VEƊE 11 - JAA TƏMARWAŊ

Kaa ɓasi gə jogte ku mini kə Pepeŋ

¹ Kəya yə aynan seeka kaasəna damdi gədəwa bə ŋamte koŋ ana. Yə waatənan minti: «Faa la, ɗee la a ŋamte *Kuli kə Pepeŋ də *ko bə jəəti keereŋ a nuunuŋ. Kaa gə minti bə kaw awalna adaŋ, əŋkəy la gəm.

² Tiilim də Kuli kə Pepeŋ, yaakə taŋ la bay ŋamte gud maa mo yə a ayaŋ ko toŋ a kaa gə minti paapa gə Ziwifi baŋ. Kaa teŋ tayte vil kə Pepeŋ yaŋ wəra kir kitir hor-hor waaɗe cuuru ɓasi.

³ Kitir toŋ hitiŋ giidu 1.260. Də ko toŋ kəyaŋ, kəmnə də kəkəy katən ɓasiŋ, ten vay yaŋ na minti yə jogtə ku mini katən la wəra. Dəməəmə də laaweŋ ji yaŋ də tarə-tere siri.»

⁴ Kəmnə də kəkəy té ɓasiŋ haa kəbaŋ ɓasi gə minti yə məntəy Oliviyeŋ daana kəbaŋ ɓasi gə minti yə gaɓtaŋ lampaŋ adaŋ gəm. Yə gə əstə-əsti tiinə Barkaŋ bə minti kumna cəərə seŋkaŋa keɗeŋ.

⁵ Hulum ɗəlaŋ ne bə jiya baymeleŋ, cəwa kəman kalte warda kuy da bə bi a awe kaa kə acukur neete teŋ wəra. Gəəzi hulum bə gulduy bə jəy baymeleŋ me yaŋ wəra haa bədoona.

⁶ Abay də gisi ku ko bə apəyaŋ minti ko a hage wəra cəərə seŋkaŋa pəda də ko bə minti yə bə waate kel kə Pepeŋa wəraŋ yaŋ kəəsi. Abay bə kole kan wəra kor, bə ji seŋkaŋ baymele də gidiirə leseŋ keɗe damdi giidi bəlaŋ anaŋ, yaŋ kəəsi gəm.

⁷ Bə minti yə təwaŋ waate bə kel kə Pepeŋ ne wəraŋ, bege bə wara bə waŋ-waŋ li yaŋ warda giidə tələŋkə kələmləma də bay nobeŋ da. Wə bə ɗələy yaŋ, wə pi bulum yaŋ ciiri daana wə əwəy yaŋ wəra.

⁸ Yə yaake titiŋ yaŋ lam-lam a larga də kəkəya giidə vil mooto də minti yə a ɓəlaŋ Barkaŋ neeteŋ wəra adaŋ. Yə mantaŋ vil taŋ máŋ minti Sodom, ɗawba Eziptə gəm.

⁹ Hiti soope də nusi, gidiirə kaŋ, kaasaw də kaŋ, ku kaŋ, seŋkaŋ keɗeŋ pəəti yaŋ bə bi a guluy titi di. Yə yəəkəy titi di bə ke a tələŋkə ba.

¹⁰ Kaa gə cəərə seŋkaŋ keɗe ji yaŋ wəra də waale gud me kə kaa té ɓasiŋ. Yə bə ji kəɗwəy yaŋ gud waale neeteŋa bə ɓarse kara aduubə də kumsi, gud maa mo *kaa kə jogte ku mini kə Pepeŋ té ɓasiŋ a ləsnəy ablaw.

¹¹ Adordə hiti tó soope'i də nusiŋa kəyaŋ, kaŋkaw gə aye dədərgəŋ bi yaŋ sar Pepeŋ da, yə bə kalte yaŋ giidə titiŋa ɓasi keɗe, kəya yə bə piti yaŋ wəra apəya faɗi. Kaa gə minti bə guluyaŋ, tiiri bə lerɗe yaŋ wəra kas walkaŋ.

¹² Kəya kaa té ɓasiŋ bə əski dordə karman kəman bə waata da apəy da də səɓaki minti: «Aŋ luu da kanda». Kəya yə bə li yaŋ apəy na dər kamraŋ na warna kəkər zugi də dər kaa gə acukur neeteŋ.

¹³ A ko toŋa faɗi, seŋkaŋ bə miiri yaŋ anə ŋgiɗ-ŋgiɗi. Agal məna'a də kuli hori bə giidə vil ɓalke yaŋ wəra, kaa guɓi seeɗa me yaŋ wəra a ko toŋa ada gəm. Kaa kaayaŋ gə yaakə-yaakeŋ bə ŋili yaŋ kas walkaŋ, yə kole yaŋ bə tokɗe Pep bə minti apəyaŋ wəra də kuy.

¹⁴ Gəəli bə ɓasiŋ təwaŋ ne, səma, gəəli bə soopeŋ wəra maŋ bə tuli pa.

Dordə atoltom də seeɗaŋ

¹⁵ *Hulum bə digi kə Pepeŋ bə seeɗaŋ ufuŋ atoltom nuutuŋ. Kəya ten əskəŋ dordə kar kəman bə waate də apəy da minti: «Kumna bə cəərə seŋkaŋ máŋ wəra kə Barkaŋ náŋ Pepeŋ daana Kristu, *hulum nuutu bə minti wə ŋəmnuŋ gəm. Wə bə isi yaŋ bə hame kumnaŋa bə faɗnə-faɗna.»

¹⁶ Kaa kəmtəŋ hor-hor ɓasi ciiri waaɗe'i gə tiinə kaŋ gə minti gə əstə-əsti cəərə jaaŋa də kumnaŋa tiinə Pepeŋaŋ, vaŋ bə malte tiini adawra bə ke awalna a Pepeŋa minti:

¹⁷ «Barkaŋ Pepeŋ, Bar Səɓakiŋ, tam bə minti a jəŋ caw, bə minti hebkəna caw, are jəm suuse gud bə minti tam jəŋ joŋreŋ də səɓaki nəmti həmhəmaŋ, tam əsəŋ bə hame kumna nəmtiŋa.

¹⁸ Gidiirə kaŋ koloŋ waŋ wəra. Hebkəna máŋ ha'aŋ, haa cəwa də waŋ nəmtiŋ, də minti tam jeme kəəti də kaa gə mee-meŋ dərəŋ, də minti tam werke *kaa kə jogtom ku mini nəmtiŋ, kaa nəmti, daana kaa gə minti humi kosoŋ cəərəma, koncoŋ də kəmtəŋ. Cəwa də minti tam bese kaa gə ɓalke kaa gə cəərə seŋkaŋ wəraŋ nəkaŋ ne.»

¹⁹ Kəya ku *Kuli kə Pepeŋ apəy naŋ bəŋəŋ wəra. Kəya ten asaŋ *cokrom bə *jaŋ ada ta'i giidu. Kəya koŋ welɗeŋ, dordə kar kəman hagaŋ, təbay də koŋ dəbaŋ, seŋkaŋ miiriŋ ŋgiɗ-ŋgiɗi, asərpəyaŋ vaŋ pərtət faɗi gəm.