ROMEŊ 2 - JAA TƏMARWAŊ

Kəəti kə Pepeŋ ɗeker

¹ Bədoona ana, tam nuutu mindi mindi mo bə minti ceme kəəti də kaŋ, kamkam nəmti paapa, gud bə minti tam cəməy kəəti di daana tam də kusrum bə ji akas té ana gəm. Kəya a kəkəy bə jəməy kəəti diŋaŋ, tam wəra bə doo-de kusrum də kəəti tam toki faɗi.

² Áŋ wəra gə asə-ase minti, bə minti Pepeŋ jeme kəəti də kaa kə jəəti gom də baymele toŋ kəyaŋ, wə jəmu haa də kəkəy bə gəəziŋ.

³ Tam bə minti ceme kəəti də kaa kə jəəti kel teŋ, anaaŋa tam bə ji bə té ana gəm, tam ɗiki haa minti tam deŋe wəra ku kəəti kə Pepeŋa mo?

⁴ Ɗalba pisi boblo bə minti Pepeŋ jəw, kel gə minti wə jəm daŋgay dəm hebkən-hebkəna faɗi baŋ, daana mi nuutu bə ku kel, yə gole dərəma haa kel kə bagŋ mo? Tam paapa bə asə-ase bə mo minti wə jəŋ pisi toŋ sarəma haa kir minti tam nakə la bə kolə kerkem a baymele nəmtiŋ?

⁵ Gud tete nəmtiŋa daana minti tam bele ke kum wəra cəərə baymele nəmtiŋa baŋ, tam bə ɗampe cəərəma haa daŋgay mooto-mooto də minti ɗe a jəm yaŋ dər hi bə minti Pepeŋ ge gud waŋ nuutuŋ yaŋ wəraŋ, daana wə jeme kəəti də kaŋ yaŋ a kuɗuŋa faɗiŋ.

⁶ Də hi toŋa ateŋaŋ, wə werke mindi mindi mo yaŋ də aŋar də kel gə minti wə a jiitiniy.

⁷ Wə aye dədərgə də bay teweŋ yaŋ a kaayaŋ gə minti ayaŋ kusri saksaki bə ji haa pisiŋ kir minti Pepeŋ aŋkə té laŋ, wə haa cəərə té la apəyaŋ, daana wə ayə dədərgə də minti me pədaŋ la a teŋ.

⁸ Kə kaayaŋ gə minti gargaŋ də waŋ də Pepeŋ, yə haraŋ dər gəəziŋ warnaŋ, daana yə doŋ baymeleŋ ciiri kumnaŋ, waŋ daana kəəti kə Pepeŋ bə awe yaŋ ciiri gəm.

⁹ Kaa kə ji baymeleŋ keɗe fele lasi yaŋ daana tərməyi ji yaŋ wəra də jamə-jeme hasi gəm, kaanə Ziwifi gə minti əskəŋ kel kə Pepeŋ ajew ada gəm, kaayaŋ gə minti paapa gə Ziwifi baŋ ada gəm.

¹⁰ Səma kə kaa gə minti jəŋ pisiŋ, Pepeŋ əŋkəy yaŋ, wə hay ciiri yaŋ apəya, wə əyəy kəkaɓiŋ yaŋ. Kaanə Ziwifi gə minti əskəŋ kel nuutuŋ ajew ada gəm, kaayaŋ gə minti paapa gə Ziwifi baŋ ada gəm.

¹¹ Gud maa mo, Pepeŋ ji kel haa anə gəga'-gəga'i də kaŋ.

¹² Kaŋ keɗe gə minti jəŋ baymeleŋ bay ase *ku gili kə *Moyisiŋ bese wəra, səma paapa də kəəti də ku giliŋ toŋ ba. Kaŋ keɗe gə minti jəŋ baymeleŋ bə minti yə bə ɗe gud ku gili kə Moyisiŋaŋ, Pepeŋ jəməy kəəti di haa duuru gəm.

¹³ Gud maa mo Pepeŋ kole hulum duru ɗeker haa paapa gud jeɓre bə ku giliŋa təwa ba. Wə kole ɗeker duru haa hulum bə minti ji joŋre də kel kə ku gili toŋ.

¹⁴ Kaa gə minti paapa gə Ziwifi baŋ, ku gili kə Moyisiŋ paapa də diri ba. Səma hõy a ko kəmana, yə ji kel gə minti giidə ku gili kə Moyisiŋaŋ də ciiri anə faɗi gəm. Bə minti yə bə ji bədoonaŋ, yə ge dər wəra minti karman pisi bə jiŋ də dər té, jəəne nuutu minti ku giliŋ paapa də dər té baŋ.

¹⁵ Yə bə ge dəra wəra də ɗe di minti kel gə giidə ku giliŋ wəra gə jeerə-jeere giidə té. Ku tərməyi wəra bə gay diri minti kel teŋ haa bədoona ana faɗi. Ɗiki di bə minti bə wəətiya minti yə jəŋ kəya pisi, kumundu ba baymeleŋ, bə gay diri cəərə kel teŋa wəra bədoona ana gəm.

