ROMEŊ 11 - JAA TƏMARWAŊ

Pepeŋ beye kaanə Ziwifiŋ warna ba

¹ Bədoona ana ten də le kuŋ minti: Pepeŋ bəyaŋ kaa nuutuŋ warna mo? Paapa anə ceki faɗi! Gud maa mo ten də kusrən hulum bə *Israyel. Ten a tanta də Beŋjameŋ, a kaasaw də *Abrahama.

² Pepeŋ bəyaŋ kaa nuutu gə minti wə a ŋəmnəy warda ajew hãã ba. Aŋ wəra gə asə-ase kel kə *Eli, *hulum bə jogte ku mini kə Pepeŋ, gə minti wəra gə jeerə-jeere giidə Kefter kə Pepeŋaŋ. Wə hagaŋ gəəliŋ kəəsi tiinə Pepeŋa minti:

³ «Barkaŋ, yə awaŋ kaa kə jogtom ku mini nəmtiŋ wəra. Yə caataŋ *ko bə jəətəm keereŋ wəra gəm. Yaakaŋ hebkəna haa ten məna, yə bə goldona bə awe wəra gəm.»

⁴ Pepeŋ hərnu kel minti: «Ten yaakaŋ kaa a kusrən guɓ-guɓi seeɗa. Haa kaa gə minti ɗeŋ gud Baala ba, bə minti kaŋ bə ɗiki cuuru minti wə pepe kəman.»

⁵ Dər ko bə daynaŋaŋ, haa bədoona gəm. Kaa gə minti Pepeŋ a ŋəmnəy wəra gud pisi bə minti wə jəw sar kaŋaŋ bese bay ji maki ba.

⁶ Wə ŋəmnəy haa gud pisi nuutuŋa səm moŋ, ŋeme toŋ ji paapa gud joŋre bə minti yə a juunuŋ ba. A jəə la ana baŋ, yə mante pisi nuutu toŋ minti pisi bə ji sar kaa pəda.

⁷ Gud kel teŋ haa minti harmə mo? Yə haa minti kaanə Israyel fəlaŋ karman bə minti yə a bə gulduŋ ba. Fəlnu haa kaa gə minti Pepeŋ ŋəmnəy wəraŋ faɗi. Kə kaa kaayaŋ ha'aŋ, wə jəŋ kir minti yə ŋelə la wəra

⁸ damdi wəra bə jeerə-jeere giidə Kefter nuutuŋa anaŋ minti: «Hãã hebkəna Pepeŋ jiiniy kir minti yə nəŋə la wəra dər ɗiki di, diri a neke bə ase ba daana kusniy a neke bə əski bə gəm.»

⁹ Kumna *Davidi də kusru waataŋ bədoona gəm minti: «Hamte bə kəɗwəy neeteŋ kolə la siri vew kumundu ba amaaya də tupuy, karman bə minti yə awte kəəsu, daana bə fele daŋgay də minti yə a kir fəla anə ɓeti guuduŋ gəm!

¹⁰ Diri bəwə la wəra kir minti yə a ase pəda, kirki jəə la saksaki bə kuntə-kunti wəra kas eele bə gəəli bə kel gə siriŋ.»

¹¹ Ten də le ku pa minti: bə minti kampar kaanə Israyel dəsaŋ, yə awtaŋ warna kay naŋ bə faɗnə-faɗna mo? Paapa anə ceki! Səma gud leŋe neeteŋa ta, kaa gə minti paapa gə Israyel baŋ koloŋ bə fele seereŋ. Kəya kel teŋ gaŋ giidə kaanə Israyel bə hətəya faɗi gəm.

¹² Bə minti yə ləŋaŋ, kel teŋ gaŋ kaa gə cəərə seŋkaŋ bə fele pisi bobloŋa. Bə minti yə haraŋ wəra adoroŋ, kaa gə minti paapa gə Israyel baŋ fəlaŋ pisi bobloŋ gəm. Bədoona ana, bə minti Israyel haraŋ ne bə de haa də seereŋ wəra anə soki mənaŋ, pisi bə minti Pepeŋ jəw bə ji máŋ bə daŋə-deŋe kampa ablaw ɗaw.

