TITI 3 - JAA TƏMARWAŊ

Joŋre kə kaa kə doo-deŋ cəərə seŋkaŋaŋ

¹ Bədoona ana, ɗəkə cəərə kaa kə Pepeŋ la keɗe minti yə əskə la gud kəkamnaŋa daana kaa gə abay-abay, yə tupuy kuy la daana yə ɗampə kusri la wəra bə ji joŋre pisiŋ keɗe faɗi.

² Wəətəy la minti yə a waate kel kə bayməlaŋ cəərə huluma ba, yə a ji gəbaŋ də hulum bə gəm. Yə jəə la kaa kə tapte adəwaldə kaa ɗaw, daana yə jəə la sããya sar kaŋa keɗe.

³ Gud maa mo, áŋ də kusrə áŋ ha'aŋ, áŋ a jəŋ dayday haa kaa gə minti kel paapa də dər áŋ ba, paapa bə de ku huluma ba, áŋ a wəra gə lentə-lente. Áŋ a jəŋ kafkam gə saane gidiirə kar keɗe gə minti giidə áŋ bələy. Áŋ a zugi haa dər sərkəŋa daana də lemlem də kar kə kaa. Kaŋ a maltaŋ dər áŋ wəra, áŋ maltaŋ dər kumsə áŋ wəra gəm.

⁴ Səma, də bə minti Pepeŋ, Hulum bə seere áŋ, gaŋ gud pisi nuutuŋ wəra daana bele nuutuŋ cəərə kaŋa tə bə moŋ,

⁵ wə seereŋ áŋ wəra. Wə seereŋ áŋ wəra haa paapa gud joŋre ɗekeri bə minti áŋ a juunu ba. Wə seereŋ áŋ wəra haa gud minti wə jəŋ giidu pəsaŋ sar áŋaŋ. Də Tiiru Cetcetaŋ, wə baadaŋ baymele náŋ wəra, wə haraŋ bə we áŋa wəra kaa kəmarwaŋ, daana wə ayaŋ dədərgə təmarwaŋ a áŋ.

⁶ Tiiru taŋ ha'aŋ, Pepeŋ duusənə wəra cəərə áŋa ablaw də Yeesu Kristu Hulum bə seere áŋ,

⁷ minti áŋ kolə la wəra kaa ɗekeri dər Pepeŋa gud pisi nuutuŋa. Wə jəŋ bədoona ana haa minti áŋ falə dədərgə də bay teweŋ la, dədərgə tá də minti ɗiki də áŋ bə malə-mele cəərəŋ.

⁸ Teŋ haa kəya kel kə gəəzə-gəəzi daana ten bele minti tam dugtuy la də səɓaki, kir minti kaa gə minti doŋ gud Pepeŋaŋ ayə kusri la bə ji haa joŋre pisiŋ. Haa kəya kel pəsaŋ gə minti keye kaŋ.

⁹ Səma a kalte kum a awəy də boobo də bay bəlam dəŋa ba. Awəy də minti yə caara cəərə kəmoomo di gə daydaya, awəy daana gəbaŋ bə minti yə jəw cəərə *ku gili kə *Moyisiŋaŋ, a kalte kum ada ba. Teŋ kəya kel kə boobo, gə minti keye hulum baŋ.

¹⁰ Hulum bə minti ceme adəwaldə kaŋ wəra ha'aŋ, wəətu la kampa məna, bə ɓasiŋ kəyaŋ, jəəne minti wə əskənəm kum baŋ, yəəku kel du la warna.

¹¹ Tam bə asə-ase minti hulum toŋ kəyaŋ, wə yaakaŋ kəkəy ɗekeriŋ wəra, baymele bə minti wə juutu ha'aŋ, jeme kəətiŋ cuuru haa tó.

Kel gə adoroŋ

¹² Ten bə gam Artemasi mo, Tisiki mo yaŋ səram na. Bə minti toŋ tuukuŋ ne səram naŋ, haa kusrum la, bəəda a fəlan giidə seŋka də Nikopolisiŋa, gud bə minti ten ɗe a ji ko bə kosõõye ada na.

¹³ Zenas hulum bə keye kaa tiinə kəətiŋa daana Apolo ha'aŋ, mələy la a kəkəy bə gəryiŋa pisi kir minti karman a kerpe kəəsi ba.

¹⁴ Kaa náŋ gəm, yə hatə ayə bə kusri la bə ji joŋre pisiŋa, bə keye kaa gə minti dər gəəliŋaŋ kirka keyeŋ. Yə jəəne bə ji bədoonaŋ, de neeteŋ bese wəra siri boobo ba, wə kole bə keye kaa.

¹⁵ Kaa gə minti kanna sarən naŋ keɗe bə mirkim na. Gədaarə áŋ gə doo-deŋ, mirkiy la. Pisi kə Pepeŋ jəə la dəərəŋ keɗe'i.