MATIYE 21 - JAA TƏMARWAŊ

Yeesu kele Zeruzalema

¹ Bə minti Yeesu də kaa gə guuduŋ wəra maŋ sar vil də Zeruzalemaŋ, yə tuukuŋ sar wəlasi də Betfajeŋa, a haa maŋ sar *pərki bə minti yə məntu Oliviyeŋ. Kəya wə vaŋ kaa warna ɓasi gud *kaa gə guuduŋa,

² wə wəətənəy minti: «Aŋ ɗee la giidə wəlasi də tiiniŋ na haa naŋ. Aŋ vaŋ ne ada anəkay faɗiŋ, aŋ fele agerhẽ də əntə-ənti gil də korməyaŋ sara. Aŋ fuktuy da, aŋ bən da diiri.

³ Hulum laanaŋ kuŋ ne ciiriŋ, aŋ wəətu la minti Barkaŋ də caadi, kəya wə yaakaŋ di yaŋ faɗi.»

⁴ Kel teŋ jəŋ haa minti kel gə minti *hulum bə jogte ku mini kə Pepeŋ a wəətənəy wəraŋ, doo kuy la wəra

⁵ minti: «Aŋ waatə kaanə Siyoŋ la minti: ‹Aŋ golə la kəm, kumna nəətiŋ day səraŋ da. Wə haraŋ kusru wəra adoro, wə bə luu-li cəərə agerhẽ tooka lam, wə bə luu-li cəərə kormə agerhẽ.›»

⁶ Kəya kaa gə gud Yeesu ɓasiŋ kooroŋ faɗi, yə jəŋ damdi Yeesu a wəətənəy ana.

⁷ Yə haraŋ da də agerhẽ tookaŋ də korməyaŋ guudə ada. Yə pəŋ dəməəmə neeteŋ də cəərə kumsəŋ wəra, yə baartəna kirku. Kəya Yeesu luŋ cuuru faɗi.

⁸ Kaa gə ablaw baartaŋ dəməəmə neete də cəərə kumsəŋ a kəkəya. Sərdə kaa hətəŋ kasi kəbaŋ, yə bərtənəy a kəkəya gəm.

⁹ Kaa gə minti tiinu naŋ daana guudu daŋ, naaktaŋ kuy minti: «Osana! Tokɗeŋ jəə la a *Kormə Davidiŋ! Pepeŋ gaa pisi la cəərə hulum bə minti bəŋ a sam Barkaŋaŋ! Ko bə apəyaŋ keɗe tokɗə Pepeŋ la!»

¹⁰ Bə minti wə kəlaŋ giidə vil də Zeruzalem naŋ, kaa gə giidə vil pətəŋ wəra bə laare keɗe, yə əsəŋ bə lete ku kumsi minti: «Ana toŋ haa mindi mo?»

¹¹ Kəya kaa kə ablaw hərnəy kel minti: «Kəna Yeesu, *hulum bə jogte ku mini kə Pep bə minti bəŋ Nazareti giidə seŋka də Galileŋ daŋ.»

Yeesu sarme kaŋ wəra giidə Kuli kə Pepeŋa

¹² Yeesu kəlaŋ giidə tiilim də *Kuli kə Pepeŋa kəyaŋ, wə fəlaŋ ha'aŋ kaa kə celeereŋ də kaa kə gusi kar gə əsə-isi ada. Kəya wə əsəŋ bə sərməya wəra. Wə puktuŋ tabul kə kaa kə məɗti suŋku bə irkuŋ daana kəbaŋ gə əsti kə kaa kə celeere gə abaakuŋ wəra gəm.

¹³ Kəya wə əsəŋ bə wəətiya minti: «Pepeŋ waataŋ giidə kefter nuutuŋa minti: ‹Kuli katən, yə bə məntu yaŋ minti kuli bə tooseŋ.› Səma aŋ teŋ, aŋ kulnu wəra ‹ko bə əsti kə kaa gə minti tope kar kasi kaŋa də waŋ.›»

¹⁴ Kəya kaa kə bəwə-bəwiŋ də kaa kə hurufiŋ zeŋ suru da giidə tiilim də *Kuli kə Pepeŋ da. Wə siirtiniy wəra faɗi.

¹⁵ Bə minti kəkamna kə *kaa kə keere Pepeŋ daana *kaa kə hate ku gili kə Pepeŋ asaŋ gom də miɗi bə minti wə a juunuŋ, daana kəmar koncoŋ bə naakte kuya giidə Kuli kə Pepeŋa minti: «Osana! Tokɗeŋ jəə la a *Kormə Davidiŋ!», yə koloŋ waŋ faɗi.

¹⁶ Kəya yə wəətunu minti: «Tam bə əski gud naakte bə ku kə kəmar koncoŋa nuutu mo?» Wə minti: «Ten bə usku wəra pisi. Aŋ aŋkaŋ kel té kayiŋ hõy giidə kefter kə Pepeŋa bə mo minti: ‹Pepeŋ, tam hataŋ kəmar koncoŋ kuɗu-kuɗuŋ ne wəra də kaayaŋ gə se kaw keɗe minti yə tokɗom laŋ.›»

¹⁷ Kəya Yeesu yəəkənəy, wə yaakaŋ vil taŋ wəra gəm, wə kooroŋ giidə wəlasi də Betaniŋ, wə həŋ a ko toŋa ada.

