Kel pəsaŋ kəmarwaŋ gə minti Zaŋ jiiriniy 6 - JAA TƏMARWAŊ

Yeesu aye hame a kaa kə ablaw

¹ Adordə kel teŋa kəyaŋ, Yeesu cakɗaŋ warna agal naaya ta də kan kəmtəŋ gə Galile na, yə mante kan teŋ minti kan gə Tiberiyadiŋ gəm.

² Kaŋ taptaŋ guudu ablaw gud bə minti yə astaŋ kar gə məɗ-miɗi gə minti wə jiini bə seerte kaa kə ɗemeŋaŋ wəra də diri.

³ Kəya Yeesu luŋ wəra apəya cəərə pərki kəmana, wə əsəŋ ada je'i də *kaa gə guuduŋ.

⁴ *Kəɗwəy kə kaanə Ziwifi gə minti yə məntəy Pakiŋ, a wəra maŋ bə ji gəm.

⁵ Yeesu haŋ duru apəya bə gole kəyaŋ, wə asaŋ kaŋ bə ɗe da suru da ablaw. Wə əsəŋ bə le ku Filipi minti: «Áŋ fele mappa tó bə gusiŋ haa kəna ane mo minti áŋ əyəy di bə hameŋ?»

⁶ Yeesu waataŋ kel teŋ haa bə gole koɗ Filipi. Karman bə minti tó Yeesu bə jəw wəra də duru ajew ɗaw.

⁷ Kəya Filipi minti: «Soloy a jəə la nuutu kəna kasi náŋa kəs-kəsi ɓasi ɗaw, wə sə a neke bə gusi mappa kir minti mindi mindi mo falə la bə hame wesekiŋ ba.»

⁸ Hulum bə guudu baalaŋ, yə məntu Andere, wə haa seenə Simoŋ Piyer, waataŋ Yeesu minti:

⁹ «Pur kəman yaŋ kəna, mappa də jəə-ji də kaasaw orjəŋ yaŋ kəəsu wiiɗiw, də aska ada ɓasi gəm. Səma kar teŋ kəya neke haa mindi mo?»

¹⁰ Yeesu minti: «Aŋ baarə kaŋ la adawra.» Kaɗəkaw sããya jəŋ a ko toŋa ablaw, kaŋ baaraŋ ada faɗi. Kaa kaŋkar aduubə də kaŋa ada karman bə guɓ-guɓi wiiɗiw.

¹¹ Kəya Yeesu humuŋ mappaŋ kəəsu, wə jəŋ suuse a Pepeŋ cəərə, wə ɓarsəna a kaa gə minti adaŋ. Wə jəŋ bədoona də askaŋ gəm. Wə əynəy di damdi giidi a bəlaŋ ana.

¹² Kaŋ seepteŋ wəra a tay di, kəya Yeesu waataŋ kaa gə guuduŋ minti: «Aŋ kotə gud mappa də yaaktə-yaakteŋ la keɗe kir minti kumundu a ɓalke wəra anə məna ba.»

¹³ Kəya yə kotnə cəərə, yə ɗostoŋ kəlam hor cuuru ɓasi də gud mappa də minti a taakaŋ gud wiiɗiwaŋ də minti kaŋ a hamaŋ.

¹⁴ Kaŋ asaŋ miɗi bə minti Yeesu juunu kəyaŋ, yə əsəŋ bə waate faɗi minti: «*Hulum bə jogte ku mini kə Pepeŋ bə minti kel a wəra gə jeerə-jeere cuuru minti wə bi yaŋ cəərə seŋkaŋaŋ, haa hulum toŋ gəəzi ɗe.»

¹⁵ Yeesu asaŋ faɗi minti yə bi a de tó bə isi kumna ciiri a waŋ kəyaŋ, wə haraŋ bə he guudu na warna cəərə pərki na máŋ tó məna bay cuuru.

Yeesu ɗe də kəmpuru cəərə kana

¹⁶ Cəwaŋ dəraŋ wəra kəyaŋ, *kaa gə gud Yeesuŋ sorkoŋ warna ku kan kəmtəŋ na.

¹⁷ Yə luŋ giidə turtiŋa bə ɗe Kapernam agal naaya taŋ na. Koŋ a ziɓiŋ ne wəra ɗaw, Yeesu a kəm bay tuli siri gəm.

¹⁸ Kaŋkaw kəmtəŋ bə ji, kəya kan əsəŋ bə layte.

