ROMEŊ 12 - JAA TƏMARWAŊ

Ɗe də hulum bə joŋre kə Pepeŋ

¹ Bədoona ana kəsaananti, gud giidu pəsaŋ gə ablaw-ablaw gə minti Pepeŋ jiiniy sar áŋaŋ, ten bə jəŋ kamkama minti: aŋ ayə kusrəŋ la wəra soki məna a Pepeŋ damdi karman bə minti yə əwu bə keere ana, bə minti dədərgə, wəra bə zee-ze dəra'i a nuunuŋ daana bə minti daw duruŋ faɗi. Haa kəya kəkəy bə gəəzə-gəəzi bə minti aŋ kir ke awalna a Pepeŋ duuru ku tarməyaŋaŋ.

² Aŋ a tepe ɗe dəŋ də kə kaa gə dər ko bə hebkənaŋ ba. Aŋ yaakə Pepeŋ la bə koloŋa də ɗiki kimirwi bə minti wə bə ayaŋ dəŋaŋ ɗaw, kir minti aŋ nakə la bə ase karman bə minti giidə Pepeŋ bəluŋ, haa karman bə minti pisi, bə minti daw duruŋ, daana bə minti a kuɗuŋa damdi wə sə a ji bədoona anaŋ.

³ Gud pisi bə minti Pepeŋ juunu sarənaŋ, ten bə waate mindi mindi mo guudəŋa minti, aŋ a gole kusrəŋ dəŋaŋ karman bə minti aŋ lamaŋ ba. Aŋ kir gole dər kusrəŋ haa anə ɓeti də aŋar də de bə minti Pepeŋ aynaŋ dəŋ.

⁴ Mindi mindi mo gud áŋa də kusru caw wə məna, səma kar du ada ablaw, joŋre neeteŋ hal-hal gəm.

⁵ Yə də áŋ bədoona gəm. Áŋ ablaw, səma áŋ ɗe a tepe tapi haa bə ji kusrə hulum məna gud tepe náŋa də Kristu. Áŋ keɗe gə jagtə-jagte sar kumsə áŋa haa damdi kar də hulum ana, mindi mindi mo a ko nuutuŋa.

⁶ Gud pisi kə Pepeŋa, wə ayaŋ aye a mindi mindi mo gud áŋa hal-hal bə ji joŋreŋ. Wə ayaŋ ne a hulum haa joŋre bə jugu kuŋ wəraŋ, wə jəw la də kel kə waate gə minti tepe də kel gə minti áŋ gə doo-de guudiŋ.

⁷ Wə ayaŋ ne a baalaŋ minti wə kayə kaŋ laŋ, wə kəyəy la faɗi. Wə ayaŋ ne a baalaŋ minti wə hatə kaŋ laŋ, wə hətəy la faɗi.

⁸ Wə ayaŋ ne a naytoŋ minti wə teŋə dər kaa laŋ, wə tiŋiy diri la faɗi. Wə ayaŋ ne a kumundu pa minti wə ayə la a kaŋ, wə ayə la bay ɗiki faɗi. Wə ayaŋ ne a baalaŋ pa minti wə ɗee la də kaŋ, wə jəw la haa də aye bə kusruŋ faɗi. Wə ayaŋ ne a kumundu ji bə giidu pəsaŋ sar kaŋaŋ, wə jəy la də waale faɗi gəm.

⁹ Beleŋ jəə la a kəkəy duŋa gəəzi. Aŋ malə dər baymeleŋ la wəra, aŋ doo jaa la də pisiŋ.

¹⁰ Aŋ balə kumsəŋ gə doo-deŋ la aduubə də kumsəŋa damdi kəsaanə kumsiŋ bele kumsi ana. Aŋ bandə la bande bə ji kese də kumsəŋa.

¹¹ Aŋ a ji də koslom ba, aŋ jəə joŋre la wəra də ku tarməyaŋ keɗe. Aŋ ayə kusrəŋ la wəra keɗe bə ji joŋreŋa a Barkaŋ.

¹² Aŋ jəə la də waale gud karman bə minti ɗiki dəŋ bə malə-mele cuuruŋ, aŋ məə la ku gəəliŋa, aŋ jəə la saksaki bə toose Pepeŋa gəm.

¹³ Kaa kə Pepeŋ jəəne dər caadə karmanaŋ, aŋ kəyəy la, aŋ topə irku də kaa kə doo-deŋ la gerdeŋa pis-pisi gəm.

¹⁴ Aŋ waatə Pepeŋ la haa minti wə gaa pisi la cəərə kaa kə lasəŋa ɗaw, paapa minti wə gay guɗbusi la ba.

¹⁵ Aŋ waalə la də kaa gə minti dər waaleŋaŋ, aŋ laawə la də kaa gə minti dər laaweŋaŋ gəm.

¹⁶ Kuŋ jəə la bə tapə-tepe də kumsəŋ. Aŋ a teke cəərə kusrəŋ apəya ba, aŋ doo haa la bə ji joŋre muntu muntu mo, koo nayto bə minti gole dər kaŋa paapa karman baŋ. Aŋ a ɗiki minti aŋ kaa kə asə-ase ba.

¹⁷ Aŋ a werke baymeleŋ də kumsu baymeleŋ ba, aŋ goldə la ɗaw haa kəkəy bə ji kar gə minti dər kaŋa keɗe pəsaŋ.

¹⁸ Agal nəətiŋa, aŋ jəə la kir minti aŋ nakə la bə ji kəkaɓi də kaŋ keɗe.

¹⁹ Aŋ gə minti giidən bəlaŋ, aŋ a ge abal də kusrəŋ aŋ ba, aŋ yaakə kəkəy də waŋ də koleŋ la a Pepeŋ. Gud maa mo wə waataŋ giidə kefter nuutuŋa minti: «Hulum bə ke abal haa ten, werke mindi mindi mo haa ten gəm.»

²⁰ Wə waataŋ pa minti: «Tay jəəne bə ɗeme hulum bə acukur nəmtiŋaŋ, əyu karman bə hame la. Kinkin jəəne duuruŋ, əyu karman bə se la. A ko toŋa kəya, tam bə ji haa damdi tam bə fəku kuɓursi bə cəwa taŋtaŋ də cuuru ana gadi faɗi.»

²¹ A yaake baymeleŋ bə pi buluma cəərəma ba anə ceki. Ana ɗaw ha'aŋ, pəə bulum la wəra cuuru də ji bə pisiŋ.