ROMEŊ 6 - JAA TƏMARWAŊ

Kaa gə minti gə tapə-tepe də Yeesuŋ fele dədərgəŋ

¹ Áŋ waate ta'i kənaŋ minti harmə mo? Áŋ raawə la də ji bə baymeleŋ kir minti pisi bə minti Pepeŋ jəw cəərə kaŋaŋ zulə la mo?

² Paapa anə ceki! Me bə minti áŋ miinuŋ cəmaŋ adəwaldə áŋ wəra də baymeleŋ tə bə moŋ, áŋ neke bə raawe duru naanaanə mo?

³ Jəə la də dərəŋ minti, bə minti yə jəŋ batem a áŋ keɗe bə tepe áŋ də Yeesu Kristuŋ, áŋ təpaŋ wəra duuru a me nuutuŋa gəm.

⁴ Bə minti yə jəŋ batem a áŋ, áŋ meŋ wəra haa duuru faɗi, yə vaŋ áŋ a tələŋkə wəra haa duuru gəm kir minti Pep Abaŋ harə áŋ la wəra dədərgə adordə meŋa damdi wə a haraŋ Kristu wəra dədərgə də səɓaki nuutu də daŋə-deŋeŋ ana gəm. Wə haraŋ áŋ wəra dədərgə haa minti ɗe də áŋ jəə la kimirwi.

⁵ Gud maa mo, jəəne minti áŋ təpaŋ də Yeesu gud me náŋ bə minti haŋ sar nuutuŋ, áŋ ji yaŋ wəra gə tapə-tepe duuru gud hare bə dədərgə bə he sar nuutuŋ gəm.

⁶ Áŋ asə la wəra pisi minti, bə minti yə ɓəlnu wəra a kəbaŋ gə largaŋaŋ, hulum bə minti áŋ a jəŋ ajew bədoonaŋ, wə wəra bə ɓalə-ɓele duuru, kir minti kusrə áŋ bə hatə-hate də baymeleŋ a ji pəda daana minti áŋ a ji kafkam kə baymeleŋ pəda gəm.

⁷ Gud maa mo hulum bə minti meŋ wəraŋ, wəra bə ɓarsə-ɓarse də baymeleŋ.

⁸ Áŋ meŋ wəra də Kristu ŋaanaanə moŋ, wəra cəərə áŋa faɗi gəm minti áŋ bə ji haa zugi dədərgə duuru.

⁹ Gud maa mo áŋ wəra gə asə-ase minti, Kristu bə minti haraŋ wəra dədərgə adordə meŋaŋ me hõy pəda; meŋ paapa bə nakə-neke bə ji abay cuuru pəda.

¹⁰ Bə minti wə meŋ wəraŋ, me toŋ ɓərsunu aduubə du wəra də baymeleŋ warna kampa məna faɗi. Bə hebkənaŋ minti wə dədərgəŋ, haa a Pepeŋ təwa.

¹¹ Bədoona ana, aŋ gəm ha'aŋ, aŋ golə kusrəŋ la damdi me dəŋ wəra bə ɓarsə-ɓarse dəərəŋ də baymeleŋ ana daana aŋ máŋ dədərgə haa a Pepeŋ gud tepe nəətiŋa də Yeesu Kristu.

¹² Bədoona ana, aŋ a yaake baymeleŋ bə ji abaya cəərə kusrəŋ bə minti bə me yaŋ wəraŋ ba, kir minti wə a gaŋ bə humi kosoŋa cəərə ɗiki bə baymel-baymele bə minti feke ku tarməyaŋ daŋ bə gəm.

¹³ Aŋ a yaake kəkəy a karman dəŋ anə məna bə ji baymele minti wə kolə la wəra karman bə joŋre bə kel kə gul-gulaŋ ba. Ana ɗaw ha'aŋ, aŋ haraŋ wəra dədərgə adordə meŋa tə kəm, aŋ ayə kusrəŋ la wəra keɗe a Pepeŋ kir minti wə jəə joŋre la dəərəŋ bə jəəti kel ɗekeriŋ.

