MATIYE 13 - JAA TƏMARWAŊ

Ku kumti cəərə hulum bə reye kolɓoya

¹ Dər hi toŋa kəyaŋ, Yeesu kəlaŋ warda aker da, wə ɗeŋ a isi warna cin ku kan kəmtəŋ na.

² Kəya kaŋ taaraŋ ablaw anə kirkir cuuru hãã wə koloŋ bə li giidə turtiŋa, wə əsəŋ ada cin. Kaa gə ablaw əsəŋ gil ku doŋdoŋa gəm.

³ Kəya wə əsəŋ bə wəətəy kela ablaw də *ku kumti minti: «Hulum kəman kəlaŋ wəra bə ɗe a reye kolɓoy giidə aka nuutuŋa.

⁴ Bə minti wə bə rəyu caw, surduŋ vaŋ agəjaŋ də kəkəy na. Kaskoŋ vaŋ a ko toŋa kəyaŋ, yə təknu wəra kuya le'-le'i.

⁵ Surduŋ ɗeŋ a ve a ko kəman bə minti pərki guudu adawra, seŋka cuuru anə ferra. Kəya kewkew duŋ vaŋ warda anə cəlamma faɗi.

⁶ Səma bə minti cəwaŋ ɗeŋ a fe apəya daaway rakiŋ, kewkew saawaŋ wəra faɗi, wə hẽŋeŋ wəra keskeleki gud bə minti kəsar du paapa gə vaa-ve adawra na anə hayaŋ ba.

⁷ Surdu ɗeŋ a ve a ko bə kəjəma. Kəjəm ɗeŋ a ve kaydaŋ, yə huufunu wəra.

⁸ Surduŋ vaŋ a ko bə cimə-cimiŋa. Kəya wə dəyaŋ warda, wə waŋ degeɓ-geɓi. Kolɓoy bə məna, kəəsu məna waŋ pisi kəsi, hor-hor kənki, hor-hor soope mo, bədoona ana.

⁹ Hulum bə minti jəəne də kosoŋ kirka əskiŋ, wə əskə la pisi faɗi.»

Yeesu waate kel a kaŋ də ku kumti haa səm mo?

¹⁰ Əsəŋ wəra sawəwa kəyaŋ, *kaa gə gud Yeesuŋ zeŋ suru da, yə əsəŋ bə wəətu minti: «Tam waate kel a kaŋ də *ku kumti haa səm mo?»

¹¹ Wə hərnəy kel minti: «Aŋ teŋ ha'aŋ, kel gə waate sam *Kumna kə Pep gə minti a gə ŋoyə-ŋoyeŋ, wə vaɗnaŋ dəŋ wəra a nəənəŋ. Səma kə kaa kaayaŋ, wə vəɗnəy di wəra ba.

¹² Gud maa mo, hulum bə minti əskəŋ kel neŋ, wə fele yaŋ ada ablaw pa kir minti yə jəə la máŋ suru ablaw. Səma hulum bə minti ɗempa a əski kel baŋ, nuutu weseki gə minti wə a iskiniy, yə ɓalke wəra ada ɓalka pa.

¹³ Ten wəətəy kel də ku kumti haa gud minti jəəne nuutu minti diri bə goleŋ, yə paapa bə ase ba. Jəəne nuutu minti kusniy bə iskiŋ, yə paapa bə əski guudiŋ ba.

¹⁴ Kel gə minti Ezay a jugnuy wəraŋ, yə doŋ kuy wəra haa bədoona minti: ‹Aŋ bə jeɓre kel yaŋ, səma aŋ bə iskiy guudi ba. Dərəŋ bə gole yaŋ, səma a bə ase gud kel ba;

¹⁵ gud bə minti kaa teŋ hẽŋeŋ ku tərməyi wəra, yə kaltaŋ kəəsi wəra kusni minti té a iski ba. Yə topoŋ kəəsi wəra diri minti dər té a gole ba. Yə jəŋ kel teŋ bədoona haa minti té a ase ba, té a jeɓre ba, té a əski kel teŋ ba minti té a hare sarən da minti ten siiriy laŋ ba.›

¹⁶ Səma waaleŋ nəəti gud bə minti dərəŋ bə ase daana kosnoŋ bə iski.

