TITI 1 - JAA TƏMARWAŊ

Mirkiŋ

¹ Jeere kefter toŋ kəya haa ten Pol, hulum bə joŋre kə Pepeŋ, daana bə *gaa-ge kə Yeesu Kristu bə waate kela də səmuŋ. Pepeŋ əsnən minti ten ɗee la a keye kaa gə minti wə vərnəy wəraŋ, minti yə doo la guudu daana minti ten gay diri la wəra cəərə gəəzi də ɗe náŋ bə minti giidə Pepeŋ bəluŋ,

² minti yə jəə la gə malə-mele ɗiki di wəra cəərə dədərgə də bay teweŋa. Hãã wəra ajew də mele bə gud koŋaŋ, Pep bə minti wə ceme tete baŋ waataŋ wəra kaŋkaŋ minti tó aye dədərgə táŋ a áŋ.

³ Də bə minti ko bə minti wə a ŋəmnu nəkaŋ wəraŋ, wə gaŋ gud dədərgə táŋ wəra də kel kə waate nuutuŋ. Pepeŋ Hulum bə seere áŋ aynan kel teŋ kaasəna minti ten wəətəy la wəra a kaŋ.

⁴ Ten bə jeerem kefter toŋa a nəənəm tam Titi, tam kormon bə gəəziŋ gud tepe náŋa a de bə gud Pepeŋa. Pisiŋ daana kəkaɓi kə Pep Abaŋ də Kristu Yeesu Hulum bə seere áŋ jəə la cəərəma.

Joŋre bə minti Titi jəw giidə seŋka də Keretiŋaŋ

⁵ Bədoona ana, ten taakənam Kereti da ha'aŋ minti tam ɗampə dər kel gə minti a yaakaŋ bay ɗampeŋ la wəra a kuɗiŋa, daana minti tam əstə kaa kəmtəŋ gə tiinə kaa la wəra giidə Tapiŋa wəra kar-kar giidə vilaŋ keɗe. Cəərəm jəə la a kel gə minti ten a hatnam dəm wəraŋ.

⁶ Hulum bə tiinə kaŋ jəə la haa hulum bə minti yə məlu kel suru ba. Wə jəə la də həlgə guudu ɗaaməna faɗi. Kərmuyuŋ jəə la gə doo-de, hulum a fele ko bə wəətəy sam ɗe neeteŋ baymele ba, daana minti yə paapa bə iski kosoŋa bə moŋ bə gəm.

⁷ Wə jəə la hulum bə minti yə məltu kel suru ba, gud minti wə ji haa joŋre kə Pepeŋ. Gud teŋa ta, wə a ji hulum bə teke cəərə kusru apəya ba, wə a ji hulum bə waŋ-waŋ bə gəm, bə markete bə gəm, bə feke kel bə gəm, hulum bə lemlem də soloy bə gəm.

⁸ Səma, wə jəə la hulum bə minti tope kə irku də kaa girdu pisi, hulum bə bele pisiŋ, hulum bə ɗiki du pisi, hulum ɗeker, bay zeɓe suru, daana wə jəə la hulum bə minti ame kusru pisi.

⁹ Wə jəə la bə əsə-isi ŋəŋ a kel kə hate bə gəəziŋa, damdi yə a hətnu duŋ ana. Bədoona ana ta, wə ji yaŋ bə nakə-neke kirka teŋe dər kaa kaayaŋ də hate bə gəəziŋ, daana kaa gə minti hẽŋe wəra də awəy cəərə hate toŋaŋ, wə gay diri wəra cəərə leŋe neeteŋa.

¹⁰ Gud maa mo, kaa kəman yaŋ ablaw gə ayə-aye giidiŋa faɗi, daŋgeŋ haa adəwaldə kaanə Ziwifiŋa. Yə de ku hulum ba, kel di petpeti, daana yə ji tiniini də kaa.

¹¹ Kaa teŋ kəya hay kuy la wəra bay hate kel kə bayməlaŋ teŋ, gud bə minti yə ɓalkete giidə kuli kə kaa wəra də hate bə minti paapa kir hate baŋ. Yə jəəti kel teŋ haa bə golde bege bə bay guuduŋ.

¹² *Hulum bə jogte ku mini kə pepe neeteŋ bə giidə seŋka də Keretiŋ toki a waataŋ wəra ciiri ajewa minti: «Kaanə Keretiŋ ha'aŋ, yə da anə hãã kaa kə ceme tete, yə kaa kə sərkə gə ablaw-ablaw damdi bege bə waraŋ ana, kaa kə kurfuk-kurfuki gə koslom-koslom neete bə anə lami.»

¹³ Kel gə minti wə wəətənəy ha'aŋ, yə kel kə gəəzi. Gud teŋa ta, wəətəy la wəra kaŋkaŋ kir minti de neeteŋ jəə la ɗeker,

¹⁴ minti yə a de gud ajujun də boobo də bay bəlam də kə kaanə Ziwifiŋa ba, daana minti yə a de gud ku gili kə kaa kəsarkaŋ gə minti yaakaŋ gəəzi wəraŋ ba.

¹⁵ Kar wəra keɗe *cetceti sə kaa gə minti wəra cetcetiŋ gəm. Səma kə kaa gə minti wəra gə zeɓə-zeɓeŋ daana paapa gə doo-de baŋ ha'aŋ, kar wəra keɗe tiini gə zeɓə-zeɓe gəm, gud minti ase neeteŋ bə zeɓə-zeɓe daana ɗiki di baymeleŋ, keseŋ paapa də diri pəda.

¹⁶ Yə neete bə waate minti té asaŋ Pepeŋ, anaaŋa joŋre bə minti yə bə jəwaŋ ge dər kaŋ wəra minti Pepeŋ paapa də diri ba. Yə iski kosoŋ ba, yə kaa kə ɓalkə-ɓalke, daana yə paapa gə nakə-neke bə ji joŋre pisi anə məna bə ceki.