KOLOSIŊ 3 - JAA TƏMARWAŊ

¹ Pepeŋ harnaŋ wəra dədərgə adordə meŋa də Kristu tə pə moŋ, aŋ malə ɗiki dəŋ la haa cəərə kar gə apəyaŋa, a ko bə minti Kristu bə əsə-isi a kasi kemer kə Pepeŋ na ada naŋ.

² Aŋ malə ɗiki dəŋ la wəra anə soki məna cəərə kel kə ko bə apəyaŋa; aŋ a mele ɗiki dəŋ cəərə kaayaŋ gə cəərə seŋkaŋa ba.

³ Gud maa mo, aŋ wəra haa damdi gə mee-me ana. Dədərgə dəŋ də gəəzə-gəəziŋ wəra də ŋoyə-ŋoye kasi Pepeŋa də kə Kristuŋ.

⁴ Dədərgə dəŋ də gəəzə-gəəziŋ haa Kristu faɗi. Bə minti wə vəɗaŋ kusru ne ateŋaŋ, aŋ veɗe yaŋ wəra duuru keɗe dər məyan nuutuŋa.

Ɗe dəŋ kimirwiŋ

⁵ Bədoona ana ta, ɗiki bə kar gə minti cəərə seŋkaŋa kənaŋ, aŋ əwəy kəsar di la wəra sarəŋa. Haa anə ji bə booboŋ, kel kə zeɓə-zeɓeŋ, kel kə sesewsesew, ɗiki bə ji baymeleŋ daana kel kə həryəm-həryəm (gud maa mo həryəm haa ke bə awalna a kar gə minti kaŋ guluy pepe neeteŋ toki).

⁶ Wáŋ kə Pepeŋ awte cəərə kaa gə minti paapa bə humi kosoŋa cuuru baŋ, haa gud kumsə kel teŋa kay kəya faɗi.

⁷ A dayday bə minti baymele toŋ kəya a bə əsə-isi cəərəŋa kumnaŋ, ɗe dəŋ a jəŋ haa bədoona ana gəm.

⁸ Səma bə hebkənaŋ, kolte bə wáŋ, ŋoryeŋ, jəəti bə sərkəŋ cəərə kumsəŋaŋ, kel teŋ keɗe, aŋ yəəkəy la wəra. Koo sarte bə kaŋ, kumundu ba kel kə kes-keseŋ, a kalte wəra kuŋa ba.

⁹ Aŋ a ŋete kel a kumsəŋ pəda, gud maa mo kusrəŋ bə hatə-hate də baymeleŋ daana kel nuutu gə minti wə a jəŋ bə kaŋa bə jiyaŋ, aŋ yaakaŋ teŋ ne wəra.

¹⁰ Aŋ koloŋ hebkəna damdi kaa kəmarwaŋ ana faɗi. Pep bə minti a jəənəŋ, kolnoŋ wəra kəmarwaŋ haa tó. Wə bə ji joŋre sarəŋa saksaki bə koloŋ wəra damdi tó ana kir minti aŋ nakə la bə əsu wəra kaŋkaŋ.

¹¹ Gud teŋa ta, hulum jəəne nuutu bə Ziwifiŋ, kumundu ba paapa bə Ziwifiŋ ba; tənturu jəəne də jamə-jeme, kumundu ba a bay jeme; wə jəəne nuutu hulum bə dəhãy, kumundu ba hulum bə seŋka də dərə də bay jeme; wə jəəne nuutu kafkam, kumundu ba paapa kafkam ba, ceme bə dər paapa a ko toŋa pəda. Kel máŋ haa Kristu ŋel məna faɗi: wə haa karman bə daŋə-deŋe kumsuŋ, wə giidə kaa gə minti doŋ guuduŋ keɗe gəm.

¹² Pepeŋ ŋamnaŋ wəra minti aŋ jəə la kaa kə tó daana wə balnaŋ tə pə moŋ, jəə la sarəŋa haa ase bə caadə kumsəŋ, ji bə giidiŋ pəsaŋ sar kumsəŋaŋ, hare bə cəərə kusrəŋ bə adawraŋ, talma sããyaŋ, daana mi bə ku kel.

