LIKI 19 - JAA TƏMARWAŊ

Yeesu ger Zake

¹ Bə minti Yeesu tuukuŋ Zeriko tuukaŋ, wə əsəŋ bə cakɗe vil taŋa wəra.

² A ko toŋa kəya, hulum yaŋ ada səmu minti Zake. Wə kumna də *kaa kə tope lambaŋ daana wə də bege ablaw.

³ Wə a bəlaŋ minti tó asə Yeesu la də dər tó, minti wə mindi mo. Səma, duru ɗempa a əsu ba kas kaa kə ablaw gud bə minti wə godogroy.

⁴ Kəya wə kooroŋ də tara ajew na tiinə kaŋ na. Wə ɗeŋ a li apəya a kəbaŋa minti tó asə Yeesu la, gud bə minti wə sə a bə kele yaŋ guudiŋ.

⁵ Bə minti Yeesu tuukuŋ a ko toŋaŋ, wə haŋ duru apəya, wə wəətunu minti: «Zake, vaa da warda adawra da cəlamma, gud bə minti ten kir hi dayna ger dəma.»

⁶ Kəya Zake luŋ warda cəlam faɗi, wə duunu irku du də waale.

⁷ Kaa gə minti asaŋ kel teŋ keɗeŋ, yə əsəŋ bə ŋorme kuya bə waate minti: «Hulum toŋ ɗeŋ a hi haa ger hulum bə baymeleŋa!»

⁸ Səma Zake faŋ apəya, wə waataŋ Barkaŋ minti: «Barkaŋ, golə la, ten ɓarse nusi də kar nin yaŋ wəra a kaa kə caacaŋ, daana jəəne minti ten a jəŋ tiniini də hulum ne a kəkəy bə de soloy nuutuŋ, ten wirku yaŋ máŋ kampa waaɗe.»

⁹ Kəya Yeesu wəətunu minti: «Giidə kuli toŋ fəlaŋ seere ne dayna, gud bə minti hulum toŋ a kaasaw də *Abrahama gəm.

¹⁰ Bədoona ana, *Kormə Hulúm bəŋ a golde daana a seere kaa gə minti a lenteŋ wəraŋ.»

Ku kumti cəərə soloy bə minti kumnaŋ əynu kasi kaa kə joŋre nuutuŋaŋ

¹¹ Bə minti kaŋ bə iski kel teŋaŋ, Yeesu raawaŋ bə waate *ku kumti gaalaŋa a kaa gə minti bəŋ a iski kel nuutuŋ. Wə jəŋ bədoona gud bə minti wə wəra maŋ sar Zeruzalema, kaŋ ɗəkəŋ neeteŋ haa minti *Kumna kə Pepeŋ veɗe wəra hebkəna a ko toŋa faɗi.

¹² Wə wəətənəy ta minti: «Golə la, pur kəman yaŋ, wə a kaasaw də kumnaŋa. Wə kooroŋ warna giidə seŋka kəman na tooto minti yə doo tó da də ada kumna. Adoro tó hare da máŋ kumna.

¹³ Ajew də kooreŋa, wə mantaŋ gud kaa kə joŋre nuutuŋa hor, wə ɓərsənəy soloy kəəsi məna-məna keɗe. Wə wəətənəy minti: ‹Aŋ jəə celeere la duuru hãã bə minti ten hare daŋ.›

¹⁴ Səma kaa gə giidə seŋka nuutuŋ jəmaŋ acukur wəra duuru. Yə əsəŋ, yə vaŋ kaa a waate minti: ‹Are bele minti hulum toŋ jəə la kumna naare ba.›

¹⁵ Bədoona, də teŋ keɗe wə haraŋ da máŋ giidə seŋka nuutuŋ da kumna. Wə mantaŋ kaa kə joŋre nuutu hori gə minti wə a əytənəy soloy kəəsiŋ, bə gole joŋre bə minti mindi mo a juunu duuruŋ.

