Kel pəsaŋ kəmarwaŋ gə minti Zaŋ jiiriniy 13 - JAA TƏMARWAŊ

Yeesu baade kampar kaa gə guuduŋ

¹ Dər dəəgŋa a ko bə minti *kəɗwəy gə Pakiŋ ɗe a ji a dibiinimaŋ, Yeesu asaŋ minti hi kə toŋ nəkaŋ ne bə yaake seŋkaŋ wəra bə koore sar Abaŋ. Wə a bə bele kaa nuutu gə cəərə seŋkaŋa saksaki, wə raawaŋ bə bələya hãã a me du bə guudiŋa.

² Yeesu də kaa gə guuduŋ a jəŋ bə hame. Nərtitiŋ a koloŋ ɗiki bə baymele ku tarmə Zudasi kormə Simoŋ Iskariyotiŋa minti wə malə gud Yeesu la wəra.

³ A wəra də dər Yeesu minti tó a bəŋ sar Pepeŋ da, tó bə hare yaŋ suru pa daana minti Abaŋ ayaŋ səɓakiŋ wəra keɗe kasi tó gəm.

⁴ Kəya wə faŋ apəya a ko bə hameŋa, wə pəŋ dəməəmə nuutu də cəərə kumsuŋ wəra, wə humuŋ dəməəmə də sete kusrum, wə əntənə təwru.

⁵ Kəya wə gaŋ kan giidə təəyə, wə əsəŋ bə baade kampar kaa gə guuduŋa wəra, wə sətnəy di wəra də dəməəmə də təwruŋ faɗi gəm.

⁶ Wə tuukuŋ cəərə Simoŋ Piyera kəyaŋ, Piyer minti: «Barkaŋ, tam gadi baadən kamparən! Paapa!»

⁷ Wə minti: «Karman bə mini ten bə jəwa ha'aŋ, tam usku guuduŋ hebkəna faɗi ba, tam bə usku guuduŋ yaŋ ajew na.»

⁸ Tó minti: «Paapa, tam baadən kamparən ba anə ceki!» Wə minti: «Ten baadənam kampəram baŋ, karman bə təpam dəərən pa pəda.»

⁹ Kəya Piyer minti: «Barkaŋ, jəəne bədoonaŋ, a baadən kamparən təwa ba, baadən anə kaasən la də cəərən wəra ada gəm!»

¹⁰ Wə minti: «Hulum bə minti a baadaŋ kusru ne wəraŋ, wə paapa də caadə bəədu pəda, wə baade máŋ haa kəmpuru təwa'i gud maa mo kusru wəra *cetceti keɗe'i. Aŋ wəra cetceti, səma paapa aŋ keɗe ba.»

¹¹ Hulum bə minti bə ɗe a məlu guudu wəraŋ də duru; haa gud teŋa ta wə a waataŋ minti: «Aŋ wəra cetceti, səma paapa aŋ keɗe ba.»

¹² Wə bəədənəy kəmpəri wəra baada kəyaŋ, wə haraŋ bə dere dəməəmə nuutuŋa, wə haraŋ cəərə hameŋa faɗi. Wə wəətənəy minti: «Karman bə minti ten jəənəŋ dəŋ sarəŋa ha'aŋ, aŋ uskunu guuduŋ nuutu mo?

¹³ Aŋ mantan minti: ‹Hulum bə hate kaŋ› daana ‹Barkaŋ›, haa akəsa gud bə minti ten haa hulum toŋ gəəzi.

¹⁴ Ten bə minti Barkaŋ daana Hulum bə hate kaŋ baadənaŋ kampəraŋ wəra hebkəna faɗi. Aŋ gəm, aŋ kir baadete kampar kumsəŋ aduubə də kumsəŋa bədoona ana.

¹⁵ Gud maa mo, ten gaanaŋ dərəŋ haa cəərə kela kir minti karman bə minti ten a juunu sarəŋaŋ, aŋ jəw la gəm.

¹⁶ Gəəzi, gəəzi, ten waataŋ, hulum bə joŋreŋ deŋe burduŋ ba, hulum bə digiŋ deŋe hulum bə minti gəənu daŋ bə gəm.

¹⁷ Hebkəna ha'aŋ, aŋ asaŋ kel teŋ wəra, aŋ jiiniy neŋ, aŋ fele waale yaŋ.

¹⁸ Ten waataŋ kel teŋ haa paapa cəərəŋa keɗe ba. Kaa gə minti ten vərnəy, yə də dərən. Səma, kel gə jeerə-jeere gə giidə Kefter kə Pepeŋ kir de kuy wəra minti: ‹Hulum bə minti ten ɓarsaŋ mappa katən duuruŋ, wə koloŋ ku cəərəna.›

¹⁹ Ten waataŋ teŋ wəra hebkəna faɗi, ajew də minti kel teŋ bə jiŋ, kir minti yə bə jəŋ neŋ, aŋ doo la minti ‹*Ten kəna ten› haa hulum toŋ.

