Kel pəsaŋ kəmarwaŋ gə minti Zaŋ jiiriniy 10 - JAA TƏMARWAŊ

Yeesu waate sam bərdə kaamaŋ

¹ Yeesu minti: «Gəəzi, gəəzi, ten waataŋ, hulum bə minti bele kele giidə hiw kə kaamaŋaŋ, wə yaakaŋ ku hiw ne ta'i bə ɗe a li cuuru da, wə hulum bə dəgaaya daana bandi.

² Səma hulum bə minti kele ku hiw naŋ, haa bərdə kaamaŋ.

³ Hulum bə gole ku hiw buŋu ku wəra. Kaamaŋ usku durdu, wə məntəy də səməy məna-məna keɗe daana wə vay wəra tiilima.

⁴ Wə vəənəy ne wəra keɗeŋ, wə kele tiiniya, yə tepe guudu faɗi gud minti durdu də diri.

⁵ Hulum bə minti paapa də diri baŋ, yə ɗe guudu ba anə hasi, yə meere wəra də tara suru ɗaw gud minti durdu paapa də diri ba.»

⁶ Yeesu waataŋ *ku kumti toŋ a kaa gə minti bə jiɓru kuŋ, səma yə uskunu guudu ba.

⁷ Yeesu waataŋ pa minti: «Gəəzi, gəəzi, ten waataŋ, ten haa damdi ku hiw kə kaamaŋ ana.

⁸ Kaa gə minti bəŋ warda ajew dən daŋ keɗe, teŋ kaa kə dəgaaya daana bandi. Səma kaamaŋ iskiniy kuy ba.

⁹ Ten haa damdi ku kuli ana, hulum bə minti kəlaŋ ne cəərəna tew, toŋ seere yaŋ wəra. Wə neke yaŋ bə kele a hiwa daana bə kele wardaŋ, wə fele hame yaŋ gəm.

¹⁰ Hulum bə dəgaayaŋ bi haa a ji dəgaaya, a awe daana a ɓalke kar təwa. Ten ha'aŋ, ten bəŋ haa minti kaa kəsarkaŋ falə dədərgə la máŋ pisi falə.

¹¹ Ten kəna bərdə kaamaŋ bə minti wəra maŋ bə aye kusru gud kaamaŋ nuutuŋa.

¹² Hulum bə ame kaamaŋ bə minti yə wirku werkeŋ, kaamaŋ paapa nuutu ba. Wə asaŋ kaaya gə pəəriŋ da ne zugiŋ, wə yaake kaamaŋ, wə gede wəra. Kəya kaaya gə pəəriŋ bawte kaamaŋ, yə miiriy wəra məna-məna.

¹³ Haa kəya kel gə minti jəəti gud bə minti hulum toŋ golde haa soloy təwa, kel də kaamaŋ haŋ suru ba.

¹⁴ Səma ten toŋ haa bərdə kaamaŋ. Yə də dərən, ten də diri gəm.

¹⁵ Yə də dərən damdi ten də dər Barən ha'aŋ ana, tó Barən də dərən gəm. Ten aye kusrən gud kaamaŋ katəna.

¹⁶ Kaamaŋ katən gaalaŋ yaŋ, teŋ paapa giidə hiwa kəna ba. Ten kir kele tiini bə ɗe a əməy gəm. Yə əskən dordən yaŋ, yə tepe yaŋ wəra də kumsi kaayaŋ məna, ten əməy yaŋ məna gəm.

¹⁷ Barən bəlan gud bə minti ten bə aye kusrəna a meŋ kir minti ten harə la wəra dədərgə.

¹⁸ Hulum anə məna neke bə bən dədərgə dən wəra ba, ten aya haa də ɗiki dən faɗi. Ten bə nakə-neke bə yaake kusrən bə awe, ten bə nakə-neke bə həru wəra dədərgə caw pa. Pepeŋ waatənan minti ten jəə la bədoona ana.»

¹⁹ Kel teŋ kəya koloŋ kaanə Ziwifiŋ máŋ bə ɓarse diri pa.

²⁰ Kaa ablaw guudi əsəŋ bə waate minti: «Kəwal cuuru tə gəm, wə wəra bə leele! Aŋ jiɓru ku haa səm mo?»

²¹ Sirdi minti: «Hulum bə minti kəwal cuuru waate kel bədoona ana mo? Kəwal neke bə biŋi dər hulum bə bəwə-bəwiŋ wəra minti wə asə la mo?»

