LIKI 21 - JAA TƏMARWAŊ

Aye kə həlgə də bay

¹ Yeesu haŋ duru apəya, wə asaŋ kaa kə begeŋ bə ve soloya a ko bə feke soloya giidə *Kuli kə Pepeŋa.

² Wə asaŋ həlgə kəman də bay də caaca bə ve karmə soloya ɓasi gəm.

³ Kəya Yeesu waataŋ minti: «Gəəzi ten waataŋ, aye kə həlgə də bay tá də caacaŋ dəŋaŋ kə kaa kaayaŋ keɗe.

⁴ Gud maa mo kaa kaayaŋ ayaŋ soloy nuutu ablaw, səma yaakaŋ kəəsi ablaw gəm. Həlgəŋ də caaca naataŋ nuutu anə keɗeŋ, a ayaŋ karman bə minti a jəŋ kaasaŋ warna neŋneŋ keɗe faɗi, karman bə minti a sə a fele hameŋ duuruŋ.»

Yeesu waate sam ɓalke bə Kuli kə Pepeŋ

⁵ Sərdə kaa kəman əsəŋ bə waate sam *Kuli kə Pepeŋa minti wə bə hərsə-hərsi də pərki pis-pisi, də kar gə minti yə a əytənəy a Pepeŋ keɗe bə ɗəmpuŋ. Kəya Yeesu waataŋ minti:

⁶ «Hi kəman bə bi yaŋ, kar gə minti aŋ bə əsəya hebkənaŋ, yə bə ce yaŋ wəra neŋneŋ keɗe, koo pərki də kumundu yaake bə malə-mele cəərə kumsu ada ba.»

Lasi də minti bi ajew də tewe də seŋkaŋaŋ

⁷ Yə əsəŋ bə le ku Yeesu minti: «Hulum bə hateŋ, kel teŋ ɗe a ji kotnə mo? Karman maa ji mo bə ge dər minti kel teŋ maŋ bə de kuyaŋ?»

⁸ Yeesu wəətənəy minti: «Aŋ jəə la wəra gə gunə-guni, aŋ a yaake hulum bə ləŋaŋa ba, gud maa mo kaŋ ablaw piti yaŋ bə ji kusri damdi té kəna ten ana. Mindi mindi mo bə waate yaŋ minti tó kəna *Hulum bə minti Pepeŋ ŋəmnuŋ, daana minti koŋ nəkaŋ ne wəra. Səma, aŋ a hay bəlam di ba.

⁹ Aŋ ɗəlaŋ əski sam duuriŋ ne daana kaŋ pətəŋ ne apəya cəərə kumsiŋ, aŋ a jeme walka ba gud maa mo kel teŋ kir ji wəra kəm ajewa, səma tewe bə koŋ bi adoro də kel teŋa anə cəlam faɗi ba.

¹⁰ Kəya aŋ bə ase gidiirə kaa yaŋ bə piti cəərə gidiirə kaa gaalaŋa, seŋka mooto cəərə daalaŋ mooto gəm.

¹¹ Seŋkaŋ miirti yaŋ də səɓaki, tay bə jəəti yaŋ ta'-ta'i a koŋa, daana boŋ gəm. Kar gə məɗ-miɗi gə ji walka ablaw jəəti yaŋ apəy da.

¹² Səma, ajew də kar teŋa keɗeŋ, yə topoŋ yaŋ, yə ləsaŋ yaŋ, yə bə taɗtaŋ yaŋ warna ku kəətiŋ na giidə *kuli bə toose kə kaanə Ziwifiŋ na, yə fəkaŋ yaŋ a daŋgaya, yə ɗe yaŋ dəərəŋ tiinə kaa kə dəməəməŋ na, keɗe haa gud səmana.

¹³ A ko toŋa, aŋ fele kəkəy yaŋ bə ji kəmnə də kəkəy də kel katən wəra a niini.

¹⁴ Yə humnuŋ neŋ, aŋ a hoye ɗiki dəŋ wəra ajewa cəərə kel gə minti aŋ ɗe a wəətəy wəra cəərə kusrəŋa ba,

¹⁵ gud bə minti ten də kusrən, ten ayaŋ hel də kel kə waateŋ yaŋ kir minti hulum bə acukur dəŋ anə məna a isi tiinəŋa də kel gil ba, daana a ce awəy tiinəŋa ba.

¹⁶ Anə bəraŋ, anə nərəŋ, anə kəsaanaŋ, anə kusul dəŋ, daana anə gədaaraŋ bə ayaŋ yaŋ warna haa té. Yə bə ji kel yaŋ minti yə awə sərdəŋ la wəra.

¹⁷ Kaŋ keɗe bə məlaŋ dərəŋ yaŋ wəra gud səmana,

¹⁸ səma kaaɗe gə cəərəŋ lente wəra anə məna ba.

