VEƊE 18 - JAA TƏMARWAŊ

Vil də Babilon ɓalke wəra

¹ Adordə kel teŋa kəyaŋ, ten asaŋ *hulum bə digi kə Pepeŋ baalaŋ bə ve da adawra da. Wə də abay ablaw, welɗe də məyan nuutuŋ wəlaŋ cəərə seŋkaŋ warna keɗe.

² Kəya wə əsəŋ bə naakte ku koloŋ minti: «Babilon, vil mootoŋ awaŋ ne wəra adawra, a awaŋ ne wəra adawra. A koloŋ máŋ haa ko bə minti kəwal də gidiirə karmə kəwal keɗe əsti ada. Gidiirə kasko gə liwisiŋ də kaayaŋ gə minti gole jeeɗem əsti haa ada gəm.

³ Gud maa mo gidiirə kaŋ keɗe saŋ kumuy naataŋ. Kumuy bə waŋ toŋ haa dəglə naata də raawə-raawe hasaŋ. Kəkamna gə cəərə seŋkaŋ jəŋ piwpiw dəərə. Kaa kə celeere gə cəərə seŋkaŋ koloŋ kusri wəra də hurma gud həryəm də kar pəsaŋ naata gə səɓak-səɓakiŋa.»

⁴ Kəya ten əskəŋ dordə karman kəman baalaŋ bə waate apəy da minti: «Kaa katən, aŋ vaa da warda aduubə də kaa gə giidə vil taŋ da, kir minti aŋ a tepe kuŋ diiri bə jəəti baymeleŋa ba daana minti Pepeŋ a ɗe a jəŋ daŋgay dəŋ damdi wə bə ɗe a jəy daŋgay diŋ ana bə gəm.

⁵ Gud maa mo baymele neeteŋ mooloŋ cəərə kumsu bə tuli warna hãã apəy na, kəya cəərə Pepeŋ ɗəkəŋ cəərə jəəti bə kel kə bay ɗekeriŋ neeteŋ.

⁶ Aŋ jəə kaa teŋ la damdi yə a jəŋ kaa kaayaŋ ana derra gəm. Karman bə minti yə a juunu sar kaŋaŋ, aŋ hərəy di la kampa ɓasi. Taasa kə kaa teŋ, aŋ ɗustu la də kumuy bə minti toŋ də waŋ kampa ɓasi dəŋaŋ neeteŋ bə minti yə a vaŋ kaa kaayaŋ bə sawaŋ.

⁷ Həlgə tá də minti hagaŋ sam kusrə ablaw daana jəŋ wəra anə fənay-fənay dər kar pəsaŋa keɗe, aŋ lasə la, aŋ kolə la laawe damdi a jəŋ kaa kaayaŋ teŋ ana gəm. A waataŋ kusrə minti: ‹Ten haa kumnaŋ, ten paapa həlgə də dibirgini ba. Kel kə hame bə godor awe hõy cəərəna ba.›

⁸ Gud kel naata teŋa ta, leseŋ bə minti bə ɗampə-ɗampe cəərəŋ bə awe cəərə haa dər hi bə məna faɗi. Lasi taŋ haa meŋ, hame bə godor, tay, daana cəwaŋ bə kuurə wəra keɗe gəm. Gud maa mo Barkaŋ Pepeŋ bə minti jamna kəətiŋ, wə də səɓaki ablaw.»

⁹ Kəkamna gə cəərə seŋkaŋ gə minti təpaŋ dəərə bə ji piwpiwa daana bə hame kar pəsaŋ-pəsaŋ gə deŋe kumsiŋaŋ, yə bə hage yaŋ, yə bə laawe yaŋ gud kel də a ko bə minti yə asaŋ kese bə cəwa ne bə ki vil taŋaŋ.

¹⁰ Yə bə isi yaŋ warna anə tooto laki kas walka minti Pepeŋ a jeme kəətiŋ cəərə té bədoona ba. Yə hage yaŋ minti: «Toŋ haa gəəli maa bədoona day mo? Babilon, vil mooto də səɓakiŋ, dər lera ɗaaməna anəkay faɗi, Pepeŋ jəmnəy kəəti di ne wəraŋ!»

¹¹ Kəya kaa kə celeere gə cəərə seŋkaŋ bə hage daana bə laawe yaŋ gud kel də gəm, gud minti hulum paapa bə gusi kar gə celeere neeteŋ pədaŋ.

¹² Kar gə celeere teŋ haa anə kooso bə gusi awəy-awəy, kooso bə minti haŋ dornoŋ, gidiirə ataara daalaŋ-daalaŋ. Gidiirə dəməəməŋ ada gəm: sərdə pasa fəfet-fəfetaŋ, sərdə hərlə də gusi awəy-awəy. Anə kəbaŋ gə fele gəəliŋ, kar gə minti yə ɗəmpənəy də kəsnə baaŋaŋ, kəbaŋ pəsaŋ-pəsaŋ, koosoŋ, kooso pis-pisiŋ, daana pərki pisiŋ ada gəm.

