VEƊE 17 - JAA TƏMARWAŊ

Maswaŋ daana bege bə waraŋ

¹ *Hulum bə digi kə Pepeŋ bə aduubə də kaa kə digi seeɗa'iŋ gə minti kətaasawaŋ a kəəsiŋ, zeŋ sarən da bə bi a waatan minti: «Bəəda, ten gam dərəm yaŋ cəərə kəəti bə cəərə maswaŋ mooto də əsə-isi cəərə kanaŋ. Maswaŋ taŋ veɗe haa vil mooto də minti də hərsə-hərsi ku vor bə ablawaŋ.

² Kəkamna gə cəərə seŋkaŋ jəətəŋ piwpiw dəərə. Kaa gə cəərə seŋkaŋ markaŋ wəra kas jəəti bə piwpiwaŋ də maswaŋ damdi kaŋ markete wəra kas kumuy ana.»

³ Kəya Tiiru Cetcetaŋ vaŋ cəərəna, hulum bə digiŋ kooroŋ warna dəərən a ful na faɗi. Kəya ten asaŋ həlgəŋ də luu-li cəərə bege bə waraŋa bə minti kəəli anə jəŋ-jəŋ. Sam bə sarte sam Pepeŋ wəra bə jeerə-jeere suru ɓəəka keɗe. Cuuru seeɗa, gəw du hor gəm.

⁴ Həlgəŋ də dəməəmə hərlə pas-pasa sara. Gidiirə ataara pas-pasa də gusi awəy-awəy sara keɗe. Taasa bə kooso bə gusi awəy-awəy kaasa kay də kumuy bə atələələma giidu. Kumuy toŋ veɗe haa joŋre naata bə baymele daana piwpiw bə maswaŋ naataŋ.

⁵ Sam bə jeerə-jeere tiinə, sam toŋ gud kel du gə metə-meteŋ gə jeerə-jeere minti: «Vil mooto də Babilon, nər kə maswaŋ, nər də kel gə bayməlaŋ gə cəərə seŋkaŋ.»

⁶ Kəya ten asaŋ həlgə taŋ ha'aŋ, a wəra də markə-marke də kor də kaa kə Pepeŋ, də kor də kaa gə minti yə a əwtənəy wəra gud de neeteŋa gud Yeesuŋ. Ten asna bədoona kəyaŋ, ten ŋələŋ wəra hasi faɗi.

⁷ Kəya hulum bə digiŋ waatənan minti: «Tam ŋələŋ haa səm mo? Ten kam gud kel gə metə-mete kə həlgəŋ yaŋ wəra, də bege bə wara bə cuuru seeɗa'iŋ də gəw du horiŋ bə minti bə halaŋ.

⁸ Bege bə minti tam a əsnu kənaŋ, wə a jəŋ hõy caw; bə hebkəna ha'aŋ, wə paapa caw pəda. Wə bə hare yaŋ bə kele da warda giidə tələŋkə kələmləma də bay nobeŋ da, wə bə ɗe a bese wəra. Kaa gə cəərə seŋka gə minti səməy a paapa gə jeerə-jeere giidə kefter bə dədərgəŋa wəra ajew də mele bə gud koŋ baŋ, kaa teŋ bə ŋili yaŋ a ko bə minti yə asaŋ bege toŋ neŋ. Gud maa mo wə a jəŋ hõy caw, wə paapa hebkəna caw pəda, wə bə hare yaŋ wəra caw.

⁹ Haa kəna ko bə minti aseŋ jəə la də dər hulum daana wə jəə la bə naa-neŋ. Cə seeɗa'aŋ vəɗaŋ wəra haa pərki seeɗa'i bə minti həlgəŋ də əsə-isi adaŋ, a vəɗaŋ haa kəkamna seeɗa'iŋ gəm.

¹⁰ Wiiɗiwiŋ guudi wəra hebkəna gə mee-me, bə kənki diŋ bə hame kumnaŋa hebkəna, bə seeɗaŋ, yə əsnu kəm ba. Wə əsəŋ ne akaceŋa a kumnaŋaŋ, kəkəy paapa cuuru bə hiti ada ablaw ba.

¹¹ Bege bə wara bə minti a jəŋ caw daana wə paapa hebkəna caw pəda, wə a jəŋ haa aduubə də kəkamna seeɗa'iŋa. Wə bə hare yaŋ wəra caw, wə bə kole haa kumna bə azəgən gəm. Səma wə bə ɗe a bese wəra.

¹² Gəw du hori gə minti tam a əsnəy, haa kəkamna hori gə minti teŋ əstəŋ kəm bə hame kumnaŋa baŋ. Yə bə fele abay bə hame kumnaŋ də aŋar də ler məna bagŋ də bege bə wara bə waŋ-waŋ.

¹³ Kəkamna teŋ keɗe ha'aŋ, ɗiki neeteŋ məna də kumsi. Yə golde haa minti té aye gərɓəɓiŋ də abay neeteŋ a bege bə waraŋ.

¹⁴ Bege bə waraŋ də kəkamna horiŋ duuri Kormə Taaməkaŋ yaŋ. Kormə Taaməkaŋ bə pi bulum yaŋ ciiri gud maa mo wə haa Barkaŋ kə kəmnə də kaŋ keɗe, wə haa Kumna kə kəkamnaŋ. Kaa gə minti Pepeŋ məntənəy, gə minti wə a ŋəmtənəy daana kaa ɓetiŋ bə pi bulum yaŋ duuru keɗe.»

¹⁵ Kəya hulum bə digiŋ waatənan minti: «Kan gə minti tam a əsnəy a ko bə minti maswaŋ də əsə-isi ada ha'aŋ, yə haa gidiirə kaŋ, kaa kə ablaw, gidiirə seŋkaŋ daana gidiirə ku kaŋ keɗe gəm.

¹⁶ Gəw du hori gə minti tam a əsnəy minti yə kəna kəkamnaŋ, də bege bə wara bə waŋ-waŋ, yə mele dər maswaŋ yaŋ wəra. Yə bə humi kar naataŋ yaŋ wəra keɗe, yə bə gaara yaŋ wəra gəlaana caw. Yə bə hame kusuki də yaŋ, yə bə kuurə yaŋ wəra də cəwaŋ.

¹⁷ Kəkamna horiŋ bə ji kel teŋ bədoona haa gud minti Pepeŋ həənəy guudi minti yə ɗəkə la bə ji kel gə minti tó a ɗəkəŋ bə jəy. A ko toŋa kəyaŋ, yə bə tepe kuy yaŋ wəra məna bə aye səɓaki neeteŋ a bege bə waraŋ minti wə əsə la kumna, hãã bə minti kel gə minti Pepeŋ a ɗəkəŋ bə jəy doo kuy la wəra kəm.

¹⁸ Həlgə də minti tam a asna kənaŋ, haa vil mooto də minti də əsə-isi cəərə kəkamna gə cəərə seŋkaŋaŋ keɗe.»