¹⁹ Yə a hoɗoŋ wəra karman bə kelewmeeter kənki, kəya yə asaŋ Yeesu bə bi da caw cəərə kan da də kəmpuru sar turtiŋ da. Kəya walkaŋ jəmnəy faɗi.

²⁰ Səma, Yeesu wəətənəy minti: «Aŋ a ji walka ba, kəna ten!»

²¹ Kaa gə guuduŋ a bəlaŋ haa minti té haw giidə turtiŋa. Ɗe a goleŋa, turti məlaŋ ne wəra ku keeŋe a ko bə minti yə bə ɗe na ada naŋ ɗaw.

Kaŋ golde Yeesu

²² A dibiiniŋa, kaa kə ablaw gə minti a cakɗaŋ warna agal naytaŋ na də *kaa gə gud Yeesuŋ baŋ, yə ɗəkəŋ minti deegŋ ha'aŋ, turtiŋ a jəŋ məna faɗi. *Kaa gə gud Yeesuŋ a luŋ giidə bə kooreŋ haa té təwa, Yeesu luŋ guudi ada ba.

²³ Kəya sərdə kətartaw kəman tuukuŋ agal də vil də Tiberiyadiŋ da anəkay. Yə məlaŋ wəra a ko bə minti Yeesu a ayaŋ mappaŋ a kaŋ adordə bə minti wə a jəŋ suuseŋ cəərəŋ.

²⁴ Kaŋ asaŋ anəkay minti Yeesu paapa a ko toŋa ada pəda də kaa gə guuduŋ, yə raawaŋ bə li giidə turtiŋa, yə kooroŋ Kapernam bə ɗe a guldu.

Yeesu haa hame bə aye dədərgəŋ

²⁵ Kaŋ ɗeŋ a fele Yeesu warna agal naaya ta də kan də aŋar də Kapernam na. Yə əsəŋ bə law ku minti: «Hulum bə hateŋ, tam tuluŋ wəra kəna haa kotnə mo?»

²⁶ Wə minti: «Gəəzi, gəəzi, ten waataŋ, aŋ goldon zuga haa gud minti aŋ a hamaŋ mappaŋ, aŋ seepteŋ wəraŋ. Aŋ goldon paapa gud bə minti aŋ əskəŋ gud miɗi bə minti ten juutunuŋ ba.

²⁷ Aŋ jəə joŋre la, paapa bə fele hame bə minti ɓalke wəraŋ ba. Aŋ jəw la ɗaw haa bə fele hame bə minti toŋ bə ji yaŋ saksaki daana aŋ fele dədərgə də bay teweŋ guuduŋ. Hame toŋ ha'aŋ, bə ayaŋ dəŋ haa ten *Kormə Hulúm, gud maa mo Barən Pepeŋ məlaŋ kəəsu cəərəna minti tó aynan abay kə toŋ.»

²⁸ Kəya yə ləənu ku minti: «Joŋre bə minti giidə Pepeŋ bele minti are jəə tó laŋ, haa muntu mo?»

²⁹ Wə hərnəy di minti: «Joŋre bə minti Pepeŋ bele minti aŋ jəw laŋ haa minti aŋ doo la guudəna, ten bə minti wə gaanan daŋ.»

³⁰ Yə minti: «Tam bə ji haa miɗi muntu mo minti are asə la daana are doo la guudumaŋ? Tam bə ji haa maa mo?

³¹ Hame bə minti yə məntu ‹man›, kəmoomo də áŋ a həmnu a ko bə minti yə a kəm giidə ful daŋ, damdi wəra bə jeerə-jeere giidə Kefter kə Pepeŋa ana minti: ‹Wə əynəy hame bə minti bəŋ apəy daŋ.›»

³² Wə hərnəy kel minti: «Gəəzi, gəəzi, ten waataŋ, hame bə minti bəŋ apəy daŋ, aynaŋ dəŋ haa paapa moomo də áŋ *Moyisi ba. Barən ayaŋ hame bə gəəzə-gəəziŋ haa tó.

³³ Gud maa mo hame bə minti Pepeŋ əyuŋ, haa tó bə minti bi apəy da daana aye dədərgəŋ a kaa gə cəərə seŋkaŋ.»

³⁴ Yə minti: «Hulum bobloŋ, hame toŋ kəyaŋ, əytu la a are saksaki.»

