MATIYE 5 - JAA TƏMARWAŊ

Yeesu waate kel a kaŋ cəərə pərkiŋa

¹ Bə minti Yeesu asaŋ kaa kə ablaw teŋ anəkay, wə kooroŋ a li wəra apəya cəərə pərkiŋa. Wə əsəŋ ada cin, *kaa gə guuduŋ zeŋ suru da.

² Wə əsəŋ bə hətəya minti:

Waale bə gəəzə-gəəziŋ

³ «Waaleŋ kə kaa gə minti ɗiki di wəətəy minti yə gə kerpə-kerpeŋ, gud bə minti *Kumna kə Pepeŋ haa neete.

⁴ Waaleŋ kə kaa gə minti paapa bə aŋke kusri baŋ, gud bə minti yə bə fele seŋka də minti Pepeŋ a waatəna sama wəraŋ.

⁵ Waaleŋ kə kaa gə minti bə laawe ku tərməyiŋ, gud bə minti Pepeŋ bə tiŋiy diri yaŋ.

⁶ Waaleŋ kə kaa gə minti də tay də minti té jəə la haa kel ɗekeriŋ, gud bə minti Pepeŋ siipiy ku tərməyi yaŋ diiri keɗe.

⁷ Waaleŋ kə kaa gə minti jəəti giidi pəsaŋ sar kaŋaŋ, gud bə minti Pepeŋ ji giidu pəsaŋ yaŋ ciiri gəm.

⁸ Waaleŋ kə kaa gə minti ku tərməyi wəra də ɗampə-ɗampeŋ, gud bə minti yə ase Pepeŋ yaŋ dəmaŋ də diri.

⁹ Waaleŋ kə kaa gə minti golde minti kəkaɓi jəə la adəwaldə kaŋa keɗeŋ, gud bə minti Pepeŋ bə məntəy yaŋ minti yə karmə tó.

¹⁰ Waaleŋ kə kaa gə minti bə se lasiŋa gud ɗe neete ɗeker bə gud Pepeŋaŋ, gud bə minti Kumna kə Pepeŋ haa neete.

¹¹ Waaleŋ nəəti bə minti kaŋ bə sartənaŋ neŋ, minti yə lasənaŋ ne daana yə ŋeteŋ kel ne sarəŋa də kel kə bayməlaŋ keɗe gud kel dəna.

¹² Aŋ waalə la, aŋ gaɗtə la də waale gud bə minti werke boblo bə məŋ na apəy na tarmə pepeŋ na. Gud maa mo yə ləsaŋ *kaa kə jogte ku mini kə Pepeŋ gə ajew dəŋ haa damdi yə bə lasəŋaŋ ana faɗi gəm.»

Mantaŋ daana pəɗakiŋ

¹³ «Aŋ haa damdi manta ana adəwaldə kaa gə cəərə seŋkaŋa gadi faɗi. Səma jəəne minti wə za'laŋ ne wəraŋ, hulum neke yaŋ bə həru dihi pə mo? Joŋre du pa pəda, yə vaw warna taakaw na, kaŋ təytu máŋ wəra.

¹⁴ Aŋ haa pəɗaki kə kaa gə cəərə seŋkaŋ. Vil də minti wəra də hərsə-hərsi apəya cəərə pərkiŋa neke bə mete ba.

¹⁵ Lampaŋ gəm ha'aŋ, hulum do'ona neŋ, wə guɓi karman wəra cəərə ba. Wə ɗe a mala wəra apəya a ko bə maltaŋa minti a walə ko bə giidə kuli la wəra keɗe'i.

¹⁶ Aŋ gəm ta, pəɗaki nəətiŋ walə koŋ la a kəkəy bə minti aŋ jəəti kar pəsaŋ. Kaŋ əsnəy neŋ, yə isi bə tokɗe Bəraŋ Pep bə minti apəyaŋ haa gud kel dəŋa.»

Yeesu hate kaŋ cəərə ku giliŋa

¹⁷ «Ten waataŋ ha'aŋ, aŋ a ɗiki minti ten bəŋ a ɓalke *ku gili kə Moyisiŋ daana hate bə minti *kaa kə jogte ku mini kə Pepeŋ a hatnaŋ dəŋ wəra ba. Ten bəŋ nin haa ɗaw a doy kuy wəra.

¹⁸ Gəəzi ten waataŋ, bə minti seŋkaŋ də ko bə apəyaŋ yaŋ kəm lam bay ɓalkeŋ, karmə jeere, ɗalba karmə kel wesek-weseki gə giidə ku giliŋ, kumundu ɓalke wəra guudi anə məna ba, hãã bə minti kel gə minti a waataŋ wəraŋ doo kuy la wəra kəm.

