KOLOSIŊ 1 - JAA TƏMARWAŊ

Mirkiŋ

¹ Jeere kefter toŋ kəya haa ten Pol, ten bə minti Pepeŋ bəlaŋ minti ten kolə la *hulum bə gaa-ge kə Yeesu Kristuŋ. Are təpaŋ də seenə áŋ Timoteŋ bə jeereŋ kefter toŋ na

² a aŋ kaa kə Pepeŋ, kəsaanə are ɓetiŋ gud tepe nəətiŋa də Kristuŋ gə giidə seŋka də Kolosiŋ. Pisiŋ, də kəkaɓi kə Bar áŋ Pepeŋ jəə la cəərəŋa.

Pol ji suuse a Pepeŋ

³ Are bə ji suuse saksaki a Pepeŋ, Bar Barkaŋ náŋ Yeesu Kristuŋ, bə minti are ɗəlaŋ ne bə tuusu cəərəŋaŋ.

⁴ Gud maa mo, are əskəŋ sam de nəəti bə gud Yeesu Kristuŋ daana minti aŋ bele kaa kə Pepeŋ keɗe ŋaanaanə moŋ.

⁵ De toŋ daana bele toŋ bə əsə-isi haa cəərə karman bə minti Pepeŋ bə ɗokoŋ dəŋ na apəya naŋ. Haa karman bə minti aŋ wəra gə malə-mele ɗiki dəŋ cuuruŋ. Bə minti yə waatənaŋ kel kə gəəziŋ wəraŋ, *Kel pəsaŋ kəmarwaŋ, aŋ fəlaŋ ɗiki dəŋ tó bə malə-meleŋ haa də ko toŋ faɗi.

⁶ Kel pəsaŋ kəmarwaŋ teŋ wəra bə duusi daana bə aye pisiŋa a kaŋ giidə seŋkaŋa keɗe'i. Yə jəŋ wəra adəwaldəŋa haa bədoona gəm də anə hãã bə minti aŋ əskəŋ sam pisi bə minti Pepeŋ bə jəwa sar kaŋa daana aŋ əsnəy wəra sarəŋa minti yə naanaanə gəəzə-gəəzi moŋ gəm.

⁷ Epafrasi bə minti bə tapə-tepe də are a joŋreŋa, bə minti ɓeti bə ji joŋre kə Kristuŋ daana are bəlu ablaw, hatnaŋ kel teŋ ne warna də sam areŋ.

⁸ Wə waataŋ are cəərə bele bə minti Tiiruŋ kalnaŋ dəŋ giidəŋaŋ.

Pol toose Pepeŋ cəərə kaa kə Tapiŋa

⁹ Gud teŋa ta, are saksaki bə toose cəərəŋa hãã də hi bə minti are əskənəŋ səmaŋ. Are bə waate Pepeŋa minti wə gaŋ dərəŋ la wəra kaŋkaŋ cəərə kel gə minti giidu bələy, cəərə hela daana zuuri bə kel gə minti Tiiruŋ əyəy.

¹⁰ Bədoona ta, aŋ ji yaŋ wəra gə nakə-neke a ɗe dəŋa damdi kə Barkaŋ ana, bə daw duru wəra cəərə kara keɗe gəm. Gud maa mo, ɗe dəŋ ɗe a awe cuuru haa cəərə gidiirə pisiŋa keɗe, aŋ zeede yaŋ pisi zeeda bə ase Pepeŋa wəra gəm.

¹¹ Wə ayaŋ səɓaki yaŋ anə kaŋkaŋ də səɓaki nuutu mooto hasaŋ, kir minti aŋ nakə la bə hale daana bə mi ku gidiirə kela keɗe də waale.

¹² Aŋ jəə suuse la a Abaŋ bə minti kolnoŋ gə nakə-neke bə fele kar pəsaŋ-pəsaŋ gə minti wə bə ɗukuya a kaa nuutuŋ a kumna nuutu bə dər pəɗakiŋ naŋ.

¹³ Wə ɓətəŋ áŋ warda ku səɓaki də dər tilməŋ da, wə ɗeŋ də áŋ a kumna kə Kurmuyu bə minti wə bəlu ablaw na.

¹⁴ Gud tepe náŋa duuru taŋ, áŋ fəlaŋ bidiŋ daana vəəgi bə giidu wəra cəərə baymeleŋa.

Kel də Yeesu daana joŋre nuutuŋ

¹⁵ Hulum ase Pepeŋ də duru ba, səma hulum ase Yeesu Kristu ha'aŋ, kusrə Pepeŋ dege'-dege'i faɗi. Wə dəŋaŋ kar gə minti Pepeŋ jiiniy keɗe.

¹⁶ Pepeŋ jəŋ kar keɗe haa duuru: kar gə minti apəyaŋ də kaayaŋ gə adawraŋ keɗe, kar gə minti aŋ əsəy də kaayaŋ gə minti aŋ əsəy baŋ. Teŋ haa anə kar gə minti kəkamnaŋ a tiiruŋaŋ, kar gə cəwa-cəwaŋ, kəkamnaŋ, kar kə səɓak-səɓakiŋ. Pepeŋ jəŋ kar keɗe haa duuru, a nuunu gəm.