¹⁷ Gəəzi ten waataŋ, *kaa kə jogte ku mini kə Pepeŋ də kaa ɗekeriŋ ablaw a bəlaŋ minti té asə kar gə minti aŋ bə əsəyaŋ la, səma yə əsnəy ba. Yə a bəlaŋ minti té əskə kel gə minti aŋ bə iskiyaŋ la, səma yə iskini ba.»

Yeesu de bəlam də ku kumti bə cəərə hulum bə reye kolɓoy

¹⁸ «Bədoona ana ta, aŋ jeɓrə bəlam də *ku kumti bə cəərə hulum bə reye kolɓoyaŋ la.

¹⁹ Kaa gə minti əski kel bə waate cəərə *Kumna kə Pepeŋa, yə doy haa di baŋ, yə haa damdi agəjaŋ də kəkəy bə minti dər kar vaŋ adaŋ ana. Nərtitiŋ bi a humi kel gə minti a vaŋ ku tərməyiŋ wəra.

²⁰ Sərdə kaa gaalaŋ yaŋ, teŋ haa damdi ko bə minti koŋ adawra guudu pərkiŋ bə minti dər kar vaŋ adaŋ ana. Yə əski kel kə Pepeŋ, yə doy də waale faɗiŋ.

²¹ Səma yə paapa gə vaa-ve kəsar a kel teŋa ba tə bə moŋ, yə kole ɗiki di anə cəlamma faɗi. Bədoona ana ta, bə minti gəəli tuluŋ ne ciiriŋ, ɗalba yə ɗəlaŋ ne bə ləsəya gud kel kə Pepeŋaŋ, yə yaake kəkəy bə minti yə cuuruŋ hebkən-hebkəna faɗi.

²² Kaa gaalaŋ yaŋ, teŋ haa damdi ko bə kəjəma bə minti dər kar vaŋ adaŋ ana. Yə iski kel kə Pepeŋ, səma ɗiki də kel gə minti bə ji siri cəərə seŋkaŋaŋ huyuy ablaw, yə bə ji haa tiniini də kusri a kəkəy bə golde hurmaŋaŋ. Gud teŋa ta, kar teŋ huufi kel kə Pepeŋ wəra, de neeteŋ si ajewa pəda gəm.

²³ Sərdə kaa gaalaŋ yaŋ, teŋ haa damdi ko bə cimə-cimi bə minti dər kar vaŋ adaŋ ana. Yə iski kel kə Pepeŋ, yə iskiy guudiŋ gəm. De neeteŋ ɗe ajewa pisi damdi kolɓoy bə minti dəyaŋ wəra, kəəsu məna we kəsi, hor-hor kənki, hor-hor soope mo, bədoona ana'iŋ.»

Ku kumti cəərə kel kə ciiŋira

²⁴ Kəya Yeesu wəətənəy *ku kumti pa minti: «*Kumna kə Pepeŋ bə ŋarə-ŋere də kel teŋ haa kənaŋ: hulum kəman ɗeŋ a jo'e dər kaasaw pəsaŋ giidə aka nuutuŋa.

²⁵ Dər duugŋ kəmana bə minti kaŋ wəra a kinaŋ, hulum bə acukur nuutu faŋ da, wə bəŋ a jo'e ciiŋir aduubə də kaasaw pəsaŋaŋ, kəyaŋ wə kooroŋ faɗi.

²⁶ Bə minti kaasaw pəsaŋ suŋ wəra su kəyaŋ, yə vaŋ ciiri wəra. Ciiŋir vaŋ cuuru wəra aduubə di ada gəm.

²⁷ Kaa kə joŋre kə bərdə akaŋ bəŋ suru a wəətu minti: ‹Barkaŋ, tam a jo'oŋ giidə aka nəmtiŋ na kanna dər kaasaw pəsaŋ bə mo? Ciiŋir toŋ bə pəŋ duru ada haa də ane də mo?›

²⁸ Wə minti: ‹Jəŋ kel teŋ haa gila hulum bə acukur.› Kəya té minti: ‹Tam bele minti are ɗee la a pi ciiŋir toŋ wəra mo?›

²⁹ Wə minti: ‹Paapa! Aŋ a pəw wəra ba gud bə minti kaasaw pəsaŋ kole bə leŋe bə pi wəra kaasəŋa ada.

