Kel pəsaŋ kəmarwaŋ gə minti Zaŋ jiiriniy 7 - JAA TƏMARWAŊ

Kəsaanə Yeesu gə nuruŋ ɗempa a de kel nuutuŋ ba

¹ Adordə kel teŋa kəyaŋ, Yeesu ɓəktəŋ giidə seŋka də Galileŋ. Wə a bəlaŋ ɗe giidə seŋka də Zude ba gud maa mo kaanə Ziwifiŋ a bə guldu ada bə awe.

² Də ko toŋ ha'aŋ, *kəɗwəy gə muryukiŋ a wəra maŋ.

³ Kəya kəsaanə Yeesu gə nuruŋ wəətunu minti: «A isi kəna ba, ɗee la warna Zude na kir minti *kaa gə guudum gə minti ada naŋ asə joŋre bə minti tam bə jəwa la.

⁴ Hulum bəlaŋ ne minti kaŋ asə tó laŋ, wə ji kar nuutuŋ wəra kəkər. Tam jəəne bə ji kumsə joŋre toŋaŋ, vaɗə kusrum la wəra kəkər tiini.»

⁵ Anaaŋa koo kəsəənuŋ derra doŋ guudu ba.

⁶ Kəya Yeesu wəətənəy minti: «Ko katən kəm bay neke. Nəətiŋ ha'aŋ, koŋ keɗe sarəŋa pisi.

⁷ Kaa gə cəərə seŋkaŋ neke bə məlaŋ dərəŋ wəra ba, səma ten toŋ ha'aŋ, yə malnan dərən wəra gud maa mo ten kəətəy gud joŋre neete bə baymeleŋ wəra saksaki.

⁸ Aŋ ɗee la a kəɗwəy. Ten toŋ ɗe ba gud maa mo ko katən nəkaŋ kəm ba.»

⁹ Adordə kel teŋa kəyaŋ, wə yaakaŋ Galile ada.

¹⁰ Səma bə minti kəsəənuŋ kooroŋ a kəɗwəy anəkay, wə haŋ kəkəy na bə ɗe ada na máŋ dəgaaya-dəgaaya faɗi gəm.

Yeesu a kəɗwəy gə muryukiŋa

¹¹ Kaanə Ziwifiŋ guldunu a ko bə kəɗwəya. Yə minti: «Wə haa ane mo?»

¹² Kaŋ caŋ awəy ablaw də səmu. Sirdiŋ minti: «Hulum toŋ ha'aŋ, wə pisi», kaayaŋ minti: «Paapa! Wə kəna hulum bə lente kaa.»

¹³ Də teŋ keɗe, hulum bəŋəŋ ku anə məna bə waate wəra kaŋkaŋ cuuru ba kas walka də kəkamna kə kaanə Ziwifiŋ.

¹⁴ Hi bə kəɗwəy ɗeŋ a ɓarse gəga'i kəyaŋ, Yeesu kooroŋ giidə *Kuli kə Pepeŋ, wə əsəŋ bə hate kaŋa ada.

¹⁵ Kaanə Ziwifiŋ ŋələŋ, yə əsəŋ bə waate minti: «Hulum toŋ ase kel ablaw bədoona haa naanaanə mo? Yə hətnu ba tə gəm?»

¹⁶ Wə minti: «Kel gə minti ten hətəy bəŋ haa ku Pep bə minti gaanan daŋ, yə paapa dər kel katən ba.

¹⁷ Hulum bə minti bəlaŋ ji kel gə minti giidə Pepeŋ bələy, wə neke bə ase minti hate toŋ kəya bəŋ kasi Pepeŋ da mo, ten waate haa dər kel katən moŋ?

¹⁸ Hulum bə minti waate dər kel nuutuŋ, wə golde haa minti kaŋ aŋkə tó la. Hulum bə minti toŋ bele nuutu minti tokɗeŋ jəə la kə hulum bə minti gaŋ tó daŋ, wə waate haa gəəziŋ faɗi, ŋete bə kel paapa ku ba.

¹⁹ *Moyisi aynaŋ *ku giliŋ haa tó bə mo? Səma hulum paapa bə ji joŋre də ku gili toŋ anə məna guudəŋa ba. Aŋ bə goldon bə aweŋ haa kel maa mo?»

²⁰ Yə wəətunu minti: «Tam haa də kəwal cəərəma ɗe. Mindi toŋ bə goldoma kəna bə awe mo?»

