ROMEŊ 1 - JAA TƏMARWAŊ

Pol mirki kaa kə doo-de gə Rom

¹ Jeere kefter toŋ haa ten Pol, hulum bə joŋre kə Yeesu Kristuŋ. Pepeŋ mantənan minti ten kolə la *hulum bə gaa-ge daana wə əsnən wəra dəra'i a kusru bə waate *Kel pəsaŋ kəmarwaŋ nuutuŋ wəra.

² Pepeŋ a wəətənəy səməy wəra dayday bə əyəy a kaŋ ku *kaa kə jogte ku mini nuutuŋa, yə jiiriniy wəra giidə Kefter nuutuŋa gəm.

³ Kel teŋ waate haa cəərə Kurmuyuŋa. A kusukiŋa, wə bəŋ haa a kaasaw də kumna *Davidi da.

⁴ Səma agal kə Tiiru Cetcetaŋaŋ, Pepeŋ gaŋ dər wəra anə kaŋkaŋ faɗi minti wə haa kormə tó a kəkəy bə minti wə hərnu wəra dədərgə adordə meŋaŋ. Kurmuyu toŋ haa Yeesu Kristu Barkaŋ náŋ.

⁵ Haa guudu ta minti Pepeŋ jəŋ pisi nuutuŋ sar are minti are jəə la kaa kə vaa-ve kə Kristu, kir minti gidiirə kaa gaalaŋ-gaalaŋ nakə la bə de guudu daana bə humi kosoŋa cuuru gəm. Kel teŋ jəŋ gila keɗe haa bə he cəərə Kristu apəya.

⁶ Aŋ haa aduubə də kaa teŋa gəm, aŋ gə minti Kristu mantənaŋ wəra minti aŋ jəə la kə toŋ.

⁷ Ten jeere kefter toŋ haa a aŋ gə giidə vil də Rom, aŋ gə minti giidə Pepeŋ bəlaŋ keɗeŋ, daana wə mantənaŋ wəra minti aŋ jəə la kaa kə toŋ. Pisiŋ, də kəkaɓiŋ kə Bar áŋ Pepeŋ daana kə Barkaŋ Yeesu Kristuŋ jəə la cəərəŋa!

Pol də caadə ɗe a helɗe kaa kə doo-de gə Rom

⁸ Ajew anə faɗiŋ, də Yeesu Kristu, ten də suuseŋ a Pep katən gud kel dəŋa keɗe gud bə minti kaŋ bə waate sam de nəətiŋa wəra a koŋa keɗe.

⁹ Pep bə minti ten bə jəw joŋreŋa wəra də ku tarman keɗe a kəkəy bə waate *Kel pəsaŋ kəmarwaŋ gə cəərə Kurmuyuŋa wəraŋ, bə asə-ase minti kel gə minti ten waataŋ diŋ yə gəəzi: ten saksaki bə ɗiki cəərəŋa dər toose katəna.

¹⁰ Ten bə mante saksaki kəəsu minti, giidu bəlaŋ neŋ, wə ayan kəkəy la bə ɗe na a helɗeŋ máŋ ta.

¹¹ Gud maa mo tay də ɗe gerdeŋ naŋ doonon wəra hasi, kir minti ten ɗee la a ayaŋ aye kə Tiiru Cetcetaŋ bə koloŋ də səɓaki a de nəətiŋa.

¹² Ten waataŋ haa kəna ɗaw minti ten ɗe gerdeŋ na haa minti áŋ ɗee la a teŋe dər kumsə áŋ də de náŋ bə minti áŋ cuuru məna'iŋ, aŋ teŋen dərən la də nəətiŋ, ten teŋeŋ dərəŋ də katən gəm.

¹³ Kəsaananti, ten bele minti aŋ asə la minti ten goldoŋ kəkəy kampa ablaw bə ɗe gerdeŋ na, səma ten jəŋ wəra bə laŋtə-laŋte hãã hebkəna. Gud maa mo ten bə balə-bele minti ten ɗee la a ji joŋreŋ aduubə dəŋa kir minti wə falə we la a tiiruŋa damdi wə jəətəŋ aduubə də gidiirə kaa kaayaŋa ana gəm.

¹⁴ Ten kir ji joŋreŋ a kaŋ keɗe: a kaa gə giidə seŋka də dərə də jamə-jemeŋ, a kaayaŋ gə giidə nayta də dərə də bay jemeŋ gəm; a kaa gə asə-ase kefter, a kaayaŋ gə minti karman paapa də diri baŋ gəm.

¹⁵ Caadə waate bə Kel pəsaŋ kəmarwaŋ wəra a aŋ gə giidə vil də Rom jəŋ sarəna haa gud teŋa.

Səɓaki də Kel pəsaŋ kəmarwaŋ

¹⁶ Kese bə waate Kel pəsaŋ kəmarwaŋ wəraŋ paapa dərəna ba anə ceki. Gud maa mo yə haa səɓaki də minti Pepeŋ ji joŋreŋ dəərə bə seere mindi mindi mo wəra bə minti doŋ ne guuduŋ, gə Ziwifi gə minti iskiniy ajew, də kaa gə minti paapa gə Ziwifi baŋ gəm.

¹⁷ Gud maa mo, Pepeŋ kole kaŋ duru ɗeker naanaanə moŋ, Kel pəsaŋ kəmarwaŋ wəra gə vaɗə-veɗe diiri. Kəkəy bə ɗeker toŋ mele guudu haa də deŋ, wə raawe hãã a tewe du na də deŋ gəm, damdi wəra bə jeerə-jeere giidə Kefter kə Pepeŋa ana minti: «Hulum bə minti dər ten Pepeŋa ɗeker ji yaŋ caw gud de nuutu bə guudəna.»