Hel də minti kaa gə minti paapa gə Ziwifi baŋ fele seereŋ dəərəŋ

¹³ Ten waate kel hebkəna haa a aŋ kaayaŋ gə minti paapa gə Ziwifi baŋ. Ten haa *hulum bə gaa-ge kə Pep bə minti wə gəənu da a nəənəŋ. Gud teŋa ta, joŋre tó bə minti wə aynan dən kəyaŋ, ten ufi kun guudu faɗi.

¹⁴ Də joŋre toŋ kəya, a ɗiki dəna ten bə ge giidə kaa katən gə Ziwifiŋ yaŋ bə hətəya kir minti sirdiŋ tulə la wəra a seereŋa.

¹⁵ Gud maa mo bə minti Pepeŋ zeŋ kaanə Ziwifiŋ wəra agəjaŋaŋ, wə haraŋ bə tepe kaa kaayaŋ gə cəərə seŋkaŋa duuru. Karman bə minti ji a hare bə de irku də kaanə Ziwifiŋa suruŋ haa maa mo? Haa hare bə dədərgəŋ wəra adordə meŋa toki!

¹⁶ Mappa də minti yə a ayaŋ sərdəŋ ajew a Pepeŋ, a wəra nuutu keɗe. Kəbaŋ gə minti kəsar di kə Pepeŋ, kəəsiŋ haa nuutu faɗi gəm.

¹⁷ Bədoona ana, kaanə Israyel gə ŋarə-ŋere haa bə kəbaŋ oliviye bə akera gə minti yə cəmaŋ sərdə kəəsuŋ wəraŋ ana. Tam bə minti paapa bə Ziwifi baŋ, tam haa damdi kasi oliviye bə maskaŋ gə minti yə jəgtənəy a nayto bə akeraŋaŋ ana. Kəya tam neke bə se kan du gə minti li a kəsar du daŋ də kəəsu kaayaŋ gəm.

¹⁸ Gud teŋa ta, tam paapa kir hage də kasi oliviye gə ŋetə-ŋete wəraŋ baahãy ba. Tam neke bə ufi kum naanaanə pə mo? Gud maa mo ayam kan da haa kəsar də kəbaŋ, tam əyəy kan paapa tam ba.

¹⁹ Ɗalba tam isi bə waate minti: «Yə ŋeŋ kasi kəbaŋ wəra haa bə jagan a kuɗiŋ.»

²⁰ Gəəzi nuutu. Yə cəmaŋ kasi kəbaŋ teŋ wəra haa gud bay de neeteŋa. Nəmtiŋ ha'aŋ, tam saksaki kiiyi garaŋ haa gud de nəmtiŋa gəm. Səma a he cəərə kusrum apəya ba, jəə walka də kel məntəŋ gə minti jəm moŋ la ɗaw.

²¹ Jəəne minti Pepeŋ yaakaŋ kasi oliviye bə akeraŋ bay ɗoote baŋ, a ɗiki dəma minti wə yaakam mo?

²² Golə laŋ, aŋ bə ase ha'aŋ, Pepeŋ ji pisiŋ sar kaŋa daana wə də cəwa gəm. Wə də cəwa sar kaayaŋ gə minti awtaŋ a kəkəy nuutuŋaŋ, səma wə ji pisiŋ sarəma jəəne minti tam isi dər pisi toŋa saksakiŋ. Jəəne paapaŋ, wə ŋem wəra gəm.

²³ Kə kaanə Ziwifiŋ, yə koloŋ neŋ, yə doŋ neŋ, Pepeŋ hare yaŋ bə jəgtəya nuutu ada gud maa mo wə bə nakə-neke bə hare bə jəgtəya.

²⁴ Aŋ gə minti paapa gə Ziwifi baŋ, aŋ haa damdi kasi kəbaŋ gə maskaŋ ana. Yə camnaŋ da bə bi a jagtaŋ a kəbaŋ gə akera gə minti aŋ a jəwaŋ paapa siri baŋ. Kaanə Ziwifiŋ haa damdi kasi kəbaŋ gə akeraŋ ana. Pepeŋ ɗəlaŋ ne bə hare bə jəgtəya adaŋ, teŋ ji máŋ bay gəəli ɗaw gud bə minti haa kəbaŋ gə minti a jəwnəy warnaŋ.

