VEƊE 13 - JAA TƏMARWAŊ

Bege bə wara bə waŋ-waŋ ɓasiŋ

¹ Kəya ten asaŋ bege bə wara bə waŋ-waŋ bə li da warda dər kan kəmtəŋ da. Bege toŋ cuuru seeɗa, gəw du hor gəm. Gəw du wəra də karmə kaŋkəlaŋ gə kumnaŋ ciiri hor keɗe. Sam bə sarte sam Pepeŋ wəra bə jeerə-jeere cəərə cuuru taŋa məna-məna keɗe.

² Bege toŋ haŋ kiiriw ana dege'-dege'i, kəmpuru kəmtəŋ də kaaɗe ana simik-simik, gilirgu kempeleŋ ana sĩĩt-sĩĩt gəm, ku damdi ku googoŋ ana. Kəya dəragoŋ boblo əynu səɓaki nuutuŋ, jaaŋa nuutu də kumnaŋ, abay nuutu həmhəmaŋ gəm.

³ Cuuru kəman məna, toso ada damdi haa toso də əwuŋ ana, səma a wəraŋ wəra. Kaa gə cəərə seŋkaŋ keɗe ŋələŋ gud kel teŋa, yə təpaŋ gud begeŋa faɗi.

⁴ Kəya yə əsəŋ bə ke awalna a dəragoŋ gud bə minti a ayaŋ abay a begeŋ. Yə əsəŋ bə ke awalna a begeŋ gəm minti: hulum bə ŋere də begeŋ paapa, hulum bə duuri duuru paapa gəm.

⁵ Kəya yə ayaŋ abay də waate kel a begeŋ minti wə waatə kel gə aŋke kusruŋ la daana wə sartə sam Pepeŋ la. Wə fəlaŋ abay taŋ kir kitir hor-hor waaɗe cuuru ɓasi.

⁶ Wə waataŋ ku baymele cəərə Pepeŋa, wə sərtunu səmu, ko bə kuli nuutuŋ apəy na, də kaa gə minti ada naŋ keɗe.

⁷ Yə əynu kəkəy minti wə duurə kaa kə Pepeŋ la daana wə pəə bulum la ciiri. Yə ayaŋ səɓaki də cəərə kaasaw də kaŋ, gidiirə kaŋ, ku kaŋ, daana gidiirə seŋkaŋ keɗe kəəsu.

⁸ Kaa gə cəərə seŋkaŋ keɗe bə kaw awalna yaŋ, kaa té gə minti də anə hãã a mele bə gud koŋ daŋ, səməy paapa gə jeerə-jeere giidə kefter bə dədərgə kə Kormə Taaməka bə jamə-jemeŋa ba.

⁹ Tam hulum bə minti kosnom adaŋ, jeɓrə la pisi:

¹⁰ hulum bə minti toŋ sə a ɗe a daŋgay, wə bə ɗe yaŋ nuutu a daŋgaya gəəzi. Hulum bə minti sə a fele meŋ ku caafayaŋ, wə bə fele meŋ haa ku caafaya gəəzi gəm. Gud teŋa ta, kaa kə Pepeŋ məə la ku gəəliŋa, yə əsə la gə doo-de.

¹¹ Kəya ten asaŋ bege bə wara bə waŋ-waŋ baalaŋ kəman pa, wə kəlaŋ warda dər seŋkaŋ da. Gəw du cuuru ɓasi damdi kə kormə gamla ana, səma wə waate kel damdi dəragoŋ mooto wiriktikaŋ ana.

¹² Wə jəŋ joŋreŋ keɗe də abay kə bege bə ajew bə minti bə guluŋ gəm. Wə haŋ gud kaa gə cəərə seŋkaŋ keɗe minti yə kaw awalna la a bege bə ajew bə minti toso də əwuŋ a wəraŋ wəraŋ.

¹³ Bege bə ɓasi toŋ jəətəŋ miɗi kəmtəŋ ablaw. Koo nuutu cəwaŋ, wə gaana warda kəkər adawra da də dər kaŋ keɗe.

¹⁴ Wə lenteŋ kaa gə cəərə seŋkaŋ wəra də miɗi bə minti wə nəkaŋ bə jəw də dər bege bə ajew. Bege tó bə ɓasiŋ haŋ gud kaŋ minti yə ɗampə karman la damdi bege bə ajew ana bə əyu tokɗeŋ. Bege toŋ, yə a ŋiinu də caafay, wə haraŋ wəra dədərgə.

¹⁵ Bege bə ɓasiŋ fəlaŋ səɓaki bə aye kaŋkaw gə dədərgəŋ a karman bə minti yə a juunu damdi bege bə ajew ana, minti wə waatə kel la daana wə awə mindi mindi mo bə minti kəənu awalna baŋ la wəra.

¹⁶ Wə haŋ gud kaŋ keɗe, kəmar koncoŋ, kaa kəmtəŋ, kaa kə hurmaŋ, kaa kə caacaŋ, kafkam, gə minti paapa kafkam baŋ, minti yə jəə la də tarwa a kəəsi kemera ɗawba tiini.

¹⁷ Hulum bə bay tarwa taŋ neke bə gusi karman nuutu wəra, daana gusi da a kusru bə gəm. Tarwa taŋ haa sam begeŋ ɗawba haa numra də minti təkaŋ kumsə də sam begeŋ. Bə əski gud kel teŋ kəyaŋ, tam jəə la hulum bə ase kel.

¹⁸ Hulum bə ase kel falə gud numra kə begeŋ la. Numra taŋ ŋəraŋ də sam hulum kəman, numra taŋ 666.