LIKI 24 - JAA TƏMARWAŊ

Yeesu hare wəra dədərgə adordə meŋa

¹ Bəbəəgaŋ dər Dəmasiŋa, kəram kooroŋ cəərə teɗker də son bə siisi pisi də agumgum duru bə minti yə a ɗəmpunuŋ.

² Bə minti yə ɗeŋ a tuukiŋ, yə fəlaŋ pərki bə ku teɗker wəra bə laktə-lakte agəjaŋa.

³ Yə vaŋ giidə, yə fəlaŋ titi də Barkaŋ Yeesu ada ba.

⁴ Yə lenteŋ wəra gud kel gə minti jəŋ, ɗe a goleŋa kaa vəɗaŋ diri gil-gil ɓasi də dəməəmə də welɗe pələk-pələka siri.

⁵ Kəya yə cokoŋ ciiri adawra kas walka, kaa té ɓasiŋ wəətənəy minti: «Aŋ golde hulum bə dədərgəŋ adəwaldə kaa kə mee-meŋa səm mo?

⁶ Wə paapa kəna ba, wə haraŋ ne wəra dədərgə. Aŋ ɗəkə kel gə minti wə a waatənaŋ dəŋ bə minti wə a kəm Galile daŋ

⁷ minti: ‹Doŋ kir minti yə ayə *Kormə Hulúm la wəra kasi kaa kə bayməlaŋa, yə ɓəlu la wəra a kəbaŋ gə largaŋa daana wə harə la wəra dədərgə a hi bə soopeŋa.›»

⁸ Kəya ciiri ɗəkəŋ kel gə minti Yeesu a wəətənəy diŋ.

⁹ Bə minti yə haraŋ da minti gole teɗker, yə bəŋ a tope bəlam də kel teŋ wəra keɗe a *kaa gə guudu hor ciiri məna'iŋ, daana a kaayaŋ teŋ keɗe gəm.

¹⁰ Kəram teŋ haa anə Mari də Magdalaŋ, də Jan daana Mari nər Zaki. Də kəram kaayaŋ gə minti yə a jəŋ də kumsiŋ, yə keɗe yə topoŋ bəlam də kel teŋ a *kaa kə vaa-veŋ.

¹¹ Səma kaa kə vaa-veŋ a ɗəkəŋ neeteŋ haa minti yə waate a té haa ku lente, yə doŋ kel neeteŋ ba.

¹² Də teŋ keɗe Piyer kooroŋ də tara cəərə teɗker, wə goɓoŋ bə gola giidə, wə asaŋ ladəraŋ máŋ laki təwa. Kəya wə haraŋ aker da, bə ŋələ-ŋili ba anə caw gud kel gə minti jəŋ.

A kəkəy bə Emayusiŋa

¹³ Dər hi tó bə məna'iŋa, *kaa gə gud Yeesu ɓasi kooroŋ giidə wəlasi də minti yə manta Emayusiŋ. Wəlasi taŋ wəra sar Zeruzalema kas tooto ɗəwa.

¹⁴ Yə bə keɗpe zugi cəərə kel gə minti a jəŋ keɗe.

¹⁵ Anaaŋa, bə minti yə bə keɗpe lam daana bə ce awəyaŋ, Yeesu də kusru təpaŋ guudi bə ɗe diiri a kəkəya.

¹⁶ Yə əsnu caw, səma karman həənəy kuy wəra bay əsu minti kəna mindi moŋ.

¹⁷ Yeesu ləənəy kuy minti: «Aŋ ce awəy cəərə maa toŋa a kəkəya bədoona mo?» Kəya yə əsəŋ laki kas də laawe.

¹⁸ Hulum məna guudi, səmu minti Kelewpasi, hərnu kel minti: «Gəɗaŋ Zeruzalema haa tam məna bay iski kel gə minti jəŋ akaceŋa kənaŋ mo?»

