Kel pəsaŋ kəmarwaŋ gə minti Zaŋ jiiriniy 3 - JAA TƏMARWAŊ

Yeesu naale də Nikodem

¹ Hulum kəman a jəŋ adəwaldə kəkamna kə kaanə Ziwifiŋa, yə məntu Nikodem. Wə haa hulum bə *Farisiyeŋ.

² Ɗeŋ a deye hõy, wə kooroŋ sar Yeesu duugŋ, wə wəətunu minti: «Hulum bə hateŋ, wəra də dər are minti Pepeŋ gaanam da bə bi a hate are. Gud maa mo, Pepeŋ sə a jəə la duuru bə əyu səɓakiŋa baŋ, hulum anə məna sə a neke bə ji kar gə məɗ-miɗi gə minti tam a jiitiniy ba.»

³ Yeesu minti: «Gəəzi, gəəzi, ten waatam, jəəne minti kan də Tiirə Pepeŋ haraŋ bə we huluma baŋ, wə neke bə kele a *Kumna kə Pepeŋa ba.»

⁴ Nikodem minti: «Hulum wəra pəərəŋki pəta, wə hare bə we kimirwi kəm paŋ haa naanaanə mo? Wə neke bə hare bə kele giidə nuru bə we kampa bə ɓasi pə mo?»

⁵ Wə minti: «Gəəzi, gəəzi, ten waatam, jəəne minti kan də Tiirə Pepeŋ haraŋ bə we huluma baŋ, wə neke bə kele a Kumna kə Pepeŋa ba.

⁶ Beebe bə minti hulum kisirkiŋ wəənuŋ, suru haa kusuki kə kəmnu. Hulum bə minti Tiirə Pepeŋ wəənuŋ, toŋ haa a tiiruŋa gəm.

⁷ A ŋili gud kel gə minti ten a waatənam minti aŋ kir hare bə we kəmarwaŋ ŋaanaanə moŋ ba.

⁸ Golə la kəm, kaŋkaw he ha'aŋ, yə təwyi nuutu anə hãy faɗi. Tam iski sawye diŋ, səma ko bə minti yə faŋ da adaŋ daana ko bə minti yə ɗe adaŋ, wə paapa də dərəm ba. Haa kel gə məna'iŋ də hulum mundu mundu mo bə minti haraŋ bə we də Tiirə Pepeŋ.»

⁹ Kəya Nikodem minti: «Kel teŋ ji haa naanaanə ji mo?»

¹⁰ Yeesu minti: «Tam hulum boblo bə hate kaanə Israyel anə gadiŋa, gud kel teŋ kəya paapa də dərəm ba!

¹¹ Gəəzi, gəəzi, ten waatam, are waate haa kel gə minti də dər areŋ, are tope haa bəlam də kel gə minti are əsnəy, də teŋ keɗe aŋ ɗempa a de haa də kel gə minti are a topnoŋ bəlam diŋ ba.

¹² Ten waatənaŋ kel haa cəərə kar gə minti bə jəəti sarəŋa kəna adawra, aŋ doŋ guudi ba. Bədoona tə kəm, ten bə waatənaŋ kel ne cəərə kar gə minti jəəti apəy na ger Pepeŋ na, aŋ bə de guudi naanaanə de mo?

¹³ Hulum kisirki ɗeŋ kəm hõy apəy na ger Pepeŋ na ba anə ceki. Səma *Kormə Hulúm ɗaaməna faɗi a jəŋ da ada, vaŋ warda adawra da haa tó faɗi gəm.

¹⁴ Bə minti *Moyisi giidə fulaŋ, wə gəɓaŋ hənji də ɗampə-ɗampe də koosoŋ wəra apəya a gədəwaŋa. Bədoona ana ta, Kormə Hulúm kir geɓe wəra apəya ɓekte gəm,

¹⁵ kir minti, mindi mindi mo doŋ ne guuduŋ, wə falə dədərgə də bay teweŋ la.

¹⁶ Gud maa mo Pepeŋ bəlaŋ kaa gə adawraŋ wəra kə ablaw. Gud teŋa ta, wə ayaŋ kurmuyu məna'iŋ da minti mindi mindi mo doŋ ne guuduŋ, wə a bese wəra ba, səma wə falə nuutu la haa dədərgə də bay teweŋ.

¹⁷ Pepeŋ gaŋ kurmuyuŋ adawra da haa paapa minti wə bəə la a de kaŋ də kəəti ba, wə gəənu da minti kaŋ bə falə seereŋ la guudu ɗaw.

¹⁸ Hulum bə minti doŋ ne guudu, kəəti kə Pepeŋ daw pəda, səma hulum bə minti doŋ guudu baŋ, kəəti kə Pepeŋ duunuŋ ne wəra ɗaw gud bə minti wə doŋ gud Kormə Pepeŋ ɗaaməna'iŋa ba.

