VEƊE 10 - JAA TƏMARWAŊ

Hulum bə digi kə Pepeŋ də kormə kefter bə hayɗə-hayɗeŋ

¹ Adoro kəyaŋ, ten asaŋ *hulum bə digi kə Pepeŋ bə səɓaki bə ve da warda adawra da sar Pepeŋ da. Kamraŋ gə vaa-ve suru damdi dəməəmə ana, akaarə pepeŋ də gaa-ge cuuru ada gəm. Duru damdi cəwa də apəyaŋ ana, kəmpuru damdi kəbaŋ gə karə-kere bə do'e ana.

² Kormə kefter bə hayɗə-hayɗe bə bəŋə-biŋi kəəsu kay. Wə məlaŋ kəmpuru kemer wəra cəərə kan kəmtəŋa anə ɓeti, kaayaŋ gulaŋ cəərə seŋkaŋa anə ɓeti gəm.

³ Kəya wə əsəŋ bə naakte ku də səɓaki damdi googoŋ ana. Bə minti wə naaktaŋ ku bədoona kəyaŋ, koŋ dabtaŋ gidim-gidim kampa seeɗa.

⁴ Ten a ɗəlaŋ jeere dordə ko bə dabteŋ, a ko toŋa kəya dordə karman kəman əsəŋ bə waatan da apəy da minti: «Dordə ko bə minti a dabtaŋ kampa seeɗa'iŋ, yaakə toŋ la, a jeere kel gə metə-mete teŋ ba.»

⁵ Kəya hulum bə digiŋ bə minti ten a əsnu gil cəərə seŋkaŋa daana kan gəm, haŋ kəəsu apəya,

⁶ wə əsəŋ bə kele ku də sam Pep bə minti dədərgə caw bə faɗnə-faɗnaŋ, bə minti jəŋ ko bə apəyaŋ, seŋkaŋ, kan kəmtəŋ də kar kə giidiŋ keɗeŋ, minti cəwa də miŋ təwaŋ ne wəra.

⁷ Bə minti hulum bə digi kə Pepeŋ bə seeɗaŋ ufuŋ atoltom nuutuŋ ne akaceŋaŋ, kel kə metə-mete kə Pepeŋ de kuy yaŋ wəra dər hi toŋa damdi wə a wəətənəy a *kaa kə jogte ku mini nuutuŋ ana.

⁸ Kəya dordə karman bə minti a waatənan kel apəy daŋ, haraŋ bə dogon kela pa minti: «Ɗee la a de kefter bə ku bə bəŋə-biŋiŋ kasi hulum bə digi bə minti kəmpuru bə malə-mele cəərə kan kəmtəŋa daana cəərə seŋkaŋaŋ.»

⁹ Kəya ten kooroŋ suru faɗi bə ɗe a wəətu minti wə ayan kormə kefter yaŋ mo. Wə minti: «Daw la, həmu la, wə ji yaŋ kuma jibit-jibit bə son bə tum ana, səma giidim na ha'aŋ, wə bə ji yaŋ gəlag-gəlagi.»

¹⁰ Kəya ten doŋ kormə kefter bə kəəsuŋ, ten həmnu. Kuna kəna anəkay ha'aŋ, wə anə jibit-jibit bə son bə tum ana. Səma bə minti wə kəlaŋ giidən na kaynaŋ, wə koloŋ wəra anə gəlag-gəlagi.

¹¹ Kəya yə waatənan minti: «Harə la bə jogte kel kə Pepeŋa, kel gə minti wə a ɗəmpənəy wəra a gidiirə kaŋ, a seŋkaŋ, a ku kaŋ, a kəkamnaŋ ablaw gəm.»