Kel pəsaŋ kəmarwaŋ gə minti Zaŋ jiiriniy 14 - JAA TƏMARWAŊ

Yeesu haa kəkəy bə ɗe ger Pepeŋ

¹ Yeesu waataŋ kaa gə guuduŋ minti: «Tarməyaŋ a ceme wəra ba, aŋ doo la gud Pepeŋa, aŋ doo la guudəna gəm.

² Ger Barən na ha'aŋ, kuliŋ yaŋ ada na ablaw, ten koore a ɗampaŋ dəŋ. Wə a jəə la ada na baŋ, ten sə a waataŋ səmu ba.

³ Ten ɗəmpunu da ne wardaŋ, ten hare yaŋ da a humuŋ warna sarən na kir minti aŋ ɗee la a isi a ko bə minti ten bə əsə-isi adaŋ gəm.

⁴ Kəkəy bə minti ɗe a məlaŋ a ko bə minti ten ada naŋ, wə wəra də dərəŋ.»

⁵ Kəya Tomasi minti: «Barkaŋ, ko bə minti tam ɗe ada naŋ, paapa də dər are ba. Are bə ase kəkəy duŋ haa naanaanə ase mo?»

⁶ Wə minti: «Ten haa kəkəy, ten haa gəəziŋ, ten haa dədərgəŋ. Hulum neke bə ɗe sar Abaŋ bay ten ba.

⁷ Ten jəəne də dərəŋ, Barən ji yaŋ də dərəŋ gəm. Hebkəna ha'aŋ, wə də dərəŋ ɗaw, aŋ gə asə-ase duuru.»

⁸ Kəya Filipi minti: «Barkaŋ, gaa dər are la cəərə Abaŋa. Are əsnu neŋ, kel teŋ neke are yaŋ faɗi.»

⁹ Wə minti: «Filipi, ten aduubə dəŋa kəna diidədayŋa, ten kəm paapa də dərəm ba? Hulum bə minti asnan neŋ, wə asaŋ haa Abaŋ faɗi gəm. Tam bə haraŋ kəna minti ten gaŋ dərəŋ la cəərə Abaŋaŋ haa səm pə mo?

¹⁰ Tam paapa bə doo-de gud kel teŋa ba minti ten bə tapə-tepe də Abaŋ daana wə bə tapə-tepe dəərən? Kel gə minti ten waataŋ dəŋ, yə bəŋ paapa dər ɗiki dən da ba. Aba bə minti giidənaŋ bə ji haa joŋre bə minti wə a ɗəkəŋ bə jəw faɗi.

¹¹ Aŋ doo kel nin la minti ten bə tapə-tepe də Abaŋ daana wə bə tapə-tepe dəərən gəm. Jəəne nuutu minti aŋ doŋ kel katən baŋ, aŋ doo la nuutu gud joŋre bə minti ten a juunuŋ to'i.

¹² Gəəzi, gəəzi, ten waataŋ, hulum bə minti doŋ ne guudənaŋ, kar gə minti ten jiitiniy, wə bə jəy yaŋ gəm. Wə bə jəəti kar gə deŋe teŋ kəm pə ɗaw gud maa mo ten koore sar Abaŋ.

¹³ Kar gə minti aŋ məntəy keɗe kaasəna də səman, ten jəŋ dəŋ yaŋ kir minti boblo kə Abaŋ vaɗə la wəra sar Kurmuyuŋa.

¹⁴ Ten dogoŋ kel teŋ pa: aŋ mantaŋ karman ne kaasəna də səman, ten jəŋ dəŋ yaŋ.»

Yeesu waate sam aye bə Tiiru Cetcetaŋ

¹⁵ « Aŋ jəəne bə balnaŋ, aŋ humi kosoŋ yaŋ cəərə kel katəna faɗi.

¹⁶ Ten waate Abaŋ yaŋ minti wə ayaŋ Hulum baalaŋ da bə bi a kəyaŋ bə minti ji yaŋ dəərəŋ saksaki.

