VEƊE 1 - JAA TƏMARWAŊ

Mele bə gud kel

¹ Haa kənaŋ kel gə minti Yeesu Kristu vəɗnəy wəra a kaŋ. Pepeŋ əynu kel teŋ kir minti kar gə minti wəra maŋ bə tuliŋ, wə kay guudi la wəra a kaa kə joŋre nuutuŋ. Yeesu Kristu gaŋ *hulum bə digi nuutuŋ bə ɗe a kay guudi wəra a Zaŋ, hulum bə joŋre nuutu.

² Zaŋ topoŋ bəlam də kar gə minti wə əsnəy wəraŋ keɗe, wə minti kel teŋ haa kə Pepeŋ, Yeesu Kristu jəŋ bar kəkəy wəra ciiri.

³ Waaleŋ cəərə hulum bə minti aŋkaŋ kefter toŋ, cəərə kaa gə minti əskəŋ kel té gə minti *hulum bə jogte ku miniŋ a wəətənəy ne wəraŋ daana gə minti humi kosoŋ ciiriŋ gəm. Gud maa mo, hi bə minti kar teŋ tuli duruŋ wəra maŋ.

Zaŋ mirki kaa kə doo-de gə giidə vil seeɗa'aŋ

^4-5 Jeere kefter toŋ a kaa kə Tapi gə giidə vil seeɗa'a də Aziŋ, haa ten Zaŋ. Pisiŋ də kəkaɓiŋ kə Pep bə minti a jəŋ caw, hebkəna caw, daana bə bi yaŋ caw gəm jəə la cəərəŋa. Pisiŋ də kəkaɓiŋ kə Tiiru Seeɗa'aŋ də minti də əsə-isi tiinə jaaŋa də kumnaŋaŋ jəə la cəərəŋa. Pisiŋ də kəkaɓiŋ kə Yeesu Kristu, bar kəkəy ɓetiŋ, hulum bə minti haraŋ wəra ajew dədərgə adordə meŋaŋ, kumna kə kəkamna gə cəərə seŋkaŋ, jəə la cəərəŋa. Yeesu haa hulum bə minti bəlaŋ áŋ, wə bədəŋ áŋ wəra ku baymele náŋa də kor du.

⁶ Wə təpaŋ áŋ minti áŋ kolə la a kumna nuutuŋa *kaa gə keere kə Buru Pepeŋ. Tokɗeŋ də abay jəə la nuutuŋ bə faɗnə-faɗna. *Amen.

⁷ Aŋ golə laŋ, wə day caw bə bi da dər kamraŋ daŋ. Kaŋ əsu yaŋ wəra də diri keɗe, koo nuutu kaa gə minti a kəptunuŋ. Kaasaw də kaa gə cəərə seŋkaŋ keɗe hage yaŋ kəəsu. Ãã, yə haa bədoona ana. Amen.

⁸ Barkaŋ Pepeŋ minti: «Ten haa Alfa, ten haa Omega. Ten haa hulum bə minti a jəŋ caw, ten hebkəna caw, ten bə bi yaŋ caw gəm, ten haa Bar Səɓakiŋ.»

Yeesu vəɗaŋ kusru wəra dər Zaŋa

⁹ Kəna ten seeneŋ Zaŋ. Gud tapi náŋa də Yeesuŋ, ten haa kumsəŋ bə minti giidə *Kumna kə Pepeŋa gəm, ten bə se gəəliŋa daana ten bə mi ku damdi aŋ ana gəm. Yə gaanan warna cəərə ajomga də Patmosi na haa gud bə minti ten a waataŋ kel kə Pepeŋ wəra daana kel gə minti Yeesu a jəŋ bar kəkəy ciiriŋ wəra a kaŋ.

¹⁰ Dər hi bə faake kə Barkaŋaŋ, Tiiru Cetcetaŋ tuluŋ cəərəna. Kəya ten əskəŋ dordə karman kəman bə hage da kerkən da anə koloŋ damdi atoltoma ana

¹¹ minti: «Karman bə minti tam bə əsuŋ, jiiru la, kaa kefter toŋ la a kaa kə Tapi gə giidə vil seeɗa'aŋ haa kənaŋ: Efesi, Simirnə, Pergam, Tiyatir, Sardə, Filadelfi, Lawdise.»

¹² Adoro ten haraŋ bə gole hulum bə waatan kela, ten asaŋ lampa seeɗa də gaɓtə-gaɓte a larga də kooso bə gusi awəy-awəya seeɗa gəm.

¹³ Aduubə də lampa taŋa, ten asaŋ hulum bə haa-he hulum kisirki ada. Wə bə darə-dere jamba tempəla suru. Saama də jəə-ji də kooso bə gusi awəy-awəy də əntə-ənti kuuyu.

¹⁴ Kaaɗe gə cuuru wəra gəbərwəŋ ana ceɗek-ceɗeki damdi amaaləwa ana. Duru də goleŋ damdi kəsəlɗə cəwa ana.

¹⁵ Kəmpuru welɗe damdi kooso pisi bə yoorə-yoore ana gəm. Durdu hage də səɓaki damdi kan kəmtəŋ gə dabteŋ ana.

¹⁶ Seska a kəəsu kemera seeɗa. Caafay də kəsnə ɓasa gə kaa-ke kəlaŋ warda ku da. Tiinu welɗe damdi cəwa də daaway ɗeker-keraŋ ana.

¹⁷ Bə minti ten əsnu anəkay, ten awaŋ tiinu damdi ten wəra bə mee-me ana. Kəya wə məlaŋ kəəsu kemer sarəna, wə waatənan minti: «A ji walka ba! Ten haa hulum bə ajew, bə adoroŋ,

¹⁸ daana bə minti caw dədərgəŋ. Ten a meŋ wəra, ten haraŋ wəra dədərgə, ten máŋ caw dədərgə bə faɗnə-faɗna. Səɓaki də cəərə meŋ daana də cəərə ko kə kaa kə mee-meŋa kaasəna.

¹⁹ Bədoona ana, kar gə minti tam a əsnəy bə jiŋ keɗe, gə hebkəna, də kaayaŋ gə adoroŋ, jiiriy la.

²⁰ Seska seeɗa'a tá də minti tam a asna a kaasən kemeraŋ, də lampa seeɗa'a də gaɓtə-gaɓte a larga də kooso bə gusi bə awəy-awəyaŋ, gud kel di gə metə-meteŋ haa minti: seska seeɗa'aŋ haa *kaa gə digi kə Pepeŋ gə minti bə gole cəərə kaa kə Tapi gə giidə vil seeɗa'aŋaŋ. Lampa seeɗa'aŋ haa Tapi taŋ faɗi gəm.»