¹³ Anə son bə siisi pisiŋ, agumgumaŋ, kar pəsaŋ gə minti yə fəkəy dər hameŋa minti wə kolə la dihiŋ, kar kə siisi pəsaŋ, kumuy bə atələələmaŋ, son, kuntiŋ, kaasaw, kəccəŋ, kaamaŋ, gədaamoŋ, puspusiŋ, kafkam daana kaa kə daŋgay ada gəm.

¹⁴ Kaa kə celeereŋ waataŋ vil taŋ minti: «Kar gə minti te də caadiŋ keɗe, yə təwaŋ ne wəra. Kar pəsaŋ-pəsaŋ niiti gə məyan-məyan lenteŋ ne wəra, yə bə fələy hõy pəda anə hasi.»

¹⁵ Kaa kə celeere gə minti koloŋ wəra də hurma a ko bə minti yə a bə ji celeere taŋa adaŋ, yə bə isi yaŋ warna anə tooto laki kas walka minti Pepeŋ a jeme kəətiŋ cəərə té bədoona ba. Yə bə hage yaŋ, yə bə laawe yaŋ

¹⁶ minti: «Toŋ haa gəəli maa bədoona day mo? Vil mooto də minti dəməəmə pasa fəfet-fəfetaŋ, dəməəmə hərlə pasa də gusi awəy-awəy də ataara pəsaŋ, də kooso bə gusi awəy-awəy də sərdə pərki pis-pisiŋ a jəŋ sara,

¹⁷ dər lera ɗaaməna anəkay faɗi bege naataŋ neŋneŋ keɗe bəsaŋ wəra!» Kaa kəmtəŋ gə hoɗe kətartaw kəmtəŋ, kaa kə gəryiŋ giidiŋ, kaa kə joŋre gə giidiŋ, də kaa kaayaŋ gə minti ji celeere neeteŋ haa cəərə kan kəmtəŋaŋ, əsəŋ warna anə tooto laki.

¹⁸ Yə əsəŋ bə naakte kuya də bə minti yə asaŋ kese bə cəwaŋ bə ki vila anəkay təwa faɗiŋ minti: «Vil tá də minti a də ŋarə-ŋere də vil mootoŋ taŋ haa məntə mo?»

¹⁹ Yə kaŋ godor ciiri, yə hagaŋ, yə laawaŋ bə naakte kuya minti: «Toŋ haa gəəli maa bədoona day mo? Vil mooto də minti koloŋ kaa gə minti a jəŋ də kətartaw kəmtəŋ kəəsi bə hoɗe cəərə kan kəmtəŋaŋ wəra də hurma kas bege bə giidəŋ, dər lera ɗaaməna anəkay faɗi, kar naata teŋ gila keɗe bəsaŋ wəra!»

²⁰ Aŋ kaa gə apəyaŋ, aŋ waalə la gud bə minti a wəra də ɓalkə-ɓalkeŋ. Aŋ kaa kə Pepeŋ, aŋ *kaa gə vaa-veŋ, aŋ *kaa kə jogte ku mini kə Pepeŋ, aŋ waalə la. Gud maa mo, bə minti Pepeŋ jəmaŋ kəəti də vil taŋ ha'aŋ, wə kaanaŋ gədəəgi də kel nəətiŋ wəra minti aŋ ɗeker.

²¹ Kəya hulum bə digi kə Pepeŋ bə səɓaki haŋ pərki boblo anə həb, wə gəənu dər kan kəmtəŋ na. Wə minti: «Yə bə ge Babilon vil mootoŋ, yaŋ warna də səɓaki anə vərra bədoona gəm. Hulum hare hõy bə asa pəda anə hasi.

²² Hulum iski gudul kə kaa kə le gundiŋ, kaa gə gaw, kaa gə ufi kelew, kaa gə ufi atoltom hõy gerda pəda. Kaa gə minti ɗampe kar pəsaŋ, də kar gə ɗampə-ɗampe pəsaŋ, yə fələy gerda hõy pəda. Dordə anə kuuni bə ecceŋ, yə usku gerda hõy pəda bə gəm.

²³ Lampaŋ wele ko wəra gerda hõy pəda. Kaa gə minti tope kəram kəmarwaŋ, hulum iskiy səməy hõy gerda pəda gəm. Kəəti toŋ gila keɗe bə bi cəərə haa gud bə minti kaa kə celeere naataŋ a jəŋ haa kaa kə samsam, daana kaa kə zal naataŋ a kaŋ ku gidiirə kaŋ wəra keɗe minti yə tapə la gud té.

²⁴ Daana pa, kaa kə Pepeŋ, kaa kə jogte ku mini nuutuŋ, daana kaa gə minti yə a əwnəy wəraŋ, yə fəlnəy kor diŋ gerda.»