¹³ Aŋ halə kumsəŋ la aduubə də kumsəŋa. Jəəne minti hulum kəman yaŋ də kel də kumsu aduubə dəŋaŋ, mindi mindi mo vəəgə giidu la wəra cəərə kumsəŋa. Barkaŋ vəəgəŋ giidu wəra cəərəŋa tə kəm, aŋ vəəgə giidəŋ la wəra cəərə kumsəŋa bədoona ana gəm.

¹⁴ Səma karman bə deŋe kel kaayaŋ gila keɗeŋ, haa minti aŋ balə kumsəŋ la aduubə də kumsəŋa. Beleŋ haa damdi saama də əntəŋ wəra sar kumsəŋa anə kaŋkaŋ ana.

¹⁵ Kəkaɓi də minti Kristu aynaŋ dəŋ jəə la haa karman bə kəyaŋ bə ase kel gə minti aŋ kir jəy. Pepeŋ bəlaŋ minti aŋ asə kəkaɓi taŋ la wəra. Wə mantənaŋ warda minti aŋ bəə la a kole wəra kusrə hulum bə məna haa sə teŋ. Aŋ kir ji suuse a Pepeŋ saksaki.

¹⁶ Kel kə Kristuŋ, də fele bə guudi ada anə keɗe, jəə la aduubə dəŋa. Aŋ hatə kumsəŋ la, aŋ kaa dər kumsəŋ la cəərə kəkəy pisiŋa də ase bə minti wəra kaŋkaŋ. Aŋ gaa gudul la a Pepeŋ də ku tarməyaŋ keɗe daana də ji bə suuseŋ ada gəm. Aŋ gaa la haa gudul bə tokɗe Pepeŋ, gudul bə waate sam Kel kə Pepeŋ, gudul bə minti aŋ cəmnu də səɓaki kə Tiiru Cetcetaŋ gəm.

¹⁷ Dər joŋreŋa daana dər kel gə minti aŋ wəətəy keɗe, aŋ jəy la haa də sam Barkaŋ Yeesu. Aŋ jəə suuse la a Pep Abaŋ haa də səmu gəm.

Joŋre bə minti aŋ jəw də ɗe dəŋ kimirwiŋ aduubə də kumsəŋaŋ

¹⁸ Aŋ kəram, aŋ doo ku kaŋkar nəətiŋ la. Haa karman bə minti kəram gə minti teŋ kə Barkaŋ kir jəw.

¹⁹ Aŋ kaŋkar, aŋ balə kəram nəətiŋ la, aŋ a ji siri də sərkə ba.

²⁰ Aŋ kəmar koncoŋ, aŋ doo ku kamnaŋ la cəərə kara keɗe'i, haa karman bə minti giidə Barkaŋ bəluŋ.

²¹ Aŋ kəmnə də kuliŋ, aŋ a kole kusrəŋ wəra bəyhi ku karməyaŋa minti aŋ wəətəy sam joŋre neeteŋ saksaki baymele ba. Aŋ jəəne bə ji bədoonaŋ, yə dere hor wəra faɗi.

²² Aŋ kafkam, aŋ humi kosoŋ la cəərə kəmnə dəŋa kəna adawra cəərə kela keɗe. Aŋ a ji joŋre nəətiŋ a ko bə minti yə bə goloŋ cəərəŋaŋ təwa, də ɗikiŋ minti aŋ jəə la diri pəsaŋ ŋaanaanə moŋ ba. Səma aŋ jəə joŋreŋ la də ku tarməyaŋ pəsaŋ gud bə minti aŋ bə ji kese də Barkaŋa.

²³ Jəəne nuutu joŋre nəəti muntu muntu mo, aŋ jəw la wəra də ku tarməyaŋ keɗe, gud maa mo aŋ jəw haa a Barkaŋ, aŋ jəw paapa a kaa kəsarkaŋ təwa ba.

²⁴ Jəə la cəərəŋa ɗəki minti Barkaŋ bə ɗe yaŋ a werkeŋ. Aŋ ɗe a fele haa kar pəsaŋ gə minti wə bə ɗukuy na a kaa nuutuŋ. Gud maa mo Bərdəŋ bə gəəzə-gəəzi bə minti aŋ bə jəw joŋreŋaŋ, haa Kristu də kusru faɗi.

²⁵ Hulum bə minti ji nuutuŋ haa baymeleŋ, wə ɗe a fele daŋgay nuutuŋ haa də aŋar də baymele tóŋ gəm, gud maa mo Pepeŋ ji kel gəga'-gəga'i də kaŋ.