ROMEŊ 9 - JAA TƏMARWAŊ

Pepeŋ ŋəmaŋ kaanə Israyel

¹ Ten bə tapə-tepe də Kristu səm moŋ, kel gə minti ten wəətəy yə gəəzi, ten ŋe kel ba. Ɗiki dən bə minti Tiiru Cetcetaŋ bə ɗe duuruŋ bə waatəna gəm minti ten waate haa gəəziŋ a kəkəy bə minti ten waate minti:

² ten də laawe ku tarməna ablaw hasi daana a paapa bə yaakəna ɗemeŋ ba

³ gud kəsaanan gə Ziwifi gə minti are a kaasaw gə məna a kusukiŋa diiriŋ. A jəə la minti kel teŋ kəya sə a kəyəy, ten a bə doo-de haa minti Pepeŋ gan guɗbusi la wəra daana minti ten a ji bə tapə-tepe də Kristu pəda.

⁴ Yə haa kaasaw də moomo di *Israyel, Pepeŋ jəŋ kir minti yə kolə la wəra karmə tó, wə gəənəy diri wəra cəərə boblo nuutuŋa, wə topoŋ *jaa diiri, wə əynəy *ku giliŋ, wə kəənəy diri a kəkəy bə kaw awalnaŋa, wə wəətətənəy sam kar gə minti tó bə jiitiy di yaŋ gəm.

⁵ Yə a kaasaw də kəmoomo di gə Hebere gə samsam da. Kristu waŋ bə hulum kisirki ana haa a kaasaw di da gəm, tó bə minti wə haa Pepeŋ bə əsə-isi cəərə kara keɗeŋ. Tokɗeŋ jəə la nuutu bə faɗnə-faɗnaŋ! *Amen!

⁶ Kar gə minti Pepeŋ a wəətənəy səməy wəra a kaanə Israyel, wə jiiniy bə moŋ, ten waate paapa bədoona ba. Wə jiiniy nuutu, səma koloŋ kaa kə Pep gə minti Israyel də gəəzə-gəəziŋ, paapa kaŋ keɗe gə minti waŋ a kaasaw də moomo di Israyelaŋ ba.

⁷ Ana paŋ, kaa gə minti a kaasaw də moomo di Abrahamaŋ paapa keɗe kərmuyu gə gəəzə-gəəziŋ gə minti Pepeŋ a wəətunu wəra ciiriŋ ba. Gud maa mo wə a wəətunu wəra dayday haa minti: «Kaasaw dəm gə minti ten a waatənam səməy wəraŋ, bi haa a kəsar də *Izaki da.»

⁸ Gud kel teŋ haa minti, kaa gə minti waŋ a kaasaw də Abrahama keɗeŋ paapa karmə Pep gə gəəzə-gəəziŋ ba. Kərmuyuŋ haa kaayaŋ gə minti waŋ gud kel gə minti wə a waataŋ Abraham wəra ciiri təwa faɗi.

⁹ Gud maa mo Pepeŋ a wəətunu sam karman wəra də bə minti wə wəətunu kel teŋ haa kənaŋ: «Də ko toŋ kəna bədoona anəkay, ten hare yaŋ da, Sara ji yaŋ də beebe kaasa.»

¹⁰ Kel gaalaŋ yaŋ ada pa: áŋ ɗəkə la cəərə Rebeka. A haa mar moomo də áŋ Izakiŋ, a vaŋ kəmkun duuru.

^11-12 Pepeŋ a waatəna wəra minti: «Kurmiyi bobloŋ ɗe a kole bə ji joŋre a nayto konceŋ.» Wə waataŋ kel teŋ ha'aŋ də bə minti yə a kəm bay weŋ ɗaw, kəya yə jəŋ karman pisi mo, baymele mo, kəm paapa. Wə jəŋ bədoona haa bə ge dər minti tó ŋəmaŋ beebe məna gud karməya té ɓasiŋa haa gud ɗiki nuutu bə minti wə a həənu wardaŋ. Bədoona ta, Pepeŋ kumna cəərə ŋeme bə kaa nuutuŋa. Wə ŋəməy paapa gud karman bə minti yə juunu ba, wə ŋəməy haa gud bə minti wə a bəlaŋ məntəy warda a kusru bədoona anəkay faɗi.

¹³ Yə haa damdi wəra gə jeerə-jeere giidə Kefter kə Pepeŋa ana minti: «Ten bəlaŋ *Zakopi, ten pəyaŋ Ezo wəraŋ.»

¹⁴ Kel teŋ waate haa minti harmə mo? Yə waate haa minti Pepeŋ gula mo? Paapa anə ceki!

¹⁵ Gud maa mo wə a waataŋ Moyisi warda minti: «Ten ji giidən pəsaŋ sar hulum bə minti ten bele jəw duŋ. Ten ase caadə hulum bə minti ten bele əsu caaduŋ.»

¹⁶ Wə ji kel teŋ gud giidu pəsaŋ gə minti wə jəy sar kaŋaŋ, paapa gud bele bə giidu kə huluma ba, paapa gud joŋre nuutuŋa bə gəm.