¹⁷ Hulum toŋ haa Tiiru də veɗe gəəziŋ wəraŋ. Kaa gə cəərə seŋkaŋ neke bə doora kel də siri ba, gud bə minti yə asa ba, a paapa də diri bə gəm. Aŋ teŋ ha'aŋ, a də dərəŋ, gud maa mo a sarəŋa maŋ, a isi yaŋ giidəŋa saksaki gəm.

¹⁸ Ten yaakaŋ bay cəərəŋ damdi kəmar gə kukuyu ana ba, ten hare yaŋ səraŋ da.

¹⁹ Isi kəna sawəwaŋ, kaa gə cəərə seŋkaŋ bə asan pəda, səma aŋ teŋ ha'aŋ, aŋ bə asan yaŋ, gud bə minti aŋ bə asan caw dədərgə, aŋ bə ji yaŋ zugi gəm.

²⁰ Ten haraŋ ne wəra dədərgəŋ, aŋ ase yaŋ minti ten bə tapə-tepe də Barən, aŋ gə tapə-tepe dəərən, damdi ten bə tapə-tepe dəərəŋ ana gəm.

²¹ Hulum bə minti doŋ kel katən ne kəəsuŋ daana bə humi kosoŋa ciiriŋ, toŋ haa hulum bə bəlan. Barən bele hulum bə minti bəlan yaŋ gəm. Ten bəlu yaŋ daana ten ge gud kusrən yaŋ wəra a nuunu gəm.»

²² Zudasi, paapa Zudasi Iskariyoti ba, minti: «Barkaŋ, kel teŋ bə ji haa naanaanə mo minti tam veɗe kusrum yaŋ a are təwa, paapa a kaa kaayaŋ gə cəərə seŋkaŋ baŋ!»

²³ Yeesu minti: «Hulum bə minti bəlan, wə humi kosoŋ yaŋ cəərə kel gə minti ten wəətəy, daana Barən bə bəlu yaŋ. Are də Barən, are bi yaŋ a isi giidə hulum toŋa.

²⁴ Hulum bə minti bəlan baŋ, wə humi kosoŋ cəərə kel katəna bə gəm. Kel gə minti aŋ iskiniy kunaŋ, yə haa paapa dər kel katən ba, yə bəŋ haa ku Barən bə minti a gaanan daŋ.

²⁵ Ten waatənaŋ kel teŋ haa də ko bə minti ten kəm sarəŋaŋ.

²⁶ Hulum bə Kəyaŋ, haa Tiiru Cetcetaŋ də minti Abaŋ bə gaara yaŋ a koɗon daŋ, a hataŋ kar yaŋ neŋneŋ keɗe, a ɗəktəŋ cəərəŋ yaŋ cəərə kel gə minti ten a waatənaŋ dəŋ keɗe gəm.

²⁷ Ten ayaŋ kəkaɓi ku tarməyaŋa, ten ayaŋ haa kəkaɓi katən. Ten ayaŋ dəŋ haa paapa damdi kaa gə cəərə seŋkaŋ ayta a kaŋ anaŋ ba. Ɗiki dəŋ a ceme wəra ba, walka a jəŋ bə gəm.

²⁸ Aŋ a əskənən bə waate minti: ‹Ten koore, səma ten hare yaŋ səraŋ da.› Aŋ a jəə la bə balna gəəziŋ, aŋ sə a ji də waale minti ten koore sar Abaŋ, gud maa mo wə daŋnan boblo.

²⁹ Ten waatənaŋ kel teŋ wəra hebkəna ajew də minti yə jiŋ, kir minti yə jəŋ neŋ, aŋ doo la guudənaŋ.

³⁰ Ten waate kel dəərəŋ ajew na ablaw pəda gud maa mo kumna bə cəərə seŋkaŋ day da. Səɓaki paapa kəəsu anə weseki bə isi cəərəna kumna ba,

³¹ səma wə bi kir minti kaŋ asə la minti ten bele Abaŋ daana ten ji kar gə minti wə a waatənan minti ten jəy laŋ. Aŋ pətə la, áŋ koorə la.»