VEƊE 2 - JAA TƏMARWAŊ

Kefter a kaa kə Tapi gə Efesiŋ

¹ «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Efesiŋaŋ minti: ‹Hulum bə minti seska seeɗa'aŋ a kəəsu kemeraŋ, bə minti bə gəryi aduubə də lampa seeɗa'a də gaɓtə-gaɓte a larga də kooso bə gusi bə awəy-awəyaŋ, bə waataŋa minti:

² Ten bə asə-ase joŋre nəətiŋ, bande nəətiŋ, də mi bə ku gəəli nəətiŋ. Wəra də dərən minti aŋ paapa gə doo-de haa bə hale kaa kə sərkəŋ aduubə dəŋa ba. Kaa gə minti ji kusri minti té *kaa kə vaa-veŋ, aŋ gulnuy kuɗiy wəra, aŋ əsnəy wəra minti yə kaa kə ŋete kel.

³ Aŋ halaŋ gəəliŋ, aŋ saŋ lasiŋ gud səmana, aŋ gəyaŋ ba.

⁴ Səma karman bə minti giidən yaakaŋ wəra sarəŋa guuduŋ ha'aŋ, bele boblo nəətiŋ bə ajewa bə minti aŋ a bə balna duuruŋ, aŋ yəəkunu wəra.

⁵ Aŋ ləŋaŋ haa a ko muntu moŋ, aŋ harə la bə ɗiki cuuru. Aŋ kolə kerkeŋ la a baymele nəətiŋ. Joŋre bə minti aŋ a jəŋ bə jəwa ajew, aŋ harə la bə jəwa. Aŋ doŋ haa ne bə kole kerkeŋ a baymele nəətiŋ baŋ, ten bi yaŋ a he lampa nəətiŋ wəra a ko bə minti a də malə-mele adaŋ.

⁶ Səma ten bə aŋkəŋa agal ha'aŋa gəm: aŋ məlaŋ dər joŋre kə kaa kə Nikolaŋ wəra, damdi ten a məlnu duru wəraŋ ana gəm.

⁷ Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi. Hulum bə minti pəŋ bulum neŋ, ten əyu kəkəy bə hame we də kəbaŋ gə aye dədərgə də bay teweŋ yaŋ ger Pepeŋ na a *Paradisi naŋ.›»

Kefter a kaa kə Tapi gə Simirnəŋ

⁸ «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Simirnəŋaŋ minti: ‹Hulum bə ajew, hulum bə adoroŋ, bə minti a meŋ wəra daana haraŋ wəra dədərgəŋ, bə waataŋa minti:

⁹ Ten bə asə-ase gəəli daana caaca nəətiŋ (səma a gəəziŋa ha'aŋ, aŋ kaa kə hurma). Wəra də dərəŋ minti kaa kəman yaŋ bə waataŋ səmaŋa baymele, kaa teŋ bə ufi kuya minti té kaanə Ziwifi, anaaŋa paapa, yə haa kaa kə tapə-tepe ciiri kə *Sataŋ.

¹⁰ Aŋ a ji walka kas lasi də minti aŋ bə saara yaŋ palpal ba. Golə la, Nərtitiŋ bə feke sərdəŋ yaŋ a daŋgaya bə goloŋ koɗoŋ, aŋ bə se lasi yaŋ kir hiti hori. Aŋ əsə la ɓeti jəəne nuutu minti yə awaŋ, kəya ten ayaŋ werke bə bulum yaŋ, werke toŋ haa dədərgəŋ.

¹¹ Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi. Hulum bə minti pəŋ bulum neŋ, me bə ɓasiŋ ji karman suru pəda.›»

Kefter a kaa kə Tapi gə Pergam

¹² «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Pergamaŋ minti: ‹Hulum bə caafay də kəsnə ɓasa gə kaa-keŋ bə waataŋa minti:

¹³ Vil də minti aŋ gə əsə-isi adaŋ yaŋ nuutu də dərən, haa vil də minti *Sataŋ də əsə-isi kumna ada gəm. Səma aŋ əsəŋ ŋəŋ gə tapə-tepe dəərən, aŋ maltaŋ kuŋ cəərə de nəəti bə guudən ba, koo nuutu bə minti yə awaŋ Antipasi, bərdə kəkəy katən ɓetiŋ wəra gerdəŋa, a ko bə minti Sataŋ də əsə-isi kumna adaŋ.

