KOLOSIŊ 2 - JAA TƏMARWAŊ

¹ Bədoona ana, kuuri bə minti ten bə kuuru guudəŋaŋ, gud kəsaanan gə Lawdiseŋa daana kaayaŋ gə ablaw gə minti asnan hõy də diri baŋ, gəəliŋ naanaanə me'i moŋ, aŋ asə la wəra.

² Ten bə ji bədoona kir minti diri jəə la də teŋə-teŋe, yə jəə la gə tapə-tepe dər beleŋa, daana minti yə asə gəəziŋ la wəra, də fele bə guuduŋ ada keɗe, bə ase karman wəra ciiri anə kaŋkaŋ. Bədoona ana, yə neke yaŋ bə ase hel də metə-mete kə Pepeŋ, haa Kristu də kusru faɗi.

³ Hel daana ase bə kel gə kəəsuŋ keɗe, aŋ fələy gə metə-mete haa sar Kristu; yə haa hurma mooto-mooto.

⁴ Ten waataŋ bədoona haa kir minti hulum a jəŋ tiniini dəŋ də kel kə dəsəŋ kəman ba.

⁵ Ten jəəne nuutu paapa səraŋ na də kusrən gil bə ɗawmay, ten yaŋ nuutu sarəŋa dər ɗikiŋa. Bədoona ana, ten də waale bə asaŋ gə əsə-isi ŋəŋ daana wəra gə tapə-tepe anə tamcak-tamcaki dər de nəəti bə gud Kristuŋaŋ.

Kristu haa hel də gəəzə-gəəziŋ

⁶ Bədoona ana, aŋ doŋ haa də Kristu Yeesu minti wə Barkaŋ nəətiŋ, ɗe dəŋ jəə la bə kə kaa gə minti gə tapə-tepe duuruŋ ana.

⁷ Aŋ vaa kəsar la a kel nuutuŋa, gud ɗe nəətiŋ jəə la bə malə-mele haa cuuru daana aŋ gargə la pisi garga də səɓaki a deŋa də aŋar də hate bə minti yə a hatnaŋ dəŋ. Aŋ jəə la gə ɗosə-ɗose də ji bə suuseŋ a Pepeŋ gəm.

⁸ Aŋ əsə la wəra gə gunə-guni kir minti hulum kəman a humuŋ amaaya də ase bə ji tiniini də kaŋ, bə minti keye baŋ bə gəm. Golde bə gud hate bə ɗiki toŋ bəŋ paapa sar Kristu da ba. Kəsar du faŋ haa gud hate bə to'osi kə kaa kəsarkaŋ da anə hãã daana cəərə kəwal gə minti gə əsə-isi kəkamna cəərə seŋkaŋaŋ.

⁹ Gud maa mo, karman bə minti sar Pepeŋaŋ, áŋ fəlu wəra anə dege'-dege'i sar kusrə Kristu gəm.

¹⁰ Gud tepe nəətiŋa duuru taŋ, aŋ wəra anə kaŋkaŋ gə doo-de kuŋ, gud maa mo wə haa kumna cəərə kəkamnaŋa, cəərə kar kə səɓak-səɓakiŋa gəm.

¹¹ Gud tepe nəətiŋa duuruŋ, aŋ koloŋ wəra kaa kə tantəraŋ gə camə-ceme. Paapa *jeme bə tanta də minti kaa kəsarkaŋ cəmaŋ ba. Taŋ haa də minti Kristu doonoŋ wəra ku səɓaki də baymele bə minti kusrəŋ a wəra bə hatə-hate duuruŋ. Kəya haa jeme bə tanta də minti wə jəmaŋ taŋ.

¹² Bə minti yə jəənəŋ batem, aŋ jəŋ haa damdi aŋ a wəra gə vaa-ve a tələŋkə də Kristu keɗe, daana aŋ haraŋ wəra dədərgə adordə meŋa duuru keɗe ana gəm. Kel teŋ jəŋ bədoona ana haa gud bə minti aŋ doŋ gud səɓaki kə Pep bə minti hərnu wəra dədərgə adordə meŋaŋ.

