ROMEŊ 14 - JAA TƏMARWAŊ

Aŋ a ceme kəəti də kumsəŋ ba

¹ Aŋ doo irku də hulum bə minti kəm paapa də səɓaki a deŋa baŋ la sarəŋa bay jeme kəəti də kel gə minti wə bə ɗikiyaŋ.

² Aŋ goloŋ neŋ, hulum yaŋ bə ɗiki minti tó bə nakə-neke bə hame kar keɗe. Nayto bə minti kəm paapa də səɓaki a deŋa baŋ, hame nuutuŋ haa kosnə kəsaw təwa.

³ Hulum bə minti bə nakə-neke bə hame kar keɗeŋ a gole nayto bə bay həməy baahãy ba. Hulum bə minti nəkaŋ bə həməy keɗe baŋ, a jeme kəəti də nayto bə həməy keɗeŋ bə gəm gud bə minti Pepeŋ duunu irku du suru.

⁴ Tam haa mindi mo bə jeme kəəti də hulum bə joŋre kə hulum baalaŋ? Wə əsəŋ ne ku joŋre nuutuŋa pisi mo, wə awaŋ ne a kəkəy bə jəwa mo, cəərə kel teŋa haa burduŋ. Wə isi yaŋ nuutu ku pisi gud bə minti Barkaŋ bə nakə-neke bə kəyu minti wə a awe baŋ.

⁵ Hulum yaŋ, sərdə hiti kəman gole duru pisi dəŋaŋ kumsu, kə baalaŋ gole duru haa kel kə məna. Mindi mindi mo kir ase wəra cuuru kaŋkaŋ minti ɗiki də tó bədoona haa səm mo?

⁶ Hulum bə minti bə ɗiki minti hiti kəman dəŋaŋ kumsuŋ, wə jəw haa a Barkaŋ. Hulum bə minti bə nakə-neke bə hame kar keɗeŋ, wə jəw haa a Barkaŋ gəm, gud maa mo wə ji suuse a Pepeŋ ciiri. Nayto bə minti paapa bə nakə-neke bə həməy keɗe baŋ, jəw haa a Barkaŋ gəm gud bə minti wə ji suuse a nuunu ciiri gəm.

⁷ Hulum anə məna gud áŋa caw a kusruŋ, paapa. Wə me paapa a kusru bə gəm.

⁸ Jəəne minti áŋ zugiŋ, haa a Barkaŋ. Jəəne minti áŋ meŋ neŋ, haa a nuunu gəm. Bədoona ana ta, áŋ jəəne kəm zugiŋ, ɗalba áŋ meŋ ne wəraŋ, áŋ haa kə Barkaŋ.

⁹ Gud maa mo Kristu meŋ wəra daana wə haraŋ wəra dədərgə adordə meŋaŋ haa kir minti tó nakə la bə ji Barkaŋ kə kaa kə mee-meŋ, kə kaa gə minti kəm dədərgəŋ gəm.

¹⁰ Səma tam, tam jeme kəəti də seenem haa səm mo? Tam gəm, tam hage də seenem baahãy səm mo? Gud maa mo áŋ keɗe ɗe wəra ku kəətiŋa tiinə Pepeŋa.

¹¹ Gud maa mo Barkaŋ waataŋ wəra giidə kefter nuutuŋa minti: «Ten waate haa kənaŋ minti: mindi mindi mo ve wəra də guguuru tiinina daana wə waate yaŋ wəra də ku pəɗaki gəm minti ten haa Pepeŋ.»

¹² Bədoona ana ta, mindi mindi mo gud áŋa ɗe yaŋ a tope bəlam də karman bə minti wə a juunuŋ wəra tiinə Pepeŋa tó də kusru.

¹³ Áŋ yaakə ceme bə kəəti də kumsə áŋ la wəra. Aŋ haa la ɗaw haa ɗiki bə minti aŋ a ge karman a kəkəy də seenə áŋa minti wə dasə la ada bə gaw dər baymeleŋa ba.

¹⁴ Ten bə asə-ase karman daana ten wəra bə doo-de haa duuru gud ɗiki kə Barkaŋ Yeesuŋa minti: karman anə məna faɗi də kusru bə minti paapa cetceti baŋ, paapa. Səma hulum ɗəkəŋ ne minti karman yaŋ, toŋ paapa cetceti baŋ, wə kole suru paapa cetceti ba gəəzi.

¹⁵ Jəəne minti tam kole ɗiki də seenem bə huyu gud karman bə minti tam bə həmuŋ, karman bə minti tam bə jəwaŋ paapa bə tapə-tepe də beleŋ ba. Amə kusrum la pisi kir minti hame bə karman nəmti toŋ a kole bə ɓalke seenem bə minti Kristu meŋ guudu wəraŋ ba.

¹⁶ Jəə la kir minti karman bə minti dərəma pisiŋ, a kole karman bə minti kaŋ neke bə wəətu səmu baymele ba.

¹⁷ Gud maa mo *Kumna kə Pepeŋ waate paapa cəərə aye bə kəkəy bə kar kə hameŋ daana gə seŋa ba. Kəmtəŋ də kel haa minti áŋ jəə la gə kolə-kole dər Pepeŋa ɗeker, áŋ jəə la kəkaɓi daana dər waaleŋa. Aye kar teŋ a áŋ haa Tiiru Cetcetaŋ.

¹⁸ Hulum bə minti ji joŋreŋ a Kristu də kəkəy toŋ kəyaŋ de dər Pepeŋ yaŋ daana kaŋ waate yaŋ gəm minti wə bə ji haa pisiŋ.

¹⁹ Gud teŋa ta, áŋ goldə la saksaki haa kel gə minti ji kəkaɓiŋ aduubə də kaŋa daana gə minti keye kumsə áŋ bə si a deŋaŋ.

²⁰ A ɓalke joŋre kə Pepeŋ wəra gud karman bə minti tam bə həmuŋ ba. Gəəzi kar kə hameŋ neŋneŋ keɗe *cetceti. Səma jəəne minti a kəkəy bə hame kumundu kəmana tam ge seenem bə awe dər baymeleŋaŋ, tam jəŋ haa baymele.

²¹ Karman pisiŋ haa minti a hame kusukiŋ ba, a se kumuy ba, koo karman muntu muntu bə minti neke bə ge seenem bə awe dər baymeleŋaŋ, a jəw ba faɗi.

²² Karman bə minti tam bə ɗuku minti wə yaŋ pisi cəərə kar teŋaŋ, bəsu la ku tarməyama kir minti wə jəə la də dərəŋ ɓasi də Pepeŋ təwa. Waaleŋ haa kə hulum bə minti ji karman bay awəy ku tərmuyu cəərə pisi duŋaŋ.

²³ Hulum bə minti hame karman bə minti wə də awəy də pisi duŋ ku tərmuyu cuuruŋ, wə bə doo-de kusru də kəəti gud bə minti karman bə minti wə juunuŋ paapa bə tapə-tepe də deŋ ba. Gud teŋa ta, karman muntu muntu mo bə minti hulum jəw, wə jəəne də awəy cuuruŋ, karman toŋ paapa bə tapə-tepe də deŋ ba, kəya wə juunu neŋ, wə jəŋ haa baymele faɗi.