²⁰ Gəəzi, gəəzi, ten waataŋ, hulum bə minti doŋ kel də hulum bə minti ten a gəənu neŋ, wə doŋ haa kel dən faɗi gəm. Hulum bə minti doŋ kel dən neŋ, wə doŋ haa kel də Hulum bə minti a gaanan da.»

Yeesu minti Zudasi mele gud tó wəra

²¹ Adordə kel teŋa kəyaŋ, ɗiki də Yeesu cəmaŋ wəra hasi, wə əsəŋ bə waate wəra kaŋkaŋ minti: «Gəəzi, gəəzi, ten waataŋ, hulum bə gud aŋ lakiŋ kənaŋ bə ji akoloki yaŋ cəərəna.»

²² Kəya *kaa gə guuduŋ əsəŋ bə gole kumsi, yə lenteŋ wəra dər ɗiki di minti wə waate haa sam mindi mo?

²³ Hulum aduubə də kaa gə gud Yeesuŋa, haa tó bə minti wə bəlu ablaw, a jəŋ maŋ suru.

²⁴ Kəya Simoŋ Piyer raawaŋ bə viɗku daana bə wəətu seteeta minti wə laa ku Yeesu la cəərə hulum bə minti wə bə wəətu səmuŋ.

²⁵ Kəya hulum bə sar Yeesuŋ cokoŋ ku suru na bə law ku minti: «Barkaŋ, hulum toŋ haa mindi mo?»

²⁶ Yeesu minti: «Ten cepe mappaŋ dər kəsawa, hulum bə minti ten əyu duŋ haa tó faɗi.» Kəya wə raawaŋ bə he mappaŋa, wə cepna, wə ayna a Zudasi, kormə Simoŋ Iskariyotiŋ.

²⁷ Zudasi doŋ mappaŋ anəkay, *Sataŋ vaŋ cuuru faɗi gəm. Yeesu əsəŋ bə wəətu minti: «Karman bə minti tam sə a jəw, jəw la cəlam faɗi.»

²⁸ Wə wəətunu bədoona haa səm moŋ, hulum anə məna gud kaa gə minti a jəŋ bə hameŋ əskəŋ guudi ba.

²⁹ Zudasi a jəŋ bə ame saki bə soloya haa tó tə bə moŋ, sirdiŋ ɗəkəŋ haa minti Yeesu wəətunu minti wə ɗee la a gusi kar gə minti té bə ji kəɗwəy diiriŋ da, kumundu ba, wə ɗee la a aye kar a kaa kə caacaŋ.

³⁰ Zudasi doŋ mappaŋ kəyaŋ, wə kəlaŋ warna faɗi. Koŋ a jəŋ haa duugŋ.

Ku gili kimirwi

³¹ Adordə minti Zudasi kəlaŋ warnaŋ, Yeesu minti: «Hebkəna ha'aŋ, gud boblo kə ten *Kormə Hulúm bə veɗe wəra. Boblo kə Pepeŋ bə veɗe wəra guudəna gəm.

³² [Gud boblo kə Pepeŋ vəɗaŋ wəra gud Kormə Hulúma tə gəm,] Pepeŋ də kusru vəɗu boblo nuutuŋ yaŋ wəra a kaŋ gəm. Wə bə jəw yaŋ hebkən-hebkəna faɗi.

³³ Karmanti, ten ji máŋ hebkəna sarəŋa haa anə sawəwa bagŋ. Kel gə minti ten a wəətənəy a kaanə Ziwifiŋ, ten waataŋ dəŋ gəm minti aŋ bə goldon yaŋ, səma ko bə minti ten bə ɗe ada naŋ, aŋ neke bə ɗe ada na ba.

³⁴ Ten ayaŋ *ku gili kimirwi, ku gili toŋ haa minti: aŋ balə kumsəŋ la adəwaldə kumsəŋa. Damdi ten a balnaŋ ana, aŋ balə kumsəŋ la bədoona gəm.

³⁵ Aŋ jəəne bə bele kumsəŋaŋ, kaŋ keɗe kole yaŋ bə ase minti aŋ haa *kaa gə guudən.»

Yeesu minti Piyer bə malte ku yaŋ cəərə tó

³⁶ Simoŋ Piyer laŋ ku Yeesu minti: «Barkaŋ, tam ɗe ane mo?» Wə minti: «Ko bə minti ten ɗe ada naŋ, tam neke bə ɗe guudəna ada na hebkəna ba, səma adoro tam bə ɗe yaŋ guudəna.»

³⁷ Wə minti: «Barkaŋ, ten neke bə ɗe guuduma hebkəna ba səm mo? Ten wəra bə ɗampə-ɗampe bə me guuduma!»

³⁸ Wə minti: «Piyer tam wəra bə ɗampə-ɗampe nuutu gəəzi bə me guudəna mo? Gəəzi, gəəzi, ten waatam, ajew də minti goglokiŋ hõõdeŋ, tam bə malte kum yaŋ wəra cəərəna kampa soope.»