¹⁹ Yeesu wəətənəy minti: «Kel maa jəŋ mo?» Yə hərnu kel minti: «Kel gə minti jəŋ sar Yeesu bə Nazaretiŋaŋ. Wə *hulum bə jogte ku mini kə Pepeŋ, wə də səɓaki a joŋreŋa daana a kel kə waateŋa tiinə Pepeŋa, tiinə kaŋa keɗe gəm.

²⁰ Kəkamna kə *kaa kə keere Pepeŋ də kaa kəmtəŋ náŋ əynu ku meŋa daana yə ɓəlnu wəra a kəbaŋ gə largaŋa.

²¹ Ɗiki də are a bə malə-mele minti wə haa hulum bə minti a sə a ɓiti kaanə *Israyel wəraŋ. Anaaŋa hiti dayna soope bə minti kel teŋ jəŋ.

²² Sərdə kəram naareŋ ŋələŋ are. Yə a kooroŋ siswiɗiŋ cəərə teɗker na,

²³ səma yə fəlaŋ titi du ada ba. Yə haraŋ da a tope bəlam də kel a are minti *kaa kə digi kə Pepeŋ vəɗaŋ dər té, yə waataŋ té minti wə dədərgə.

²⁴ Sərdə are kooroŋ cəərə teɗker, yə fəlaŋ kel teŋ damdi kəram a wəətənəy ana, səma tó ha'aŋ, yə əsnu də diri ba.»

²⁵ Kəya Yeesu wəətənəy minti: «Aŋ kaa gə minti cəərəŋ paapa! Aŋ də liŋ-liŋ bə de gud kel gə minti kaa kə jogte ku mini kə Pepeŋ a wəətənəy!

²⁶ Doŋ kir minti *Hulum bə minti Pepeŋ ŋəmnu lasə la bədoona, adoro wə kele yaŋ a məyan nuutuŋa.»

²⁷ Kəya wə topoŋ bəlam də kel gə minti a jəŋ gə jeerə-jeere cuuruŋ wəra keɗe, wə məlaŋ guudu də kefter kə *Moyisiŋ, də kefter kə kaa kə jogte ku mini kə Pep gə minti yə a jiiriniy wəraŋ keɗe.

²⁸ Bə minti yə tuukuŋ maŋ sar kuli bə minti yə ɗe adaŋ, Yeesu jəŋ damdi tó raawe ajewa ana.

²⁹ Kəya yə dignu, yə wəətunu minti: «Əsə la sar are kəna, gud bə minti cəwaŋ dəraŋ wəra, ko bə duugŋ wəra maŋ.» Kəya yə vaŋ aləwa, yə əsəŋ də kumsi.

³⁰ Bə minti wə əsəŋ bə hame diiriŋ, wə haŋ mappaŋ, wə jəŋ suuse a Pepeŋ cəərə, kəya wə ɗoklona dərə, wə əynəy di.

³¹ Gud teŋa diri bəŋəŋ wəra, kəya yə əsnu wəra pəɗaki, səma wə lenteŋ wəra diri a ko toŋa ada cin faɗi.

³² Kəya yə əsəŋ bə waate kumsi minti: «Bə minti wə bə waate kela a áŋ ha'aŋ daana bə ke gud jeereŋa wəra a áŋ a kəkəy daŋ, tarmə áŋ do'oŋ gal akera bə cəwa ana bə mo?»

³³ Kəya yə pətəŋ apəya cəlam faɗi, yə haraŋ Zeruzalem, yə ɗeŋ a fele kaa gə gud Yeesu hor ciiri məna'iŋ gə tapə-tepe ciiri də kaa kaayaŋ.

³⁴ Yə əsəŋ bə waate kaayaŋ ɓasi gə tulə-tuliŋa minti: «Barkaŋ haraŋ ne wəra dədərgə gəəzi, wə vəɗaŋ dər Simoŋ!»

