VEƊE 15 - JAA TƏMARWAŊ

Kaa kə digi seeɗa'i gə minti boŋ kəəsiŋ

¹ Kəya ten asaŋ kel kəmtəŋ pəsaŋ gə ŋili kaa gaalaŋ apəy da pa: *kaa kə digi kə Pepeŋ seeɗa gə minti wə əynəy kəkəy minti yə vaa lese bə adoro seeɗa'i la cəərə seŋkaŋ naŋ. Lese toŋ haa kel gə minti waŋ kə Pepeŋ doŋ ku wəra cəərə seŋkaŋa duuruŋ.

² Kəya ten asaŋ karman kəman ada damdi kan gə minti aŋ ase kar gə guudiŋ wardaŋ ana, duru bə tapə-tepe də cəwa. Ten asaŋ kaa gə minti a pəŋ bulum cəərə bege bə waraŋa də karman bə minti yə a ɗəmpunu bə haw, bege tó bə minti səmu wəra bə vaɗə-veɗe də numraŋ. Yə əstəŋ gil-gil cəərə karman tó bə he kan kəmtəŋa, gundi bə minti Pepeŋ a əytənəy diŋ kəəsi kay-kay.

³ Yə bə ge gudul kə *Moyisiŋa, hulum bə joŋre kə Pepeŋ, daana gudul kə Kormə Taaməkaŋ gəm minti: «Barkaŋ Pepeŋ, Bar Səɓakiŋ, joŋre nəmtiŋ boblo, wə bə ŋili kaa kas pisi duŋ. Kumna kə gidiirə kaŋ, gədəəgi də kel nəmtiŋ wəra ɗeker, yə gə tapə-tepe də gəəziŋ.

⁴ Barkaŋ, mindi toŋ bə jəm walka dəm bə mo? Mindi toŋ bə de haa bə hagam səmam bə mo? Gud maa mo tam *cetceti tam ŋel məna. Gidiirə kaŋ neŋneŋ keɗe bi yaŋ a feke də gigiiri tiinima. Gud maa mo joŋre nəmti ɗekeri, kaŋ əsnu wəra neŋneŋ keɗe'i.»

⁵ Adoro kəyaŋ, ten asaŋ ku *Kuli kə Pepeŋ warda bə bəŋə-biŋi giidə *muryuki nuutu də waate sam *jaa nuutuŋ da.

⁶ Kaa kə digi kə Pep seeɗa'iŋ gə minti leseŋ kəəsi seeɗaŋ vaŋ warda giidə Kuli nuutuŋ da. Dəməəmə bərwa də gusi awəy-awəy siri, a welɗe anə pelek-peleki. Saama də ɗampə-ɗampe də kooso bə gusi awəy-awəy də kaa-ke kiiyi.

⁷ Məna aduubə də kar gə dədərgə waaɗe'iŋ aytaŋ taasa bə ɗampə-ɗampe də kooso bə gusi awəy-awəy wəra məna-məna a kaa kə digi seeɗa'iŋ keɗe. Taasa toŋ wəra bə ɗostə-ɗoste də kumuy bə minti veɗe waŋ kə Pep bə dədərgə bə minti caw bə faɗnə-faɗnaŋ.

⁸ Kəya Kuli kə Pepeŋ ɗosoŋ wəra də kese bə minti feke warda sar məyan kə Pepeŋ da də səɓaki nuutuŋ. Hulum nəkaŋ bə kele giidə Kuli kə Pepeŋa pəda hãã də bə minti lese seeɗa'i bə kasi kaa kə digi kə Pepeŋ doŋ ku ne wəraŋ kəm.