I TIMOTE 3 - JAA TƏMARWAŊ

Kaa gə tiinə kaa gə Tapiŋ

¹ Kel gə minti ten wəətəy haa kənaŋ, yə kel kə gəəzə-gəəzi. Kel teŋ haa minti hulum bə minti golde minti tó jəə la tiinə kaŋa giidə kuli kə Pepeŋaŋ, wə golde haa kəya joŋre pisi.

² Bədoona ana ta, hulum bə tiinə kaŋ jəə la haa hulum bə minti ɗe nuutuŋ pisi, paapa kir minti hulum məlu kel suru ba. Wə jəə la də həlgə guudu ɗaaməna faɗi, wə a ji hulum bə raawte kel ba. Wə jəə la hulum bə minti ɗiki du pisi daana kaŋ əŋku la gəm. Wə jəə la bə tope kə irku də kaa girdu pisi, daana wə jəə la hulum bə nakə-neke bə hate kaa pisi.

³ Wə a ji hulum bə markete ba, wə a ji hulum bə humti dər kaa bə gəm. Səma wə jəə la hulum sããya daana bə arsete ku kel. Wə a ji hulum bə ayə-aye ɗiki du a soloy bə gəm.

⁴ Wə jəə la hulum bə minti bə nakə-neke bə ame cəərə gə girduŋ pisi, wə hatə kərmuyuŋ la bə daw ku daana bə humə kosoŋa cuuru pisi.

⁵ Gud maa mo, jəəne minti hulum paapa bə nakə-neke bə ame cəərə gə girduŋ baŋ, wə ji gud kaa kə Tapiŋ naanaanə ji mo?

⁶ Wə a ji hulum bə doo-de kimirwi gud Yeesu Kristu ba. Wə jəəne hulum bə doo-de kimirwiŋ, kumundu ba wə isi bə he cəərə kusru apəya, kəya kəəti kə Pepeŋ bə daw damdi wə doŋ Nərtitiŋ anaŋ gəm.

⁷ Wə jəə la haa hulum bə minti kaa gə minti paapa gə doo-de gud Pepeŋa baŋ əŋku la pisi gəm. Jəəne paapaŋ, yə kultu kese daana wə de wəra a vew kə Nərtitiŋa.

Kaa kə joŋreŋ giidə Tapiŋaŋ

⁸ Kaa kə joŋreŋ giidə Tapiŋaŋ ha'aŋ gəm, yə jəə la kaa gə minti kaŋ humi kosoŋ ciiri, kaa gə minti kuy paapa ɓas-ɓasi ba. Yə a ji kaa kə ayə-aye kusri gud kumuya ba, kaa kə lemlem də soloy bə gəm.

⁹ Yə gargə la gud gəəzi də kel gə minti Pepeŋ vəɗnəy di wəra cəərə deŋa də ɗiki di bay baymele ada.

¹⁰ Ajew də minti aŋ humi kaa teŋ ha'aŋ, aŋ guluy kuɗi la wəra kəm gəm. Adoro, jəəne minti kel paapa siri baŋ, aŋ mələy la a joŋreŋa giidə Tapiŋa ta.

¹¹ Bədoona gəm, kəram jəə la kəram gə minti kaŋ humi kosoŋ ciiri. Yə a ji kəram gə juti kel ba. Yə jəə la kəram gə minti ame kusri daana wəra ɗeketi a kela keɗe.

¹² Hulum bə joŋreŋ giidə Tapiŋaŋ jəə la də həlgə guudu ɗaaməna faɗi. Wə jəə la hulum bə minti ame kərmuyuŋ pisi, də kaa gə giidə kuli nuutuŋ keɗe'i.

¹³ Kaa teŋ gə minti jəŋ joŋre neeteŋ ne wəra a kuɗuŋaŋ, kumsi kaa kə Pepeŋ əŋkəy yaŋ ablaw, gud teŋa yə gə nakə-neke bə waate sam de bə gud Yeesu Kristuŋ də abay.

Kel kəmtəŋ gə minti Pepeŋ vəɗnəy wəraŋ

¹⁴ Bədoona ana, ten yaŋ bə ɗiki minti ten ɗe yaŋ səram na ga'i. Səma, ten jeerem kefter toŋ kaynaŋ

¹⁵ minti, jəəne nuutu minti ten tuukuŋ səram na ga'i baŋ, kefter toŋ gam dərəm yaŋ minti ɗe kə kaa kə Pepeŋ jəə la giidə Tapiŋa naanaanə mo. Kaa teŋ haa kaa gə tapə-tepe ciiri kə Pep bə dədərgəŋ. Yə haa səɓaki də de kel kə gəəziŋ.

¹⁶ Gəəzi kel kəmtəŋ té gə minti Pepeŋ vəɗnəy wəraŋ, haa kel gə minti ge dər áŋ a ɗe bə gud Pepeŋaŋ. Hulum neke bə malte ku cəərə kel teŋa kəya ba. Yə haa minti bəŋa: Kristu vəɗaŋ kusru wəra hulum kisirki. Tiiru Cetcetaŋ gəənu guudu wəra minti wə ɗeker. *Kaa kə digi kə Pepeŋ əsnu wəra. Gidiirə kaŋ wəətunu kel nuutuŋ wəra. Giidə koŋa wəra keɗe, kaŋ doŋ gud kel nuutuŋa. Pepeŋ həənu warna apəy na a ko bə məyan na.