ROMEŊ 10 - JAA TƏMARWAŊ

Kaanə Ziwifiŋ də kaa gə minti paapa gə Ziwifi baŋ, gud Barkaŋ bə məna

¹ Kəsaananti, karman bə minti ku tarman wəra bə balə-bele duuru ablaw daana minti ten bə toose Pepeŋa cuuru də səɓakiŋ, haa minti kaanə Ziwifiŋ falə seereŋ laŋ.

² Ten neke bə ji bərdə kəkəy ciiri minti yə gə ayə-aye kusri a kel kə Pepeŋa, səma paapa də kəkəy bə minti bə əsə-isi cəərə ase bə gəəzə-gəəzi bə Pepeŋa ba.

³ Yə əskəŋ gud hel də minti Pepeŋ kole kaŋ wəra duru ɗeker dəərəŋ ba, yə goldoŋ dər hel neete bə kole kusri wəra ɗeker duruŋ. Bədoona ana yə doŋ haa də nayta də minti Pepeŋ a ɗampəna wəraŋ ba.

⁴ Gud maa mo Kristu təwaŋ səɓaki də *ku giliŋ wəra, kir minti Pepeŋ kolə la duru ɗeker haa kaa gə minti doŋ neŋ keɗe.

⁵ *Moyisi də kusru a jeereŋ wəra cəərə kole bə huluma ɗeker dər Pepeŋa də ku giliŋ minti: «Hulum bə minti doŋ ku ku giliŋ ne wəra keɗeŋ, wə fele dədərgə də gəəzə-gəəziŋ guudu gəm.»

⁶ Səma Kefter kə Pepeŋ waate cəərə kole bə huluma duru ɗeker də deŋ minti: «A waate ku tarməyama minti: ‹Minti ɗe yaŋ tarmə pepeŋ mo?›, ba.» (Haa minti: bə ɗe a waate Kristu minti wə vaa da warda sar áŋ daŋ.)

⁷ «A waate bədoona ana bə gəm: ‹Mindi sorke a ko kə kaa kə mee-meŋ naŋ mo?›» (Haa minti: bə ɗe a waate Kristu minti wə luu da warda sar áŋ daŋ.)

⁸ Kefter kə Pepeŋ waate ɗaw haa minti: «Kel nuutuŋ sarəma maŋŋa ɗaw, yə wəra kuma daana ku tarməyama gəm.» Haa kel gə minti waate cəərə deŋa daana áŋ bə waate wəra a kaŋ haa té gəm.

⁹ Jəəne minti tam waate wəra kəkər də kum tiinə kaŋa minti Yeesu haa Barkaŋ, daana tam jəəne bə doo-de ku tarməyama minti Pepeŋ hərnu wəra dədərgə adordə meŋaŋ, tam fele seereŋ yaŋ.

¹⁰ Gud maa mo hulum bə minti jəəne bə doo-de wəra ku tərmuyuŋ, Pepeŋ kulu hulum ɗekeri duru. Wə waataŋ ne wəra kəkər də ku cəərə de nuutuŋaŋ, Pepeŋ siiru wəra.

¹¹ Gud maa mo wəra bə jeerə-jeere giidə Kefter kə Pepeŋa minti: «Mindi mindi mo doŋ ne guuduŋ, wə kole kese hõy pəda anə ceki faɗi.»

¹² Bədoona ana, hulum bə Ziwifiŋ paapa dəra'i də hulum bə minti paapa bə Ziwifi baŋ pəda: yə haa gud Barkaŋ bə məna bə minti ji pisiŋ bay gədəəgi du a kaa gə minti hare mante neeteŋ suruŋ.

¹³ Gud maa mo wəra bə jeerə-jeere giidə Kefter kə Pepeŋa minti: «Mindi mindi mo haraŋ mante nuutuŋ ne sar Barkaŋaŋ, wə siiru yaŋ wəra.»

¹⁴ Səma jəənə minti kaŋ doŋ guudu baŋ, yə hare mante neeteŋ suru naanaanə mo? Yə de guudu naanaanə mo jəəne minti yə a uskunu səmu bə waate hõy baŋ? Yə usku səmu bə waate naanaanə mo jəəne minti hulum paapa bə ɗe a wəətu səmu wəra a niini baŋ?

¹⁵ Yə ɗe a wəətu səmu wəra naanaanə mo jəəne minti hulum vəənəy baŋ? Kel teŋ damdi wəra bə jeerə-jeere giidə Kefter kə Pepeŋa ana minti: «Waaleŋ nuutu gil faɗi bə minti kaa kə waate *Kel pəsaŋ kəmarwaŋ tuluŋ neŋ.»

¹⁶ Səma sərdə kaŋ doŋ Kel pəsaŋ kəmarwaŋ teŋ ba. Ezay a waataŋ ne wəra minti: «Barkaŋ, mindi doŋ gud kel gə minti are a wəətənəy wəraŋ mo?»

¹⁷ Aŋ asaŋ ne, aŋ fele deŋ haa gud əski bə kel kə waatə-waateŋa wəra, kel té gə minti waate wəra cəərə Kristuŋ faɗi.

¹⁸ Bə hebkənaŋ le ku katən haa minti: Kaanə Ziwifiŋ bay əski kel teŋ mo? Yə gə əskə-əski diiri, gud maa mo Kefter kə Pepeŋ waate minti: «Dordə kaa té gə waate kel ɗeŋ wəra cəərə seŋkaŋa keɗe; kel gə minti yə wəətənəy ɗeŋ warna hãã a ko bə minti seŋkaŋ təwaŋ ada naŋ.»

¹⁹ Ten də le ku pa minti: ɗalba kaanə *Israyel əskəŋ gud kel ba ɗawmay? Paapa. Hulum bə ajew bə minti jugnuy kel gə minti Pepeŋ wəətənəy diŋ haa Moyisi faɗi minti: «Ten ji yaŋ kir minti giidəŋ kolə la bə hatəŋa cəərə kaa gə minti paapa bə gole dərəŋa kaa kəman baŋ də karman bə minti giidəŋa bəlnuŋ kəəsiŋ. Ten ji yaŋ kir minti aŋ kolə la də waŋ cəərə kaa gə minti karman paapa də diri baŋ.»

²⁰ Adoro Ezay, bay kan duru, jugnuy kel gə minti Pepeŋ a wəətənəy diŋ wəra minti: «Kaa gə minti a paapa bə goldona baŋ, falnan haa té. Kaa gə minti a paapa bə mante karmana kaasəna baŋ, ten vəɗaŋ kusrən wəra haa a teŋ.»

²¹ Səma cəərə kaanə Israyelaŋ, Ezay jugnuy kel nuutu pa minti: «Də ko bə bəbəgiŋ hãã dəəgŋ, ten bə doo-de kaasən saksaki a kaa katən, səma yə haa kaa gə minti paapa bə humi kosoŋa cəərəna ba daana yə baynan kun wəra.»