VEƊE 14 - JAA TƏMARWAŊ

Kormə Taaməkaŋ də kaa gə minti wə miɗniy ciiriŋ

¹ Ɗeŋ a gole kəyaŋ, Kormə Taaməkaŋ gil cəərə pərki bə Siyoŋa. Kaa 144.000 gə minti səmu daana sam buru bə jeerə-jeere tiiniŋ gə əsə-isi suru ada.

² Kəya ten əskəŋ dordə karman kəman bə hage da apəy da də səɓaki damdi kan kəmtəŋ gə dabte giwiw-giwiwiŋ ana, damdi ko bə hageŋ ceme təbay də səɓakiŋ ana. A hage damdi kaa kəman bə le gundi ana.

³ Kaa 144.000 gə əsə-isi tiinə jaaŋa də kumnaŋa, tiinə kar waaɗe'iŋ gə dədərgəŋa, tiinə kaa kəmtəŋ gə tiinə kaŋa gəm. Yə gaŋ gudul kimirwi bə minti hulum baalaŋ nəkaŋ bə hətu ba, hətnu haa kaa té gə minti wə miɗniy ciiri warda adawra daŋ təwa.

⁴ Yə luktuŋ kusri də kəram ba, yə amaŋ kusri eŋ-eŋ a kəəsiŋa. Yə təpaŋ gud Kormə Taaməkaŋa bə ɗe a məltu a ko bə minti wə ɗeete adaŋ keɗe. Wə miɗniy ciiri warda aduubə də kaŋ da, yə máŋ wəra kə Pepeŋ daana kə Kormə Taaməkaŋ gəm. Yə kaa gə ajew gə minti ge dər minti Pepeŋ miɗi cəərə kaa gaalaŋ yaŋ wəra gəm.

⁵ Yə paapa bə ŋete kela ba, kel kə malə-mele paapa siri bə gəm.

Kaa kə digi soope'iŋ waate sam jeme bə kəətiŋ

⁶ Kəya ten asaŋ *hulum bə digi kə Pepeŋ baalaŋ caw bə faa-fe apəya dər kaŋkawa, *Kel pəsaŋ kəmarwaŋ gə minti bə ji yaŋ saksaki yaŋ ku kir minti wə wəətəy la a kaa gə cəərə seŋkaŋ: a kaasaw də kaŋ keɗe, a ku kaŋ keɗe, a gidiirə kaŋ keɗeŋ, a gidiirə seŋkaŋ keɗeŋ.

⁷ Wə əsəŋ bə waate wəra koloŋ minti: «Aŋ jəə walka la kasi Pepeŋ, aŋ tukɗu la gud abay nuutuŋa, gud maa mo cəwa də minti wə jeme kəətiŋ dərəŋ nəkaŋ ne. Aŋ kaa awalna la a hulum bə minti jəŋ ko bə apəyaŋ də ko bə adawraŋ, kan kəmtəŋ də paaŋeŋ gəm.»

⁸ Hulum bə digi bə ɓasiŋ bəŋ adordə naayaw tó bə ajew da. Wə minti: «Babilon, vil mootoŋ awaŋ ne wəra adawra, a awaŋ ne wəra. Gud maa mo gidiirə kaŋ keɗe saŋ kumuy naata. Kumuy bə waŋ toŋ haa dəglə naata də raawə-raawe hasi.»

⁹ Hulum bə digi kə Pepeŋ baalaŋ bə soope tuukuŋ adordə kaayaŋ ɓasiŋ da, wə əsəŋ bə waate ku koloŋ minti: «Hulum bə minti kaŋ awalna ne a bege bə waraŋa daana a karman bə minti yə a ɗəmpunu bə haw, wə a fəlaŋ tarwa kə bege toŋ ne tiinu ɗawba kəəsuŋ,

¹⁰ wə bə se gəəli yaŋ ku waŋ kə Pepeŋa. Gəəli toŋ haa damdi Pepeŋ gaŋ kumuy bə waŋ-waŋ giidə kopi bə minti veɗe waŋ nuutuŋ wəra minti kaŋ saw laŋ ana. Hulum toŋ se lasi yaŋ dər cəwa də minti də do'ə-do'e də karman bə minti yə məntu sufrəŋ tiinə kaa kə digi cetcetiŋa daana tiinə Kormə Taaməkaŋa gəm.

