Kel pəsaŋ kəmarwaŋ gə minti Zaŋ jiiriniy 9 - JAA TƏMARWAŊ

Yeesu seere hulum bə minti waŋ wəra bə bəwə-bəwi paŋ

¹ Bə minti Yeesu bə ɗe na caw, wə asaŋ hulum kəman bə minti waŋ warda haa bə bəwə-bəwiŋ.

² Kəya *kaa gə guuduŋ əsəŋ bə law ku minti: «Hulum bə hateŋ, hulum toŋ waŋ wəra bə bəwə-bəwi haa gud baymele kə mindi mo? Gud nuutu mo, ɗawba kə kəmnuŋ mo?»

³ Yeesu minti: «Wə waŋ bə bəwə-bəwi paapa gud baymele nuutu ba, gud kə kəmnu bə gəm. Wə waŋ bə bəwə-bəwi haa minti joŋre kə Pepeŋ gaa guudu la wəra suru.

⁴ Bə minti koŋ kəm daaway, áŋ kir ji haa joŋre kə hulum bə minti a gaanan daŋ. Ko bə duugŋ wəra maŋ, a ko toŋa hulum neke bə ji joŋre pəda.

⁵ Bə minti ten kəm kəna caw cəərə seŋkaŋa, ten haa Pəɗaki kə kaa kə cəərəŋ.»

⁶ Yeesu waataŋ kel teŋ bədoona waata kəyaŋ, wə tufuŋ kiɗiki adawra, wə halɓaŋ gedel diiri, wə sətnu dər hulum bə bəwə-bəwiŋa.

⁷ Wə waataŋ hulum minti: «Ɗee la a baade dərəm wəra a goloŋ bə Siloweŋa.» (Siloweŋ haa minti ‹Karman bə minti yə gəənu da.›) Hulum kooroŋ, wə baadaŋ duru warda da ada. Wə haraŋ da ha'aŋ, duru máŋ bə ase.

⁸ Kaa kə kuli nuutuŋ də kaa gə minti a əstunu bə mante kara diidəday, əsəŋ bə lete ku kumsi minti: «Haa hulum bə minti a jəŋ diidəday bə saaweŋ bə mo?»

⁹ Sirdi minti: «Kəna tó», kaayaŋ minti: «Paapa tó ba, hulum toŋ həənu haa he bagŋ.» Hulum bə bəwə-bəwi minti: «Kəna ten!»

¹⁰ Kəya yə əsəŋ bə law ku minti: «Dərəm bəŋəŋ wəra haa naanaanə biŋi mo?»

¹¹ Wə minti: «Hulum bə minti yə məntu Yeesu halɓaŋ gedel, wə satnan dən dərəna, wə waatənan minti: ‹Ɗee la a goloŋ bə Siloweŋ bə ɗe a baade dərəm wəra.› Kəya ten ɗeŋ, ten baadəna wəra, a əsəŋ bə ase faɗi.»

¹² Yə ləənu ku minti: «Hulum toŋ ane mo?» Wə minti: «Ten ase ba.»

Kaanə Farisiyeŋ le ku hulum bə minti duru bəŋəŋ wəraŋ

¹³ Kəya yə kooroŋ də hulum bə minti a jəŋ bə bəwə-bəwiŋ sar kaanə *Farisiyeŋ.

¹⁴ Doloy hi bə minti Yeesu a halɓaŋ gedel daana bəŋəŋ dər hulum wəra duruŋ, haa *hi bə faake kə Pepeŋ.

¹⁵ Kəya kaanə Farisiyeŋ koloŋ bə le ku huluma gəm ta minti duru koloŋ bə ase haa naanaanə mo? Wə minti: «Wə satnan gedel dərəna, ten baadəna wəra, ten koloŋ bə ase.»

¹⁶ Kəya sərdə kaanə Farisiyeŋ minti: «Hulum bə minti jəŋ kel teŋ neke bə bi sar Pepeŋ da ba, gud maa mo wə paapa bə humi kosoŋa cəərə *ku gili bə minti waate sam hi bə faakeŋ ba.» Sirdi kəman pa minti: «Hulum bə baymeleŋ neke haa naanaanə neke bə ji gom də miɗi toŋ kəyaŋ mo?» Kəya kuy ɓarsaŋ aduubə də kumsi faɗi.

¹⁷ Kəya yə haraŋ bə le ku hulum bə minti a jəŋ bə bəwə-bəwi pa minti: «Tam gəm, hulum bə minti bəŋnəm dərəm wəraŋ, tam waate cuuru haa minti harmə gəm mo?» Wə hərnəy kel minti: «Wə haa *hulum bə jogte ku mini kə Pepeŋ.»

¹⁸ Kəkamna kə tiinə kaanə Ziwifiŋ ɗempa a de haa minti hulum toŋ a jəŋ wəra bə bəwə-bəwi, hebkəna wə máŋ bə aseŋ ŋaanaanə moŋ ba hãã bə minti yə mantaŋ kəmnu da kəm.

¹⁹ Kəya yə əsəŋ bə le ku kəmnuŋa minti: «Haa gila korməyoŋ mo? Aŋ waate minti wə waŋ warda bə bəwə-bəwiŋ mo? Jəəne bədoonaŋ, maa bə kulnu hebkəna bə ase mo?»

