MATIYE 20 - JAA TƏMARWAŊ

Bərdə akaŋ werke kaa kə joŋre nuutuŋ

¹ «*Kumna kə Pepeŋ bə ŋarə-ŋere damdi kel kayiŋ ana. Hõy məna, bərdə aka kəman jəmaŋ ku wəra bəbəəgaŋ bə ɗe a golde kaa bə ji joŋre giidə aka də atələələma nuutuŋa.

² Bərdə akaŋ də kaa kə joŋre teŋ doŋ ku kumsi minti tó əyəy soloy kooso məna a jeŋa. Kəya wə vəənəy bə ɗe a ji joŋreŋ giidə aka nuutuŋa.

³ Wə haraŋ bə kele wəra də cəwa də kəccəŋ pa. Wə fəlaŋ kaa gaalaŋ a ko bə alumaŋa, yə paapa bə ji karmana ba.

⁴ Kəya wə wəətənəy minti: ‹Aŋ ɗee la a ji joŋre giidə aka katən gəm. Ten werkeŋ yaŋ damdi yə werkete kaŋ ana.›

⁵ Kəya yə kooroŋ faɗi gəm. Də cəwa də daaway daana də cəwa də minti yə le kaaraŋ dəərə aker daŋ, wə kəlaŋ wəra pa, wə fəkaŋ kaa a joŋreŋ na giidə akaŋ na pa.

⁶ Də cəwa də minti yə le kəccəŋ aker daŋ, wə kəlaŋ wəra, wə fəlaŋ kaa kəman a ko toŋa ada laki pa. Wə wəətənəy minti: ‹Aŋ jaŋ hẽẽya bay ji joŋre laka səm mo?›

⁷ Yə minti: ‹Are jaŋ haa gud bə minti hulum humuŋ are a joŋre baŋ.› Wə minti: ‹Jəəne bədoonaŋ, aŋ ɗee la a ji joŋre giidə aka katən gəm.›

⁸ Bə minti cəwaŋ dəraŋ wəra kəyaŋ, bərdə akaŋ mantaŋ hulum bə tiinə kaa kə joŋre nuutuŋ suru da, wə wəətunu minti: ‹Mantə kaa kə joŋreŋ da, əytəy werke neeteŋ la. Malə guudum la bə werke kəm ajew haa kaayaŋ gə minti teŋ bəŋ adoroŋ, ɗee la a gaw cuuru wəra cəərə kaayaŋ gə minti bəŋ a mele gud joŋreŋ ajew.›

⁹ Kaa gə minti yə humnuy a joŋreŋa də cəwa də minti yə le kəccəŋ aker da dəərəŋ bəŋ, mindi mindi mo fəlaŋ werkeŋ də soloy kooso məna'i.

¹⁰ Kəya werkeŋ koloŋ cəərə kaayaŋ gə minti teŋ a məlaŋ gud joŋreŋ ajew gəm ta. Yə bəŋ də ɗiki minti yə werke té yaŋ hayaŋ dəŋaŋ kaayaŋ gə minti bəŋ adordə teŋ. Səma mindi mindi mo aduubə di fəlaŋ haa soloy kooso məna damdi kaayaŋ ana gəm.

¹¹ Bə minti yə fəlaŋ werkeŋ bədoona kəyaŋ, yə əsəŋ bə ŋorme kuya cəərə bərdə akaŋa.

¹² Yə minti: ‹Kaaya teŋ lakaŋ, yə bəŋ haa adordə are. Yə jəŋ joŋre haa kir ler məna faɗi. Are kaayaŋ gə minti jaŋ a joŋreŋa hẽẽya dər cəwaŋa də həɓiŋ sar areŋ, tam bə werke are gəga'-gəga'i diiri haa naanaanə mo?›

¹³ Kəya wə haraŋ kel a kumundu guudi məna minti: ‹Daarənti, ten jəənəm dərəm paapa ji ba. Gosə golə la kəm, áŋ doŋ ku kumsə áŋ paapa cəərə werke bə soloy kooso kir je a joŋreŋa məna bə mo?

¹⁴ Doo werke nəmtiŋ la, ɗee la. Doonon dərən bə mo minti ten aye werke toŋ kəya a hulum bə minti bəŋ adoroŋ.

¹⁵ Ten paapa bə nakə-neke bə ji joŋre də soloy katən damdi giidən bəlaŋ ana bə mo? Giidim ɗəmam cəərəna haa gud bə minti ten hulum pisi sə maa mo mo?›»

¹⁶ Kəya Yeesu waataŋ kel ada pa minti: «Kaa gə minti teŋ hebkəna kaa kə adoroŋ, bə ɗe a kole yaŋ wəra kaa kə ajew; kaa gə minti teŋ hebkəna kaa kə ajew, bə ɗe a kole yaŋ wəra kaa kə adoro haa teŋ.»