¹⁴ Bədoona ana ta, baymeleŋ bə ji abay cəərəŋa pəda gud bə minti aŋ paapa kir kasi *ku giliŋ ba, aŋ máŋ kir kasi pisi bə minti Pepeŋ jəw cəərə kaŋaŋ.

Aŋ haa kafkam kə kel ɗekeriŋ

¹⁵ Áŋ bə waate haa minti harmə mo? Áŋ ɗee la a ji baymeleŋ gud bə minti áŋ paapa kir kasi *ku giliŋ pəda, áŋ máŋ kir kasi pisi bə minti Pepeŋ jəw cəərə kaŋaŋ tə mo? Paapa anə ceki faɗi!

¹⁶ Aŋ wəra gə asə-ase minti, aŋ ayaŋ kusrəŋ ne a hulum minti aŋ jəə la kafkam nuutu bə humi kosoŋ cuuruŋ, aŋ ji haa kafkam nuutu gəəzə-gəəzi. Aŋ jəəne bə humi kosoŋa cəərə baymele bə minti ɗe a mele kaŋ a meŋaŋ, aŋ haa kafkam nuutu. Aŋ jəəne bə humi kosoŋa cəərə Pepeŋaŋ, aŋ haa kafkam kə humi bə kosoŋ toŋ, daana wə ɗe a məlaŋ haa a kel gə minti Pepeŋ koloŋ wəra ɗeker duruŋ gəm.

¹⁷ Áŋ jəə suuse la a Pepeŋ, gud maa mo aŋ a jəŋ kafkam kə baymeleŋ, səma bə hebkənaŋ, aŋ humuŋ kosoŋ wəra də ku tarməyaŋ soki məna cəərə kar gə minti yə a hatnaŋ dəŋ, gə minti gəəziŋ.

¹⁸ Aŋ wəra gə bədə-bidi ku baymeleŋa, aŋ koloŋ máŋ kafkam kə kel ɗekeriŋ.

¹⁹ Ten humtuŋ kar gə minti bə jəəti sar aŋ kaa kəsarkaŋa kənaŋ bə waataŋ kel, gud bə minti aŋ iski cəlam baŋ. A dayday aŋ ayaŋ kar də kusrəŋ damdi kafkam ana bə jəəti gidiirə baymeleŋa daana kar kə bay koloŋ cetcetiŋ gəm. Kel teŋ kəya malnaŋ a bay humi bə kosoŋ bə cəərə Pepeŋa faɗi. Bə hebkənaŋ, aŋ ayə kar də kusrəŋ la wəra keɗe a Pepeŋ bədoona ana gəm, bə ji kel ɗekeri gə ɗe a məlaŋ cəərə ɗe cetcetiŋaŋ.

²⁰ Bə minti aŋ a jəŋ kafkam kə baymeleŋ, kel kə he guudi a paapa cəərəŋa bə ji kel ɗekeriŋ ba.

²¹ Dər ko bə ateŋa daŋ, aŋ fəlaŋ haa maa gud jəəti bə kar gə minti jəŋ keseŋ dayna mo? Kel teŋ ɗe a awe ciiri dəərəŋ haa a meŋa ɗaw.

²² Səma aŋ wəra hebkəna gə bədə-bidi ku baymeleŋa, aŋ máŋ gə kolə-kole kafkam kə Pepeŋ. Karman bə minti aŋ fəlu adaŋ haa minti ɗe dəŋ kole wəra cetceti daana wə ɗe a awe cuuru dəərəŋ a dədərgə də bay teweŋa.

²³ Gud maa mo werke bə gud baymeleŋ haa meŋ. Səma karman bə minti Pepeŋ əyu a kaŋ booboŋ haa dədərgə də bay tewe də minti wəra də tapə-tepe də Yeesu Kristu Barkaŋ náŋ.