Kel pəsaŋ kəmarwaŋ gə minti Zaŋ jiiriniy 18 - JAA TƏMARWAŊ

Kəkamna kə kaanə Ziwifiŋ de Yeesu

¹ Adordə toose toŋa kəyaŋ, Yeesu kooroŋ də *kaa gə guuduŋ warna agal nayta də paaŋe də Sedroŋ na. Ko bə minti yə vaŋ ada naŋ, kəbaŋ a jəŋ gə karə-kere ada.

² Ko toŋ a də dər Zudasi, hulum bə minti bə ji akolokiŋ cuuruŋ gud bə minti Yeesu a jəŋ bə ɗeete ada na saksaki də kaa gə guuduŋ.

³ Kəya Zudasi kəlaŋ tiinə kəsooto gə Roma daana kaa gə gole cəərə *Kuli kə Pepeŋ gə minti kəkamna kə *kaa kə keere Pepeŋ, də kaanə *Farisiyeŋ, a vəənəy. Kəsootoŋ a wəra gə ganə-gene də kar kə duuriŋ siri, lampa kəəsi, də gədəwa bə cəwa də do'tə-do'te ku. Wə kooroŋ diiri a ko bə kəbaŋ bə minti anə Yeesu ada naŋ faɗi.

⁴ Yeesu wəra bə asə-ase kel gə minti bə ji yaŋ suruŋ keɗeŋ tə bə moŋ, zeŋ siri na, wə wəətənəy minti: «Aŋ golde haa mindi mo?»

⁵ Yə minti: «Are golde haa Yeesu bə Nazaretiŋ.» Wə minti: «Ten gil kənaŋ haa tó.» Zudasi, hulum bə ji akolokiŋ cuuruŋ, a jəŋ siri ada.

⁶ Bə minti Yeesu wəətənəy anəkay minti: «Ten gil kənaŋ haa tó», yə dadəgaŋ warna də digniy, yə vaŋ adawra ruti!

⁷ Yeesu ləənəy kuy pa minti: «Aŋ golde haa mindi mo?» Yə minti: «Yeesu bə Nazaretiŋ».

⁸ Tó minti: «Ten a waatənaŋ minti ten gil kənaŋ haa tó. Aŋ jəəne bə golde haa ten, aŋ yaakə kaayaŋ la bə koore.»

⁹ Kəya kel gə minti wə a wəətənəy doŋ kuy wəra a ko toŋa minti: «Barən, kaa gə minti tam a aynan dən kaasənaŋ, ten lenteŋ kumundu wəra guudi anə məna ba.»

¹⁰ Simoŋ Piyer a jəŋ də macəlam kəəsu, wə bəənə wəra, wə ŋeŋ kosnə hulum kemer bə joŋre kə *kumna boblo bə keere Pepeŋ warna nalaŋ. Sam hulum bə joŋre toŋ minti Malkusi.

¹¹ Səma Yeesu waataŋ Piyer minti: «Harə macəlam nəmti la a huli duŋa. Ɗiki nəmtiŋ waatam haa minti kopi bə seŋ də lasiŋ ada bə minti barən aynan dən, ten saw bə mo?»

Yə koore də Yeesu tiinə Annə

¹² Kəya kəsootoŋ də kumna neeteŋ daana kaa gə gole cəərə *Kuli kə Pepeŋ doŋ Yeesu, yə untunu kəəsu.

¹³ Yə ɗeŋ duuru ajew kəm haa tiinə Annə. Annə haa akaarə Kayifiŋ, bə minti dər le toŋa *kumna boblo bə keere Pepeŋ.

¹⁴ Haa kəna Kayifi toŋ toki bə minti a waataŋ kaanə Ziwifiŋ minti: «Hulum meŋ ne gud kaŋa, haa maryaŋ.»

Piyer malte ku cəərə Yeesu

¹⁵ Anə Simoŋ Piyer də *hulum baalaŋ bə gud Yeesu həənu bəlam du. Hulum baalaŋ bə guudu toŋ a jəŋ wəra də dər *kumna boblo bə keere Pepeŋ. Gud teŋa ta kəkəy cuuru bə kele na aker na giidə tiilim də kuli kə kumnaŋ na. Kəya wə kəlaŋ gud Yeesu faɗi gəm.

¹⁶ Piyer toŋ yaakaŋ warda ku kəsarkaw da, taakaw da. Kəya hulum bə gud Yeesu naytoŋ kəlaŋ warda, wə ɗeŋ a nele də həlgə də gole ku kəsarkaw, kəya wə haraŋ bə kele da máŋ də Piyer guudu da faɗi.

¹⁷ Həlgə də joŋre də minti gole ku kəsarkaw waataŋ Piyer minti: «Tam paapa hulum bə gud kaa gə gud Yeesu toŋ gəm bə mo?» Piyer minti: «Ten paapa hulum bə guudi ba!»

¹⁸ Kaa kə joŋreŋ kə kumna bə keereŋ daana kaa gə gole cəərə *Kuli kə Pepeŋ a kuŋ cəwa kas kosõõyeŋ. Yə ɓəknə cəərə wəra cẽẽ bə hoole, Piyer bə hoole siri ada gəm.

Kumna boblo bə keere Pepeŋ le ku Yeesu

¹⁹ *Kumna boblo bə keere Pepeŋ əsəŋ bə le ku Yeesu cəərə *kaa gə guuduŋa daana cəərə kel gə minti wə bə hətəya a kaŋ gəm.

²⁰ Yeesu minti: «Ten waataŋ kel wəra anə kəkər a kaŋ. Ten hətnəy saksaki haa giidə *kuli bə toose kə kaanə Ziwifiŋa daana giidə *Kuli kə Pepeŋa a ko bə minti kaanə Ziwifiŋ tapte ciiri adaŋ. Ten meteŋ mete bə wəətəy ba.

