LIKI 1 - JAA TƏMARWAŊ

Mele bə gud kefter

¹ Kaa ablaw ɗəlaŋ bə jeere daana bə tope bəlam də kel gə minti a jəətəŋ aduubə də areŋ.

² Yə jeereŋ kel gə minti are a iskini ku kaa gə minti a əsnəy wəra hãã a mele bə guudiŋ daŋ, daana yə koloŋ kəmnə də kəkəy də kel teŋ.

³ Ten gəm ta, ten əsəŋ, ten felkeŋ gud kel teŋ hãã a mele bə guudi da wəra a kuɗiŋa. Bə hebkənaŋ, tam Tewfil hulum bobloŋ, dərəna pisi bə minti ten jeerem kel teŋ a kuɗiŋa,

⁴ minti tam asə la minti kel gə minti tam a hətnəy, yə kel kə gəəzə-gəəziŋ.

Waate bə kel cəərə we də Zaŋ Batisi

⁵ Kəya dər ko bə minti *Erodi kumna bə Ziwifiŋ cəərə seŋka də Zudeŋaŋ, *hulum bə keere Pepeŋ yaŋ, səmu minti Zakari. Wə a aduubə də kaa kə keere kə Abiyaŋa. Muruŋ a gidiirə Aroŋa, sam minti Elizabeti.

⁶ Yə ɓasi keɗe, yə ɗeker tiinə Pepeŋa. Yə bə iski gud *ku gili kə Barkaŋa daana bə ɗe gud kel nuutuŋa keɗe a kuɗuŋa bay sarte siri.

⁷ Səma kərməyi paapa, gud bə minti Elizabeti wəra də gedə-gede, daana yə wəra ɓasi keɗe kəpaaraŋkaw.

⁸ Ɗeŋ a deye hõy, Zakari əsəŋ bə ji joŋre bə *keere Pepeŋa gud bə minti hiŋ koloŋ cəərə kaa nuutuŋa, kaa kə Abiyaŋ.

⁹ Gud to'osi kə *kaa kə keereŋa, yə əsəŋ, yə jəŋ kooya bə siisi. Kooya bə siisiŋ ŋəmaŋ Zakari minti wə jəə joŋre bə ki agumgum bə siisi pisi la giidə *Kuli kə Barkaŋa.

¹⁰ Kaa gə ablaw əsəŋ wəra tiilima bə toose də cəwa də ki agumgum bə siisi pisiŋ.

¹¹ A ko toŋa kəya, *hulum bə digi kə Barkaŋ vəɗaŋ dər Zakari. Wə əsəŋ gil agal kemer də ko bə ki agumgum bə siisi pisiŋa.

¹² Bə minti Zakari əsnuŋ, tərmuyu jilnu, walka juunu faɗi.

¹³ Səma hulum bə digiŋ wəətunu minti: «Zakari, a ji walka ba, gud minti Pepeŋ əskəŋ toose nəmtiŋ ne. Məram Elizabetiŋ wam beebe yaŋ, tam məlu səmu yaŋ minti Zaŋ.

¹⁴ Giidim ji yaŋ wəra fənay-fənay də waale guudu; kaa ablaw waale yaŋ gud we du gəm,

¹⁵ gud bə minti wə ji yaŋ hulum boblo dər Barkaŋa. Wə bə se kumuy bə atələələm ba, kumuy baalaŋ bə marke kaa bə gəm. Tiiru Cetcetaŋ ɗusu yaŋ wəra də bə minti wə giidə nuruŋ.

¹⁶ Wə hare karmə *Israyel yaŋ ablaw a Barkaŋ Pep neeteŋ.

¹⁷ Wə ɗe yaŋ tiinə Pepeŋa də tiirə *Eli, də səɓaki du, bə tepe tarmə kamnə kəmar koncoŋ də kərməyiŋ, bə hare kaa kə ŋelə-ŋeleŋ a ɗiki ɗekeriŋa. Wə ɗampe kaa yaŋ minti yə jəə la máŋ kə Barkaŋ.»

¹⁸ Kəya Zakari waataŋ hulum bə digiŋ minti: «Ten bə ase naanaanə minti kel teŋ ji yaŋ bədoona ana mo? Gud bə minti ten wəra pəərəŋki, marən wəra təərəŋka gəm.»