¹⁹ Aŋ əsə la ŋəŋ, aŋ seere dədərgə dəŋ yaŋ wəra haa bədoona ana.»

Yeesu waate sam ɓalke bə Zeruzalem

²⁰ «Dər hi bə minti aŋ asaŋ Zeruzalem ne wəra də ɓəkə-ɓiki də kaa kə duuriŋ, aŋ ase yaŋ akaceŋa minti a ɓalke yaŋ wəra maŋ.

²¹ Kaa gə minti giidə seŋka də Zudeŋaŋ gadtə la wəra a ko bə minti pərkiŋ adaŋ. Kaa gə minti Zeruzalema akera adaŋ, yə vaa la wəra. Kaa gə minti jəŋ də ne warda maska daŋ, a ve aker da giidə vil də pəda.

²² Gud bə minti hi toŋ ji yaŋ hi bə ge acukur minti kel gə jeerə-jeere kə Pepeŋ doo kuy la wəra keɗe.

²³ Gəəliŋ ateŋa haa kə kəram gə məənəŋ daana kaayaŋ gə minti də kərməyi a kawaŋ! Gud bə minti lasi mooto ji yaŋ giidə seŋka taŋa, daana waŋ kə Pepeŋ ji yaŋ wəra cəərə kaa teŋa.

²⁴ A ko toŋa, yə awe kaŋ yaŋ wəra də macəlam, yə humti sirdiŋ yaŋ warna a daŋgay na adəwaldə gidiirə kaa gaalaŋ na warna keɗe. Kaa gə minti paapa kaanə Ziwifi baŋ tayte Zeruzalem yaŋ wəra, hãã bə minti hi neeteŋ neke wəraŋ.»

Bi də Kumna kə Pepeŋ

²⁵ «Kəya kar gə məɗ-miɗi ji yaŋ dər cəwaŋa, dər kitira, daana dər seska də apəy da. Cəərə seŋkaŋaŋ, kaŋ lente yaŋ wəra, yə ji walka yaŋ kas naakte bə kosoŋ bə kan kəmtəŋ daana kas caɓte diŋ.

²⁶ Kaŋ me yaŋ ləmkər kas ɗiki bə walka də kel gə minti bə bi cəərə seŋkaŋaŋ, gud bə minti səɓaki də apəyaŋ miirti yaŋ.

²⁷ Kəya yə ase Kormə Hulúm yaŋ bə bi da dər kamraŋ da daana dər pəɗakiŋa bə welɗe wəra kaŋkaŋ.

²⁸ Bə minti teŋ ɗəlaŋ ji neŋ, aŋ əsə la wəra pisi, aŋ humə cəərəŋ la apəya, gud bə minti hi bə bədəŋ wəra maŋ.»

²⁹ Kəya Yeesu wəətənəy ku kumti minti: «Aŋ golə la sə gum də kəbaŋ kaayaŋ keɗe:

³⁰ minti aŋ ɗəlaŋ ase kusni ne bə veŋ, aŋ ase faɗi minti pisir wəra maŋ.

³¹ Bədoona ana gəm, bə minti aŋ asaŋ kar teŋ ne kəya bə jiŋ, aŋ asə la wəra faɗi minti *Kumna kə Pepeŋ wəra maŋ bə bi.

³² Gəəzi ten waataŋ, kaa gə minti kəm zugi hebkənaŋ bese wəra keɗe bay ase kel teŋ bə ji də diri baŋ ba.

³³ Tarmə pepeŋ daana seŋkaŋ bə ji ajew na pəda, səma kel katən bə ji yaŋ saksaki.»

Aŋ əsə la wəra gə gunə-guni

³⁴ «Aŋ amə kusrəŋ la pisi minti ɗiki dəŋ a hoye wəra gud kar gə minti aŋ həməy daana kar gə minti aŋ say ba, cəərə kel gə cəərə seŋkaŋa bə gəm. Aŋ jəŋ bədoona baŋ, hi toŋ həŋ yaŋ gurusi,

³⁵ gud bə minti wə bi yaŋ cəərə kaa gə cəərə seŋkaŋa keɗe damdi amaayaŋ ve cəərə karmana ana.

³⁶ Aŋ əsə la wəra gə gunə-guni, aŋ toosə la saksaki kir minti aŋ falə səɓaki la bə deŋe wəra ku kel gə minti bə bi daŋ, daana bə isi wəra pisi tiinə *Kormə Hulúma minti wə haraŋ də neŋ.»

³⁷ Dər daawayaŋ, Yeesu bə hate giidə *Kuli kə Pepeŋa, səma ɗe a deye duugŋ, wə ɗe a həəti warna cəərə *pərki bə minti yə məntu Oliviyeŋ na.

³⁸ Kəya kaŋ camte kuy suru da giidə Kuli kə Pepeŋ da bə bi a əski kel nuutuŋ. – 21 22