²¹ Tam bə lan kun hebkəna haa səm mo? Kaa gə minti a jeɓrenen kun, lay kuy la cəərə kel gə minti ten a wəətənəy diŋ, yə wəra də diri anə kaŋkaŋ.»

²² Hulum bə gole cəərə Kuli kə Pepeŋ kəman ada əskəŋ kel teŋ kəyaŋ, wə laŋ Yeesu duru kəŋ faɗi bə wəətu na minti: «Tam haa mindi mo bə hare kel a kumna boblo bə keereŋ bədoona anaŋ?»

²³ Wə minti: «Jəəne minti ten waataŋ kel a kuɗiŋa baŋ, gay guudi la wəra. Səma jəəne minti ten wəətənəy a kuɗiŋaŋ, tam bə laanan haa səm mo?»

²⁴ Kəya Annə rəəwunu bə əntə-ənti kəəsu ger Kayifi, *kumna boblo bə keere Pepeŋ.

Piyer hare bə malte ku cəərə Yeesu pa

²⁵ Də ko toŋ ha'aŋ, Simoŋ Piyer a kəm bə hoole saksaki. Kəya yə ləənu ku minti: «Tam paapa hulum bə gud *kaa gə gud Yeesu toŋ gəm bə mo?» Piyer maltaŋ ku minti: «Ten paapa hulum neete ba!»

²⁶ Hulum bə joŋre kə *kumna boblo bə keere Pepeŋ kəman, toŋ haa kusul də hulum bə minti Piyer a ŋiinu kusnu wəraŋ, əsəŋ bə waate Piyera minti: «Ten a asnam kanda giidə kəbaŋ gə karə-kere da duuru bə mo?»

²⁷ Səma Piyer haraŋ bə malte ku wəra cuuru pa. Də ko toŋ anə derra gogloki hõõdoŋ faɗi.

Yə ɗe də Yeesu tiinə Pilati

²⁸ Bəbəəgaŋ kəyaŋ, yə kəlaŋ warda də Yeesu ger Kayifi da, yə kooroŋ duuru ger kumna bə minti Sezar a usnuŋ. Bə minti yə tuluŋ sar kuli boblo nuutuŋaŋ, kəkamna kə kaanə Ziwifiŋ doŋ haa bə ve aker na minti té kolə la paapa *cetceti ba ŋaanaanə moŋ ba, gud bə minti yə bele hame *kəɗwəy gə Pakiŋ.

²⁹ Kəya *Pilati kumnaŋ kəlaŋ warda siri da tiilim da, wə ləənəy kuy minti: «Aŋ bə ge hulum toŋa gila də kel məntəŋ mo?»

³⁰ Kəya yə minti: «Hulum gilaŋ a jəə baymele la baŋ, are sə a bi duuru tiinəma ba.»

³¹ Tó minti: «Aŋ harə la duuru, aŋ də kusrəŋ, aŋ jəmu kəəti du la də ku gili nəətiŋ.» Yə minti: «Aŋ ayaŋ kəkəy a are bə jeme kəəti də hulum bə əwu wəra ba.»

³² Haa də hel taŋ minti kel gə minti Yeesu a wəətənəy bə ge dər kaŋ minti tó bə me haa naanaanə me moŋ, doŋ kuy wəraŋ.

³³ Pilati haraŋ aləw na kaynaŋ, wə mantaŋ Yeesu suru na, wə wəətunu minti: «Tam haa kumna kə kaanə Ziwifiŋ nuutu mo?»

³⁴ Yeesu minti: «Tam waataŋ kel teŋ haa nuutu də ɗiki dəm mo, kaa gaalaŋ waatənam dəm cəərəna mo?»

³⁵ Wə minti: «Ten paapa bə Ziwifi ba. Kamnam gə Ziwifiŋ derra də kəkamna kə *kaa kə keere Pepeŋ bəŋ dəərəm a nəənən haa té. Tam jəŋ haa maa bədoona mo?»

³⁶ Wə minti: «Ten hame *Kumna katən paapa damdi kaa gə cəərə seŋkaŋ ana ba. Ten a jəə la bə té anaŋ, kaa gə guudən sə a duuri guudəna bə he ku kaŋ wəra minti yə a ayan a kəkamna kə kaanə Ziwifiŋ ba. Gəəzi, Kumna nin paapa damdi kə kaa gə cəərə seŋkaŋ ana ba.»

³⁷ Kəya Pilati minti: «Tam haa kumna tə bə mo?» Wə minti: «Tam wəətənəy ne wəra tam faɗi, ten kumna. Ten waŋ cəərə seŋkaŋa haa bə bi a ji bar kəkəy wəra cəərə gəəziŋa. Hulum bə minti doŋ gəəziŋ neŋ, wə ɗe gud kel gə kuna.»

³⁸ Pilati minti: «Gəəziŋ, haa maa mo?» Kəya *Pilati haraŋ sar kaanə Ziwifiŋ na tiilim na pa. Wə wəətənəy minti: «Ten fəlaŋ kel anə məna suru bə daw də kəəti ba.

Yə jeme kəəti də Yeesu

³⁹ Damdi to'osi náŋ waate anaŋ, saksaki a leŋa ten ge hulum bə daŋgay wəra məna dər hi bə *kəɗwəy gə Pakiŋa a nəənəŋ. Hebkəna ha'aŋ, aŋ bele minti ten gaŋ la warna haa kumna nəətiŋ bə Ziwifi mo?»

⁴⁰ Kəya yə əsəŋ bə naakte kuya keɗe minti: «Paapa tó ba! Are bele haa Barabasi!» Anaaŋa, Barabasi toŋ haa bandi ɗaw.