Kel pəsaŋ kəmarwaŋ gə minti Zaŋ jiiriniy 21 - JAA TƏMARWAŊ

Yeesu veɗe kusru dər kaa gə guudu seeɗa

¹ Adoro hiti laki, Yeesu haraŋ bə veɗe kusru wəra a *kaa gə guuduŋ ku kan kəmtəŋ gə Tiberiyadiŋa haa bə kəyaŋ ana:

² anə Simoŋ Piyer, də Tomasi bə minti yə məntu Kəmkun, də Nataniyel bə Kaana bə giidə seŋka də Galileŋ, də karmə Zebedeŋ, də kaa gə gud Yeesu gaalaŋ ada ɓasi, a jəŋ gə tapə-tepe ciiri.

³ Kəya Simoŋ Piyer wəətənəy minti: «Ten koore a tope aska.» Yə hərnu kel minti: «Are koore guuduma gəm.» Kəya yə kooroŋ bə ɗe a li giidə turtiŋa faɗi. Səma yə doŋ aska anə məna dər duugŋ taŋa ba.

⁴ Bə minti koŋ wəlaŋ wəra kəyaŋ, Yeesu máŋ gil ku kana, səma kaa gə guuduŋ asaŋ minti kəna tó ba.

⁵ Wə əsəŋ bə wəətiya koloŋ minti: «Karmanti, aŋ topoŋ aska nuutu mo?» Yə minti: «Paapa!»

⁶ Kəya wə minti: «Aŋ vaa amaayaŋ la kaasaŋ kemer, aŋ fele aska yaŋ.» Yə vaana a ko toŋa faɗi, amaayaŋ liiniy máŋ bay teɗe warda kas minti askaŋ wəra də ɗosə-ɗose giidə perle'iŋ.

⁷ Kəya hulum bə minti Yeesu bəluŋ waataŋ Piyer minti: «Kəna Barkaŋ!» Simoŋ Piyer əskəŋ anəkay minti kəna Barkaŋ, wə haraŋ bə dere dəməəmə nuutuŋa faɗi, gud maa mo wə a pəŋ daŋge də wəra a kəkəy bə ji vora, kəya wə gaŋ kusru dər kana faɗi.

⁸ Kaayaŋ gə gud Yeesu haraŋ da də turtiŋ bə taɗte amaaya da warda də ɗosə-ɗose də askaŋ. Yə paapa tooto sar doŋdoŋa ba, aduubə di də doŋdoŋ ji wəra karman bə saama məna bagŋ.

⁹ Bə minti yə luŋ warda giidə turtiŋ daŋ, yə asaŋ cəwa də kil ta'i də aska dərə, mappa ada gəm.

¹⁰ Yeesu wəətənəy minti: «Aska də minti aŋ topna daŋ, aŋ bəəda də sərdəŋ kaasaŋ da.»

¹¹ Kəya Simoŋ Piyer luŋ giidə turtiŋa, wə təɗaŋ amaayaŋ warda ku keeŋe da, də aska kəmtəŋ giidə kəsi də hor-hor wiiɗiw cəərə soope. Askaŋ a nuutu gila keɗeŋ, amaayaŋ caaraŋ ba anə ceki.

¹² Yeesu minti: «Aŋ bəəda a hame.» Hulum anə məna gud kaa gə guuduŋa doŋ kusru bə law ku minti wə haa mindi moŋ ba, gud maa mo wəra də diri minti kəna Barkaŋ.

¹³ Yeesu zeŋ ku cəwaŋa kəyaŋ, wə haŋ mappaŋ, wə əynəy di də aska ada gəm.

¹⁴ Haa kəya kampa bə soope bə minti Yeesu vaɗtaŋ kusru wəra dər kaa gə guuduŋa bə minti wə a haraŋ wəra dədərgə adordə meŋaŋ.

