KOLOSIŊ 4 - JAA TƏMARWAŊ

¹ Aŋ kəmnə də kafkam, aŋ jəy guudi la pisi a kuɗiŋa, də kel ɗekeriŋ, gud bə minti aŋ wəra gə asə-ase minti Bərdəŋ yaŋ apəy da gəm.

Kel kə Pol gə adoroŋ

² Aŋ a yaake tooseŋ ba. Aŋ jəə la wəra saksaki gə gunə-guni də toose tó bə minti aŋ bə tuusu a Pepeŋ bə jəw suuseŋ.

³ Aŋ əsəŋ ne bə tooseŋ, aŋ toosə la cəərə are gəm kir minti Pepeŋ bəŋ kəkəy la a are bə waate kel nuutuŋ wəra. Kel teŋ haa hel nuutu də metə-mete də waate sam Kristuŋ, ten hebkəna a daŋgaya haa guudi.

⁴ Aŋ toosə Pepeŋ la cəərəna kir minti ten nakə la bə ke gud kel teŋ wəra pəɗaki-pəɗaki gud bə minti haa joŋre bə minti ten kir jəw.

⁵ Aŋ jəə la də hel sar kaa gə minti kəm paapa gə doo-de gud Kristu baŋ. Də ko bə minti dərəŋ fəlaŋ neŋ keɗe, aŋ gay diri la wəra cəərə kusrəŋa minti aŋ haa kaa kə doo-deŋ.

⁶ Kel nəətiŋ jəə la saksaki haa də anul guudi, yə jəə la dəsəŋ daana aŋ asə hare bə kel la a mindi mindi mo haa də hel pəsaŋ.

Mirki bə tewe kefter

⁷ Seenə áŋ Tisiki bə minti áŋ bəluŋ, bə minti bə tapə-tepe a joŋreŋa də areŋ, hulum ɓeti bə joŋre kə Barkaŋ, ɗe yaŋ na a waataŋ kel dən keɗe haa tó.

⁸ Ten gaanaŋ dəŋ na nuutu haa anə gaa minti wə ɗee la a topoŋ bəlam də kel gə cəərən daana wə ɗee la a teŋeŋ dərəŋ gəm.

⁹ Onesim, hulum nəətiŋ, seenə áŋ ɓeti bə minti áŋ bəluŋ, yaŋ ada na gud Tisiki na gəm. Kel gə minti bə ji kəna keɗeŋ, yə ɗe yaŋ a topoŋ bəlam di wəra.

¹⁰ Aristarkə bə minti are a daŋgaya də kumsə areŋ, bə mirkiŋ na. Markə, kusul də Barnabasi, bə mirkiŋ na bədoona ana gəm. Ten a waatənaŋ wəra cuuru minti, wə ɗeŋ ne gerdeŋ naŋ, aŋ daw irku du la pis-pisiŋ.

¹¹ Yeesu bə minti yə tukɗu minti Zustisiŋ, bə mirkiŋ na gəm. Gud kaa kə doo-de gə Ziwifiŋa, té soope'iŋ laka təwa bə ji joŋreŋa dəərən cəərə kel kə *Kumna kə Pepeŋaŋ. Yə haa kaa gə minti teŋnen dərən ablaw faɗi.

¹² Epafrasi, hulum nəətiŋ, bə mirkiŋ na gəm. Wə haa hulum bə joŋre kə Yeesu Kristuŋ, wə bə kuuri də tooseŋ guudəŋa kir minti aŋ əsə la ŋəŋ a deŋa, aŋ jəə la wəra gə naa-ne daana aŋ jəə la wəra máŋ gə ayə-aye ɗiki dəŋ bə ji karman bə minti giidə Pepeŋ bəluŋ keɗe.

¹³ Ten bə nakə-neke bə waataŋ cuuru haa kənaŋ minti wə bə ji kusru wəra anə keɗe-keɗe bə ji joŋreŋa guudəŋa, gud kaayaŋ gə Lawdiseŋa daana gə Yerapoliŋa gəm.

¹⁴ Daarə náŋ doktor Liki daana Demasi bə mirkiŋ na.

¹⁵ Aŋ mirkə kəsaanə áŋ gə doo-de gə Lawdise la, aŋ mirkə Nemfa la, də kaayaŋ gə doo-de gə gud Kristu gə minti tapte ciiri akera gerdaŋ keɗe gəm.

¹⁶ Bə minti aŋ aŋkaŋ kefter toŋ ne wəra aŋkaŋ, aŋ jəə la kir minti kaa kə Tapi gə Lawdiseŋ əŋku la gəm. Aŋ də kusrəŋ, aŋ aŋkə nayto bə minti kaanə Lawdiseŋ bə ayaŋ dəŋ yaŋ naŋ la gəm.

¹⁷ Aŋ waatə Arsipi la minti wə amə cəərə joŋre bə minti Barkaŋ əynu du kəəsuŋ la, kir minti wə daw ku la wəra pis-pisi.

¹⁸ Karman bə minti ten Pol jeereŋ toŋ də kaasən, haa mirkiŋ ta'i kəna faɗi. Cəərəŋ a ge ba minti ten kəm a daŋgayaŋ. Pisi kə Pepeŋ jəə la dəərəŋ!