Yeesu waate sam me du pa

¹⁷ Bə minti Yeesu kooroŋ Zeruzalem, wə jəmaŋ *kaa gə guudu hor ciiri ɓasiŋ. Wə əsəŋ bə wəətəy kela a kəkəy bə ɗe na caw minti:

¹⁸ «Aŋ bə ase, áŋ koore haa Zeruzalem, yə bə ɗe a aye ten *Kormə Hulúm yaŋ wəra a kəkamna kə *kaa kə keere Pepeŋ daana a *kaa kə hate ku gili nuutuŋ. Kəətiŋ bə don yaŋ minti ten kir awe wəra.

¹⁹ Yə ayan yaŋ wəra a kaa gə minti paapa kaanə Ziwifi baŋ, yə awte hin yaŋ cəərəna, yə bəran yaŋ bere də kelekiŋ daana yə ɓəlan yaŋ wəra apəya a kəbaŋ gə largaŋa. Dər hi bə soopeŋa ha'aŋ, ten hare yaŋ wəra dədərgə adordə meŋa.»

Nər anə Zaki də Zaŋ mante karman kasi Yeesu

²⁰ Kəya nər Zaki də Zaŋ, karmə Zebedeŋ, zeŋ sar Yeesu diiri. A vaŋ də gəgəərə tiinu, a əsəŋ bə mante karmana kəəsu.

²¹ Yeesu harna kel minti: «Te də caadə maa mo?» A minti: «Karməyan laki sarəmaŋ ɓasi keɗe, kalə kum la a nəənən minti tam əsəŋ ne a kumna nəmtiŋaŋ, yəəkəy la ajaŋ dəma, məna agal dəm kemera, məna agal dəm guluŋa gəm.»

²² Tó minti: «Karman bə minti aŋ məntunuŋ, guudu paapa də dərəŋ ba. Kopi bə lasi bə minti ten saara yaŋ, aŋ neke yaŋ bə saara gəm mo?» Yə minti: «Are neke yaŋ.»

²³ Tó minti: «Gəəzi aŋ bə se kopi bə lasi bə minti ten saaraŋ yaŋ, səma ŋeme ɗiki bə minti mindi mo ɗe a isi agal dən kemera, kumundu ba agal dən guluŋaŋ, paapa ten ba. Ko toŋ bə ɗe a ji haa a kaa gə minti Barən a ɗəmpunu wəra a niiniŋ.»

²⁴ Bə minti kaa kaayaŋ horiŋ əskəŋ kel teŋ kəyaŋ, yə humuŋ kuy yak-yak-yaki cəərə kəsaanə kumsiŋ té ɓasiŋa.

²⁵ Kəya Yeesu məntənəy suru da keɗe, wə əsəŋ bə wəətiya minti: «Aŋ wəra gə asə-ase minti kaa kə dəməəmə gə cəərə seŋkaŋ ji daŋgay a kaa gə minti yə ciiriŋ. Kaa kə samsam ji abay də kaa teŋ gəm.

²⁶ Aŋ teŋ a paapa kir ji bədoona aduubə də kumsəŋa ba. Hulum bəlaŋ ne minti tó jəə la ku boblo aduubə dəŋaŋ, wə jəə la haa hulum bə minti ji joŋreŋ a nəənəŋ ɗaw.

²⁷ Hulum bəlaŋ ne minti tó jəə la hulum bə ajew aduubə dəŋaŋ, wə jəə la haa kafkam kə mindi mindi mo guudəŋa ɗaw.

²⁸ Gud maa mo, *Kormə Hulúm bəŋ haa paapa minti kaa jəw joŋre la ba. Wə bəŋ haa minti wə jəə joŋre la a kaŋ ɗaw daana bə aye dədərgə du wəra bə miɗi kaa ablaw.»

Yeesu seere kaa kə bəwə-bəwi ɓasi

²⁹ Anə Yeesu də kaa gə guuduŋ yaakaŋ seŋka də Zeriko kəyaŋ, kaa ablaw təpaŋ guudu.

³⁰ Kaa kə bəwə-bəwi kəman ɓasi a jəŋ gə əsə-isi agəjaŋ də kəkəya. Bə minti yə əskəŋ minti Yeesu bə kele kənaŋ, yə əsəŋ bə naakte kuya minti: «Barkaŋ, *Kormə Davidiŋ, asə caadə are la kəm mo!»

³¹ Kaa gə ablaw əsəŋ bə jəy gəbaŋa minti yə zenə la. Té ha'aŋ, yə zeŋ gud naakte kuy pisi ze ɗaw minti: «Barkaŋ, *Kormə Davidiŋ, asə caadə are la kəm mo!»

³² Yeesu əsəŋ gil, wə məntənəy suru da, wə minti: «Aŋ bele minti ten jəŋ maa la mo?»

³³ Yə minti: «Barkaŋ, pəŋtə dər are la wəra.»

³⁴ Yeesu əsnəy caadi, wə maltaŋ kəəsu diri. Hebkən-hebkəna faɗi diri əsəŋ bə ase. Kəya yə haŋ kəkəy guudu faɗi gəm.