Kaanə Ziwifiŋ bele kel də Yeesu ba

²² Yə a bə ji kəɗwəy bə ɗiki ciiri cəərə biŋi bə ku *Kuli kə Pepeŋa giidə vil də Zeruzalema, koŋ a boobeŋ.

²³ Yeesu a jəŋ bə ɓəkti giidə tiilim də Kuli kə Pepeŋa gud gadlay gə minti yə məntəy «Gadlay kə Salomoŋ».

²⁴ Sərdə kaanə Ziwifiŋ bəŋ a ɓiki cuuru cẽẽ, yə əsəŋ bə wəətu minti: «Tam yaake are bay lente cəərə kel dəma hãã kotnə mo? Waatə are la wəra kəkər: tam haa *Hulum bə minti Pepeŋ ŋəmnu mo?»

²⁵ Yeesu minti: «Ten a waatənaŋ da ne warda, aŋ ɗempa a de gud kel teŋa ba. Ten ji haa kar gə minti Barən a aynan abay də jəy anə derra faɗi, kar teŋ bə ji bar kəkəya wəra cəərəna.

²⁶ Səma aŋ paapa bə de guudəna ba gud bə minti aŋ paapa aduubə də kaamaŋ katəna ba.

²⁷ Kaamaŋ katən əskən dordən, yə də dərən, yə ɗe guudəna gəm.

²⁸ Ten əyəy dədərgə də bay teweŋ, yə bese wəra ba anə ceki, hulum neke bə ɓitiy wəra kaasəna bə gəm.

²⁹ Barən bə minti aynan dən dəŋaŋ kar keɗe. Hulum paapa bə nakə-neke bə ɓiti karman kəəsu ba.

³⁰ Barən gəm, ten gəm, are wəra gə tapə-tepe məna'i.»

³¹ Kəya kaanə Ziwifiŋ haraŋ bə humi pərki pa bə kaw bə əwu wəra.

³² Yeesu wəətənəy minti: «Kar pəsaŋ-pəsaŋ gə minti Barən aynan dən minti ten jəy laŋ, ten kaanaŋ dərəŋ ciiri ablaw. Aŋ goldon bə awe də pərkiŋ haa gud muntu mo?»

³³ Yə minti: «Are bele awam haa paapa cəərə joŋre pisi kəmana ba, are awam haa gud bə minti tam əsəŋ bə sarte sam Pepeŋaŋ. Tam bə minti hulum kisirkiŋ, tam əsəŋ bə ji kusruma minti tam Pepeŋ gadiŋ!»

³⁴ Wə minti: «Kel yaŋ gə jeerə-jeere giidə kefter bə *ku gili kə Pepeŋa minti: ‹Ten waate minti aŋ kəna pepe.›

³⁵ Wəra də dər áŋ minti áŋ neke bə pi kel gə minti Kefter kə Pepeŋ a wəətənəy wəraŋ ba. Wə mantaŋ pepe haa kaa gə minti kel kə Pepeŋ bə waate a niiniŋ.

³⁶ Katən ha'aŋ, Barən ŋamnan, wə gaanan cəərə seŋkaŋ da. Aŋ bə waatan minti ten sarte sam Pepeŋ gud minti ten waataŋ minti ten kəna Kurmuyuŋ, haa naanaanə mo?

³⁷ Ten jəəne paapa bə ji joŋre bə minti Barən bəlu baŋ, aŋ a don kel katən ba.

³⁸ Səma ten jəəne bə ji haa joŋre bə minti Barən bəluŋ, aŋ doo la guudu, jəəne nuutu minti aŋ doŋ guudəna baŋ. Aŋ doo la gud joŋre toŋa kir minti aŋ kolə la bə ase wəra soki məna bə faɗnə-faɗna minti Barən gəm, ten gəm, are gə tapə-tepe məna də kumsi.»

³⁹ Kəya yə haraŋ bə guldu pisi golda bə daw pa, səma wə dəŋnəy.

⁴⁰ Yeesu haraŋ bə cakɗe warna agal də ku vor bə Zurdeŋ na pa, a ko bə minti Zaŋ Batisi a jəətəŋ batem a kaŋ adaŋ, wə əsəŋ a ko toŋa ada.

⁴¹ Kaa ablaw kooroŋ suru na, yə əsəŋ bə waate minti: «Zaŋ jəŋ karman bə məɗ-miɗi anə məna ba. Səma kel gə minti wə wəətənəy keɗe cəərə hulum toŋa gilaŋ, yə kel kə gəəzi.»

⁴² Kəya kaa ablaw ada doŋ gud Yeesu faɗi.