¹⁷ Yeesu Kristu də kusru wəra ajew də kara neŋneŋ keɗe, kar keɗe gə əsə-isi a kuɗiŋa haa guudu gəm.

¹⁸ Kaa kə Tapiŋ haa kusru, tó də kusru haa ciiri taŋtaŋ faɗi gəm. Wə haa mele bə gud kar keɗe, wə haa hulum bə minti haraŋ wəra ajew aduubə də kaa kə mee-meŋa dədərgəŋ, kir minti tó jəə la wəra bə daŋə-deŋe kar keɗe'iŋ.

¹⁹ Pepeŋ bə balə-bele minti, karman bə minti sar toŋ, wə jəə la wəra sar Kormə toŋa dege'-dege'i gəm.

²⁰ Wə bəlaŋ pa minti aduubə də té jəə la wəra də tapə-tepe də kar gə minti cəərə seŋkaŋa də kaayaŋ gə minti apəyaŋ wəra keɗe haa duuru gəm. Wə jəŋ kir minti kəkaɓiŋ jəə la cəərə kara keɗe haa də kor də Kurmuyu bə minti gaŋ wəra a kəbaŋ gə largaŋaŋ.

²¹ Ana aŋ ha'aŋ, a dayday Pepeŋ a paapa də dərəŋ ba. Aŋ a koloŋ wəra kaa kə acukur nuutu gud ɗiki nəəti bə minti bə maltaŋ bə jəəti kar kə bayməlaŋaŋ.

²² Səma bə hebkənaŋ, Pepeŋ təpaŋ adəwaldu wəra dəərəŋ haa də me bə minti Kurmuyuŋ miinu də kusuki kə kaa kəsarkaŋ suruŋ. Wə jəŋ teŋ dəərəŋ bədoona haa kir minti tó koloŋ la wəra tiinə tó cetceti, bay kel sarəŋa, daana hulum a neke bə məlaŋ kel sarəŋa bə gəm.

²³ Səma aŋ kir isi saksaki dər deŋa, gud maa mo, gud karman bə malə-mele bə minti aŋ gə əsə-isi cuuruŋ, haa tó. Aŋ kir isi duru ŋəŋ kir minti karman a haŋ giidəŋ wəra sar *Kel pəsaŋ kəmarwaŋ gə minti aŋ a iskiniy wəraŋ ba. Yə haa kel gə minti aŋ məlaŋ ɗiki dəŋ ciiriŋ, daana yə wəra gə waatə-waate a kaa gə minti kəna adawra neŋneŋ keɗe. Ten Pol koloŋ hulum bə joŋre diŋ.

Joŋre bə minti Pol jəw gud kaa kə Tapiŋaŋ

²⁴ Bə hebkənaŋ, ten də waale ku lasi də minti ten bə saara guudəŋaŋ. Gud maa mo, də lasi də minti dər kusuki dəna tə pə moŋ, ten bə keye bə de ku lasi kə Kristu də minti a yaaktaŋ bay tope ku wəraŋ, də minti hulum saara a kəkəy bə joŋre nuutuŋaŋ. Ten saara ha'aŋ gud kusrə Kristuŋ; kusru haa kaa kə Tapiŋ faɗi.

²⁵ Ten koloŋ hulum bə joŋre kə kaa kə Tapi taŋ. Pepeŋ aynan joŋre toŋ kaasəna minti ten jəw la gud kel dəŋa. Joŋre toŋ haa bə waate karman bə minti Kel kə Pepeŋ wəətu wəraŋ keɗe,

²⁶ haa hel nuutu də minti a jəŋ wəra də metə-mete dər kaŋ da anə hãã dayday. Səma wə gaanə guudə wəra hebkəna a kaa nuutuŋ.

²⁷ Gud maa mo, Pepeŋ a bəlaŋ gay diri cəərə pisi də hel nuutu də metə-meteŋa də fele bə guudəŋ ada keɗe, də minti wə a ɗampəna a gidiirə kaŋ keɗeŋ. Hel tá də metə-meteŋ haa minti Kristu gal giidəŋa. Məlaŋ ɗiki dəŋ wəra kaŋkaŋ minti aŋ ɗe a fele boblo kə Pepeŋ yaŋ haa tó.

²⁸ Bədoona ana, are bə waate wəra a kaŋ keɗe haa sam Kristu toŋ də gidiirə hel də minti are gə nakə-neke bə jəərəŋ. Are bə ge kosnə mindi mindi mo daana bə hətu kir minti wə kolə la wəra bə doo-de ku a tiiruŋa gud tepe nuutuŋa də Kristu.

²⁹ Haa gud teŋa ta minti ten a joŋreŋa daana bə bandə-bande wəra anə keɗe-keɗe də səɓaki kə Kristu də minti bə ji joŋreŋa də səɓaki giidən daŋ.