¹⁹ Haa gud teŋa ta minti, hulum bə minti ɓalkaŋ ku gili ne wəra anə məna gud koncoŋ də ku gili kə Pepeŋa, daana bə hate kaayaŋa minti yə jəə la bə tó ana gəm, wə ji yaŋ hulum konce dəŋaŋ kaayaŋ a *Kumna kə Pepeŋa. Səma hulum bə minti ji joŋreŋ də ku giliŋ daana hətu a kaŋ, wə ji yaŋ hulum boblo a Kumna kə Pepeŋa.

²⁰ Ten waataŋ haa minti, aŋ jəəne paapa bə ji kel ɗekeriŋa dəŋaŋ kaanə *Farisiyeŋ də *kaa kə hate ku gili kə Pepeŋ baŋ, aŋ neke bə ve a ko bə Kumna kə Pepeŋ na bə gəm.»

Yeesu hate kaŋ cəərə kel kə waŋa

²¹  «Aŋ a əskəŋ wəra minti yə a waataŋ kəmoomo də áŋ gə dayday minti: ‹A awe titi ba. Hulum bə minti awaŋ titi neŋ, yə ɗee la duuru tiinə kaa kə jeme kəətiŋa.›

²² Səma, ten waataŋ nin haa minti hulum bə minti koloŋ waŋ ne sar kumsuŋaŋ, kəəti kirka jeme cuuru. Hulum bə minti waataŋ kumsuŋ ne minti: ‹Han!›, wə kirka a ɗe tiinə *kaa kəmtəŋ gə jeme kəəti kə kaanə Ziwifiŋa. Hulum bə minti waataŋ kumsuŋ ne minti: ‹Mələr!›, wə kirka a ɗe dər cəwa də bay teweŋa.

²³ Jəəne minti tam ɗe a aye karman a Pepeŋ giidə kuli nuutuŋa a *ko bə jəəti keereŋaŋ, cəərəm haraŋ ne bə ɗiki minti giidə kumsum yaŋ bə yaakə-yaake cəərəma gud karman kəmanaŋ,

²⁴ yaakə karman bə kaasam la a ko toŋa ada lam, harə la sar kumsum toŋ bə ɗe a tepe kuŋ wəra kəm duuru. Adoro, harə da a aye karman nəmti toŋ a Pepeŋ kəm ta.

²⁵ Hulum bə acukur nəmtiŋ mantənam ne ku kəətiŋ, bandə la bə tepe kuŋ duuru a ko bə minti aŋ kəm a kəkəy bə ɗe na də kumsuŋ, kir minti wə a ɗe dəərəm tiinə hulum bə jeme kəətiŋa ba. Tam jəŋ bədoona baŋ, hulum bə jeme kəətiŋ ayam kasi sootoŋa minti yə gam la a daŋgaya.

²⁶ Gəəzi ten waatam, tam neke bə kele warda a daŋgay da ba hãã bə minti tam werke bal də cəərəm wəra kəm keɗe.»

Yeesu hate kaŋ cəərə kel kə piwpiwa

²⁷  «Aŋ a əskəŋ ku gili bə minti Pepeŋ əynuŋ minti: ‹A ji piwpiw ba.›

²⁸  Səma ten waataŋ nin haa minti, hulum bə minti saanaŋ həlgə daalaŋ ne minti tó jəə piwpiw la dəərəŋ, wə wəra bə jəə-ji piwpiw dəərə dər ɗiki nuutuŋa ɗaw.

²⁹ Bədoona ana, jəəne minti gam bə yaake kəkəy bə deŋa haa dərəm kemer, bəərə la wəra, gaarə la warna faɗi. Gud maa mo, karman dəm pəŋ ne wəra sarəma mənaŋ, marya dəŋaŋ bə minti wə gam dər cəwa də bay teweŋa də kar dəm ada keɗeŋ.

³⁰ Jəəne minti gam bə yaake kəkəy bə deŋa haa kaasam kemer, jəməy la wəra, gay la warna faɗi. Gud maa mo, karman dəm pəŋ ne wəra sarəma mənaŋ, marya dəŋaŋ bə minti tam kele dər cəwa də bay teweŋa də kar dəm ada keɗe'iŋ.»

Yeesu hate kaŋ cəərə buusi bə kərama

³¹ «Yə a waatənaŋ wəra pa minti: ‹Hulum bə minti buusuŋ muruŋ ne wəraŋ, wə aya kefter bə buusiŋ la kaasa.›

³² Səma, ten waataŋ nin haa minti, hulum bə minti buusuŋ muruŋ ne wəra bay a ji kel kə piwpiw, a raawaŋ ne a de koŋkor baalaŋ, wə gaana máŋ bə ji piwpiwa haa tó. Hulum bə minti doŋ həlgə də buusə-buusi neŋ, wə jəŋ haa piwpiw.»