Yeesu nele də Piyer

¹⁵ Adordə hameŋa, Yeesu laŋ ku Simoŋ Piyer minti: «Simoŋ, kormə Zaŋ, tam bəlan dəŋaŋ kaa kaayaŋ teŋ nuutu mo?» Wə minti: «Ãã Barkaŋ, wəra də dərəm minti ten bəlam.» Yeesu minti: «Jən gud karmə kaamaŋ katən la.»

¹⁶ Kəya wə haraŋ bə law ku pa minti: «Simoŋ, kormə Zaŋ, tam bəlan nuutu mo?» Wə minti: «Ãã Barkaŋ, wəra də dərəm minti ten bəlam.» Wə minti: «Kaaman katən, golon ciiri la.»

¹⁷ Kəya wə haraŋ bə law ku kampa bə soope pa minti: «Simoŋ, kormə Zaŋ, tam bəlan nuutu mo?» Kəya, laawe doŋ Piyer gud kel gə minti Yeesu ləənu ku ciiri kampa bə soope minti: «Tam bəlan nuutu mo?» Wə hərnu kel minti: «Barkaŋ, kel wəra də dərəm keɗe, də dərəm minti ten bəlam.» Wə minti: «Jən gud kaamaŋ katən la.

¹⁸ Gəəzi, gəəzi, ten waatam, bə minti tam a jəŋ kəm puranul, tam a bə ɗampe dəməəmə də sarəma haa tam də kusrum faɗi, tam a bə ɗeete a koŋa damdi giidim bəlaŋ ana. Səma, tam koloŋ ne wəra dəma pəərəŋkiŋ, tam geŋe kaasam yaŋ wəra, hulum baalaŋ ɗampam dəməəməŋ, yə ɗe dəərəm yaŋ a ko bə minti tam a paapa də caadə ɗe ada na baŋ.»

¹⁹ Yeesu waataŋ bədoona bə ge dər minti Piyer bə me haa naanaanə mo bə aye tokɗeŋ a Pepeŋ. Kəya wə waataŋ Piyer minti: «Tapə la guudəna.»

²⁰ Piyer perteŋ duru kəyaŋ, wə asaŋ *hulum bə minti Yeesu bəluŋ guudi da. Hulum toŋ haa hulum bə minti a cokoŋ cuuru sar Yeesu a ko bə hameŋa daana wə a wəətunu minti: «Barkaŋ, hulum bə ji akolokiŋ cəərəmaŋ haa mindi mo?»

²¹ Bə minti Piyer asaŋ hulum bə minti Yeesu bəluŋ, wə waataŋ Yeesu minti: «Barkaŋ, hulum toŋ ha'aŋ, kel maa bə bi cuuru gəm mo?»

²² Yeesu minti: «Ten bəlaŋ ne minti wə jəə la caw hãã də bə minti ten hare daŋ, kel nəmti maa ada mo? Nəmtiŋ ha'aŋ, tapə la guudəna.»

²³ Haa gud kel kə waate teŋa minti kel duusuŋ warna aduubə də kaa kə doo-deŋ na minti hulum toŋ me ba. Anaaŋa Yeesu a waataŋ paapa bədoona ba, wə a waataŋ haa minti: «Ten bəlaŋ ne minti wə jəə la caw hãã də bə minti ten hare daŋ, kel nəmti maa ada mo?»

²⁴ Jəŋ bar kəkəy wəra cəərə kel teŋa daana jiiriniy wəra jeeraŋ haa hulum toŋ toki. Wəra də dər are minti bərdə kəkəy nuutuŋ a kuɗuŋa.

²⁵ Yeesu jəŋ kar gaalaŋ-gaalaŋ ablaw pa. Yə a tupuy bəlam di la wəra də jeereŋ məna-məna keɗeŋ, cəərəna minti cəərə seŋkaŋ neŋneŋ keɗe sə a kerpe bə ve kefter bə jeertə-jeerte toŋ.