I TIMOTE 5 - JAA TƏMARWAŊ

Joŋre kə Timoteŋ sar kaa kə doo-deŋaŋ

¹ Bədoona ana, bə minti tam jəəne sar hulum pəərəŋkiŋ, minti wə jəŋ karman ne paapa a kuɗuŋa baŋ, a humtu duru də kel anə halay-halay ba. Səma wəətu kel la haa damdi wə bəram ana. Kəmar kaalay ha'aŋ, guluy la damdi yə kəsaanam kə nərəm ana.

² Kəram kəmtəŋ ha'aŋ gəm, guluy la damdi kamnam kəram ana. Kəram kəəcəŋ ha'aŋ, jəə kusrum la siri damdi yə kəsaanam kə nərəm ana, də ku tarməyam wəra *cetceti.

³ Kəram gə bay gə minti wəra bay ciiri gəəzə-gəəziŋ, jəy guudi la, daana humə kosoŋ la ciiri.

⁴ Səma jəəne minti həlgə də bay, karməya jəəne zugiŋ, kumundu ba karmə karməya mo jəəne zugiŋ, kəmar teŋ kəya hatə ji bə joŋre bə ɗe bə gud Pepeŋ la bə keye kəmniŋa kəm. Yə jəə gud kəmni la damdi kəmniŋ a jiiniy guudiŋ ana gəm. Kəya kel gə minti de dər Pepeŋ pəsaŋ.

⁵ Həlgə də minti taŋ həlgə də bay də gəəzə-gəəziŋ, minti hulum paapa bə mele kəəsu sara baŋ, taŋ haa a mele ɗiki də wəra cəərə Pepeŋa, daana a saksaki bə tuusu daaway də duugŋ minti wə kayə tá la.

⁶ Səma kə həlgə də bay də minti ji kel gə minti giidə bələy təwaŋ, a naata caw dədərgə səma, a wəra haa cawa də mee-me toki.

⁷ Haa kəya kel gə minti tam kirka wəətəy di wəraŋ, kir minti kaŋ a neke bə mələy kel siri ba.

⁸ Jəəne minti hulum kəman yaŋ paapa bə ji gud kusul duŋa baŋ, daŋgeŋ haa minti wə jəŋ bə ji gud kaa gə girduŋa baŋ, hulum toŋ kəya wə ŋoryoŋ wəra haa de bə gud Pepeŋ. Wə dəŋaŋ kaa gə minti kəm bay de gud Pepeŋaŋ baymele pə ɗaw.

⁹ Tam ɗəlaŋ ne bə jeere sam həlgə də baya adəwaldə sam kəram gə bayaŋ, doŋ kir minti laate bə we də jəə la hor-hor kənki to'i. A jəə la də doo-de koŋkor haa kampa ɗaaməna faɗi.

¹⁰ Kaŋ jəə la bə aŋka pisi gud joŋre naata bə minti a bə jəwaŋ. A jəə la həlgə də minti a jəŋ gud karməyaŋ pisi, a topoŋ kə irku də kaŋ gerda pis-pisi. A jəə la həlgə də minti a baadətaŋ kampar kaa kə Pepeŋ, də minti a kəyaŋ kaa kə caacaŋ. A jəə la bə jəəti haa kumsə joŋre tó pisiŋ saksaki. Taŋ kəya jeerə sama la giidə kefter bə sam kəram gə baya ta.

¹¹ Səma, kəram gə bay gə minti teŋ kəm gawnaŋ, a jiiriy səməy giidə kefter bə sam kəram gə baya ba. Gud maa mo, kusri əsəŋ ne bə ləydəyaŋ, yə kole kirki a Kristu, yə hare də tolka də tope kaŋkar.

¹² Bədoona kəya ha'aŋ, kəəti kə Pepeŋ doy gud minti yə doŋ gud kel neete gə minti yə a wəətənəy wəra ajewaŋ minti té isi dibirgini ba.

¹³ Bədoona ana pa, kəram gə bay kəəcəŋ teŋ kəya yə kole wəra də koslom bə ɗe máŋ zugi ku kuliŋa ŋel-ŋel keɗe. Gə deŋe kumsiŋ keɗe ha'aŋ yə kole máŋ paapa də koslom təwa bə pa, səma yə bele keɗpeŋ ablaw, daana kel gerge kuya ba. Yə cipi kel daana yə ɗalte kel gə minti teŋ haŋ siri baŋ.