³⁵ Yeesu wəətənəy minti: «Ten kəna hame bə minti aye dədərgəŋ a kaŋ. Hulum bə minti bəŋ da ne sarən daŋ daana wə doŋ ne guudənaŋ, tay ɗəmu hõy ba, kinkin daw hõy bə gəm.

³⁶ Səma ten a waatənaŋ kel teŋ warda: aŋ asnan də dərəŋ, də teŋ keɗe aŋ doŋ guudəna ba.

³⁷ Kaa gə minti Barən ayan dən, yə bi sarəna keɗe. Hulum bə minti bəŋ ne sarənaŋ, ten həru duru warna ba anə ceki.

³⁸ Gud maa mo ten bəŋ apəy da haa bə bi a ji kar gə minti giidə Pep bə minti gaanan daŋ bələy, paapa gə minti giidən bələy ba.

³⁹ Pep bə minti gaanan daŋ, karman bə minti giidu bəluŋ haa minti, kaa gə minti tó a aynan dən, ten a lente kumundu wəra guudi anə məna ba daana minti ten hərəy la wəra dədərgə adordə meŋa dər hi bə adoroŋa.

⁴⁰ Bədoona ana, karman bə minti giidə Barən bəluŋ haa minti, mindi mindi mo asaŋ ten kurmuyuŋ neŋ daana doŋ ne guudənaŋ, wə falə dədərgə də bay teweŋ la, daana ten həru la wəra dədərgə adordə meŋa dər hi bə adoroŋa.»

⁴¹ Kəya kaanə Ziwifiŋ əsəŋ bə ŋorme kuya cəərə Yeesu gud kel gə minti wə a wəətənəy minti: «Ten kəna hame bə minti bəŋ apəy daŋ.»

⁴² Yə minti: «Wə haa Yeesu kormə Zosefiŋ bə mo? Anə buru də nuru, yə wəra də dər áŋ pisi. Wə bə əsəŋ bə waate hebkəna gila minti tó bəŋ apəy daŋ haa naanaanə mo?»

⁴³ Yeesu jəmnəy kuy minti: «Aŋ a ŋorme kuŋ aduubə də kumsəŋa ba.

⁴⁴ Jəəne minti Barən bə minti gaanan daŋ zeŋ hulum sarən da baŋ, wə neke bə bi sarəna ba. Dər hi bə adoroŋa ha'aŋ, ten həru yaŋ wəra dədərgə adordə meŋa.

⁴⁵ *Kaa kə jogte ku mini kə Pepeŋ a jeereŋ warda minti: ‹Kaŋ keɗe Pepeŋ hətəy yaŋ haa tó›. Mindi mindi mo əskəŋ ku Barən neŋ, wə doŋ hate nuutu neŋ, toŋ bi sarəna.

⁴⁶ Ten waate haa paapa minti hulum kəman asaŋ Barən Pepeŋ də duru ŋaanaanə moŋ ba. Əsnu haa ten təwa, ten bə minti bəŋ suru daŋ.

⁴⁷ Gəəzi, gəəzi, ten waataŋ, hulum bə minti doŋ ne guudənaŋ, dədərgə də bay teweŋ máŋ nuutu ɗaw.

⁴⁸ Ten kəna hame bə aye dədərgə a kaŋ.

⁴⁹ Hame bə minti yə məntu ‹man›, kəmoomo dəŋ a həmnu giidə ful da, də teŋ keɗe yə meŋ wəra.

⁵⁰ Səma hame bə minti bi apəy daŋ, toŋ haa gidiirə hame bə minti hulum həmnu neŋ, wə me pəda.

⁵¹ Ten də kusrən haa hame bə minti aye dədərgəŋ, bə minti bəŋ apəy daŋ gəm. Hulum bə minti hamaŋ hame tó neŋ, toŋ ji yaŋ caw bə faɗnə-faɗna. Hame bə minti ten bə əyu kir minti kaa gə cəərə seŋkaŋ falə dədərgəŋ laŋ, haa kusuki dən gadi faɗi.»

⁵² A ko toŋa kəyaŋ, kaanə Ziwifiŋ əsəŋ bə ce awəya aduubə də kumsi wəra hasi minti: «Hulum toŋ, wə bə aye kusuki du a náŋ minti aŋ həmu laŋ haa naanaanə aye mo?»

⁵³ Kəya Yeesu wəətənəy minti: «Gəəzi, gəəzi, ten waataŋ, hulum bə minti hamnan kusuki də ten Kormə Hulúm baŋ daana saanan kor dən bə gəm, dədərgəŋ ji giidu ba.