²¹ Wə minti: «Ten jəŋ miɗiŋ aduubə dəŋa kəm məna, kəya aŋ ŋələŋ wəra keɗe faɗi.

²² Aŋ golə la kəm, Moyisi ayaŋ kəkəy bə ceme tantaŋ. (Anaaŋa kəkəy toŋ a warda bə ayə-aye a kəmoomo dəŋ, Moyisi fəlnu ajew paapa tó ba.) Kəya aŋ doŋ haa bə ceme tantar kəmar koncoŋ dər *hi bə faake kə Pepeŋa.

²³ Jəəne minti aŋ gə nakə-neke bə jeme tantar beebe konceŋ dər hi bə faakeŋa bay ɓalke ku gili kə Moyisiŋ, aŋ bə koloŋ waŋ sarəna haa səm mo minti ten seereŋ hulum wəra anə halla keɗe dər hi bə faakeŋaŋ?

²⁴ Kel gə minti aŋ bə əsəyaŋ, aŋ a cəməy kəəti di bay guluy guudiŋ ba. Aŋ camə kəəti la ɗeker a kuɗuŋa.»

Kaŋ ce awəy minti Yeesu haa hulum bə ŋamə-ŋeme nuutu mo?

²⁵ Sərdə kaanə Zeruzalem əsəŋ bə waate minti: «Haa hulum bə minti yə a bə guldu bə aweŋ bə mo?

²⁶ Golə la, wə bə waate kela wəra kəkər gil aduubə də kaŋa, hulum paapa bə wəətu kela bə faɗi gəm! Kaa kəmtəŋ náŋ nuutu gə asə-ase minti wə haa *Hulum bə minti Pepeŋ ŋəmnuŋ gəəzi mo?

²⁷ Səma, Hulum bə minti Pepeŋ ŋəmnuŋ tuli akaceŋa ha'aŋ, hulum anə məna ase ko bə minti wə bəŋ da ada ba. Hulum toŋ gila ha'aŋ, ko bə minti wə bəŋ da adaŋ də dər áŋ.»

²⁸ A ko toŋa kəyaŋ Yeesu bə hate giidə *Kuli kə Pepeŋa. Wə waataŋ koloŋ minti: «Ten nuutu də dərəŋ mo? Ko bə minti ten bəŋ da adaŋ də dərəŋ nuutu gəəzi mo? Ten gaŋ kusrən da haa paapa ten toki ba, hulum bə minti gaanan daŋ, wə bə nakə-neke minti aŋ malə ɗiki dəŋ la cuuru. Wə paapa də dərəŋ ba,

²⁹ səma ten toŋ ha'aŋ, wə də dərən gud bə minti ten bəŋ haa suru da, wə gaanan da haa tó.»

³⁰ Kəya yə bəlaŋ daw, səma hulum məlaŋ kəəsu suru ba gud bə minti cəwa də daw a kəm bay neke.

³¹ Anaaŋa aduubə də kaa kə ablawaŋ, kaa ablaw doŋ guudu. Yə minti: «Hulum bə minti Pepeŋ ŋəmnu bəŋ ne akaceŋaŋ, wə jəəti miɗi bə deŋe kə hulum toŋ gilaŋ yaŋ nuutu mo?»

Kəkamna kə kaanə Ziwifiŋ vaŋ kaa gə gole cəərə Kuli kə Pepeŋ a de Yeesu

³² Kaanə *Farisiyeŋ əskəŋ kel gə minti kaŋ a bə wiskitiya cəərə Yeesuŋ kəyaŋ, kəkamna kə *kaa kə keere Pepeŋ, də kaanə Farisiyeŋ, vaŋ kaa gə gole cəərə *Kuli kə Pepeŋ a daw.

³³ Yeesu minti: «Ten bə ji sarəŋa kəna haa də aŋar də ko anə ga'i bagŋ, adoro ten bə koore sar hulum bə minti gaanan daŋ.

³⁴ Aŋ bə goldon yaŋ, səma aŋ bə fəlan pəda, gud maa mo ko bə minti ten ɗe ada naŋ, aŋ neke bə ɗe ada na ba.»

³⁵ Kaanə Ziwifiŋ waataŋ aduubə də kumsi minti: «Wə bə koore haa a ko muntu toŋ minti aŋ bə fəlu pədaŋ mo? Wə bə koore haa ger kaanə Ziwifi gə minti warna gə meerə-meere aŋay ger kaanə Gereki na mo? Wə ɗe a hate kaanə Gereki mo?