¹⁴ Səma karman bə minti giidən yaakaŋ wəra sarəŋa guuduŋ ha'aŋ, sərdəŋ adəwaldəŋa doŋ hate kə Balam bə dayday. Wə hataŋ Balaki minti wə kuntə vew la tiinə kaanə *Israyela, wə zugtuy guudi la bə hame kusuki bə minti kaŋ a keereŋ anə pepe kəman duuruŋ daana yə jəətə booboŋ la.

¹⁵ Sərdə kaa gaalaŋ adəwaldəŋa doŋ kel gə minti kaa kə Nikolaŋ hətəy gəm.

¹⁶ Aŋ kolə kerkeŋ la a baymele nəətiŋ. Jəəne paapaŋ, ten wəra maŋ bə tuli sarəŋa bə bi a duuri kaa teŋ də caafay də kun.

¹⁷ Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi. Hulum bə minti pəŋ bulum neŋ, hame bə minti yə məntu «man» bə metə-meteŋ, ten əyu du yaŋ. Pərki gibirwi bə minti sam kimirwiŋ bə jeerə-jeere cuuruŋ, ten bə əyu du gəm. Sam kimirwi toŋ haa də dər hulum bə minti fəlaŋ pərki toŋ neŋ təwa.›»

Kefter a kaa kə Tapi gə Tiyatir

¹⁸ «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Tiyatiraŋ minti: ‹Kormə Pepeŋ bə minti duru də goleŋ damdi kəsəlɗə cəwaŋ ana, kəmpuru welɗe damdi kooso pisi bə yoorə-yooreŋ ana, bə waataŋa minti:

¹⁹ Ten bə asə-ase joŋre nəətiŋ, bele nəətiŋ, de nəətiŋ, digi nəətiŋ daana mi bə ku gəəli nəətiŋ. Wəra də dərən minti aŋ bə ji joŋreŋa máŋ hebkəna ablaw dəŋaŋ bə ajew.

²⁰ Səma karman bə minti giidən yaakaŋ wəra sarəŋa guuduŋ ha'aŋ, aŋ yaakaŋ kəkəy a həlgə də minti yə manta Zezabel aduubə dəŋaŋ, həlgə taŋ də minti ji kusrə damdi həlgə də jogte ku mini kə Pepeŋ ana. Kəya a lentenen kaa kə joŋre nin wəra, a hətnəy bə jəəti kel kə piwpiwa daana bə hamte kusuki bə minti yə a keereŋ anə pepe kəman duuruŋ gəm.

²¹ Ten a yaakəna koŋ minti a kolə kerka la a jəəti bə piwpiw naataŋ, səma a doŋ haa ba.

²² Ten bə gaara yaŋ də ɗeme a kəɓəra. Kaa gə minti jəəti piwpiw dəərəŋ, ten gay lasiŋ yaŋ ciiri ablaw gəm jəəne minti yə koloŋ kirki a baymele bə minti a a hətnəy diŋ baŋ.

²³ Ten bə awa karməyaŋ yaŋ wəra. Kəya kaa kə Tapiŋ keɗe ase yaŋ wəra minti ten haa hulum bə gole dər ɗikiŋ daana dər kel gə minti hulum bələy. Ten werke mindi mindi mo aduubə dəŋa də aŋar də joŋre bə minti wə a juunuŋ.

²⁴ Səma aŋ kaa gə Tiyatir gə minti doŋ haa də hate bə baymele toŋ baŋ, də kel kə metə-mete kə *Sataŋ bə gəm, ten waataŋ minti ten məlaŋ eele baalaŋ cəərəŋa ada pəda.

²⁵ Nəətiŋ təwa ha'aŋ, aŋ əsə la ŋəŋ də kel gə minti aŋ duuniy, hãã dər hi bə minti ten hare daŋ.

^26-28 Hulum bə minti pəŋ bulum neŋ daana jəŋ kel gə minti giidən bələy ne hãã a tewe bə koŋaŋ, ten əyu abay də minti Barən a aynan dən yaŋ gəm. Abay taŋ haa bə ji kumna cəərə gidiirə kaŋa keɗe, aŋ bə əməy yaŋ də gədəwa koosoŋ kaasəŋa. Aŋ bə cay yaŋ wəra damdi yə ce gədaayaw ana. Ten bə əyu seska mooto də wele koŋ yaŋ gəm.

²⁹ Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi.›»