¹⁶ Kar gə minti ten wəətənəy səməy haa kənaŋ ɗe a veɗe wəra anə pəɗaki də hi bə minti Pepeŋ he bə jeme kəəti də kaŋ, haa Yeesu Kristu. Də hi toŋ ateŋaŋ, Pepeŋ kay gud kel neete gə metə-mete gə minti yə bə ɗikiya ku tərməyiŋ yaŋ wəra. Kel teŋ gə tapə-tepe də *Kel pəsaŋ kəmarwaŋ gə minti ten haa bə wəətiya wəraŋ.

Kaanə Ziwifiŋ humi kosoŋ cəərə ku gili kə Pepeŋa ba

¹⁷ Tam bə minti bə waate minti tam bə Ziwifiŋ, ko nəmti bə garge kaasam haa *ku gili kə Moyisiŋ, tam bə ufi kuma minti tam kə Pepeŋ.

¹⁸ Tam bə asə-ase karman bə minti giidu bəluŋ, ku giliŋ bə hatə-hate dəərəm minti tam ŋamə karman pisi la naanaanə moŋ gəm.

¹⁹ Tam wəra bə ɗəkə-ɗiki cəərə kusruma kaŋkaŋ minti tam haa hulum bə ɗe də kaa kə bəwə-bəwiŋ, tam haa pəɗaki kə kaa gə minti dər ko bə tilməŋaŋ,

²⁰ hulum bə gili kaa kə bay ase gud kel gə jiŋ, hulum bə hate kaa gə minti paapa gə asə-ase karman kəm hayaŋ baŋ. Tam bə ɗiki bədoona haa gud bə minti a ɗiki dəma ku giliŋ ayam ase bə kar daana gəəziŋ wəra keɗe.

²¹ Bədoona ana, tam bə minti hate kaayaŋ, tam bele hate kusrum tam də kusrum bə səmaŋ naanaanə mo? Tam waate kaŋ minti yə a ji dəgaayaŋ ba, ana tam nuutu bə jəərə ɗaw!

²² Tam he ku kaa kaayaŋ wəra minti yə a ji piwpiw ba, ana doloy tam bə jəwa! Tam minti giidim paapa cəərə kar gə minti kaŋ guluy pepe neeteŋ ba, ana tam nuutu bə ɗeete a humti kar gə giidə kuli neeteŋ warda!

²³ Tam ufi kum də ku giliŋ, səma tam bə ɓalke aŋke də Pepeŋa wəra də bay humi bə kosoŋ bə cəərə ku gili toŋ toki faɗi pa.

²⁴ Kel teŋ ji haa damdi wəra bə jeere-jeere giidə Kefter kə Pepeŋa ana minti: «Kaa gə minti paapa gə Ziwifi baŋ bə sarte sam Pepeŋa haa gud aŋ gə Ziwifiŋa ɗaw.»

²⁵ Jəəne minti tam bə ji joŋre də kel kə ku giliŋ, gəəzi *jeme bə tantaŋ keye. Səma tam jəəne paapa bə humi kosoŋa cəərə ku giliŋa baŋ, koo tam jəə la nuutu wəra bə jamə-jeme tantaram, tam haa bə hulum bə minti tənturu bay jemeŋ ana faɗi.

²⁶ Jəəne minti hulum bə tənturu də bay jemeŋ bə humi kosoŋa cəərə kel kə giidə ku giliŋaŋ, Pepeŋ gulu haa damdi hulum bə tənturu də jamə-jeme ana faɗi.

²⁷ Tam bə Ziwifiŋ, kel gə jeerə-jeere gə giidə ku giliŋ kaasəma daana tantaram wəra də jamə-jeme gəm. Də teŋ keɗe tam paapa bə humi kosoŋa cəərə ku giliŋa ba. Kel gə minti hulum bə tənturu də bay jemeŋ kəna a kusuki du bə humi kosoŋa cəərə ku giliŋaŋ, ɗe a jəmam kəəti dəm haa karman toŋ.

²⁸ Gud maa mo ji hulum hulum bə Ziwifiŋ, haa paapa ɗe du bə kerkə koŋ kəna anəkayya təwaŋ ba. Tanta də jamə-jeme də gəəzə-gəəziŋ haa paapa tarwa də minti kaŋ asa sar hulumaŋ təwa bə gəm.

²⁹ Səma ji hulum hulum bə Ziwifi bə gəəzə-gəəziŋ haa karman bə minti gal giidu daŋ. Tanta də jamə-jeme də gəəzə-gəəziŋ haa nayta də minti Tiirə Pepeŋ jəərə də ku tarmə hulum; joŋre kə ku gili bə jeerə-jeereŋ paapa ada ba. Hulum toŋ fele tokɗe nuutuŋ haa kasi Pepeŋa, paapa kasi kaa kəsarkaŋa ba.