³⁶ Wə waataŋ kel teŋ minti: ‹Aŋ bə goldon yaŋ, səma aŋ bə fəlan pəda, gud maa mo ko bə minti ten bə ɗe ada naŋ, aŋ neke bə ɗe ada na ba› ha'aŋ, guudiŋ haa minti harmə mo?»

Kəsar də kan gə aye dədərgəŋ a kaŋ

³⁷ Hi bə ge cəərə kəɗwəy haa hi boblo bə deŋe kumsuŋ. Dər hi toŋa kəyaŋ, Yeesu faŋ apəya, wə əsəŋ bə waate koloŋ minti: «Mindi mindi mo jəəne də kinkin, wə bəəda sarən da a se kan.

³⁸ Damdi jeere bə giidə Kefter kə Pepeŋ a waataŋ ana: ‹Hulum bə minti doŋ ne guudənaŋ, kəsar də kan gə aye dədərgəŋ a kaŋ, ãye yaŋ warda giidu da.›»

³⁹ Yeesu waataŋ kel teŋ haa cəərə Tiiru də minti kaa gə minti doŋ guuduŋ bə fəla yaŋ. Də ko toŋ ha'aŋ, Pepeŋ ayaŋ Tiiru a kaa kə doo-de kəm ba, gud maa mo Yeesu a kəm paapa apəy na bə hame boblo nuutuŋ na ba.

⁴⁰ Bə minti kaŋ əskəŋ kel teŋ kəyaŋ, sirdiŋ əsəŋ bə waate minti: «Hulum toŋ haa *hulum bə jogte ku mini kə Pep bə minti aŋ a bə məwaŋ gəəzi ɗe.»

⁴¹ Sirdi minti: «Kəna *Hulum bə minti Pepeŋ ŋəmnuŋ!» Gaalaŋ pa minti: «Hulum bə minti Pepeŋ ŋəmnuŋ wə bi kanda Galile da ɗaw mo?

⁴² Kefter kə Pepeŋ minti hulum toŋ bə ji haa a kaasaw də *Davidi, wə bə tuli haa Betlehem da anəkay, wəlasi də minti Davidi a jəŋ giidəŋ.»

⁴³ Ku kaŋ ɓarsaŋ faɗi gud kel də Yeesu.

⁴⁴ Sirdiŋ golde minti té daw la, səma hulum haŋ kəəsu anə məna bə mələy suru bə daw ba.

Kəkamna kə kaanə Ziwifiŋ de gud Yeesu ba

⁴⁵ Bə minti kaa gə gole cəərə *Kuli kə Pepeŋ haraŋ sar kəkamna kə *kaa kə keere Pepeŋ də kaanə *Farisiyeŋ, kaa kəmtəŋ teŋ əsəŋ bə lay kuya minti: «Aŋ doŋ Yeesu kaasaŋ da ba haa səm mo?»

⁴⁶ Yə minti: «Hulum toŋ ha'aŋ, hulum waataŋ kel hõy damdi tó ana ba.»

⁴⁷ Gə Farisiyeŋ minti: «Aŋ ha'aŋ, aŋ yaakaŋ kusrəŋ bə lente na warna guudu na gəm mo?

⁴⁸ Aduubə də kəkamnaŋa daana də kaanə Farisiyeŋa, hulum kəman doŋ guudu anə məna nuutu mo? Paapa!

⁴⁹ Kaa té gə ablaw gə minti bele kel nuutuŋ ha'aŋ, *ku gili kə *Moyisi paapa də diri ba, Pepeŋ bəsəy yaŋ wəra!»

⁵⁰ Kaanə Farisiyeŋ gə minti a jəŋ adaŋ, Nikodem a jəŋ aduubə di gəm. Wə haa hulum bə minti a ɗeŋ hõy sar Yeesu. Wə wəətənəy minti:

⁵¹ « Ku gili náŋ waate haa minti: áŋ əskəŋ kel kə hulum baŋ daana áŋ asaŋ karman bə minti wə a juunuŋ bə gəm, kəkəy paapa cəərə áŋa bə daw də kəəti ba.»

⁵² Yə minti: «Tam haa bə Galile gəm mo? Golə jeere kə Pepeŋ la pisi, tam ase yaŋ minti *hulum bə jogte ku mini kə Pepeŋ bi Galile da ba.» [

⁵³ Adoro kəyaŋ, mindi mindi kooroŋ akera.