⁵⁴ Hulum bə minti hamnan kusuki dən neŋ daana saanan kor dən ne gəm, dədərgə də bay teweŋ máŋ nuutu. Dər hi bə adoroŋa, ten həru yaŋ wəra dədərgə adordə meŋa.

⁵⁵ Gud maa mo kusuki dən haa karman bə hame bə gəəzə-gəəziŋ, kor dən haa karman bə se bə gəəzə-gəəziŋ gəm.

⁵⁶ Hulum bə minti hamnan kusuki dən neŋ daana saanan kor dən ne gəm, wə ji yaŋ bə tapə-tepe dəərən, ten ji yaŋ bə tapə-tepe duuru gəm.

⁵⁷ Aba bə dədərgəŋ gaanan da, ten caw haa kir kəəsu gəm. Gud teŋa ta, hulum bə minti hamnan kusuki dən neŋ, ji caw haa kir kaasən gəm.

⁵⁸ Haa kəya hame bə minti bəŋ apəy daŋ. Wə wəra hal də ‹man› də minti kəmoomo dəŋ a hamnaŋ, də teŋ keɗe yə bə meŋ wəra. Səma hame tó bə apəyaŋ, hulum həmnu neŋ, wə ji dədərgə caw bə faɗnə-faɗna.»

⁵⁹ Haa kəya kel gə minti Yeesu hətnəy a kaŋ giidə *kuli bə toose kə kaanə Ziwifiŋa Kapernamaŋ.

Tepe gud Yeesuŋ

⁶⁰ *Kaa gə gud Yeesuŋ əskəŋ kel əska kəyaŋ, ablaw diŋ əsəŋ bə waate faɗi minti: «Kel teŋ kəya yə gəəli, minti toŋ doy mo?»

⁶¹ Yeesu asaŋ kaa gə guuduŋ bə ŋorme kuya gud kel teŋa anəkay, wə wəətənəy minti: «Kel teŋ hogtonoŋ tarməyaŋ mo?

⁶² Aŋ bə asaŋ ten *Kormə Hulúm ne bə hare na apəy na a ko bə minti ten a jəŋ da adaŋ, ɗiki dəŋ bə ji máŋ naanaanə mo?

⁶³ Tiirə Pepeŋ aye dədərgəŋ haa tá, hulum də kusru neke bə ji karman ada ba. Kel gə minti ten a waatənaŋ dəŋ kənaŋ, Tiiruŋ bi cəərəŋa haa guudi bə ayaŋ dədərgəŋ.

⁶⁴ Səma sərdəŋ aduubə dəŋa paapa bə de guudəna ba.» Anaaŋa, kaa gə minti bə de guudu baŋ daana hulum bə minti ji akoloki yaŋ cuuruŋ, yə a wəra də duru da anə hãã faɗi.

⁶⁵ Yeesu wəətənəy ada pa minti: «Ten waatənaŋ minti bi sarəna haa kaa gə minti Barən əynəy kəkəy bə biŋ təwa haa sə teŋ derra faɗi.»

⁶⁶ Də ko toŋ kəyaŋ, ablaw də kaa gə guuduŋ haŋ giidi wəra suru, yə bəlaŋ ɗe guudu pəda.

⁶⁷ Yeesu laŋ ku kaa gə guudu hor ciiri ɓasiŋ minti: «Aŋ gəm, aŋ bele koore gəm mo?»

⁶⁸ Simoŋ Piyer minti: «Barkaŋ, kel gə minti aye dədərgə də bay teweŋ, yə kaasəma, are bə ɗe kəna sar mindi pə mo?

⁶⁹ Are teŋ, are doŋ guuduma, are asaŋ wəra gəm minti tam haa Hulum Cetceti bə minti Pepeŋ gəənu daŋ.»

⁷⁰ Yeesu minti: «Aŋ kaa hor cəərəŋ ɓasiŋ, varnaŋ warda haa ten bə mo? Anaaŋa hulum yaŋ aduubə dəŋa məna'iŋ, toŋ haa kəwal gadi!»

⁷¹ Wə waataŋ kel teŋ bədoona haa cəərə Zudasa, kormə Simoŋ Iskariyotiŋ, gud maa mo bə ɗe a ji akoloki wəra cəərə Yeesu haa tó, wə a nuutu aduubə də kaa gə guudu hor ciiri ɓasiŋaŋ.