VEƊE 12 - JAA TƏMARWAŊ

Həlgə də məənəŋ daana dəragoŋ

¹ Kəya kel kəmtəŋ kəman gə ŋili kaŋ vəɗaŋ warda apəy da. Kel teŋ haa həlgə kəman də darə-dere cəwa də wele koŋ sara, kampara gə maltə-malte cəərə kitira, kaŋkəlaŋ gə kumnaŋ gə ɗampə-ɗampe də seska hor cəərə ɓasi gə malə-mele cəərə.

² A a jəŋ də məənə, a wəra maŋ bə we, a bə naakte ku kas ɗeme bə weŋ faɗi.

³ Kəya kel kəmtəŋ kəman gə ŋili kaa vəɗaŋ apəy da pa. Kel teŋ haa dəragoŋ kəman hərlə, a mooto anə wiriktiki. Cəərə seeɗa, gaw də hori, karmə kaŋkəlaŋ gə kumnaŋ gə maltə-malte wəra cəərə məna-məna seeɗa keɗe.

⁴ A harwaŋ agal məna də ko bə seska bə ɓarsə-ɓarse duru soope'iŋ warda adawra da də dəgnə. A ɗeŋ a isi wəra tiinə həlgəŋa minti a waŋ ne wəra anəkay, tá hame beebeŋ wəra.

⁵ Kəya həlgəŋ waŋ beebe koŋkor, wə haa hulum bə minti yə əynu səɓaki kəəsuŋ. Səɓaki taŋ haa bə ji kumna cəərə gidiirə kaŋa keɗe də gədəwa kooso kəəsu. Yə hərnu warna apəy na sar Pepeŋ na sar jaaŋa nuutuŋ na, dəragoŋ nəkaŋ bə liki beebeŋ pəda.

⁶ Kəya həlgəŋ gədaŋ warna a ful na, a ko bə minti Pepeŋ a ɗəmpunu a nəənə minti yə aya hameŋ la ada kir hiti 1.260.

⁷ Kəya duuri kəman awaŋ a ko bə apəy na faɗi. Mikayel kumna kəman məna kə *kaa kə digi kə Pepeŋ, də kaa kə digi gaalaŋ guudu ada, duuruŋ də dəragoŋ. Dəragoŋ duurunuy də kaa kə digi naataŋ gəm.

⁸ Səma dəragoŋ pəŋ bulum ba, kəya yə nəkaŋ bə fele ko bə isi apəy na pəda gəm.

⁹ Dəragoŋ mooto wiriktikaŋ, haa hənji də dayday, hənji də minti yə mante minti Nərtitiŋ kumundu ba *Sataŋ. A haa karman bə minti vaŋ kaa gə cəərə seŋkaŋ bə ji baymeleŋaŋ. Yə zogna də kaa kə digi naataŋ keɗe warda apəy da cəərə seŋkaŋ da.

¹⁰ Kəya ten əskəŋ dordə karman kəman bə waate da apəy da koloŋ minti: «Cəwa də minti Pepeŋ seere kaŋ wəra dərəŋ nəkaŋ ne. Hebkəna ha'aŋ, Pep náŋ ge gud səɓaki nuutuŋ wəra, wə isi bə hame kumna nuutuŋa. Kristu, *Hulum bə minti wə ŋəmnuŋ, əsəŋ bə hame abay nuutuŋa gəm. Gud maa mo Nərtiti də minti malte kel sar kəsaanə áŋa tiinə Pepeŋa daaway də duugŋ keɗeŋ, yə zogna da ne warda apəy da.

¹¹ Kəsaanə áŋ pəŋ bulum cəərə də kor də Kormə Taaməkaŋ, də kel gə minti yə a jəŋ bar kəkəy wəra ciiriŋ gəm. Yə ɗəkəŋ cəərə kusri ba, yə jəŋ walka də me bə gəm.

¹² Gud teŋa ta, ko bə apəya daana aŋ kaa gə minti ko bə isi nəətiŋ ada naŋ, aŋ waalə la. Səma gəəli bobloŋ cəərə seŋkaŋ na, cəərə kaa kəmtəŋ na, gud bə minti Nərtitiŋ vaŋ saraŋ na, a wəra də kolə-kole waŋ hasi. A də asə-ase minti hiti naataŋ paapa ablaw pəda.»

¹³ Bə minti dəragoŋ asaŋ minti yə gaŋ tá warda cəərə seŋka da kaydaŋ, a əsəŋ bə sarme həlgə də minti a də waa-we beebe koŋkor faɗi.

¹⁴ Kəya yə ayaŋ gəraŋ də marla boblo a həlgəŋ ɓasi minti a faa la wəra tooto sar waŋ kə dəragoŋa bə ɗe warna a ful na a ko bə minti yə a ɗəmpunu a nəənə minti yə aya hameŋ la ada kir laate soope də nusiŋ.

¹⁵ Kəya dəragoŋ harsaŋ kan warna damdi paaŋe ana minti ãye diŋ doo həlgəŋ la.

¹⁶ Səma seŋkaŋ jəmaŋ tulul də həlgəŋ, a bəŋəŋ ku wəra, a ləkəŋ kan gə minti dəragoŋ a hərsənəy wardaŋ giidə.

¹⁷ A wəra bə kolə-kole waŋ hasi sar həlgəŋa tə bə moŋ, a əsəŋ bə duuri də kaasaw də həlgə kaayaŋ gə minti humuŋ kosoŋ cəərə ku gili kə Pepeŋa daana doŋ kel gə minti Yeesu a jəŋ bar kəkəy diŋ.

¹⁸ Kəya a ɗeŋ a isi ku kan kəmtəŋ na.