TITI 2 - JAA TƏMARWAŊ

Hate bə minti a kuɗuŋa pisiŋ

¹ Səma nəmtiŋ ha'aŋ, tam toŋ hatə kaŋ la haa də hate bə minti toŋ a kəkəy kə Pepeŋaŋ.

² Waatə kaa kaŋkar kəpaaraŋkaw la minti yə a ji kaa kə raawte kel ba. Yə jəə kusri la kir minti kaŋ humə kosoŋ la ciiri, daana yə jəə la də ɗiki pisiŋ ku tərməyi. Yə əsə la ŋəŋ gə doo-de gud Pepeŋa, bə ji beleŋa daana bə hale gəəliŋa.

³ Bədoona ana gəm, waatə kəram kəmtəŋ la minti yə jəə kusri la wəra damdi kəram gə minti ɗe gud Pepeŋa a gəəziŋaŋ ana. Yə a kole kusri kəram gə juti kel ba, daana yə a yaake kusri bə kole kafkam kə kumuy bə gəm. Yə hatə kumsi la bə ji kar pəsaŋa.

⁴ Yə hatə kəram kəəcəŋ la bə bele kaŋkar neeteŋa də kəmar koncoŋ neeteŋ.

⁵ Yə hətəy la minti yə jəə la də ɗiki pisiŋ ku tərməyi, daana yə jəə la *cetceti. Yə jəə la kəram gə minti de kuli neeteŋ pisi, sããya daana gə minti iski gud kaŋkar neeteŋa, kir minti hulum a sarte kel kə Pepeŋ ba.

⁶ Bədoona gəm, waatə kəmar kaalay la, yə jəə la də ɗiki pisi ku tərməyi.

⁷ Tam də kusrum gəm ha'aŋ, a joŋre nəmtiŋa keɗeŋ, jəə la haa joŋre pisiŋ, kir minti kaŋ asə la haa kaasəma. A kəkəy bə hate nəmtiŋa, hatə kel la a kuɗiŋa pisi kir minti kaŋ humə kosoŋ la cəərəma.

⁸ Kel nəmtiŋ jəə la haa kel ɗekeriŋ, kir minti hulum a sərtəy ba. Bədoona ana, kaa kə acukur náŋ a fele ko bə waate kel kə bayməlaŋ cəərə áŋa ba, keseŋ kolə máŋ bə doya ɗaw.

⁹ Kafkam ha'aŋ, wəətəy la minti yə doo ku kəmnə diŋ la cəərə kara keɗe. Yə jəə la haa karman bə minti doy diriŋ daana yə a kolte awəy diiri ba.

¹⁰ Wəətəy la minti yə a ji dəgaaya guudi ba anə ceki. Yə jəə la saksaki bə ji ɗaw haa joŋre pisiŋ daana ɓetiŋ kir minti hate náŋ cəərə Pep Hulum bə seere áŋ kolə la bə doy diri guudi.

¹¹ Gud maa mo, Pepeŋ gaŋ gud ji bə pisi nuutuŋ wəra a kaŋ, minti kaŋ keɗe falə seereŋ la haa gud pisi nuutu toŋa.

¹² Pisi nuutu toŋ kəya hate áŋ minti áŋ yaakə ji bə baymele la wəra də ɗiki bə kar gə cəərə seŋkaŋ, kir minti áŋ əsə la cəərə seŋkaŋa dogoyna kəna də ɗiki pisiŋ ku tarmə áŋa, bə ji kel ɗekeriŋa, daana bə ɗe haa ɗe bə minti giidu bəluŋ.

¹³ Áŋ əsə la bədoona ana bə mi hi pisi bə minti ɗiki də áŋ bə malə-mele cuuru hebkənaŋ, akaceŋa dər hi tó bə minti məyan kə Yeesu Kristu, Pep náŋ bobloŋ, Hulum bə seere áŋ, pəŋ dərə ne wəraŋ.

¹⁴ Tó də kusru wə ayaŋ kusru wəra bə miɗi áŋ wəra ku kel kə bayməlaŋa, bə kole áŋ wəra dər kaa nuutu gə minti wə pooroŋ wəra ciiri, daana gə minti məlaŋ ɗiki di wəra keɗe bə ji haa joŋre pisiŋ.

¹⁵ Bədoona ana ta, hatə kaa la də kel teŋ, tiŋiy diri la, daana jəə gəbaŋ la a kaa gə bay iski kosoŋ də səɓaki də minti Pepeŋ aynam dəm. A yaake hulum kəman bə koloma wəra karman bə hin boobo ba.