Yeesu ge guɗbusi a gum

¹⁸ Ɗeŋ a deye dibiinim bəbəgiŋ, də bə minti Yeesu bə hare da giidə vil daŋ, tay əsəŋ bə ɗəmu.

¹⁹ Wə ɗeŋ a gole ha'aŋ, gum kəman yaŋ gil agəjaŋ də kəkəya, wə jeleŋ cuuru na faɗi. Səma wə ɗeŋ a fele haa wə bə vaa-ve gil təwa. Kəya wə waataŋ gum minti: «Tam we hõy pəda anə ceki faɗi!» A ko toŋa ada faɗi, gum hẽŋeŋ wəra.

²⁰ *Kaa gə gud Yeesuŋ asaŋ kel teŋ kəyaŋ, yə ŋələŋ ablaw, yə əsəŋ bə waate minti: «Gum toŋ hẽŋeŋ wəra hebkən-hebkəna faɗi haa naanaanə mo?»

²¹ Yeesu wəətənəy minti: «Gəəzi ten waataŋ, aŋ doŋ ne gəəziŋ, aŋ caŋ awəy ku tarməyaŋa baŋ, aŋ neke bə tope ku kel gə minti ten jiiniy sar guma kənaŋ təwa ba, aŋ neke bə waate pərkiŋ gara minti: ‹Bəə la wəra, ɗee la a awe warna dər kan kəmtəŋ na!›, kel teŋ ji yaŋ faɗi.

²² Karman muntu muntu mo bə minti aŋ məntu kasi Pepeŋaŋ, aŋ doŋ ne gəəziŋ, aŋ fəlu yaŋ.»

Mindi ayaŋ abay a Yeesu mo?

²³ Bə minti Yeesu haraŋ daŋ, wə kəlaŋ giidə *Kuli kə Pepeŋa, wə əsəŋ bə hate kaŋa. Kəya kəkamna kə *kaa kə keere Pepeŋ də kaa kəmtəŋ gə tiinə kaŋ zeŋ suru da, yə əsəŋ bə wəətu minti: «Kel gə minti tam jəy, aynam kəkəy diŋ haa mindi mo? Aynam abay bə jəy haa mindi mo?»

²⁴ Yeesu hərnəy kel minti: «Ten gəm, ten laŋ kuŋ kəm cəərə kela məna. Aŋ harnan kel ne ciiriŋ, aynan aba bə ji kel teŋ haa mindi moŋ, ten waataŋ yaŋ gəm.

²⁵ Gaŋ Zaŋ Batisi da bə bi a ji batem haa mindi mo? Pepeŋ mo, kaa kəsarkaŋ mo?» Kəya yə əsəŋ bə ke awəya aduubə də kumsi minti: «Áŋ waataŋ ne kəna minti gəənu da haa Pepeŋ, wə bə waate áŋ haa minti áŋ bə doŋ guudu ba haa səm mo?

²⁶ Áŋ waataŋ ne kəna minti gəənu da haa kaa kəsarkaŋ, walka ji áŋ kasi kaa gə ablaw gud bə minti yə neŋneŋ keɗe wəra gə ɗəkə-ɗiki minti Zaŋ haa *hulum bə jogte ku mini kə Pepeŋ.»

²⁷ Gud teŋa ta, yə hərnu kel minti: «Are ase ba.» Tó hərnəy kel gəm minti: «Jəəne bədoona anaŋ, aynan abay bə ji kel teŋ haa mindi moŋ, ten waataŋ bə gəm.»

Joŋre kə karmə hulum ɓasiŋ

²⁸ «Aŋ gosə gole kel teŋ la kəm mo. Hulum kəman yaŋ də kərmuyu ɓasi. Wə kooroŋ sar kurmuyu bobloŋ, wə wəətunu minti: ‹Kormonti ɗee la a ji joŋre dayna giidə aka də atələələmaŋ kəm mo.›

²⁹ Kurmuyuŋ minti: ‹Ten bele ba.› Səma bə jəŋ adoro, wə koloŋ ɗiki du, wə kooroŋ nuutu giidə akaŋ.

³⁰ Kəya hulum kooroŋ sar kurmuyu bə ɓasiŋ, wə wəətunu bədoona gəm. Kurmuyu toŋ minti: ‹Ãã barən, ten ɗe yaŋ.› Səma wə bə ɗeŋ pəda.

³¹ Kəmar koncoŋ té ɓasiŋ ha'aŋ, beebe bə minti doŋ ku buruŋ haa mundu mo?» Kaŋ hərnu kel minti: «Haa beebe bobloŋ.» Kəya Yeesu wəətənəy minti: «Gəəzi ten waataŋ, *kaa kə tope lambaŋ də kəmaswaŋ tuuki yaŋ warna dəmaŋ a *Kumna kə Pepeŋ na ajew dəŋ.