³⁰ Aŋ yəəkəy la bə si də kumsi. Hi bə ceme diŋ nəkaŋ neŋ, ten waate kaa kə cəməy yaŋ minti yə kotə cəərə ciiŋir la wəra a ko bə məna, yə untu la, yə kəw la wəra, yə van kaasaw pəsaŋ la giidə dorgoɗiŋa.›»

Ku kumti cəərə dər kəbaŋ konce'iŋa

³¹ Yeesu wəətənəy *ku kumti baalaŋ minti: «*Kumna kə Pepeŋ bə ŋarə-ŋere haa bə dər kəbaŋ gə minti yə məntəy minti ‹mutardəŋ› ana. Hulum ɗeŋ a ju'uy giidə aka nuutuŋa.

³² Yə kəncəŋ anə fenna gə daŋə-deŋe kumsiŋ keɗe, səma yə kole wəra kəbaŋ kəmtəŋ gə daŋə-deŋe kumsi kaayaŋ kosnə kəsaw. Kaskoŋ pəəti a tope kuli neeteŋ a kəəsiŋa.»

Ku kumti cəərə siipəŋa

³³ Kəya Yeesu wəətənəy *ku kumti baalaŋ pa minti: «*Kumna kə Pepeŋ bə ŋarə-ŋere bə siipə də minti həlgəŋ haara, a gaara dər kunti bə ŋaɓə-ŋeɓe pəriŋaŋ ana. Siipəŋ fe kuntiŋ wəra apəya keɗe.»

Yeesu tope bəlam də kel də ku kumti haa səm mo?

³⁴ Yeesu hataŋ kel teŋ a kaŋ keɗe də ku kumti. Wə wəətənəy kel haa də *ku kumti saksaki,

³⁵ kir minti kel gə minti *hulum bə jogte ku mini kə Pepeŋ a wəətənəy wəraŋ doo kuy la wəra minti: «Ten bə wəətətəy kel yaŋ də ku kumti. Kel gə minti gə metə-mete a mele bə gud koŋ da anə hãã, ten kay guudi yaŋ wəra.»

Yeesu ke gud ku kumti bə cəərə ciiŋir wəra

³⁶ Yeesu yaakaŋ kaa kə ablaw, wə kooroŋ a kele akera. Kəya *kaa gə guuduŋ zeŋ suru da, yə əsəŋ bə wəətu minti: «*Ku kumti bə cəərə ciiŋir bə giidə akaŋ, gaw guudu la wəra a are.»

³⁷ Wə hərnəy kel minti: «Hulum bə minti jo'oŋ dər kaasaw pəsaŋ haa ten *Kormə Hulúm.

³⁸ Akaŋ, haa seŋkaŋ neŋneŋ keɗe. Dər kaasaw pəsaŋ, haa kaa gə minti humi kosoŋ cəərə kel də *Kumna kə Pepeŋaŋ. Ciiŋir haa kaa gə minti humi kosoŋ cəərə Nərtitiŋaŋ.

³⁹ Hulum bə acukur bə minti jo'oŋ ciiŋir haa Nərtitiŋ. Ceme bə kaasaw haa tewe bə seŋkaŋ. Kaa kə ceme kaasaw haa *kaa kə digi kə Pepeŋ.

⁴⁰ Damdi kaŋ humuŋ ciiŋir bə vaw warna dər cəwaŋ naŋ, kel teŋ bə ji haa bədoona ana a tewe bə seŋkaŋa gəm.

⁴¹ Kormə Hulúm ve kaa kə digi nuutuŋ yaŋ da bə bi a humi kaa gə minti ke kumsi bə jəəti baymeleŋ də kaayaŋ gə jəəti baymeleŋ keɗe. Yə hay kuy yaŋ wəra bay ve a Kumna nuutuŋa.

⁴² Kaa kə digiŋ vay yaŋ wəra dər cəwa də kuu-ki ŋilikiŋa. A ko toŋa ha'aŋ, yə herɗe kisni yaŋ, yə hage yaŋ ada kasi gəəliŋ.

⁴³ Də ko toŋ kəyaŋ, kaa gə minti a bə jəəti kel ɗekeriŋaŋ, yə kole yaŋ bə welɗe a Kumna kə Biriŋ da damdi cəwaŋ də apəyaŋ ana. Aŋ jəəne də kosoŋ, aŋ əskə la pisi!»

