JOŊRE 18 - JAA TƏMARWAŊ

Pol giidə vil də Koreŋtəŋa

¹ Adordə kel teŋa kəya, Pol yaakaŋ vil də Aten warda, wə kooroŋ Koreŋtə.

² Wə tuluŋ kay ada na, wə ɗeŋ a ŋefe də hulum bə Ziwifi kəman, səmu minti Akilasi, hulum bə seŋka də Ponti. Wə tuluŋ kəm də muru Pirsil Koreŋtə haa tuli gəm. Yə a jəŋ giidə seŋka də Itali da, səma yə kooroŋ warda ha'aŋ, gud bə minti Kolodi, kumna boblo bə Romeŋ, waataŋ wəra minti gə Ziwifiŋ neŋneŋ keɗe yaakə vil də Rom la. Pol ɗeŋ a hilɗiy,

³ kəya wə hətəŋ girdi bə ji joŋre diiri, gud bə minti joŋre neeteŋ sar kumsu: yə kaa kə zoorte golgo bə tope muryuki.

⁴ Dər *hi bə faake kə Pepeŋa saksakiŋ, Pol waatete kel wəra giidə *kuli bə toose neeteŋa. Wə a goldoŋ haa minti, gə Ziwifiŋ mo, gə Gerekiŋ mo, kolə ɗiki di la, yə doo haa la wəra gud kel gə minti tó bə wəətiyaŋ.

⁵ Səma, bə minti Silasi də Timote tuukuŋ Masedəwan da anəkay, Pol ayaŋ kusru máŋ haa a waate bə kel kə Pepeŋa təwa. Wə bə ji bərdə kəkəya wəra cəərə Yeesu a kaanə Ziwifiŋ minti wə haa *Hulum bə minti Pepeŋ ŋəmnu wəraŋ.

⁶ Səma gə Ziwifiŋ gargaŋ tiinu də awəy, yə əsəŋ bə sərtu gəm. Pol asaŋ kəya, wə gəznəy tərwə də dəməəmə nuutuŋ diri na, wə wəətənəy minti: «Aŋ ɗeŋ ne a bese wəra bay ɗe sar Pepeŋ, haa kel nəəti faɗi! Kel katən paapa ada pəda. Dər hebkənaŋa, ten hare dərən máŋ bə waate kela haa a kaa gə minti teŋ paapa gə Ziwifi baŋ.»

⁷ A ko toŋa kəya, Pol kooroŋ ger hulum kəman, yə məntu minti Titusi Zustisi, bə minti kuli nuutuŋ agəjaŋ də kuli bə toose kə Pepeŋaŋ. Hulum toŋ haa hulum bə minti bə ke awalna a Pepeŋ.

⁸ Kərispusi, kumna cəərə kuli bə tooseŋ, doŋ wəra gud Barkaŋa, də gə girduŋ keɗe. Kaanə Koreŋtə ablaw gə minti a bə jeɓre kel gə minti Pol a bə wəətiya cəərə Yeesuŋ, doŋ wəra guudiy daana yə jiiniy batem wəra gəm.

⁹ Dəyaŋ dər duugŋ kəmana, Barkaŋ waataŋ kel a Pol dər soone minti: «Walka a jəm ba, waatə kel la wəra a kaŋ saksaki, a zene ba,

¹⁰ gud bə minti ten dəərəm. Hulum neke bə mele kəəsu sarəma bə jəm baymele bə gəm, gud maa mo kaa katən yaŋ giidə vil taŋa ta'i kənaŋ ablaw.»

¹¹ Bədoona ta, Pol əsəŋ Koreŋtə, wə jəŋ le də nusi bə hate kel kə Pepeŋa.

¹² Dər ko bə minti kaanə Rom əsəŋ Galiyoŋ kumna cəərə seŋka də Akayaŋ, gə Ziwifiŋ doŋ ku kumsi wəra minti té ɗee la a de Pol bə koore duuru a kəətiŋ.

¹³ Kəya yə gəənu kel cuuru minti: «Hulum toŋ gil sarəŋa, wə bə ke dər kaŋa a ke bə awalna a Pepeŋ də hel daalaŋ də minti tepe də ku gili náŋ ba.»

¹⁴ Bə minti Pol ha'áŋ ku bə hare kel, Galiyoŋ waataŋ gə Ziwifi warna faɗi minti: «A jəə la minti hulum toŋ a awaŋ kumsu daŋ, ɗalba wə a jəŋ karman bə baymele kəman da kir minti aŋ jəw daŋgay du laŋ, ten sə a jeɓreŋ kel nəətiŋ wəra pəsaŋ faɗi, aŋ gə Ziwifiŋ.

¹⁵ Səma aŋ kəm bə ce laka awəy də kel cəərə sam kaa kəmana, daana cəərə ku gili nəətiŋa tə kəm, teŋ haa nuutu kel nəətiŋ. Ten paapa bə doo-de haa bə jeme kəəti də kel teŋ ba; aŋ ɗampə dər kel nəətiŋ la aŋ də kusrəŋ.»