¹⁹ Hulum bə digiŋ hərnu kel minti: «Ten haa kəna Gabriyel bə minti bə əsə-isi tiinə Pepeŋaŋ. Wə gaanan da a keɗpe dəərəm daana a waatam kel té pəsaŋ.

²⁰ Tam kole yaŋ wəra muluulu, tam neke kir waate kel ba hãã dər hi bə minti kel teŋ de kuy wəraŋ, gud bə minti tam doŋ gud kel nina ba. Də teŋ keɗeŋ, kel teŋ bə de kuy yaŋ wəra a hi diŋa.»

²¹ Də ko toŋ ha'aŋ, kaŋ bə mi Zakari. Yə ŋələŋ gud bə minti wə əsəŋ aləwa giidə Kuli kə Pepeŋa taa-taa-taŋ.

²² Bə minti wə kəlaŋ warda tiilim daŋ, wə nəkaŋ kir wəətəy kel pəda. A ko toŋa kəya, kaŋ asaŋ faɗi minti karman vəɗaŋ duru giidə Kuli kə Pepeŋ da. Wə əsəŋ bə wəətəy kela də kəəsu, səma wə wəətənəy kel də ku ba.

²³ Bə minti hiti nuutu bə ji joŋre nəkaŋ wəraŋ, wə kooroŋ akera.

²⁴ Adordə teŋa, muru Elizabetiŋ haŋ məənə. A meteŋ akera kitir wiiɗiw. A əsəŋ bə ɗiki ku tarməya minti:

²⁵ «Golə la kel gə minti Barkaŋ jiini sarənaŋ, hãã bə minti wə haanan kese bə cəərən wəra dər kaŋaŋ.»

Waate bə kel cəərə we de Yeesu

²⁶ A kitir bə kənki bə məənə kə Elizabetiŋa, Pepeŋ gaŋ *hulum bə digi nuutu Gabriyel giidə kuli bə Nazaretiŋ giidə seŋka də Galileŋa.

²⁷ Wə gəənu sar tər terewka də minti də balə-beleŋ. Sam hulum bə bəlaŋ minti Zosefi, wə a kaasaw də kumna *Davidi. Sam tər taŋ minti Mari.

²⁸ Kəya hulum bə digiŋ kəlaŋ aləwa gerda, wə mirkənə, wə waatəna minti: «Jəə la də waale, te də minti pisi kə Pepeŋ ciiriŋ! Barkaŋ yaŋ diiri.»

²⁹ Gud kel teŋa kəya, ɗiki də lenteŋ wəra. A əsəŋ bə le ku kusrə minti: «Mirki toŋ haa minti harmə mo?»

³⁰ A ko toŋa kəya hulum bə digiŋ waatəna minti: «Mari, a ji walka ba, gud bə minti te fəlaŋ pisi kə Pepeŋ ne.

³¹ Golə la, te he məənə yaŋ daana te we pur koŋkor yaŋ, te məlu səmu yaŋ minti Yeesu.

³² Wə ji yaŋ hulum boblo, yə məntu yaŋ Kormə Pep bə Daŋə-Deŋeŋ. Barkaŋ Pepeŋ usu yaŋ a kumna kə moomo du Davidiŋa.

³³ Wə ji yaŋ kumna kə kaanə *Israyel bə faɗnə-faɗna; kumna nuutuŋ tewe wəra bə hasi.»

³⁴ Mari waataŋ hulum bə digiŋ minti: «Teŋ kəya bə ji haa naanaanə mo, gud bə minti ten əsəŋ də hulum hõy ba?»

³⁵ Hulum bə digiŋ harna kel minti: «Tiiru Cetcetaŋ bi yaŋ ciiri, səɓaki kə Pep bə Daŋə-Deŋeŋ kulɓi yaŋ ciiri akas gəsaatərna ana. Gud teŋa kurmuyi bə minti te bə waw ha'aŋ, wə ji yaŋ kə Pepeŋ. Yə məntu yaŋ Kormə Pepeŋ.