Kəəti kə Pepeŋ de kaŋ

¹⁸ Apəya da, Pepeŋ wəra bə ge dəra minti tó də waŋ daana tó jeme kəəti də kaa gə minti paapa bə humi kosoŋa cəərə tó baŋ daana gə minti jəəti kel kə gul-gulaŋ. Yə gisi koŋ wəra dər kaŋa bay ase gəəziŋ də baymele bə minti yə bə jəwaŋ.

¹⁹ Gud maa mo kar gə minti kaŋ neke bə əsəy cəərə kel də Pepeŋaŋ wəra də diri anə kaŋkaŋ, gud bə minti wə gəənəy diri ciiri wəra haa tó də kusru faɗi.

²⁰ Səɓaki nuutu də minti gədəəgi də paapaŋ, tó Pepeŋ də kusru gadi naanaanə moŋ, yə yaŋ, səma hulum nəkaŋ bə əsəy də duru ba. Anə hãã bə minti Pepeŋ jəŋ koŋ, hulum ɗəkəŋ neŋ, wə neke bə əsəy wəra pəɗaki gud kar gə minti wə jiiniy. Bədoona ana ta, kamkam kə hulum anə məna paapa faɗi.

²¹ Də teŋ keɗe bə minti yə nuutu gə asə-ase minti Pepeŋ yaŋ, he bə cuuru bə apəyaŋ daana ji bə suuse bə minti kaŋ a kir jəy bədoonaŋ, yə jəŋ teŋ a nuunu ba anə ceki faɗi. Ana ɗaw ha'aŋ, yə wəra gə lentə-lente dər ɗiki di də kel kə bay keyeŋ, ku tərməyi də bay ɗikiŋ koloŋ haa damdi karman dər tilməŋa ana gəm.

²² Yə hage də kusri haa minti té kaa kə asə-ase, doloy yə də mələr ɗaw.

²³ Bə minti yə a kir ke awalna a boblo kə Pep bə minti toŋ saksakiŋ ɗaw, yə kaana máŋ haa a kar gə minti yə jiiniy té də kusri bə hulum kisirki bə me wəraŋ, bə kaskoŋ, bə kar gə kəmpəri waaɗe-waaɗe'iŋ, bə kar gə ɗe cəərə giidiŋaŋ ana faɗi.

²⁴ Gud teŋa ta, Pepeŋ yəəkənəy warna ku kar kə bayməlaŋ gə minti yə də kinkin di bə jəy. Kəya yə bə zode kusri wəra té də kusri də kel kə kes-kese gə minti yə bə jiitiyaŋ.

²⁵ Yə yaakaŋ Pep bə gəəzə-gəəziŋ wəra bəy, yə koloŋ kel kə ŋetə-ŋeteŋ a kuɗu. Bə minti yə sə a ke awalna a hulum bə minti jəŋ kar keɗeŋ, yə kaana daana yə jəŋ digiŋ máŋ haa a kar gə jəə-jiŋ ɗaw. Tokɗe bə faɗnə-faɗnaŋ jəə la kə hulum bə minti jəŋ kar keɗeŋ! *Amen.

²⁶ Gud teŋa ta, Pepeŋ yəəkənəy warna ku kel neete gə kes-kese gə minti yə də kinkin di bə jəy. Kəram yaakaŋ əsti də kaŋkar wəra bə əsti máŋ də kumsi ɗaw; a haa karman bə minti paapa kir ji ba.

²⁷ Kaa kaŋkar haa bədoona ana gəm. Yə yaakaŋ əsti də kəram wəra, yə le máŋ le də caadə əsti də kumsiŋ kaŋkar. Yə ji kel kə dəglə-dəgləŋ də kumsi kaŋkar. Bə ge daŋgay də aŋar də baymele neeteŋ bə awe ciiriŋ, haa té də kusri faɗi.

²⁸ Yə bəyaŋ Pepeŋ wəra, yə bəlaŋ əsu ba ŋaanaanə moŋ, wə yəəkənəy warna ku ɗiki neete bə kuntə-kuntiŋ na. Bədoona ana, yə ji máŋ haa kar gə minti a paapa kir ji baŋ faɗi.

²⁹ Ku tərməyi wəra də ɗosə-ɗose də gidiirə kel kə gul-gulaŋ, də baymeleŋ, də həryəm, də sərkəŋ, də giidi gə yaakte cəərə kumsiŋ. Yə awte kumsi, yə jəəti gəbaŋ də kumsi, yə jəəti tiniini də kumsi, daana ku tərməyi saksaki bayməlaŋ cəərə kaŋa. Yə ceme gud kumsi,

³⁰ yə waate sam kumsi baymele, yə acukur də Pepeŋ, yə sarte kumsi, yə teke cəərə kusri apəya, yə hage sam kusri, yə wəra ada ɗəwa cəərə hel də fele baymele kimirwi bə jiŋa, yə de ku kəmni ba.

³¹ Yə kaa kə bay ɗiki, kaa gə minti de ku kel neeteŋ wəra ba, kel də hulum ɗəməy ba, ji bə giidu pəsaŋ neete sar kumsi paapa gəm.

³² Yə wəra gə asə-ase minti cəərə kəəti kə Pepeŋ bə awə-awe minti, kaa gə minti jəəti gom də kel teŋ kəyaŋ, kir awe wəra. Də teŋ keɗe yə nuutu bə jəya, ana paŋ yə ɗe a le kəəsi gud kaa gə minti bə jiitiyaŋ kəm pə ɗaw!