¹⁶ Wə waataŋ kel teŋ waata kəyaŋ, wə sərmənəy wəra a ko bə kəətiŋa faɗi.

¹⁷ Kəya kaŋ haraŋ kuy keɗe cəərə Sostena, kumna bə cəərə kuli bə tooseŋ. Yə duunu bə lete ada anə ta'i tiinə ko bə jeme kəətiŋa. Səma Galiyoŋ nuutu wəra cuuru də gaa-ge anə təlaŋ, wə kəlaŋ ku a kel neeteŋa ba.

¹⁸ Pol hətəŋ nuutu kəm Koreŋtə ada anə taata. Adoro wə yaakaŋ kəsəənu gə doo-deŋ warda, wə kooroŋ Saŋkereŋ bə ɗe a li turti bə koore Siri. Yə kooroŋ gud kumsi na keɗe də Pirsil daana Akilasi. Bə minti Pol kəm ku kan gə Saŋkereŋa bay kooreŋ, wə caŋ cuuru wəra ada gud bə minti wə a kəlaŋ ku a Pepeŋ.

¹⁹ Kəya yə ɗeŋ a tuli warna Efesi na. A ko toŋa anə Pol ɓarsaŋ də Pirsil daana Akilasiŋ. Kəya Pol kooroŋ giidə kuli bə toose kə kaanə Ziwifiŋ bə ɗe a nele diiri cəərə kel kə Pepeŋa.

²⁰ Gə Ziwifiŋ a ɗəlaŋ minti wə sə a hətə la kəm sar té ada, səma wə doŋ haa ba.

²¹ A kəkəy bə kooreŋa, wə wəətənəy kəm nuutu minti: «Pepeŋ aynan kəkəy neŋ, ten hare yaŋ da hõy bə bi a helɗeŋ kəm pa.» Kəya wə luŋ giidə turtiŋa Efesi,

²² wə cakɗaŋ wəra Sezare. Wə tuluŋ Sezare tulə, wə kooroŋ kəm Zeruzalem bə ɗe a helɗe kaa kə Tapiŋ. Adoro wə haŋ kəkəy bə koore Antiyosi də Siriŋ.

²³ Wə hətəŋ Antiyosi ada maki, kəya wə haraŋ bə koore bə ɗe a gəryiti seŋka də Galatiŋ, də Firijiŋ gəm. We helɗeteŋ kaa kə doo-de gə minti adaŋ, bə əyəy səɓaki a de neeteŋa gəm.

Apolo waate kel giidə vil də Efesiŋa daana də Koreŋtəŋa

²⁴ Hulum bə Ziwifi bə Aleksandəri kəman, səmu minti Apolo, tuluŋ Efesi. Wə haa hulum bə minti waate kel də anul ablaw, daana wə asaŋ Kefter kə Pepeŋ pisi gəm.

²⁵ Yə a hətnu cəərə Kəkəy bə minti Barkaŋ gəənu a kaŋ minti yə falə seereŋ la guudu, kəya wə waate kel gə cəərə Yeesu disi ablaw a kuɗiŋa anə ɓet-ɓeti. Səma, batem bə minti də duruŋ, haa batem kə Zaŋ təwa.

²⁶ Kəya wə əsəŋ bə waate kela wəra giidə *kuli bə toose kə kaanə Ziwifiŋa, koo cuuru paapa bə huuru a ko anə ɓe'i ba. Səma, bə minti anə Pirsil də Akilasi jeɓreŋ kel gə minti wə wəətənəy wəra anəkay, yə məntunu da, yə kooroŋ duuru girdi na. Yə haraŋ bə ɗe a tupu bəlam də kel wəra a kuɗiŋa cəərə Kəkəy bə minti Pepeŋ əynu a kaŋ minti yə falə seereŋ la duuru gəm.

²⁷ Də bə minti wə a bəlaŋ minti tó koore giidə seŋka də Akay, kəsəənu gə doo-deŋ doŋ haa də waale. Yə jiirunu kefter kəəsu na ada na a kaa kə doo-de gə ko tóŋ, minti yə ɗee la a daw irku du pisi. Bə minti wə tuluŋ warna ada na anəkay, wə kəyaŋ kaa kə doo-deŋ gud bə minti pisi kə Pepeŋ duuruŋ.

²⁸ Gud maa mo, kel gə minti wə wəətəy ha'aŋ, kəskəŋ paapa diri ba. A kəkəy bə ce awəya tiinə gə Ziwifiŋa wəra anə ɗal gil, kel gə minti wə wəətənəy wəra gə nakə-neke bə ge dər kaŋ minti kel kə kaanə Ziwifiŋ paapa kemer ba. Bədoona ta, də Kefter kə Pepeŋ, wə gəənəy diri wəra cəərə Yeesu, minti wə haa *Hulum bə minti Pepeŋ ŋəmnuŋ.