³⁵ Kəya, kaa ɓasiŋ əsəŋ bə ke gud kel neete gə minti yə a wəətənəy a kəkəyaŋ, daana gə minti yə asaŋ Yeesu naanaanə mo a ko bə minti wə ɗokloŋ dər mappaŋ.

Yeesu veɗe kusru dər kaa gə guuduŋa

³⁶ Bə minti yə kəm bə waate kel teŋaŋ, Yeesu də kusru pəŋ duru aduubə di gil faɗi. Wə wəətənəy minti: «Kəkaɓiŋ jəə la dəərəŋ!»

³⁷ Kəya kusri humnuy tukuk-kuk, walka jiiniy ablaw. Yə a ɗəkəŋ neeteŋ haa minti té asaŋ tiirə karman.

³⁸ Səma Yeesu wəətənəy minti: «Ku tarməyaŋ jəmaŋ wəra səm mo? Aŋ də awəy ku tarməyaŋa bədoona səm mo?

³⁹ Aŋ golon kaasən la də kamparən. Haa kəna ten gəəzə-gəəzi! Aŋ laaman kusrən la, aŋ golə la, gud bə minti tiiruŋ paapa də kusuki daana kəskəŋ damdi aŋ asnan gilaŋ ana ba.»

⁴⁰ Kəya wə gəənəy diri cəərə tarwa də kəəsuŋa daana də kəmpuruŋa.

⁴¹ Giidi jəŋ waale ablaw! Də teŋ keɗeŋ, yə ɗempa a de kel teŋ kəm bə pa. Gud bə minti kel teŋ ŋilniy, Yeesu ləənəy kuy minti: «Karman bə hame yaŋ kaasəŋa kəna mo?»

⁴² Kəya yə əynu aska də hogə-hoge.

⁴³ Wə haana, wə hamna də diri.

⁴⁴ Kəya wə wəətənəy pa minti: «Kel gə minti wəra gə jeerə-jeereŋ cəərəna keɗe giidə kefter bə *ku gili kə *Moyisiŋaŋ, kə *kaa kə jogte ku mini kə Pepeŋaŋ, daana giidə Gudulaŋ, kir de kuy wəra keɗe. Haa kel gə minti ten a bə waataŋ dəŋa minti ten a jəŋ kəm səraŋa caw.»

⁴⁵ Kəya wə əynəy ase bə minti yə əskə gud jeere ke Pepeŋ la.

⁴⁶ Wə wəətənəy minti: «Kel teŋ damdi gə minti gə jeerə-jeereŋ ana: Kristuŋ kir lese daana kir hare wəra dədərgə adordə meŋa a hi bə soopeŋa.

⁴⁷ Yə mele guudi yaŋ bə waate kela Zeruzalema də səmu minti kaŋ kole kirki la a baymele neeteŋ daana yə falə vəəgi bə giiduŋ la guudu. Yə waate kel teŋ yaŋ wəra a kaŋ giidə seŋka daalaŋ-daalaŋa keɗe.

⁴⁸ Aŋ kəmnə də kəkəy də kel teŋ.

⁴⁹ Ten ge karman bə minti Barən a waataŋ minti tó ayaŋ dəŋ yaŋ da a nəənəŋ. Nəətiŋ, aŋ əsə la giidə vila hãã bə minti səɓaki də apəyaŋ bəə la kəm cəərəŋa.»

Yeesu koore apəya

⁵⁰ Kəya Yeesu kooroŋ warna diiri sar Betani na maŋ. A ko toŋa wə humuŋ kəəsu apəya, wə gəənəy pisiŋ ciiri.

⁵¹ Bə minti wə bə gay pisiŋa ciiriŋ, Pepeŋ həənu warna apəy na.

⁵² Neeteŋ, bə minti yə kəənu awalna kaŋ, yə haraŋ máŋ Zeruzalem də waale feh-fehi.

⁵³ Yə ɗeeteŋ saksaki giidə *Kuli kə Pepeŋa bə jəw suuse.