ROMEŊ 15 - JAA TƏMARWAŊ

Aŋ ɗee la bə Kristu ana

¹ Áŋ gə minti də səɓaki a deŋaŋ, áŋ kir hale dewe də kaayaŋ gə minti kəm paapa də səɓaki baŋ. Áŋ a golde karman bə de dər kusrə áŋ kəm bə ɗaw.

² Mindi mindi mo gud áŋa goldə la haa karman bə minti de dər kumsuŋ kir minti wə falə pisiŋ la guudu daana minti wə kəyu la bə si a deŋaŋ.

³ Gud maa mo Kristu goldoŋ haa paapa karman bə de dər kusruŋ təwa ba. Səma kel jəŋ suru damdi wəra bə jeerə-jeere giidə Kefter kə Pepeŋa ana minti: «Sarte bə minti kaŋ a sartənam duuruŋ, bəŋ a awte haa cəərəna.»

⁴ Kel gə minti gə jeerə-jeere giidə Kefter kə Pepeŋ da anə hãã keɗeŋ haa bə hate áŋ. Yə ge áŋ bə kole bə mi ku kela daana bə teŋe dər áŋa kir minti ɗiki də áŋ jəə la saksaki bə malə-mele cəərə Pepeŋa.

⁵ Pep bə minti aye mi bə ku kel tarmə kaŋa daana teŋe bə dər, koloŋ la gə nakə-neke bə ji kuŋ məna də kumsəŋ damdi Yeesu Kristu jəŋ anaŋ faɗi.

⁶ Bədoona ana ta, aŋ tokɗe Pepeŋ yaŋ, Bar Barkaŋ náŋ Yeesu Kristuŋ, də ku tarməyaŋ daana dordoŋ məna.

⁷ Aŋ topə irku də kumsəŋ la damdi Kristu doonoŋ irku dəŋ suru ana kir minti Pepeŋ falə tokɗeŋ la guudəŋa.

⁸ Ten waate haa gəəziŋ minti Kristu bəŋ cəərə seŋkaŋa ha'aŋ, bə bi a ji hulum bə joŋre kə kaanə Ziwifiŋ. Wə gəənəy diri cəərə ɓeti kə Pepeŋa a kəkəy bə minti wə doŋ ku kel gə minti Pepeŋ a wəətənəy səməy warda a kəmoomo diŋ.

⁹ Wə bəŋ haa minti kaa gə minti paapa gə Ziwifi baŋ tokɗə Pepeŋ la gud giidu pəsaŋa gəm, damdi wəra bə jeerə-jeere giidə Kefter kə Pepeŋa ana minti: «Gud teŋa ta, ten waate yaŋ wəra anə pəɗaki adəwaldə kaa gə minti paapa kaanə Ziwifi baŋ minti tam haa Pepeŋ. Ten ge gudul yaŋ də səmam bə ayam tokɗeŋ.»

¹⁰ Wəra bə jeerə-jeere pa minti: «Aŋ kaa gə minti paapa gə Ziwifi baŋ tapə la bə ji waale də kaa kə Pepeŋ keɗe.»

¹¹ A ko baalaŋa pa minti: «Aŋ gə minti paapa gə Ziwifi baŋ, aŋ keɗe tokɗə Barkaŋ la. Gidiirə kaŋ keɗe həgu səmu la.»

¹² Giidə kefter kə *Ezaya gəm minti: «Hulum pi duru yaŋ a kaasaw də Zese. Wə bə bi yaŋ a isi kumna cəərə kaa gə minti paapa gə Ziwifi baŋ, yə bə mele ɗiki di yaŋ cuuru gəm.»

¹³ Pepeŋ, hulum bə minti mele bə ɗikiŋ bi haa kəəsu daŋ, ɗosoŋ tarməyaŋ la wəra də waaleŋ daana kəkaɓiŋ gud de nəəti bə guuduŋa. Kəya ɗiki dəŋ bə malə-meleŋ ji yaŋ wəra ablaw hasi gud səɓaki kə Tiiru Cetcetaŋa.

Pol waate sam joŋre nuutuŋ

¹⁴ Kəsaananti, ten toŋ wəra bə asə-ase cəərəna kaŋkaŋ minti aŋ haa kaa kə ji pisi ablaw faɗi daana minti ase bə kar keɗe bə minti aŋ kir əsuŋ, aŋ gə asə-ase duuru. Aŋ gə nakə-neke bə keye kumsəŋ də kel kə waate gəm.

¹⁵ Də teŋ keɗe, a ko kəmana ta'-ta'i giidə kefter bə minti ten bə jeereŋ dəŋa kəyaŋ, ten topoŋ kun cəərə kela ba bə hare bə ɗəkəŋ cəərəŋa cəərə sərdə karaŋ. Ten jəŋ bədoona haa gud bə minti Pepeŋ gud pisi nuutuŋaŋ

¹⁶ kolnon hulum bə joŋre kə Yeesu Kristu cəərə kaa gə minti paapa gə Ziwifi baŋ. Ten wəra bə ayə-aye kusrən keɗe a Pepeŋ bə waate *Kel pəsaŋ kəmarwaŋ nuutuŋ, kir minti kaa gə minti paapa gə Ziwifi baŋ nakə la bə kole damdi karman bə ayə-aye bə daw duru ana, bə minti Tiiru Cetcetaŋ a ziinu wəra dəra'i a nuunuŋ.