Yeesu hate kaŋ cəərə kel kə kalte bə kuŋa

³³ «Aŋ a əskəŋ wəra minti yə a waataŋ kəmoomo də áŋ gə dayday pa minti: ‹Karman bə minti tam kəlaŋ kum wəra cuuru tiinə Barkaŋaŋ, a yəəku bay ji ba, daw ku la wəra tiinu.›

³⁴ Səma, ten waataŋ nin haa minti, aŋ a kalte kuŋ ba ana hasi: a kalte kuŋ də tarmə pepeŋ ba gud bə minti haa jaaŋa də minti wə isi cəərəŋ.

³⁵ A kalte kuŋ də seŋkaŋ bə gəm, gud bə minti haa ko bə minti Pepeŋ malte kəmpuru cuuruŋ. A kalte kuŋ də vil də Zeruzalem bə gəm, gud bə minti haa vil kə Pepeŋ, Kumna bobloŋ.

³⁶ A kalte kuŋ də cəərəŋ bə gəm, gud maa mo aŋ paapa gə nakə-neke bə kole kaaɗe də wəra anə məna kəsarkaŋ ɗalba gəbərwəŋ ba.

³⁷ Aŋ waataŋ ne minti ‹ãã›, wə jəə la ãã bə gəəzə-gəəzi. Aŋ waataŋ ne minti ‹paapaŋ›, wə jəə la paapa bə gəəzə-gəəzi faɗi gəm. Aŋ faktaŋ kel gaalaŋ ne adaŋ, vəənəy ada haa Nər Sərkəŋ.»

Yeesu hate kaŋ cəərə kel kə ke bə acukura

³⁸  «Aŋ a əskəŋ wəra pa minti: ‹Hulum gaŋ dər kumsuŋ ne wəraŋ, gaw nuutuŋ la wəra gəm, wə həŋ kəsnə kumsuŋ ne wəraŋ, həw nuutuŋ la wəra gəm.›

³⁹ Səma ten waataŋ nin haa minti, hulum jəŋ baymele ne sarəmaŋ, a garge də awəy tiinu ba. Hulum laanam ne a gabyam kemeraŋ, yəəku la bə lama a gabyam gulaŋa pa.

⁴⁰ Jəəne minti hulum goldom də kəəti minti tó humi dəməəmə nəmtiŋ, yəəku la bə humi dəməəmə nəmti də cəərə kumsuŋa ada pə ɗaw.

⁴¹ Hulum haanam guudum ne bə hale kar nuutuŋa kir ɗe kampəram guɓiŋ, ɗee la máŋ duuru kampa guɓ-guɓi ɓasi ɗaw.

⁴² Bədoona ana ta, hulum mantaŋ karman ne kaasəmaŋ, əyu du la. Hulum jəəne də caadə de bal kaasəmaŋ, a kole kerkem a nuunu ba.»

Yeesu hate kaŋ minti yə balə kaa kə acukur neeteŋ la

⁴³ «Aŋ a əskəŋ wəra pa minti: ‹Balə kumsum la›, hulum bə acukur nəmtiŋ, bəyu la wəra.

⁴⁴ Səma ten waataŋ nin haa minti aŋ balə kaa kə acukur nəətiŋ la, aŋ toosə la cəərə kaa gə minti bə lasəŋaŋ.

⁴⁵ Bədoona ana, aŋ kole yaŋ karmə Bəraŋ Pep bə minti apəy daŋ gəəzə-gəəzi. Gud maa mo Pepeŋ yaake cəwaŋ bə daage da warda cəərə kaa kə sərkə da də kaayaŋ pəsaŋ gəm. Wə yaake koŋ bə hage cəərə kaa gə minti bə jəəti kel ɗekeriŋa də kaayaŋ gə minti jəəti kel kə bayməlaŋ gəm.

⁴⁶ Aŋ jəəne bə bele kaa gə minti bə baləŋa təwaŋ, aŋ fele haa werke muntu pə mo? Koo *kaa kə tope lambaŋ, kaa kə bayməlaŋ, yə bə jəəti kel teŋa bədoona gəm.

⁴⁷ Jəəne minti aŋ mirkiti haa kəsaanaŋ təwaŋ, aŋ jəŋ karman pisi bə deŋe kumsuŋ ada ane pə mo? Koo kaa gə minti Pepeŋ paapa də diri baŋ bə jəəti kel teŋa bədoona gəm.

⁴⁸ Aŋ jəə la *cetceti damdi Bəraŋ Pep bə minti apəy daŋ wəra cetcetiŋ ana gəm.»