³⁶ Golə la, gidiiri Elizabetiŋ a təərəŋka də, a haŋ məənə gəm, giida haa beebe koŋkor. Tá də minti yə a bə manta də gedə-gedeŋ, a hebkəna a kitir bə kənki bə məənə naataŋa

³⁷ gud minti karman le Pepeŋ ba.»

³⁸ Kəya Mari wəətunu minti: «Ten tər də joŋre kə Barkaŋ. Kel teŋ jəə la sarəna damdi tam waatənan dən ha'aŋ ana.» Kəya hulum bə digiŋ yaakəna faɗi.

Mari helɗe Elizabeti

³⁹ A ko toŋa kəya, Mari kooroŋ cəlam agal də seŋka də minti pərkiŋ adaŋ, giidə kuli bə Zudeŋa.

⁴⁰ A tuukuŋ ger Zakari, a kəlaŋ akera, a mirkiŋ Elizabeti.

⁴¹ Bə minti Elizabeti əskəŋ mirki kə Mariŋ anəkay, beebeŋ ɗootoŋ giida, a ɗosoŋ wəra də Tiiru Cetcetaŋ.

⁴² A naakaŋ ku koloŋ, a waataŋ Mari minti: «Pepeŋ gəənəy pisiŋ ciiri dəŋaŋ kumsi kəram keɗe. Pisiŋ cəərə beebe bə minti giidiŋ gəm.

⁴³ Ten mindi gəm mo, bə minti nər Barkaŋ nin bəə la gerdənaŋ?

⁴⁴ Golə la, bə minti mirki niitiŋ kəlaŋ kosnon naŋ, beebeŋ ɗootoŋ giidəna də waale.

⁴⁵ Te wəra fənay-fənay də waale, te də minti doŋ gud kel gə minti Barkaŋ wəətənəy diŋ, minti yə de kuy yaŋ wəra a kuɗiŋaŋ.»

Gudul kə Mari

⁴⁶ Kəya Mari minti: «Ten tokɗe Barkaŋ də ku tarman keɗe;

⁴⁷ giidən wəra fənay-fənay də waaleŋ gud Pep hulum bə seerəna,

⁴⁸ gud bə minti ten bə anə hãy, səma Pepeŋ haraŋ duru cəərəna. Dər hebkənaŋa, gidiirə kaŋ ajew na keɗe waate yaŋ minti pisiŋ cəərəna,

⁴⁹ gud bə minti Pep Bar Səɓakiŋ jəŋ kar kəmtəŋ sarəna: səmu cetceti.

⁵⁰ Kaa gə minti jəw walka duŋ, pisi nuutuŋ jəŋ wəra cəərə kaasaw di keɗe.

⁵¹ Wə jəŋ kar kəmtəŋ də səɓaki də kəəsu. Kaa kə teke cəərə kusri apəyaŋ, wə miiriniy wəra.

⁵² Kaa gə abay-abay, wə sərmənəy wəra a kəkamna neeteŋa, wə haŋ cəərə kaa ɗeketiŋ apəya.

⁵³ Kaa gə minti tay bə ɗəməyaŋ, wə siipini wəra də kar pəsaŋ, səma wə haraŋ kaa kə hurmaŋ wəra kəəsi boobo.

⁵⁴ Wə bəŋ a keye kaanə *Israyel, kaa kə joŋre nuutuŋ. Cuuru gaŋ bay ji pisi nuutuŋ ba.

⁵⁵ Wə bə jəwa saksaki sar *Abrahama də kaasaw du, damdi wə a waataŋ kəmoomo də áŋ ana.»

⁵⁶ Mari jəŋ hiti kampar kitira soope ger Elizabeti, adoro a haraŋ akera.

We də Zaŋ Batisi

⁵⁷ Bə minti hi bə we kə Elizabeti nəkaŋ, a waŋ beebe koŋkor.

⁵⁸ Kəya kaa gə tiinə kuli naataŋ də kamnaŋ keɗe əskəŋ minti Barkaŋ seepəna wəra də pisi nuutuŋ ŋaanaanə moŋ, yə waalaŋ keɗe dəərə.

⁵⁹ Bə minti beebeŋ jəŋ aluma mənaŋ, yə bəŋ a jəmu tənturu wəra. Kaŋ a bəlaŋ minti té məlu səmu də sam buru Zakari.