¹⁷ Kəya gud tapi katəna də Yeesu Kristu, ten bə nakə-neke bə hage sam kusrən gud joŋre bə minti ten bə jəwa a Pepeŋ.

¹⁸ Gud maa mo, ten gədaŋ ne minti ten waate sam karman, ten waate təwa haa sam karman bə minti Kristu jəŋ minti, kaa gə minti paapa gə Ziwifi baŋ kolə la bə humi kosoŋa cəərə Pepeŋa haa dəərən. Wə jəŋ kel teŋ haa də kel kə waateŋ, də kar kə jiŋ,

¹⁹ də kar gə minti veɗe səɓaki kə Pepeŋ wəraŋ, də kar gə məɗ-miɗiŋ, daana də səɓaki kə Tiiru Pepeŋ gəm. Məlaŋ guudu Zeruzalema hãã warna giidə seŋka də Iliriŋ naŋ, a ko bə minti ten kaltaŋ adaŋ keɗe, ten waataŋ Kel pəsaŋ kəmarwaŋ gə cəərə Kristuŋ wəra ada.

²⁰ Səma ten bəlaŋ waate Kel pəsaŋ kəmarwaŋ gə cəərə Kristuŋ wəra haa a ko bə minti yə a waataŋ ada kəm hõy baŋ. Bədoona ana hulum neke bə waate minti ten jogoŋ bə hərsi cəərə ko bə minti hulum baalaŋ a gəənu guudu wəraŋ ba.

²¹ Bədoona ana ten jəŋ haa karman bə minti wəra bə jeerə-jeere giidə Kefter kə Pepeŋa minti: «Kaa gə minti yə waataŋ karman hõy cuuru a niini baŋ bə əsu yaŋ. Kaa gə minti a əskəŋ karman hõy cuuru baŋ bə iskiy guudi yaŋ.»

Pol bele ɗe Rom

²² Taknan kun kampa ablaw bay ɗe gerdeŋ na haa kel teŋ faɗi.

²³ Bə hebkənaŋ, joŋre katən təwaŋ wəra giidə seŋka də minti ten a jəŋ bə ji joŋreŋa ada keɗeŋ. Laate hebkəna ablaw bə minti caadə ɗe gerdeŋ naŋ sarənaŋ.

²⁴ A ɗiki dəna wə bə de ku yaŋ máŋ wəra də ko bə minti ten he kəkəy bə ɗe giidə seŋka də Espay. Gud maa mo ten də caadə ŋefe dəərəŋ a kəkəy bə minti ten bə raawe yaŋ ada naŋ daana minti aŋ kəyan la ku gəryi toŋa. Ten bə raawe yaŋ ada na haa də ko bə minti áŋ əsəŋ ne də kumsə áŋ hãã bə minti ten gaanaŋ tolka dəŋ ne wəraŋ.

²⁵ Bə hebkənaŋ ten koore kəm haa Zeruzalem bə ɗe a keye kaa kə Pep gə giidəŋ.

²⁶ Gud maa mo goloŋ pisi dər kaa kə Tapi gə Masedəwana daana gə Akaya minti té taarə soloy la bə keye kaa kə Pep gə caaca gə giidə vil də Zeruzalem.

²⁷ Yə haŋ ɗiki toŋ ku tərməyi haa té də kusri, səma a gəəziŋa haa karman bə minti yə kir jəy diŋ gəm. Gud maa mo kaanə Ziwifiŋ ɓarsaŋ kar neete gə minti a tiiruŋa də té gə minti paapa gə Ziwifiŋ baŋ. Yə kəyaŋ kaanə Ziwifiŋ ne hebkəna də kar gə kəəsiŋ gəm, haa akasi.

²⁸ Bə minti ten doŋ ku joŋre toŋ ne wəra daana minti ten ayaŋ kar gə minti yə a təərənəy da ne warda keɗe a kəmnə diŋ, ten he kəkəy bə koore Espay, ten kele kəm gerdeŋ na.

²⁹ Ten wəra bə asə-ase minti, ten ɗe gerdeŋ na ha'aŋ, də pisi kə Kristuŋ wəra keɗe.

³⁰ Kəsaananti, gud Barkaŋ náŋa Yeesu Kristu daana bele bə minti Tiiru Cetcetaŋ əyu a áŋ, ten bə jəŋ kamkama minti aŋ tapə la dəərən a duuriŋa dər toose bə minti aŋ bə tuusu a Pepeŋ guudənaŋ.

³¹ Aŋ toosə la kir minti kaanə Zude gə minti paapa gə doo-de baŋ a jən baymele ba, daana minti keye bə minti ten bə ɗe duuru a kaa kə Pep gə giidə vil də Zeruzalem doy diri la gəm.

³² Kəya ten neke yaŋ bə tuli gerdeŋ na ku tarman də waale daana Pepeŋ bəlaŋ neŋ, ten fele kaŋkaw kəmarwaŋ yaŋ giidəna gəm də ko bə minti ten bə ji yaŋ aduubə dəŋaŋ.

³³ Pep bə kəkaɓiŋ jəə la dəərəŋ keɗe! *Amen.