¹⁶ Hulum bə joŋre bə ajew bəŋ suru, wə wəətunu minti: ‹Bərdən, soloy nəmti məna'i bə minti tam a aynan diŋ, ten fəlaŋ guudu hor.›

¹⁷ Kumnaŋ hərnu kel minti: ‹Tam jəŋ kel teŋ pəsaŋ, tam hulum bə joŋre ɗeketi. Gud bə minti tam jəŋ joŋreŋ a kuɗuŋa də kar koncoŋ, ten ayam abay cəərə vil kəmtəŋa hori.›

¹⁸ Hulum bə joŋre bə ɓasiŋ bəŋ suru, wə wəətunu minti: ‹Bərdən, soloy nəmti məna bə minti tam aynan diŋ, ten fəlaŋ guudu wiiɗiw.›

¹⁹ Kumnaŋ wəətunu minti: ‹Tam, ten ayam abay cəərə vil kəmtəŋa wiiɗiw.›

²⁰ Kəya baalaŋ tuukuŋ, toŋ wəətunu minti: ‹Barkaŋ, golə la haa kəya soloy məna bə minti tam a aynan diŋ, ten mitnu a dəməəmə.

²¹ Ten jəŋ walka kaasam gud bə minti tam hulum bə minti kel dəm gəəli. Kar gə minti vəənəy paapa tam baŋ, tam humtuy a kusrum faɗ-faɗi; kaasaw gə minti tam a ju'uni baŋ, tam cəməy faɗ-faɗi gəm.›

²² Kumnaŋ hərnu kel minti: ‹Tam hulum bə joŋre bə baymeleŋ toŋ! Ten jəmam kəəti dəm də dər kel nəmtiŋ toki. Tam wəra bə asə-ase minti ten hulum bə minti kel dən gəəli tə kəm, ten humti kar gə minti ten vəənəy paapa ten baŋ, ten ceme kaasaw gə minti ten a ju'uniy baŋ.

²³ Tam gaanan soloy nin a ko bə minti yə ayte soloy də kan du adaŋ bə səm mo, minti bəŋa ten haraŋ də neŋ, ten falə kan du la guudu ada?›

²⁴ A ko toŋa kəya, wə waataŋ kaa gə suruŋ minti: ‹Aŋ doo soloy bə kəəsu la wəra, aŋ əyu la a hulum bə minti nuutuŋ hor.›

²⁵ Yə hərnu kel minti: ‹Barkaŋ, wə də soloy kəəsu hor paŋ mo!›

²⁶ Wə wəətənəy minti: ‹Ten waataŋ: hulum bə minti jəəne də karman kəəsuŋ, yə əyu yaŋ ada pa. Səma, hulum bə minti karman nuutu paapaŋ, weseki bə minti kəəsuŋ, yə daw du yaŋ wəra.

²⁷ Kaa gə acukur dən gə minti a balnan kumna neete baŋ, bəəda diiri kanda, əwəy la wəra tiinina kəna.›»

Yeesu kele Zeruzalema

²⁸ Adordə kel kə waate teŋa, Yeesu kəlaŋ tiinə kaa na bə koore Zeruzalem.

²⁹ Bə minti wə tuukuŋ sar wəlasi bə Betfajeŋa daana Betaniŋ, maŋ sar *pərki bə minti yə məntu Oliviye, kəya wə vaŋ kaa warna ɓasi gud *kaa gə guuduŋ na.

³⁰ Wə wəətənəy minti: «Aŋ ɗee la giidə wəlasi də tiiniŋ na haa naŋ. Aŋ vaŋ ne ada naŋ, aŋ fele kormə agerhẽ bə minti hulum a luunu kəm hõy baŋ bə əntə-ənti gil. Aŋ fuku da, aŋ bəəda duuru kanda.

³¹ Hulum laanaŋ kuŋ ne minti: ‹Aŋ fuku haa səm moŋ?›, aŋ həru kel la minti: ‹Barkaŋ də caadu.›»

³² Kəya kaa kə vaa-veŋ kooroŋ, yə ɗeŋ a fele kel damdi Yeesu a wəətənəy diŋ ana.