⁶⁰ Nuru doŋ haa ba. A minti: «Paapa! Səmu ji yaŋ minti Zaŋ.»

⁶¹ Yə harna kel minti: «Sam kusul di paapa bədoona ba.»

⁶² Kəya yə waataŋ kel a buru də kəəsi minti wə bele mele sam kurmuyu minti harmə mo?

⁶³ Zakari mantaŋ kəbaŋ gə ceɗə-ceɗe pampəraŋi gə jeereŋ. Wə jeereŋ minti: «Səmu minti Zaŋ.» Kəya kaŋ keɗe ŋələŋ ablaw.

⁶⁴ A ko toŋa faɗi, ku Zakari wal'aŋ wəra, wə əsəŋ bə waate kela daana wə əsəŋ bə ji suuse a Pepeŋ.

⁶⁵ Kəya walka jəŋ kaa kə tiinə kuli neeteŋ keɗe. Agal də seŋka də Zudeŋa keɗe də minti pərkiŋ adaŋ, kaŋ waataŋ sam kel teŋ wəra keɗe.

⁶⁶ Kəya, kaa gə minti əskəŋ kel teŋ keɗeŋ, yə duuniy ku tərməyi. Yə waate ku tərməyi minti: «Pur toŋ ha'aŋ wə bə ji diidi naanaanə mo?» Səɓaki kə Barkaŋ duuru gəəzi.

Gudul kə Zakari

⁶⁷ Kəya ku tarmə Zakari bar beebeŋ bə ɗosə-ɗose də Tiiru Cetcetaŋ, wə əsəŋ bə jogte ku mini kə Pepeŋa minti:

⁶⁸ «Tokɗeŋ jəə la kə Barkaŋ, Pep kə kaanə *Israyel, gud bə minti wə kəyaŋ kaa nuutuŋ, wə ɓitniy wəra.

⁶⁹ Wə gaŋ Hulum bə Seere bə səɓakiŋ da a áŋ; hulum toŋ a kaasaw də *Davida, hulum bə joŋre nuutuŋ.

⁷⁰ Golə la kel gə minti Pepeŋ a əynəy warda dayday ku *kaa kə jogte ku mini cetceti nuutuŋ daŋ minti

⁷¹ tó seere áŋ yaŋ wəra ku kaa gə acukur náŋa, ku səɓaki kə kaa gə minti məlaŋ dər áŋ wəraŋ keɗe.

⁷² Wə gaŋ dər kəmoomo də áŋ a pisi nuutuŋa, cuuru ɗəkəŋ a de *jaa nuutu *cetcetaŋa,

⁷³ də minti wə a kəlaŋ ku wəra gəəzi a moomo də áŋ *Abraham minti

⁷⁴ tó de áŋ yaŋ wəra ku səɓaki kə kaa gə acukur náŋa, minti áŋ jəw joŋre bə kaw awalnaŋ la bay walka,

⁷⁵ bə minti áŋ jəə la kaa nuutu cetceti daana ɗekeri tiinu dər hi náŋa keɗe.

⁷⁶ Tam pur konceŋ, yə mantam yaŋ hulum bə jogte ku mini kə Pep bə Daŋə-Deŋeŋ, gud bə minti tam ɗe yaŋ tiinə Barkaŋa bə ɗampe kəkəy nuutuŋa,

⁷⁷ bə ge dər kaa nuutuŋ a seereŋa gud vəəgi bə giidu nuutuŋa cəərə baymele neeteŋaŋ.

⁷⁸ Gud pisi boblo kə Pep náŋa, wə wele pəɗaki yaŋ warda apəy da cəərə áŋ da damdi minti cəwaŋ daage wardaŋ ana,

⁷⁹ bə wele kaa gə minti gə əsə-isi dər tilməŋaŋ, kaa gə minti ku meŋaŋ, daana bə ɗe də áŋ a kəkəy kəkaɓiŋa.»

⁸⁰ Beebeŋ suŋ bə naa-ne. Wə əsəŋ giidə fula hãã bə minti wə gaŋ gud kusru wəra kəkər a kaanə Israyel.