Kaanə Ziwifiŋ fele seereŋ

²⁵ Kəsaananti ten bele minti aŋ asə kel gə gəəzə-gəəzi gə minti a gə metə-mete teŋ la wəra, kir minti aŋ a ji bə ɗiki saksaki minti aŋ gə asə-ase ba. Kel teŋ haa minti, sərdə kaanə *Israyel ŋéle yaŋ hãã bə minti kaa gə minti paapa gə Ziwifi baŋ gə minti a kir seere wəraŋ, seerə la wəra kəm keɗeŋ.

²⁶ Haa bədoona ana minti tanta də Israyel keɗe bə seere yaŋ wəra, damdi wəra gə jeerə-jeere giidə Kefter kə Pepeŋa ana minti: «Hulum bə minti bə de kaŋ yaŋ wəraŋ, fe haa Siyoŋ da. Wə pi baymele bə cəərə kaa gə minti a kaasaw də *Zakopiŋ yaŋ wəra.

²⁷ *Jaa də minti ten doora diiriŋ, haa də minti ten pəy baymele bə ciiriŋ wəraŋ.»

²⁸ Aŋ gulnuy ne agal də minti yə bəyaŋ *Kel pəsaŋ kəmarwaŋ wəraŋ, yə koloŋ kaa kə acukur kə Pepeŋ, səma aŋ kaayaŋ fəlaŋ pisiŋ haa gud teŋa. Jəəne agal də ŋeme bə minti wə a ŋəmnəy, yə saksaki haa kaa gə minti giidu bələy gud kel kə kəmoomo diya.

²⁹ Gud maa mo Pepeŋ kole ɗiki du cəərə karman bə minti wə əyuŋ daana cəərə kaa gə minti wə məntənəy wəra a kusruŋ ba.

³⁰ A dayday, aŋ gə minti paapa gə Ziwifi baŋ humuŋ kosoŋ cəərə Pepeŋa ba. Bə hebkənaŋ, wə jəŋ giidu pəsaŋ sarəŋa haa gud bə minti kaanə Ziwifiŋ yaakaŋ humi bə kosoŋ bə cuuruŋ wəraŋ.

³¹ Kel teŋ bə ji diiri haa bədoona ana gəm. Bə hebkənaŋ, cəərə bay humi bə kosoŋ neeteŋ awaŋ diiri haa minti Pepeŋ jəŋ giidu pəsaŋ sarəŋaŋ. Səma haa kir minti yə nakə la bə fele ji bə giidu pəsaŋ teŋ hõy gəm.

³² Bədoona ana Pepeŋ jəŋ kir minti kaŋ keɗe jəə la damdi yə a daŋgaya kasi humi bə bay kosoŋ bə cuuruŋa ana, kir minti tó nakə la bə ji giidə tó pəsaŋ wəra siri keɗe.

³³ Pisi kə Pepeŋ wəra boblo hasi! Ase nuutuŋ daana minti kar keɗe də duruŋ wəra bə daŋə-deŋe keɗe! Ɗiki bə minti wə təku bə jəəti kar, mindi bə nakə-neke bə daw guudu mo? Hel də minti wə jəəti kar dəərəŋ, mindi bə nakə-neke bə əskə guudə mo?

³⁴ Wəra bə jeerə-jeere giidə Kefter kə Pepeŋa minti: «Mindi asaŋ ɗiki kə Barkaŋ mo? Mindi bə nakə-neke bə kəyu də kel kə waate mo?»

³⁵ «Mindi ayaŋ karman a Pepeŋ minti wə kir wirku bal duŋ wəraŋ mo?»

³⁶ Gud maa mo jəŋ kar keɗe haa tó, yə lam haa kir kəəsu daana a nuunu gəm. Tokɗeŋ jəə la nuutu bə faɗnə-faɗnaŋ! *Amen.