ROMEŊ 16 - JAA TƏMARWAŊ

Pol mirki kaŋ

¹ Ten gaŋ dərəŋ cəərə nawrə áŋ Febeŋa minti a həlgə ɓeta. A həlgə də joŋre giidə kuli kə Pep bə Saŋkereŋa.

² Aŋ doorə irku də la sarəŋa də sam Barkaŋ də kəkəy bə minti kaa kə Pepeŋ kir tope irku də kumsi duuruŋ ana faɗi. A ko muntu muntu mo bə minti a jəəne də caadə keyeŋ, aŋ kayə la faɗi gud maa mo a də kusrə, a kəyaŋ kaa kə Pepeŋ ablaw, ten də kusrən ada gəm.

³ Ten bə mirki Pirsila daana Akilasi gə minti are a joŋre kə Yeesu Kristuŋa keɗe diiriŋ.

⁴ Yə a day bə fele meŋa wəra bə seeren ku katənaŋ. Ten də suuseŋ a niini ablaw, paapa ten təwa bə gəm, kaa kə Tapi gə giidə seŋka də minti paapa gə Ziwifi baŋ keɗe bə jəy di gəm.

⁵ Ten bə mirki kaa kə doo-de gə minti tapte ciiri girdiyaŋ. Ten bə mirki Epayneti, karmə giidən. Wə haa hulum bə minti doŋ ajew gud Kristu giidə seŋka də Aziŋaŋ faɗi.

⁶ Ten bə mirki Mari də minti gəyaŋ kusrə ablaw bə ji joŋreŋa a nəənəŋ.

⁷ Ten bə mirki Andoronikisi daana Zuniya gəm, kaasaw də areŋ. Yə haa kaa gə minti are hamaŋ daŋgay də kumsi. Yə ɓasi keɗe haa *kaa kə vaa-ve gə minti səməy hagaŋ ba ga'i ba, daana yə doŋ gud Kristu haa ajew dən ɗaw.

⁸ Ten bə mirki Ampiliyatusi, karmə giidən, bə minti bə tapə-tepe də Barkaŋ.

⁹ Ten bə mirki Urbeŋ bə minti are a joŋre kə Kristuŋa də kumsə areŋ. Ten bə mirki karmə giidən Estakisi gəm.

¹⁰ Ten bə mirki Apeles bə minti wəra bə vaɗə-veɗe de nuutu bə gud Kristuŋ anə kaŋkaŋ. Ten bə mirki gə ger Aristobula gəm.

¹¹ Ten bə mirki Erodiyoŋ bə minti a kaasaw də areŋaŋ. Ten bə mirki gə ger Narsisi gə minti gə doo-de gud Barkaŋaŋ.

¹² Ten bə mirki Terifena daana Terifozi, kəram té ɓasi gə minti gəyaŋ kusri a joŋreŋa a Barkaŋ. Ten bə mirki karmə giidən Persidi də minti gəyaŋ kusrə ablaw a joŋreŋa a Barkaŋ gəm.

¹³ Ten bə mirki Rufusi, hulum bə joŋre kə Barkaŋ bə minti səmu bə hage ablaw, daana nuru də minti koloŋ nərən gəm.

¹⁴ Ten bə mirki Aseŋkiriti, Felegoŋ, Ermesi, Patrobasi, Ermasi də kəsaanə áŋ kaayaŋ gə doo-de gə minti gə tapə-tepe diiriŋ.

¹⁵ Ten bə mirki Filologi daana Zuli, anə Nere də nawraŋ, Olempiyasi də kaa kə Pep kaayaŋ gə minti gə tapə-tepe diiriŋ keɗe.

¹⁶ Aŋ mirkə kumsəŋ kaa kə Pepeŋ la wəra anə təfaɗ-təfaɗi aduubə də kumsəŋa. Kaa kə Tapi kə Kristuŋ neŋneŋ keɗe bə mirkiŋ na gəm.

Pol ge kosnə kaŋ

¹⁷ Kəsaananti, ten bə jəŋ kamkama minti aŋ amə kusrəŋ la pisi ku kaa gə minti ceme dər kaŋ daana lente kaŋ wəra də kel kə waate gə bayməlaŋ gə cəərə hate bə minti aŋ fəlnuŋ. Aŋ zee la wəra tooto siri,

¹⁸ gud maa mo gom də kaa teŋ ji joŋreŋ paapa a Kristu Barkaŋ náŋ ba, yə jəw haa gud giidi. Də durdi də keŋ daana də kel kə waate pəsaŋ neeteŋ, yə ji tiniini də kaa gə minti paapa gə jeŋə-jeŋe bə ase gom də kel teŋ kəya baŋ.

¹⁹ Kaŋ keɗe asaŋ humi bə kosoŋ nəətiŋ bə cəərə Barkaŋ wəra, daana kel teŋ doonon ku tarman wəra də waaleŋ. Səma ten bele minti aŋ jəə la wəra gə asə-ase a ji bə pisiŋa bay təpu də baymeleŋ anə ceki.

²⁰ Pep bə kəkaɓiŋ maŋ bə ɓalke səɓaki kə *Sataŋ wəra; wə koloŋ yaŋ gə əsə-isi cəərə gəm. Pisi kə Barkaŋ náŋ Yeesu jəə la dəərəŋ!

²¹ Timote bə minti are a joŋreŋa də kumsiŋ daana kaasaw dən Lusiyusi, Zasoŋ də Sosipater bə mirkiŋ na.

²² Hulum bə jeeréŋ a kefter toŋa haa ten Tertiyusi. Ten bə mirkiŋ na gəm a sam Barkaŋ bə minti təpaŋ náŋ.

²³ Gayusi, hulum bə minti ten bə həəti girduŋ daana bə minti kaa kə Tapiŋ tapte girduŋ, bə mirkiŋ na. Erasti, hulum bə ame soloy bə vil daana seenə áŋ Kartusiŋ bə mirkiŋ na gəm. [

²⁴ Konce du toŋ paapa giidə ablaw də kefter bə dayday bə ku Gerekiŋa ba. Wə waate minti: Pisi kə Barkaŋ náŋ Yeesu Kristu jəə la dəərəŋ keɗe. Amen.]

Pol tokɗe Pepeŋ

²⁵ Aŋ tokɗə Pepeŋ la! Wə bə nakə-neke bə koloŋ də səɓaki a deŋa, damdi *Kel pəsaŋ kəmarwaŋ gə cəərə Kristu gə minti ten wəra bə wəətiya waateŋ ana, daana damdi ɗiki kə Pep bə ɗampə-ɗampe bə cəərə Kristuŋ, bə minti a bə metə-mete da anə hãã, waate anaŋ gəm.

²⁶ Səma bə hebkənaŋ, kel gə minti *kaa kə jogte ku mini kə Pepeŋ a jiiriniy gaŋ gud ɗiki tó bə ɗampə-ɗampeŋ wəra pəɗaki. Pep bə minti tewe baŋ waataŋ haa tó faɗi minti gidiirə kaŋ keɗe əskə gud ɗiki toŋ la wəra, kir minti yə nakə la bə de daana bə humi kosoŋa cəərə toŋ.

²⁷ Tokɗeŋ jəə la kə Pep bə minti məna bərdə aseŋ. Aŋ tukɗu la bə faɗnə-faɗna gud Yeesu Kristu! *Amen.