Ku kumti cəərə soloy bə kisə-kisiŋa

⁴⁴ «*Kumna kə Pepeŋ bə ŋarə-ŋere də soloy kəman hayaŋi bə minti a wəra bə kisə-kisi giidə akaŋaŋ ana. Hulum kəman fəlnu, wə həənu, wə ziinu guudu kisiŋ giidə aka taŋa ada toki. Wə kooroŋ haa də waaleŋ ablaw, wə ɗeŋ a gusi kar nuutuŋ wəra neŋneŋ keɗe, wə haraŋ da a gusi aka taŋ.

⁴⁵ Aŋ golə dərəŋ la day haa kənaŋ pa. Kumna kə Pepeŋ bə ŋarə-ŋere də hulum bə celeere bə minti golde ataara də gusi awəy-awəy wəra hasi ana.

⁴⁶ Bə minti wə fəlaŋ də gusi awəy kə ablaw, wə ɗeŋ a gusi kar gə minti kəəsuŋ wəra neŋneŋ keɗe, wə haraŋ da bə bi a gusi ataara tá pəsaŋ.»

Ku kumti cəərə amaaya təəruŋa

⁴⁷ «*Kumna kə Pepeŋ bə ŋarə-ŋere də amaayaŋ ana pa. Yə gaana ne dər kanaŋ, a tope gidiirə askaŋ warda hãy keɗe.

⁴⁸ Bə minti amaayaŋ ɗosoŋ ne wəra də askaŋ, yə təɗa wəra apəya ku kana. Kəya yə isi je'-je'i bə vere aska pəsaŋa wəra, yə vaara giidə kəlama. Aska də minti taŋ paapa kir ji karman baŋ, yə hare bə vaara na warna.

⁴⁹ A tewe də seŋkaŋa ha'aŋ, kar bə ji haa bədoona dege'-dege'i gəm. *Kaa kə digi kə Pepeŋ bi yaŋ a ɓarse dər kaa kə sərkəŋ wəra də kaa kaayaŋ ɗekeriŋ.

⁵⁰ Yə ve kaa kə sərkəŋ yaŋ dər cəwa də kuu-ki ŋilikiŋa. A ko toŋa ha'aŋ, yə herɗe kisni yaŋ, yə hage yaŋ ada kasi gəəliŋ.»

⁵¹ Kəya Yeesu ləənəy kuy minti: «Aŋ əskəŋ kel teŋ ne nuutu wəra pisi keɗe gəm mo?» Yə minti: «Ãã, are iskiniy ne.»

⁵² Kəya wə wəətənəy minti: «Bədoona ana ta, *hulum bə hate ku gili bə minti koloŋ ne wəra hulum kə Kumna kə Pepeŋ, wə bə ŋarə-ŋere máŋ haa də bərdə kuli bə minti humuŋ bege nuutu kimirwiŋ də bege nuutu bə laa-leŋ warda a ko duŋ daŋ ana.»

Kaa gə giidə seŋka də Nazaretiŋ de haa də kel kə Yeesuŋ ba

⁵³ Bə minti Yeesu təwaŋ cəərə kel gə cəərə *ku kumtiŋ wəra taw kəyaŋ, wə yaakaŋ ko toŋ,

⁵⁴ wə haraŋ bə koore giidə vil də minti wə a suŋ da adaŋ. Wə əsəŋ bə hate kaŋa giidə *kuli bə toose kə kaanə Ziwifiŋa. Hate nuutuŋ ŋələŋ kaŋ wəra hasi, kəya yə əsəŋ bə waate minti: «Wə fəlaŋ ase toŋ daana səɓaki taŋ bə jəəti miɗiŋ haa da ane da mo?

⁵⁵ Kəna paapa kormə hulum bə lete kəbaŋ bə mo, kormə Mari, seenə anə Zaki, Zosefi, Simoŋ daana Zudə bə mo?

⁵⁶ Kəsəənu kəram lam sar áŋa kəna bə mo? Yə bədoona tə kəm, wə bə fəlaŋ kel teŋ da ane da mo?»

⁵⁷ Kəya ɗiki di həənəy kuy wəra bay de guudu faɗi. Kəya Yeesu wəətənəy minti: «Yə humuŋ kosoŋ hõy cəərə *hulum bə jogte ku mini kə Pepeŋ giidə seŋka nuutuŋa daana girdu akera ba.»

⁵⁸ Kəya Yeesu jəŋ miɗi a ko toŋa ablaw pəda gud bay de neeteŋa.