¹³ Aŋ a jəŋ wəra gə mee-me a tiiruŋa gud baymele nəətiŋa daana gud bə minti aŋ a haa kaa gə minti tantəraŋ a paapa də camə-ceme baŋ, kaa gə minti Pepeŋ a paapa də dərəŋ baŋ gəm. Pepeŋ aynaŋ dədərgəŋ də Kristu keɗe'i. Baymele náŋ keɗe fəlaŋ vəəgi bə giiduŋ kəəsu gəm.

¹⁴ Gud maa mo, kefter bə waate sam kel gə minti áŋ a jiitiniy a kuɗiŋa damdi ku giliŋ waate ana baŋ, wə ɓəlkunu wəra. Kefter toŋ paapa bəy pəda, gud bə minti wə ɓəlnu wəra də Kristu a kəbaŋ gə largaŋa.

¹⁵ Abay kə kəkamnaŋ daana kə kar kə səɓak-səɓakiŋ, wə pəənə wəra kəəsi. Wə kulnuy kese bə minti wə kəlaŋ wəra tiini, té guudu anə ɓiwiw lam wəra də dər kaŋ ke'-ke'i keɗe adordə minti wə a pəŋ bulum wəra ciiri a kəbaŋ gə largaŋaŋ.

¹⁶ Gud teŋa ta, aŋ a yaake hulum bə waate kela cəərəŋa, cəərə kar kə hameŋa, kar kə seŋa, anə humi bə kosoŋ cəərə hiti bə kəɗwəya, anə kəɗwəy gə gud kitir bə malteŋ, kumundu cəərə *hi bə faake kə Pepeŋaŋ ba.

¹⁷ Kar teŋ gila keɗe haa tiirə kar gə minti bə ɗe a ji yaŋ ajew naŋ. Səma gəəzi də kar teŋ haa Kristu də kusru gadi faɗi.

¹⁸ Aŋ a yaake kusrəŋ minti kaa kəman ɓətəŋ aŋke nəətiŋ la wəra ba. Kumsə kaa teŋ ha'aŋ, bele ji kusri wəra kəna anəkayya gal taakawa minti té yaŋ bə hare cəərə kusrə té adawra, yə gə ayə-aye kusri haa bə toose *kaa kə digi kə Pepeŋa, daana bə ɗe gud kel neete gə minti vaɗte diriŋ. Ɗiki neete bə minti a kusukiŋa gay bə teke cəərə kusri apəya wəra giidə ko bə booboŋa anəkay faɗi.

¹⁹ Kaa teŋ kəyaŋ, yə bele isi gə gargə-garge sar Kristu ba, jəəne nuutu minti té də kusri haa kusru, tó haa ciiri taŋtaŋ. Ana haa sar Kristu da bə minti kusru toŋ fele hameŋ daana bə tapə-tepe duru wəra pisi gud kəsar gə suruŋa daana gud dər kəskəŋ du gə maltə-malteŋa. Kəya wə bə si haa damdi giidə Pepeŋ bə balə-bele ana'i.

Bidi bə minti kaŋ fəlu gud Kristuŋ

²⁰ Aŋ wəra gə mee-me də Kristu daana aŋ wəra gə bədə-bidi ku səɓaki kə kəwal gə minti gə əsə-isi kəkamna cəərə seŋkaŋaŋ. Bədoona ana tə kəm, aŋ bə ji kusrəŋ damdi aŋ kəm kir kasi kar té gə cəərə seŋka ana, bə tope haa də sar ku gili tó kay-kayiŋ minti:

²¹ a he toŋ kəya ba, a gose kəya ba, a mele kaasam a toŋa kəya baŋ, haa səm pə mo?

²² Kar teŋ ha'aŋ keɗeŋ, bə minti tam jəŋ joŋre ne wəra jəə diiriŋ, yə təwaŋ wəra haa tewe faɗi. Golə la, kəya haa ku giliŋ daana hate kə kaa kəsarkaŋ saksaki.

²³ Gəəzi ha'aŋ, gom də kel teŋ gole dər kaŋa damdi hel mooto ada ana, gud bə minti ke bə awalna a kar kə kaa teŋ wəra bə vaa-ve ciiri kəwal-kəwal, yə ji kusri damdi té bə hare cəərə kusrə té adawra ana daana yə ke kusri daŋgay gəm. Səma kel té gə minti yə jəy gila keɗeŋ, yə paapa gə nakə-neke bə əməy ku kel gə minti kusri bə hatə-hate də baymeleŋ bələy ba.