¹⁹ Kəəti kə Pepeŋ bə de kaŋ yaŋ gud kel teŋa haa kənaŋ: Pəɗakiŋ bəŋ wəra cəərə seŋkaŋa, səma kaŋ balna ba. Yə ŋəmaŋ neeteŋ haa tilməŋ gud minti yə jəəti haa kel kə bayməlaŋ.

²⁰ Gud maa mo, hulum bə ji baymeleŋ ha'aŋ, wə bele Pəɗakiŋ ba anə hasi, wə ze sara bə gəm kas walka minti, kel gə minti tó jəy bayməlaŋ, guudi ɗe a ge wəra.

²¹ Hulum bə minti ji kel gə gəəziŋ, toŋ ze maŋ sar Pəɗakiŋa kir minti kar gə minti tó jəy, Pəɗakiŋ gay guudi la wəra minti ku té bə tapə-tepe də Pepeŋ.»

Bar kəkəy bə minti Zaŋ Batisi jəw cəərə Yeesuŋ

²² Adordə kel teŋa kəyaŋ, anə Yeesu də *kaa gə guuduŋ kooroŋ giidə seŋka də Zudeŋ. Wə hətəŋ ada pisi laki diiri, wə jəətəŋ batem a kaŋ.

²³ Zaŋ Batisi bə jəəti batema a kaŋ Enona gəm, maŋ sar vil də Salima, gud bə minti ko toŋ də kan ablaw. Kaŋ pəətəŋ suru, kəya wə jiitiniy batem.

²⁴ Kel teŋ jəŋ haa də ko bə minti Zaŋ a kəm paapa bə gaa-ge a daŋgaya baŋ.

²⁵ Kəya sərdə kaa gə gud Zaŋ əsəŋ bə ce awəya də hulum bə Ziwifi kəman cəərə kel kə to'osi də baadeŋa minti tam kole wəra *cetceti tiinə Pepeŋaŋ.

²⁶ Yə kooroŋ sar Zaŋ bə ɗe a wəətu minti: «Hulum bə hateŋ, tam asaŋ ne hulum bə minti a jəŋ səram da ku vor bə Zurdeŋ da agal naaya taŋ daŋ, hulum tó bə minti tam a jəŋ bərdə kəkəy cuuruŋ, əsəŋ hebkəna bə jəəti batema a kaŋ gəm. Kaŋ keɗe gaŋ kuy máŋ haa suru na anəkay ɗaw.»

²⁷ Wə hərnəy kel minti: «Hulum nəkaŋ bə he kel a kusru anə faɗi bay Pepeŋ əyu du ba.

²⁸ Aŋ də kusrəŋ, aŋ kəmnə də kəkəy də kel katən gə minti ten a wəətənəy minti: ‹Ten toŋ paapa *Hulum bə minti Pepeŋ ŋəmnuŋ ba, səma wə gaanan warda ajew du da.›

²⁹ Aŋ gosə gole la kəm, a ko bə kəɗwəy gə de həlgəŋaŋ, hulum bə dooraŋ haa gedraŋ bə mo? Bərdə kəkəy nuutuŋ isi máŋ maŋ suru ha'aŋ, bə usku ku. Kusru ji wəra də waale anə holoŋ-holoŋ bə minti wə bə iski ku dəəruŋaŋ. Waale katən bə gud Hulum bə minti Pepeŋ ŋəmnuŋ, wə haa bədoona ana gəm, wə wəra bə doo-de ku anə kaŋkaŋ faɗi.

³⁰ Doŋ kir minti hage bə səmuŋ duusə la wəra pisi duusa, katən harə la wəra adoro.

³¹ Hulum bə minti bəŋ apəy daŋ, boblo də kar keɗe haa tó. Hulum bə minti toŋ waŋ kəna cəərə seŋkaŋaŋ, wə haa bə kaa gə cəərə seŋkaŋ ana gəm. Wə waate haa sam kar gə cəərəŋ gəm. Hulum bə minti bəŋ apəy daŋ, wə wəra boblo də kar keɗe gəəzi,

³² wə waate haa sam kel gə minti wə a əsnəy daana wə a iskiniy. Səma hulum paapa bə de haa də kel nuutu teŋa ba.

³³ Hulum bə minti doŋ kel nuutuŋ neŋ, wə ge dər kaŋ wəra pəɗaki minti kel kə Pepeŋ haa kel gə gəəzə-gəəziŋ.

³⁴ Hulum bə minti Pepeŋ gəənu daŋ, wə joge haa kel kə Pepeŋ, gud maa mo Pepeŋ əyu Tiiruŋ bay gədəəgi də.

³⁵ Pep Abaŋ bele Kurmuyuŋ, wə əynu kar neŋneŋ keɗe wəra kəəsu.

³⁶ Hulum bə minti doŋ kel kə kurmuyuŋ neŋ, toŋ fəlaŋ dədərgə də bay teweŋ ne. Hulum bə minti humuŋ kosoŋ cəərə kel kə kurmuyuŋa baŋ, wə fele dədərgə taŋ ba, waŋ kə Pepeŋ ji cuuru saksaki.»