¹⁷ Wəra bə jeerə-jeere giidə Kefter kə Pepeŋa cəərə kel gə minti wə a wəətənəy a Farawoŋ minti: «Ten əsnəm kumna anə derra haa bə ge gud səɓaki katən wəra dəərəm kir minti səman hagə la wəra giidə seŋkaŋa neŋneŋ keɗe.»

¹⁸ Bədoona ana ta, Pepeŋ ji giidu pəsaŋ haa sar hulum bə minti giidu bəlaŋ, wə ŋélé mindi mo bə minti giidu bəlaŋ neŋ gəm.

Pepeŋ kumna cəərə karman bə minti giidu bele jəw

¹⁹ Ɗalba hulum waate minti: «Jəəne bədoona anaŋ, Pepeŋ bə ceme təbay a kaŋ haa səm pə mo? Gud maa mo mindi neke bə gerge tiinə karman bə minti giidu bəluŋ mo?»

²⁰ Tam hulum kisirki bagŋ, tam haa mindi mo bə ce awəy də Pepeŋ? Karman bə hərsə-hərsi waate hulum bə hursuŋ yaŋ mo minti: «Tam jəənən bədoona ana səm moŋ?»

²¹ Də gedel bə məna, kəkəy cəərə hulum bə hərsi kara bə hərsi pəka bə joŋre bə tiilim, bə hərsi baalaŋ bə tope kə irku də kaŋ gəm.

²² Kel gə minti Pepeŋ jiiniy haa bədoona ana gəm. Wə a bəlaŋ minti kaŋ asə la minti tó bə kolə-kole waŋ, tó də səɓaki gəm. Də teŋ keɗe, wə məŋ ablaw bə hale kaa té gə minti wə a bə kolə-kole waŋ siri daana gə minti a wəra maŋ kir minti wə bəsəy wəraŋ.

²³ Wə a bəlaŋ gəm minti, boblo kə toŋ naanaanə me'i moŋ, kaŋ əsu la daana minti tó ɓərsunu də kaa gə minti tó jəŋ giidə tó pəsaŋ siriŋ. Wə a ɗampaŋ kaa teŋ warda hãã bə isiy dər məyan nuutuŋa.

²⁴ Kaa teŋ haa áŋ faɗi, áŋ gə minti wə mantaŋ sərdə áŋ warda gud gə Ziwifiŋ daŋ, sirdi gud kaa gə minti paapa gə Ziwifi baŋ gəm.

²⁵ Wə waataŋ giidə kefter kə Ose, *hulum bə jogte ku mini nuutuŋa, haa bədoona minti: «Kaa gə minti a paapa kaa katən baŋ, ten məntəy yaŋ máŋ Kaa Katən. Kaa té gə minti ten a bəlnəy baŋ, ten məntəy yaŋ máŋ minti Karmə Giidən.

²⁶ A ko bə minti yə a wəətənəy ada minti: ‹Aŋ paapa kaa katən ba›, a ko toŋa derra faɗi yə bə məntəy minti yə karmə Pep bə Dədərgəŋ.»

²⁷ Ezay, hulum bə jogte ku mini kə Pepeŋ, a waataŋ cəərə kaanə *Israyela gəm minti: «Jəəne nuutu kəna minti kaanə Israyel ablaw damdi abəɗəskəŋ də ku kan kəmtəŋ ana ɗaw, ɗe a seere haa maki diŋ təwa.

²⁸ Gud maa mo, Barkaŋ bə de cuuru ba, wə bi yaŋ cəərə seŋkaŋa bə bi a de ku kel gə minti wə a waataŋ minti tó jəy yaŋ wəra faɗi.»

²⁹ Ezay a waataŋ wəra ajewa pa minti: «Barkaŋ bə Duuriŋ a yaakə sərdə kaasaw də áŋ la ada a áŋ baŋ, áŋ a gə kolə-kole haa damdi vil də Sodom daana də Gomor ana faɗi.»

³⁰ Bədoona ana, karman bə minti áŋ bele wəətuŋ haa minti: kaa gə minti paapa gə Ziwifi baŋ a paapa bə golde kəkəya bə ji ɗeker tiinə Pepeŋa ba, səma wə kulnuy wəra ɗeker duru gud de neeteŋa.

³¹ Kə kaanə Israyel, yə goldoŋ *ku gili bə minti kuluy ɗeker dər Pepeŋaŋ, səma yə nəkaŋ bə daw ku wəra ba.

³² Səm mo? Gud bə minti yə goldoŋ kəkəy bə kole wəra ɗeker tiinə Pepeŋa haa paapa də deŋ ba, səma də joŋre bə minti yə juutuŋ. Kəya yə laŋ wəra a pərki bə daste kaa

³³ bə minti Pepeŋ a wəətunu səmu wəra giidə Kefter nuutuŋa minti: «Golə laŋ, ten ge pərki giidə vil də Siyoŋa, pərki bə minti kaŋ daste ada, pərki bə ke kaŋ. Hulum bə minti doŋ ne guuduŋ, wə kole kese hõy pəda anə ceki faɗi.»