³³ Bə minti yə bə foke kormə agerhẽŋaŋ, kəmnə duŋ wəətənəy minti: «Aŋ foke kormə agerhẽŋ haa səm mo?»

³⁴ Yə haraŋ kel minti: «Barkaŋ də caadu.»

³⁵ Kəya yə doŋ kormə agerhẽ da a Yeesu, yə pəŋ dəməəmə neete də cəərə kumsəŋ wəra, yə baartəna cuuru, kəya yə luŋ Yeesu kərdu.

³⁶ Bə minti wə bə ɗe caw, kaŋ fəkaŋ dəməəmə neeteŋ də cəərə kumsəŋ a kəkəya.

³⁷ Bə minti wə bə tuuki maŋ sar Zeruzalema a kəkəy bə minti sorke warda cəərə pərki bə Oliviye daŋ, kaa gə gud Yeesuŋ keɗe jəŋ wəra fənay də waale, daana yə əsəŋ bə tokɗe Pepeŋa koloŋ-koloŋ cəərə miɗi bə minti yə a əsnuŋ keɗe minti:

³⁸ «Pepeŋ gaa pisi la cəərə Kumna bə minti bəŋ a sam Barkaŋaŋ! Kəkaɓiŋ jəə la apəya, ko bə apəyaŋ keɗe tokɗə Pepeŋ la!»

³⁹ Sərdə kaanə *Farisiyeŋ gə minti aduubə də kaŋa adaŋ waataŋ Yeesu minti: «Hulum bə hateŋ, waatə kaa gə guudum la minti yə zenə la!»

⁴⁰ Wə hərnəy kel minti: «Ten waataŋ, jəəne minti yə zeneŋ neŋ, karmə pərkiŋ laka naakte kuy yaŋ.»

Yeesu hage cəərə Zeruzalema

⁴¹ Bə minti Yeesu zeŋ maŋ sar kuli bə Zeruzalemaŋ daana wə asna anəkay, wə hagaŋ cəərə. Wə minti:

⁴² «Te vil də Zeruzalem, te sə a asə la nuutu təwa dər hi bə daynaŋa minti karman bə əyəy kəkaɓiŋ a haa muntu moŋ! Səma, bə hebkənaŋ, karman toŋ wəra bə metə-mete diriya.

⁴³ Ko kəman bi yaŋ ciiriya minti kaa gə acukur diŋ ɓikiy ciiriy yaŋ wəra, yə he ku kaŋ yaŋ wəra bay ve warna daana bay ve da. Kəya yə ɗələy yaŋ duuri wəra ɓəki keɗe.

⁴⁴ Yə ɓəlkəy yaŋ wəra keɗe, yə awe kaa gə giidi yaŋ wəra gəm, yə yaake pərki cəərə kumsu apəya anə məna ba, gud bə minti te bəlaŋ ase hi bə minti Pepeŋ bəŋ a kəyəy duuruŋ ba.»

Yeesu giidə Kuli kə Pepeŋa

⁴⁵ Kəya Yeesu kəlaŋ giidə tiilim də *Kuli kə Pepeŋa, wə əsəŋ bə sarme kaa kə ji celeereŋa wəra,

⁴⁶ bə wəətiya minti: «Pepeŋ waataŋ giidə kefter nuutuŋa minti: ‹Kuli nin ji yaŋ kuli bə toose.› Səma aŋ teŋ, aŋ kulnu ‹ko bə əsti kə kaa gə minti tope kar kasi kaŋa də waŋ.›»

⁴⁷ Yeesu bə hate dər hitiŋa saksaki giidə Kuli kə Pepeŋa. Kəkamna kə *kaa kə keere Pepeŋ, də *kaa kə hate ku gili nuutuŋ, də kəkamnaŋ, bə golde kəkəya bə awe Yeesu wəra.

⁴⁸ Səma, yə ɗempa a fele kəkəy bə ji karman suru ba, gud bə minti kaŋ keɗe bə jiɓru ɗeket-keti. – 19 20