VEƊE 19 - JAA TƏMARWAŊ

Gudul bə jamwaaleŋ

¹ Adoro də kel teŋa kəyaŋ, ten əskəŋ dordə karman kəman bə hage apəya də səɓaki damdi dordə kaa gə ablaw hə̃ə̃'iŋ ana, bə waate minti: «Aleluya! Aŋ tokɗə Pep náŋ la! Seereŋ, aŋkeŋ, də səɓakiŋ keɗe nuutu.

² Gud maa mo kəəti nuutuŋ keɗe ɗeker, daana bə tapə-tepe də gəəziŋ. Wə jəmaŋ kəəti də maswaŋ mooto də minti ləŋaŋ kaa gə cəərə seŋkaŋ wəra də piwpiw naataŋ, Kaa kə joŋre nuutu gə minti a a əwnəy wəra, wə gaŋ abal neeteŋ wəra dəərə.»

³ Yə haraŋ bə naakte kuya pa minti: «Aleluya! Aŋ tokɗə Pepeŋ la! Kese bə cəwa bə ki vil mootoŋ bə fe apəya wəra ɗəwilla haa bə faɗnə-faɗna.»

⁴ Kaa kəmtəŋ hor ɓasi ciiri waaɗe'iŋ gə tiinə kaŋ daana kar kə dədərgə waaɗe'iŋ vaŋ də gigiiri tiinə Pep bə minti cin a jaaŋa də kumnaŋa bə kaw awalnaŋ. Yə minti: «*Amen! Aleluya!»

⁵ Kəya ten əskəŋ dordə karman bə mante da sar jaaŋa da minti: «Aŋ tokɗə Pep náŋ la, aŋ kaa kə joŋre nuutu gə minti jəw kese duŋ, kaayaŋ koncoŋ də kəmtəŋ keɗe!»

Kəɗwəy gə minti Kormə Taaməkaŋ de həlgə nuutuŋ

⁶ Kəya ten əskəŋ dordə kaa kəman ablaw ana hə̃ə̃'a bə hage damdi dabte bə kan kəmtəŋ daana təbay də koŋ ana. Yə minti: «Aleluya! Aŋ tokɗə Pepeŋ la! Gud maa mo, Barkaŋ, Pep náŋ Bar Səɓakiŋ, bə əsə-isi bə hame kumna nuutuŋa.

⁷ Áŋ waalə la wəra dagna'-dagna'i. Áŋ tukɗu la! Gud maa mo hi bə ji kəɗwəy gə de həlgə kə Kormə Taaməkaŋ nəkaŋ ne. Muruŋ ɗampaŋ da ne warda.

⁸ Pepeŋ ayna kəkəy bə dere dəməəmə pasa fəfet-fəfeti sara, a welɗe anə pelek-peleki, a wəra cetceti.» (Dəməəmə pasa fəfet-fəfet taŋ veɗe wəra haa joŋre ɗekeri kə kaa kə Pepeŋ.)

⁹ Kəya *hulum bə digi kə Pepeŋ waatənan minti: «Jeerə la minti: ‹Waaleŋ kə kaa gə minti fəlaŋ mante bə bi a hame kəɗwəy gə minti Kormə Taaməkaŋ de həlgə diriŋ.› Teŋ haa kənaŋ, kel kə Pepeŋ gadi faɗi.»

¹⁰ Kəya ten vaŋ də gəgəərən tiinə hulum bə digiŋa bə kaw awalna, səma wə waatənan minti: «A ji teŋ ba! Ten haa hulum bə joŋreŋ damdi tam daana kəsaanam ana toki gə minti doŋ gud kel gə minti Yeesu a jəŋ bar kəkəy diŋ. Kaa awalna la haa a Pepeŋ!» Gud maa mo kel gə minti Yeesu jəŋ bar kəkəy ciiriŋ, haa kel gə minti Pepeŋ kəltənəy warda ku *kaa kə jogte ku mini nuutu daŋ.

Hulum bə cəərə gədaamo gibirwiŋ pi bulum

¹¹ Kəya ten asaŋ tarmə koŋ wəra bə bəŋə-biŋi, də gədaamo gibirwi ada. Hulum bə luu-li cuuruŋ, yə məntu «Ɓetiŋ daana Gəəzə-gəəziŋ». Wə jeme kəəti daana wə duuri wəra ɗeker.

¹² Duru də goleŋ damdi kəsəlɗə cəwaŋ ana, kaŋkəlaŋ gə abay-abay cuuru anə pər. Sam kəman yaŋ bə jeerə-jeere suru, sam toŋ də duru təwa.

¹³ Dəməəmə də suruŋ wəra də taɓkə-taɓke də kor. Yə mante hulum toŋ minti: «Kel kə Pepeŋ».

¹⁴ Kəsooto gə apəyaŋ guudu ada, yə gə lupə-lupi cəərə gədaamo gəbərwəŋa gəm, yə gə darə-dere dəməəmə pasa bərwa fəfet-fəfeta wəra cetceti siri.

¹⁵ Caafay də kəsnə də kaa-ke bə kalə-kele warda ku da, bə ŋete gidiirə kaŋ wəra. Wə bə isi yaŋ ciiri də səɓaki anə kəŋkəŋ də gədəwa koosoŋ kəəsu. Wə bə peete we də atələələma yaŋ wəra a ko bə peeteŋa bə de kumuy də bə veɗe waŋ kə Pep Bar Səɓakiŋ.

¹⁶ Sam kəman yaŋ wəra bə jeerə-jeere cəərə dəməəmə də suruŋa daana dugmu du minti: «Kumna kə kəkamnaŋ, Barkaŋ kə kəmnə də kaŋ.»

¹⁷ Kəya ten asaŋ *hulum bə digi kə Pepeŋ gil aduubə də cəwa də wele koŋa. Wə əsəŋ bə naakte ku koloŋ a kasko gə pətə-piti apəya tooto'iŋ minti: «Aŋ bəəda! Aŋ tapə cəərəŋ la bə hame hame bə minti Pepeŋ a ɗəmpunuŋ.

¹⁸ Haa kusuki də anə kəkamnaŋ, kəkamna kə sootoŋ, kaa gə duuriŋ, anə gədaamoŋ, kaa gə dərɓuŋ, kaa gə minti teŋ kafkam, gə minti teŋ paapa kafkam baŋ, kaayaŋ koncoŋ, də kaayaŋ kəmtəŋ keɗe, aŋ həməy la.»

¹⁹ Kəya ten asaŋ bege bə waraŋ, kəkamna gə cəərə seŋkaŋ, daana kəsooto neeteŋ. Yə a kotoŋ ciiri wəra gil bə ɗe a duuri hulum bə cəərə gədaamoŋ də kəsooto nuutuŋ.

²⁰ A ko toŋa kəyaŋ, yə humuŋ bege bə waraŋ də bege bə minti jogte ku mini bə laŋte kaŋ. Bege tó bə ɓasiŋ jəətəŋ miɗiŋ də dər bege bə ajew. Gud miɗi toŋa, wə koloŋ bə lente kaa gə minti yə a məltənəy tarwa kə bege bə ajew siriŋ wəra, gə minti a kaŋ awalna a karman bə minti yə a ɗəmpunu bə he bege bə ajew. Bege toŋ ɓasi keɗe, yə vəənu dədərgə zugi a ko bə cəwa də sufrə hərhəraŋa.

²¹ Kaayaŋ gə guudiŋ, hulum bə cəərə gədaamoŋ əwnəy wəra də caafay də minti kəlaŋ warda ku daŋ. Kəya kaskoŋ seepteŋ wəra keɗe də kusuki di.