¹⁴ Gud teŋa ta, ten bele minti kəram gə bay kəəcəŋ harə la bə tope kaŋkara, yə waa kəmar koncoŋ la daana yə amə cəərə kuli neete la pisi, kir minti kaa kə acukur náŋ a fele ko bə waate kel kə bayməlaŋ cəərə áŋa gud kel di ba.

¹⁵ Gud maa mo, sərdə kəram gə bay kəəcəŋ kəman taakaŋ kəkəy pisiŋ ne wəra ɗaw, yə haŋ neeteŋ máŋ bəlam də *Sataŋ.

¹⁶ Jəəne minti həlgə kəman də doo-de gud Pepeŋa minti kusul də jəəne həlgə də bay moŋ, a kayə la. Doŋ kir minti həlgə də bay taŋ a kole karman bə eele kaa kə Tapiŋa ba. Bədoona kəya tə bə moŋ, kaa kə Tapiŋ keye máŋ haa kəram gə bay gə minti teŋ wəra bay ciiri gəəzə-gəəziŋ.

Kaa gə tiinə kaa kə Tapiŋ

¹⁷ Kaa kəmtəŋ gə tiinə kaa kə Tapiŋ gə minti ji joŋre neeteŋ a kuɗuŋa ha'aŋ, yə kir ape werkeŋ kampa ɓas-ɓasi. Aŋ humə kosoŋ la daŋgeŋ haa cəərə kaa gə minti bə geye bə waate kel kə Pepeŋa wəraŋ, daana bə hate kaŋa diiriŋ.

¹⁸ Gud maa mo, kefter kə Pepeŋ waataŋ wəra minti: «A dere akoŋkooro wəra ku kurki bə minti bə tayte kaasawa bə tu'uy wəraŋ ba.» Wə wəra bə jeerə-jeere pa minti: «Hulum bə joŋreŋ kir ape werke nuutuŋ».

¹⁹ Jəəne minti hulum kəman bəŋ ne a ge kel cəərə hulum bə tiinə kaŋaŋ, a daw ku faɗi ba. Kaa gə minti asaŋ kel teŋ tapə la kəm pisi ɓasi mo, soope mo bə waate kel teŋa cəərə hulum toŋa, kəya doo kel teŋ la kəm.

²⁰ Səma kaayaŋ gə minti jəəti baymeleŋ ha'aŋ, jəy gəbaŋ la wəra tiinə kaa kə ablawa kəkər, kir minti kaa kaayaŋ jamə walka la wəra kas baymeleŋ gəm.

²¹ Ten bele waatam wəra kaŋkaŋ tiinə Pepeŋa, tiinə Kristu Yeesu daana tiinə kaa kə varə-vere gə digi kə Pepeŋa minti bəŋa: doo kel teŋ la bay he agal wəra pəlaŋ daana a keye gud hulum kəmana məna təwa'i ba.

²² A bandə-bande bə mele kaasəma cəərə huluma minti wə jəə joŋre la giidə Tapiŋa ba. A tepe kusrum dər baymele kə hulum baalaŋa ba. Tam də kusrum ha'aŋ, amə kusrum la *cetceti.

²³ A se kan gəsaalaŋ saksaki bay ciiri pəda. Saa kumuy bə atələələm la ada weseka gud minti giidim ɗamtam daana kusrum paapa sarəma saksaki holoŋ baŋ.

²⁴ Baymele kə kaa kəman yaŋ, wə ase wəra kəkər ajew də bə minti yə kəm bay jəmu kəəti duŋ. Kə kaa kəman gaalaŋ yaŋ, neeteŋ ge guudu wəra kəm haa adordə kəətiŋa.

²⁵ Joŋre pisiŋ haa bədoona gəm. Wə wəra kəkər ta'i faɗi. Jəəne nuutu minti joŋre pisi kəman yaŋ minti yə ase toŋ wəra hebkəna kəkər faɗi baŋ, wə bə bese bay ge gud kusru wəra ba.