I TIMOTE 2 - JAA TƏMARWAŊ

Hate bə cəərə tooseŋ

¹ Bədoona ana, karman bə ajew bə minti ten bele waate kaa duuruŋ haa minti yə toosə Pepeŋ la cəərə kaŋa neŋneŋ keɗe, yə mantə la kəəsu, yə jəw kamkam la, daana jəw suuse la ciiri keɗe'i.

² Yə toosə la cəərə kəkamnaŋa də kaa kaayaŋ gə abay-abay keɗe gəm, doŋ kir minti áŋ jəə la zugi kəkaaɓa bay kel. Áŋ humə kosoŋ la cəərə Pepeŋa a kuɗuŋa, daana ɗe náŋ jəə la wəra ɗe pisiŋ tiinu gəm.

³ Bədoona ana, tooseŋ haa karman bə minti giidə Pepeŋ bəluŋ, bə minti de dər Pepeŋ Hulum bə seere áŋ.

⁴ Kel teŋ daw duru gud bə minti wə golde haa minti kaŋ neŋneŋ keɗe seerə la wəra, daana minti yə kolə la wəra bə ase gəəziŋa.

⁵ Gud maa mo, Pepeŋ haa wə ɗaaməna faɗi, hulum bə minti aduubə də kaŋa də Pepeŋ, wə ɗaaməna faɗi gəm, Kristu Yeesu haa hulum toŋ.

⁶ Wə ayaŋ kusru wəra bə miɗi kaŋ wəra keɗe. Wə jəŋ bədoona ha'aŋ bə ge dər kaŋ wəra a ko duŋa anə ɓeti minti Pepeŋ bele haa minti kaŋ keɗe seerə la wəra.

⁷ Gud teŋa ta, Pepeŋ ŋamnan, wə gaanan minti ten ɗee la a sewle kaa gə minti teŋ paapa kaanə Ziwifi baŋ. Ten bə *gaa-ge minti ten ɗee la a hətəy kel cəərə deŋa daana gəəziŋ. Ten waate haa gəəziŋ, ten ŋete paapa kel ba.

⁸ Bədoona ana, karman bə minti giidən bəluŋ haa minti, a ko bə tooseŋa wəra giidə koŋa keɗe ha'aŋ, kaa kaŋkar toosə la. A kəkəy bə tooseŋaŋ, yə humtə kəəsi la apəya bay kel kə zeɓə-zeɓe ku tərməyi, bay waŋ daana bay awəy gəm.

⁹ Kə kəram ha'aŋ, ten bele minti yə tarə dəməəmə neeteŋ la haa də kəkəy dəŋ, paapa kirka ge hulum dər kela ba, yə a kole kel di petpeti ba. Yə a lepe ciiri tet-tete minti té jəə la wəra kəkər zugi ba. Yə a tere kar gə minti gusi awəy ba: anə maykeleelew maaway, də ataara daana dəməəmə.

¹⁰ Səma kə kəram teŋ ha'aŋ ɗaw, karman bə minti yə əŋkəy guudu pisiŋ haa joŋre bə minti yə bə jəwa pisiŋ. Haa kəya karman pisi bə minti kir ji kə kəram gə minti waate minti té humi kosoŋ cəərə Pepeŋaŋ.

¹¹ Bə minti həlgəŋ bəŋ ne a ko bə hateŋaŋ, a əsə la ba'-ba'i, bay waate kel, a a teke cəərə kusrə apəya ba.

¹² Ten ayaŋ kəkəy a həlgə minti a hatə kaa kaŋkar la ba, a a ji abay ciiri bə gəm; a əsə la ba'-ba'i.

¹³ Gud minti bəŋa, Pepeŋ jəŋ Adam kəm ajew, adoro wə haraŋ kəm bə ji Eva.

¹⁴ Bədoona pa, Adam taakaŋ kusru bə siiti wəra ba, səma yaakaŋ kusrə wəra bə siiti haa həlgəŋ, a doŋ ku Pepeŋ ba.

¹⁵ Səma həlgəŋ gud bə minti a we kəmar koncoŋ, a fele seere yaŋ. De teŋ keɗe, a jəə la də doo-de, bə bele kaŋa, pasyaki tiinə Pepeŋa, daana a a feke kaa dər kela ba.