³² Gud maa mo, Zaŋ Batisi a bəŋ, wə gaanaŋ dərəŋ wəra cəərə kel ɗekeriŋa, aŋ doŋ gud kel nuutuŋa ba. Səma kaa kə tope lambaŋ də kəmaswaŋ, teŋ doŋ gud kel nuutuŋa. Kel teŋ gila keɗe, aŋ əsnəy də dərəŋ, səma aŋ doŋ haa minti aŋ kolə kerkeŋ la a baymele nəətiŋ ba, aŋ kolə la bə de gud kel nuutuŋa bə gəm.»

Ku kumti cəərə kaa kə joŋre gə sərkəŋa

³³ «*Ku kumti kəman haa kənaŋ, aŋ jiɓru la kəm pə mo. Bərdə aka kəman gəraŋ atələələma. Wə ɓəknə cəərə wəra, wə holkoŋ giidə pərki bə peete we diŋ giidu ada, wə gəraŋ gadlay kempeleŋ ada anə hələŋ bə gole cəərə pa. Adoro kəyaŋ, wə ayna a kaa minti yə golə cəərə la, tó bə əyəy we də kəbaŋ gəm, wə kooroŋ a gəryi nuutu faɗi.

³⁴ Bə minti ko bə teke atələələmaŋ kosoŋ wəra maŋ, bərdə akaŋ vaŋ kaa kə joŋre nuutuŋ sar kaa kə keɗeŋ na minti yə ɗee la a humi agal kə toŋ da.

³⁵ Kəya kaa teŋ humuŋ kaa gə minti bərdə akaŋ a vəənəy naŋ, yə doŋ kumundu guudi məna, yə lətnu wəra anə pasyak-pasyaki, yə awaŋ baalaŋ wəra, yə kaŋ bə soopeŋ də pərki.

³⁶ Kəya wə vəənəy kaa kə joŋre nuutu gaalaŋ na pa, máŋ ablaw dəŋaŋ gə ajew, yə jiiniy haa bədoona anə dege'-dege'i pa.

³⁷ Máŋ kəyaŋ, wə gaŋ kurmuyuŋ da ta, də ɗikiŋ minti yə humi kosoŋ yaŋ cəərə toŋa.

³⁸ Səma bə minti kaa kə gole cəərə akaŋ asaŋ kurmuyuŋ bə ɗe da kay daŋ, yə əsəŋ bə waate aduubə də kumsi minti: ‹Caw daŋ haa pur bə minti bə ɗe a he akaŋ a gubliŋaŋ. Aŋ bəəda, áŋ əwu la wəra, akaŋ bə yaakə la máŋ kir kasi áŋ!›

³⁹ Kəya yə duunu, yə kooroŋ warna duuru kerkə laɓiŋ na, yə əwnu wəra.

⁴⁰ A ɗiki nəətiŋaŋ, bərdə akaŋ bə tuluŋ neŋ, wə ji kaa gə minti wə a yəəkənəy akaŋ kəəsiŋ haa naanaanə ji gəm tə mo?»

⁴¹ Yə minti: «Kaa té gə sərkə-sərkəŋ, yə bə fele haa me bə sərkəŋ gəm. Kəya wə aye aka nuutuŋ máŋ kasi kaa gaalaŋ gə minti teŋ bə əyu agal nuutuŋa də ko bə minti teke dəŋ nəkaŋ neŋ.»

⁴² Kəya Yeesu wəətənəy ada pa minti: «Kel gə minti gə jeerə-jeere giidə kefter kə Pepeŋaŋ aŋ əŋkənəy hõy bə mo? ‹Pərki tó bə minti kaa kə hərsiŋ a gəənu warna ha'aŋ, koloŋ pərki pisi bə deŋe kumsuŋ a hərsi bə kuliŋa haa tó ɗaw. Jəŋ teŋ bədoona haa Barkaŋ, yə dər áŋa kel kəmtəŋ gə ŋili áŋ gəm.›

⁴³ Ten waataŋ, yə bə de *Kumna kə Pepeŋ yaŋ wəra kaasəŋa, yə bə əyu wəra a kaa gə seŋka daalaŋ gə minti teŋ jəŋ joŋre duŋ. [

⁴⁴ Hulum awaŋ ne cəərə pərki toŋaŋ, wə hiti wəra. Pərkiŋ awaŋ ne cəərə hulumaŋ, wə nirɓu wəra.»]

⁴⁵ Kəkamna kə *kaa kə keere Pepeŋ də kaanə *Farisiyeŋ əskəŋ kel teŋ bədoona kəyaŋ, yə asaŋ faɗi minti Yeesu waataŋ kel haa cəərə té.

⁴⁶ Kəya yə əsəŋ bə golde kəkəya minti té daw la, səma yə də walka kasi kaa kə ablaw, gud bə minti kaŋ a bə waate minti Yeesu haa *hulum bə jogte ku mini kə Pepeŋ.