I TIMOTE 6 - JAA TƏMARWAŊ

¹ Kaa gə minti yə kafkam, yə humə kosoŋ la cəərə kəmnə diŋa pisi humi. Yə jəə la bə ji bədoona kir minti hulum a sarte sam Pepeŋ guudi ba daana yə a waate sam hate náŋ baymele bə gəm.

² Kaayaŋ gə minti kəmnə diŋ kaa kə doo-deŋ, kafkam teŋ a ŋorye bay humi kosoŋ ciiri minti yə máŋ kəsaanə té ɗaw ba. Yə jəy joŋreŋ la pisi jəə ɗaw, gud minti kaa gə minti yə jəy joŋreŋ a niini ha'aŋ, yə haa kəsəəni gə doo-de gə minti yə bələy. Haa ta'i kənaŋ kel gə minti tam kir hətəy daana kir wəətəy.

Hate bə bay bəlam duŋ də hurma də gəəzə-gəəziŋ

³ Jəəne minti hulum kəman əsəŋ ne bə hataŋa hate baalaŋ, hulum toŋ jəəne paapa bə əsə-isi cəərə kel gə gəəzi kə Kristu Yeesu Barkaŋ náŋa ba, daana paapa cəərə hate bə ɗe náŋ bə gud Pepeŋa baŋ,

⁴ wə hulum bə he cəərə kusru apəya boobo. Wə asaŋ karman bə hasi. Wə hulum bə goldə-golde kel daana wə bele awəy ablaw cəərə kel kə waateŋa. A ko toŋa kəya, sərkəŋ pi dərə wəra ada, awəy də ablaw, sarteŋ, ɗəkti bə kel kə bayməlaŋ cəərə kumsumaŋ,

⁵ awəy də minti tewe baŋ. Kaa gə minti jəəti kumsə kel teŋ kəyaŋ, ɗiki di wəra bə lentə-lente, daana gəəziŋ paapa də diri pəda. Yə ɗiki neeteŋ haa minti ɗe bə gud Pepeŋ haa karman bə minti té kole bə fele hurma duuru.

⁶ Gəəzi, hulum bə minti doŋ ne gud Pepeŋaŋ, ɗe bə gud Pepeŋ haa hurma mooto, səma hulum toŋ jəə la də waale gud karman bə minti kəəsuŋ.

⁷ Bədoona ana, damdi áŋ bəŋ cəərə seŋkaŋa kəna kasi áŋ wiiɗiw-wiiɗiw ana, bədoona gəm, a me də áŋa ha'aŋ, áŋ neke bə he karman kasi áŋa bə gəm.

⁸ Gud teŋa ta, jəəne minti áŋ yaŋ bə falte hame bə ku áŋa wəra, daana dəməəmə də feke cəərə áŋaŋ, giidə áŋ a yaake wəra ba.

⁹ Səma kaa gə minti teŋ golde minti té kolə la də hurmaŋ, hurmaŋ kay kuy, yə feke wəra dər kel kə gəəliŋa damdi karman bə minti doŋ a vewa ana. Yə golde haa kar gə minti ɓalke kaŋ daana bəsəy wəraŋ.

¹⁰ Gud maa mo, həryəm də soloy haa kəsar də kel kə bayməlaŋ keɗe. Sərdə kaa kəman yaŋ gud minti yə bele soloy ablaw tə bə moŋ, yə yaakaŋ kəkəy bə de bə gud Pepeŋ wəra, tərməyi koloŋ bə ɗəməya ablaw gud kel teŋa.

Kel gə minti Pol wəətənəy a Timote məna bay cuuruŋ

¹¹ Səma nəmtiŋ, tam toŋ hulum kə Pepeŋ, haa giidim la wəra sə kar teŋa. Goldə la haa kəkəy bə minti tam jəə la ɗeker tiinə Pepeŋa, tam ɗee la haa ɗe bə minti giidə Pepeŋ bəluŋ. A yaake de nəmti ba, jəə beleŋ la sar kumsuma, halə gəəli la daana jəə kusrum la sããya gəm.

¹² Duurə la haa duuri pisiŋ a kəkəy kə Pepeŋaŋ. Doo dədərgə də bay teweŋ la, gud maa mo, Pepeŋ mantənam warda haa minti tam asə dədərgə taŋ la, akaceŋa bə minti tam waataŋ wəra pisi kaŋkaŋ wəra tiinə kaa kə ablawa cəərə de nəmtiŋa.

¹³ Ten bə waatəma wəra kaŋkaŋ tiinə Pep bə minti ji kar keɗe dədərgə zugiŋ, daana tiinə Kristu Yeesu bə minti waataŋ wəra pisi kaŋkaŋ cəərə de nuutuŋa wəra tiinə *Ponsə Pilatiŋ,

¹⁴ doo ku kel teŋ la wəra kəya a kuɗiŋa bay mele sarte sar kusruma, jəə la bədoona ana hãã bə minti Barkaŋ náŋ Yeesu Kristu hare daŋ.

¹⁵ Wə bə hare yaŋ da də cəwa də minti Pepeŋ ŋamnaŋ. Pepeŋ Bar Səɓaki haa tó ɗaaməna faɗi, wə də kusru wə məyan, wə Kumna kə kəkamnaŋ, daana wə Bərdə kəmnə də kaŋ keɗe.

¹⁶ Tó ɗaaməna faɗi wə saksaki caw dədərgə, wə me ba. Wə bə əsə-isi a ko bə pəɗaki bə welɗe bə minti hulum nəkaŋ bə ze suru maŋ baŋ. Hulum əsnu hõy ba, hulum neke bə əsu hebkəna bə pa. Tokɗeŋ, daana səɓakiŋ jəə la nuutu bə faɗnə-faɗna. Amen.

¹⁷ Kaa gə minti də hurma kəna cəərə seŋkaŋa, wəətəy la minti yə a teke cəərə kusri apəya gud hurma neeteŋa ba, daana minti yə a mele ɗiki di cəərə hurma də bay bəlam dəŋa ba. Yə malə ɗiki di la ɗaw haa cəərə Pepeŋa bə minti aye kar wəra keɗe ablaw a áŋ minti áŋ waalə la diiri.

¹⁸ Waatə kaa teŋ la minti yə jəə pisiŋ la, hurma neeteŋ jəə la haa joŋre pisiŋ bə minti yə bə jəwaŋ, daana yə jəə la kaa gə giidi pəsaŋ, kəəsi jəə la bə aye gəm.

¹⁹ Yə jəəne bə ji bədoona anaŋ, yə feke haa hurma neeteŋ apəya. Hurma taŋ haa də minti tewe wəra baŋ. Yə fəka bə mi ko bə ajewa dəərə bə fele dədərgə də gəəzə-gəəziŋ.

²⁰ Tam Timote, karman bə minti Pepeŋ aynam dəm kaasəmaŋ, jəw guudu la pisi. A kalte kum awəy də boobo də bay bəlam dəŋa ba. Awəy taŋ, yə manta minti kəna kel kə ase, anaaŋa doloy kəna awəy də bay bəlam dəŋ.

²¹ Bədoona ana, sərdə kaa kəman a bə waatətaŋ minti sərdə ase toŋ kəya də dər té, ana yə bə haŋ giidi wəra sar de pisi bə gud Pepeŋa doloy pə ɗaw. Pisi kə Pepeŋ jəə la dəərəŋ.