²⁰ Kəmnuŋ hərnəy kel minti: «Kəna kormə areŋ, wə waŋ wəra bə bəwə-bəwi. Kel teŋ də dər are.

²¹ Səma karman bə minti jəŋ minti wə kolə la bə aseŋ, daana hulum bə minti bəŋnu duru wəraŋ, teŋ paapa də dər are ba. Aŋ law ku la. Wə máŋ wəra boblo bə hare kel cəərə kusru.»

²² Kəmnuŋ waataŋ kel teŋ bədoona haa kas walka də kəkamna kə kaanə Ziwifiŋ. Gud maa mo yə a doŋ kuy wəra məna minti, hulum jəəne bə waate minti Yeesu haa *Hulum bə minti Pepeŋ ŋəmnuŋ, kəkəy paapa cuuru bə ɗe giidə *kuli bə toose kə kaanə Ziwifiŋa pəda.

²³ Gud teŋa ta kəmnuŋ minti: «Wə wəra boblo, aŋ law ku la.»

²⁴ Kəya kaanə Farisiyeŋ haraŋ bə mante hulum bə minti a jəŋ wəra bə bəwə-bəwiŋ. Yə minti: «Waatə gəəzi la wəra tiinə Pepeŋa. Wəra də dər are minti seerenem wəra haa hulum bə baymele.»

²⁵ Wə minti: «Wə hulum bə baymele mo, paapa mo, paapa də dərən ba. Karman bə minti ten əsnu məna'iŋ ha'aŋ, ten a jəŋ wəra bə bəwə-bəwi, hebkəna ten máŋ bə ase.»

²⁶ Yə ləənu ku minti: «Wə a jəənəm naanə mo? Wə bəŋnəm dərəm wəra haa də maa mo?»

²⁷ Wə minti: «Ten a topnoŋ bəlam di ne wəra, səma aŋ jeɓrenen kun ba. Aŋ bele minti ten harə la bə dogoŋ kela paŋ haa səm mo? Aŋ bele minti aŋ kolə la wəra *kaa gə guudu gəm ɗawmay mo?»

²⁸ Kəya yə əsəŋ bə sərtu minti: «Tam hulum bə gud hulum toŋ haa tam! Are teŋ, are haa *kaa gə gud *Moyisiŋ.

²⁹ Wəra də dər are minti Pepeŋ waataŋ kel a Moyisi. Səma hulum toŋ, wə bəŋ haa da ane da mo, paapa də dər are ba.»

³⁰ Wə minti: «Haa kəna kel kə ŋələ-ŋili dogna tə gəm bəŋa, ko bə minti wə bəŋ da adaŋ paapa də dərəŋ ba, anaaŋa wə bəŋnən dərən wəra!

³¹ Wəra də dər áŋ minti Pepeŋ iski toose kə hulum bə baymele ba. Wə iski nuutuŋ haa toose kə hulum bə minti jəŋ ne bə jəw kese duŋ daana bə jəəti kel gə minti giidu bələy gəm.

³² Də anə hãã ha'aŋ, hulum əskəŋ hõy minti hulum bəŋəŋ dər kumsu bə minti a waŋ wəra bə bəwə-bəwi ba.

³³ Hulum toŋ a bəəda kanda paapa sar Pepeŋ da baŋ, wə sə a neke bə ji karman ba anə ceki.»

³⁴ Yə minti: «A we dəm də anə hãã, tam saksaki dər baymeleŋa. Tam bə gədaŋ minti tam hate areŋ haa naanaanə mo?» Kəya yə sərmunu warda giidə kuli bə toose neeteŋ da faɗi.

³⁵ Yeesu əskəŋ minti yə sərmunu warda kəyaŋ, wə kooroŋ suru bə ɗe a wəətu minti: «Tam ha'aŋ, tam doŋ gud *Kormə Hulúma nuutu mo?»

³⁶ Hulum hərnu du minti: «Hulum bobloŋ, wə haa mindi mo, topon bəlam du la kir minti ten doo la guudu.»

³⁷ Yeesu minti: «Tam əsnu, bə waate kela dəərəm gila haa tó.»

³⁸ Hulum minti: «Barkaŋ, ten doŋ ne guuduma!» Kəya wə vaŋ də guguuru tiinə Yeesu faɗi.

³⁹ Yeesu minti: «Ten bəŋ cəərə seŋkaŋa haa bə bi a ke gud baymeleŋ wəra, kir minti kaa gə minti a jəŋ wəra gə bəwə-bəwiŋ kolə la bə ase, gə minti a jəŋ bə aseŋ, bəwə la wəra.»

⁴⁰ Kaanə Farisiyeŋ gə minti a jəŋ suru adaŋ əskəŋ kel teŋ kəyaŋ, yə əsəŋ bə law ku minti: «Are haa kaa kə bəwə-bəwi gəm tə mo?»

⁴¹ Wə minti: «Aŋ a jəə la kəna gə bəwə-bəwiŋ, kel sə a doŋ ba. Səma aŋ minti dərəŋ bə ase tə kəm, kel kəm bə doo-de dəərəŋ haa sə teŋ.»