¹¹ Kese bə cəwa də minti bə ləsəyaŋ fe warda apəy da anə ɗəwilla bə faɗnə-faɗna. Kaa kə bege bə waraŋ gə minti fəlaŋ tarwaŋ də səmuŋ daana kaŋ awalna a karman bə hawaŋ, yə fele faake ku lasi neeteŋa ba, duugŋ də daaway keɗe.»

¹² Kel teŋ keɗe waate haa minti kaa kə Pep gə minti humi kosoŋ cəərə ku gili nuutuŋa, gə minti saksaki gə doo-de gud Yeesuŋ, yə məə la ku gəəliŋa.

¹³ Kəya ten əskəŋ dordə karman kəman bə waate kel da apəy da minti: «Jeerə kel teŋ la kəya: dər ko bə hebkənaŋa faɗi, waaleŋ kə kaa gə minti fəlaŋ meŋ gə tapə-tepe də Barkaŋ.» Tiiru Cetcetaŋ minti: «Ãã bədoona! Yə faake máŋ kas joŋre neete bə gəyəy ta, gud maa mo joŋre bə minti yə a juunuŋ ɗe diiri apəya daana waate kel yaŋ wəra ciiri gəm.»

Kote bə cəərə kar

¹⁴ Ɗeŋ a gole kəyaŋ, ten asaŋ kamra gəbərwəŋ. Karman kəman bə əsə-isi ciiri damdi *Kormə Hulúm ana. Kaŋkəlaŋ gə kumnaŋ gə ɗampə-ɗampe də kooso bə gusi awəy-awəy cuuru ta'i, paaram bə kəsəŋ-kəsəŋ kəəsu kay.

¹⁵ Kəya *hulum bə digi kə Pepeŋ kəlaŋ warda giidə *Kuli kə Pepeŋ da, wə əsəŋ bə naakte ku koloŋ a hulum bə əsə-isi cəərə kamraŋ minti: «Haa paaram la, camə kar la. Cəwa də ceme kar gə cəərə seŋkaŋ nəkaŋ ne, gud bə minti yə máŋ wəra gə naa-ne.»

¹⁶ Kəya hulum bə minti bə əsə-isi cəərə kamraŋaŋ əsəŋ bə heɗe kar gə cəərə seŋkaŋa də paaram nuutuŋ. Kəya yə kotoŋ cəərə kar wəra.

¹⁷ Hulum bə digi baalaŋ kəlaŋ warda giidə Kuli kə Pepeŋ da apəya da. Tərti də kəsəŋ-kəsəŋ kəəsu kay.

¹⁸ Hulum bə digi baalaŋ kəman pa, toŋ də səɓaki də cəərə cəwaŋ kəəsu, wə kəlaŋ warda sar *ko bə jəəti keere a Pepeŋ da. Wə əsəŋ bə naakte ku koloŋ a hulum bə minti tərtiŋ kəəsuŋ minti: «Haa tərtiŋ la, camə we də atələələma də cəərə seŋkaŋ la, gud maa mo, we dəŋ wəra də naa-ne.»

¹⁹ Kəya hulum bə digiŋ gaŋ tərtiŋ cəərə seŋkaŋ na, wə əsəŋ bə ceme we də atələələmaŋa, wə vaana a ko bə minti yə a ɗəmpunu bə peetaŋ. Ko toŋ veɗe haa waŋ kə Pepeŋ.

²⁰ Kəya yə əsəŋ bə peete we də atələələmaŋa wəra a ko tó bə ɗampə-ɗampeŋ na warna taakaw na kerkə vil na. Kəya kor gaŋ warda anə biligiida giidə ko bə peete atələələma da. Kor faŋ wəra apəya kir meeter məna də nusi. Wə harsaŋ warna kir kelewmeeter kəs-kəsi soope.